Juão 1
1
Nyenga upakawaa
1Ara uyupirungawa rundewara kua nyenga upakawaa, Deus irumuwara kua nyenga, Deus kua nyenga upakawaa.
2Deus irumuwara ae uyupirungawa rame.
3Aete umunya panye maa, tiyamaa maa tiwa umunya.
4Sikuesawa uiku irumu, asui kua sikuesawa aete apigawaita turi.
5Kua turi umuturi pitunawasu upe, asui kua pitunawasuwaa tiupuderi umuweu kua turi.
6Ape yepe apigawa Deus umunduwaa sera Juão.
7Uri kuaye umbeuwaa yawe umbeu arama sese kua turi asui sesewara aintauri panye aintauruyari arama inyenga.
8Timaa ae kua turi anyunte uri umbeu arama sese kua turi.
9Kua turi supiwa uriwaa kua mundu kiti umuturi aintapia kiti panye apigawaita.
10Uiku kua mundu upe, kua mundu umunyawaa, maa kuaita mundu puraita timaa aintaukunyeseri ae.
11Uri aintapiri kuaita iyaraita, maa kuaita iyaraita timaa aintausuanti ae.
12Maa panye kuaita usuantiwaita ae kuaita uxariwaita aintapia sera rese uxari ainta supe arama ukuawasawa Deus rairaita arama ainta.
13Tiaintaunaseri tuwi irumu, timaa yuiri yanepira uputari resewara, timaa yuiri apigawaita uputari resewara, maa kuaye Deus uputariwaa yawe.
14Asui kua nyenga upakawaa uyereu apigawa arama ae asui uiku yanepiterupi, teresemu ae purangawaa irumu supiwa irumu yuiri, asui yamaa igluria yanepaya Deus umeewaa taira yepenyuwaa supe arama.
Juão umbeu Jesus resewara
15Asui Juão umbeu sesewara unyee:
—Aete kua hambeuwaa sese uriwaa serakakuera maa serundewara piri ae nyãse uiku serundere.
16Teresemu ae purangawaa irumu asui uxariana yande arama isuiwara, uxari yande arama grasa turusu piri.
17Nyãse Muize uxariana yande arama Deus nyenga kuximawara, asui Jesus Kristu uxari grasa inyenga supiwa yuiri.
18Tire awa umaa Deus, anyunte taira yepenyu uikuwaa yanepaya Deus ruaki uxari yakuawa sese.
Juão umbeu mukuĩsawa Jesus rese
19Aete Juão umbeuwaa ainta supe kuaita judewita aintaumundu irumu ipiri Jeruzalẽ sui saserdutita levitaita yuiri aintaupurandu ae:
—Awataa inde?
20Asui umbeu ainta supe tiuyumimi aintasui, umbeu:
—Timaa Kristu ixe.
21Asui aintaupurandu ae:
—Awataa inde? Maitaa indete será Elia? Asui unyee ainta supe:
—Umbaa. Maitaa indete kua utitikawaa? Asui usuaxara ainta:
—Umbaa.
22Asui aintaunyee ixupe:
—Rembeu yasendu awataa inde yambeu arama ainta supe kuaita umunduwaita yande. Maitaa rembeu neresewara?
23Asui unyee ainta supe:
—Ixete kua yepe nyenga usasemuwaa kampu upe, pemusatambika yaneruixawa rapee, maye umbeuwaa yawe kua utitikawaa sera Izaia.
24Kuaita aintaumunduwaita ipiri farizewita suiwaraita ainta.
25Asui aintaupurandu ae:
—Marantaa rebatizari miraita tirame Kristu inde u tirame yuiri Elia inde u tirame yuiri inde kua utitikawaa?
26Asui Juão unyee ainta supe:
—Habatizari ii irumu, maa aikue yepe uikuwaa pepiterupi tiwa pekunyeseri.
27Aete kua uriwaa serakakuera timaa purangawaa ixe hapuderi arama hayawika hayuka ipi sui isapatu.
28Yawewaa usasawa Betania upe parana Jurdão ruaxara Juão ubatizariwaa ape.
