Atu 4
4
Aintaumprezu Pedru Juão yuiri
1Asui aintaupurungitawaa upe aintauiku ainta supe kuaita miraita aintauri aintapiri kuaita saserdutita asui kua templu kapitão yuiri asui kuaita sadusewita yuiri.
2Aintaipiaiwa nyãse aintaumbue kuaita miraita Jesus resewara yapaka kuri manusawa sui.
3Asui aintaupisika ainta asui aintaumprezu ainta ate wirande kiti nyãse pitunana ainta.
4Maa siya kuaita usenduwaita kua nyenga aintauxari aintapia sese, asui kuajintu sinku mili aintasiyasawa kuaita apigawaita uruyariwaita.
Serakuenawaita aintaupurandu ainta
5Asui wirande kiti aintauyumuatiri Jeruzalẽ kiti kuaita serakuenawaita kuaita tuyuweita yuiri kuaita umpinimawaita yuiri
6Aintairumute kua saserdutita ruixawa serawaa Anasi, asui Kaifa, Juão yuiri, Alexandre yuiri kuaita saserdutita ruixawa sumuaraita.
7Asui aintauxari aintaupuamu aintapiterupi, asui aintaupurandu ainta:
—Awa kirimbawasawa irumutaa awa rera resetaa pemunya kua pemunyawaa?
8Asui teresemu Pedru Espiritu Santu irumu umbeu ainta supe:
—Penye umunduwaita kuaita miraita, penye yuiri penye tuyuweita,
9Pepurandu rame yande kuiri sese kua purangawaa yamunyawaa ixupe kua yepe alejadu mayetaa purangana ae kuiri,
10Haxari pekuawa muiri penye panye kuaita israelitaita yuiri, purangana ipira upe kua apigawa pemaawaa muiri penye sera rese kua Jesus Kristu Nazare suiwara, kua penupawa uyari kurusa rese kua Deus usupiriwaa manusawa sui, sera rese purangana ae kua pemaawaa.
11Kua Jesus aete kua ita pemburiwaa pesui penye pemunyawaita uka, asui kuiri aintaumunya uka santawaa sese.
12Tiyamaa amu umukaturuwaa isui nyãse tiyamaa amu rera ike iwaka wirupi aintapiterupi kuaita miraita umukaturu aramawaa yande.
13Asui aintaumaa irumu tiaintausikie Pedru Juão yuiri aintaukuawa tiaintauyumbue eskula upe yepewasute ainta aintairumu kuaita amu miraita, asui aintaakayemu aintaumaa nyãse aintaukuawa aintauwata kuera Jesus irumu.
14Asui aintaumaa irumu kua apigawa aintaumukaturuwaa upuamu aintaruaki timaa nungara aintaupuderi aintausuaxara.
15Asui aintaumundu aintausu aintasui kuaita serakuenawaita, asui aintaupurungita aintapawa.
16Aintauyumbeu aintapawa:
—Mayetaa maa yamunya ainta supe kuaita apigawaita? Nyãse panye kuaita Jeruzalẽ upewaita aintaukuawa aintaumunya yepe milagri asui timaa yapuderi yayumimi sese.
17Purangate yamutawa ainta tiarama awa supe aintaumbeu sese kua sera yawaite sesewara uyumusaĩ turusu piri aintapiterupi kuaita miraita.
18Asui aintausenui ainta, asui aintaumundu ainta tiarama aintaumbeu tiarama yuiri aintaumbue Jesus rera rese.
19Maa Pedru Juão yuiri aintausuaxara ainta, aintaunyee:
—Penyete pembeu yasendu, maitaa puranga Deus umaa yaruyari rame penyenga inyenga sui?
20Nyãse timaa yapuderi yapitu yapurungita sese kua yamaawaa yasenduwaa yuiri.
21Asui aintaumutawa ainta mukuĩsawa asui aintauxari aintausu nyãse tiaintaukuawa maye aintauxari arama aintaupurara aintaresewara kuaita miraita nyãse muiri ainta aintaumee purangawaa Deus supe sesewara kua usasawawaa.
22Asui kua apigawa aintaumunyawaa sese kua milagri urikuana kuarenta akayu.
Uruyariwaita aintaupurandu Deus
23Asui aintauyurawa rire ainta aintausu aintapiri kuaita aintaimuita asui aintaumbeu ainta supe kua aintaumbeuwaa ainta supe kuaita saserdutita ruixawaita kuaita tuyuweita yuiri.
24Asui aintausendu irumu ae yepewasu aintaumee purangawaa Deus supe, aintaumbeu:
—Inde Yaneruixawa Deus, inde remunyawaa iwaka iwi yuiri parana yuiri panye kuaita uikuwaita ipupe yuiri.
25Indete rembeu Espiritu Santu irumu iyuru sui kua yaneramunya Davi kua inde aramawaa:
—Marantaa aintaipiaiwa kuaita miraita? Marantaa aintaumanduari tenyuntu kuaita miraita?
26Kuaita serakuenawaita kua mundu upe aintaupuamu suaxara, kuaita umunduwaita aintauyumuatiri yaneDeus ruaxara suaxara yuiri kua uparawakawaa.
27Nyãse supiwa aintauyumuatiri kua tetama upe suaxara kua neraira Jesus purangawaa, panye Erudi panye Punsiu Pilatu yuiri aintairumute kuaita tiwaita judeu kuaita israelitaita yuiri.
28Aintaumunya arama muiri kua neipu uxariwaa panye kua reputariwaa rexari aintaumunya.
29Kuiri inde yaneruixawa remaa maye aintauputari aintaumutawa yande, asui rexari tiarama aintausikie kuaita inde aramawaita aintaumbeu arama nenyenga.
30Resupiri neipu remukaturu arama mãsiweraita, remunya arama yuiri tirewaita yamaa milagrita yuiri sera rese kua Jesus neraira purangawaa.
31Asui aintaupurandu rire Deus irumu uriri kua uka aintauyumuatiriwaa ape, asui teresemu ainta Espiritu Santu irumu asui tiaintausikie aintaumbeu Deus nyenga.
Uruyariwaita aintauiku yepewasu
32Asui yepewasu aintaumanduariwaa kuaita siyawaita uruyariwaita, asui tiawa aintapiterupi umbeu iyarapawate panye imaa, maa yepewasu aintayara pawate panye.
33Asui kirimbawa kuaita apustuluita aintaumbeu yaneruixawa Jesus usemu manusawa sui, asui turusu piri Deus grasa uiku aintarese panye.
34Nyãse nẽ yepe aintapiterupi uwatari ixupe imaa, nyãse muiri kuaita urikuwaita aintakupixawa aintaruka yuiri aintauvenderi ainta, asui aintaurasu sikuyara.
35Asui aintauxari ae apustuluita ipi ruaki, asui aintaupartiri ainta supe kuaye uwatariwaa yawe ainta supe aintayaweyawe.
Barnabe umee imaa
36Asui Juze apustuluita aintaumuserukawaa Barnabe, yawesawa sera suuriwaa raira, levita ae, uriwaa Xipri sui,
37Uvenderi ikupixawa asui urasu sikuyara uxari arama ae apustuluita ipi ruaki.
Currently Selected:
Atu 4: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