Deus kurderu
29Asui wirande kiti Juão umaa Jesus uri ipiri asui unyee:
—Pemaa Deus kurderu, aete umburiwaa aintasui aintapekadu kuaita mundu puraita.
30Aete kua hambeuwaa sese, uri serakakuera yepe apigawa serundewara piri ae nyãse uiku serundere.
31Timaa hakunyeseri ae serupi, maa sesewara hayuiri habatizari ii irumu uyukuawa arama Israelitaita supe.
Juão ubatizari Jesus
32Asui Juão umbeu:
—Hamaate Espiritu uwiye iwaka sui sese maye pumba yawe asui uwapika sese.
33Timaa hakunyeseri ae, maa aete kua umunduwaa ixe habatizari arama ii irumu umbeu ixe arama, awa rese remaa Espiritu uwiye aete kuri ubatizari arama Espiritu Santu irumu.
34Asui supiwa hamaa ae, asui hambeute sesewara Deus raira ae.
Mukuĩ pesua usu Jesus rakakuera
35Asui yepe ara rire Juão uiku yuiri aintairumu mukuĩ umbuewaita.
36Asui umaa Jesus usasawa asui unyee ainta supe:
—Pemaa Deus kurderu.
37Asui kuaita mukuĩ umbuewaita aintausendu resewara umbeuwaa ape aintausu Jesus rakakuera.
38Asui Jesus uyereu umaa aintauri sakakuera asui unyee ainta supe:
—Maataa pesikari? Ape aintaunyee ixupe:
—Seruixawa, mametaa reiku?
39Asui usuaxara ainta:
—Peyuiriana pemaa. Asui aintausu aintaumaa Jesus uikuwaa akiti, asui aintauiku irumu nyã ara nyãse karukana ainta.
40Andre itainasawa kua Simão Pedru aete yepe aintasuiwara kuaita mukuĩwaita usenduwaita Juão umbeuwaa asui aintausu Jesus rakakuera.
41Asui uyupiru uwasemu imu Simão asui umbeu ixupe:
—Yawasemu kua Mesia, yawesawa Kristu ae.
42Asui urasu ae Jesus ipiri. Asui Jesus umaa ae unyee ixupe:
—Indete Simão Juão raira, kuiri kuri haseruka inde Sefa, yawesawa Pedru.
Filipe Natanael yuiri
43Asui yepe ara rire Jesus usu putari Galileya kiti. Asui uwasemu Filipe asui unyee ixupe:
—Reyuiriana serakakuera.
44Betisaida suiwara kua Filipe aintarendawa kuaita Andre Pedru yuiri.
45Asui Filipe uwasemu Natanael asui unyee ixupe:
—Yawasemu kua Muize umpinimawaa sese nyenga kuximawara rupi kua aintaumbeuwaa sese yuiri kuaita utitikawaita, aete Jesus Juze raira Nazare suiwara.
46Asui Natanael upurandu ae, unyee:
—Maitaa purangawaa upuderi usemu Nazare sui? Asui Filipe unyee ixupe:
—Reyuiri remaa.
47Asui Jesus umaa Natanael uri ipiri asui umbeu sese:
—Aete yepe Israewara tiwa uganani.
48Asui Natanael unyee ixupe:
—Maa suitaa rekunyeseri ixe? Asui Jesus unyee:
—Senundere Filipe usenui inde hamaa rewapika mirá figera wirupi.
49Asui Natanael usuaxara ae:
—Indete rembuewaa, indete Deus raira, indete Israelitaita ruixawa.
50Asui Jesus unyee ixupe:
—Maitaa reruyari hambeu resewara inde arama hamaa inde mirá figera wirupi? Remaa kuri puranga piriwaa isui.
51Asui umbeu piri ixupe:
—Supiwa hambeu inde arama remaa kuri iwaka uyupirari asui remaa kuri kuaita Deus anjuita aintauyupiri aintauwiye yuiri sese kua unaseriwaa umaa kua ara.
Currently Selected:
Juão 1: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
