2 Timuteu 4
4
Yambeu arama Deus nyenga satambika
1Hambeu inde arama kirimbawa Deus usendu, usendu yuiri kua Kristu Jesus, kua umbeuwaa kuri aintaresewara kuaita upakawaita, umanuwaita yuiri, uri resewara, asui yaneruixawa Deus umunduwaa upe resewara yuiri:
2—Rembue kirimbawa inyenga yawewarawate maa kiti rewata, remusatambika ainta, rembeu ainta supe aintapekadu, rembue ainta supe nyenga supiwa tiwa nepiaiwa irumu.
3Nyãse amu ara kuri timaa aintauputari kua nyenga supiwa, maa aintaumuatiri ainta supe umbuewaita kuaye aintauputarisawa puxuwerawa uputari yawe, maye aintausaãwaa yawe yusara aintaapisa kuara upe.
4Tikuri aintauputari aintausendu kua nyenga supiwa, maa aintauputari kuri aintausendu kua nyenga tiwa supi.
5Asui inde reiku santa yawewarawate, reaguentari repurara rame, resenui mira irumu kua nyenga purangawaa, remunya puranga kua nemuraki.
Ukuawa usikana sangawa
6Maa ixe serangawa usikana aintauyuká arama ixe, serangawa usikana hasu arama.
7Hambauwana hamunya kua kera purangawaa, hambauwana hayana, hamukaturuana kua uruyarisawa.
8Kuiri umukaturu serunde kua kurua purangawaa, uxariwaa kuri ixe arama kua yaneruixawa umbeuwaa yanerese satambika nyã ara upe kuri, maa timaa ixe aramapawantu, maa ainta supe yuiri panye kuaita ugustariwaita uri kua mundu kiti mukuĩsawa.
Siya uxari Paulu
9Resikari reyuiri sepiri kutara.
10Nyãse Dema uxari ixe ugustari resewara kua mundu, asui Tesalunika kiti; asui Kresenti Galasia kiti, asui Titu Dalmasia kiti.
11Anyunte Luka serumuarawaa. Resu reyuka Marku, asui reruri neirumu ae, nyãse turusu uajudari ixe semuraki rese.
12Maa kua Tikiku hamundu ae Efezu kiti.
13Asui reyuiri rame reruri ixe arama sepupekawa haxariwaa Truadi upe, Karpu ruka upe, reruri yuiri selivruita, maa panye sui haputari reruri ixe arama kuaita suu pirera aintaumpinimawaa sese.
14Kua Alexandre upurakiwaa kubri, puxuwera umunya ixe arama; yaneruixawa kuri upagari ixupe sikuyara kua umunyawaa.
15Remaa nesui ae nyãse kirimbawa umuruanyana kua yambuewaa.
16Asui hayupiru rame hambeu seresewara tiawa uajudari ixe, maa aintauxari ixe panye. Haputari Deus tiumburi kunta sese kua aintaumunyawaa puxi.
17Maa yaneruixawa uiku seruaki, asui uxari ixe arama kirimbawasawa hambeu arama inyenga panye ainta supe kuaita tiwaita judeu. Asui uyurawana ixe iyuru sui kua leão.
18Yaneruixawa uyurawa kuri ixe, panye puxuwerawa sui; asui umukaturu ixe urasu kuri ixe yaneruixawa Deus umunduwaa upe, iwaka kiti. Yamee ixupe arama purangawaa yawewarawate, amem.
Kuekatu
19Kuekatu Priska supe, Akila supe yuiri; kuekatu yuiri Uneziferu ruka puraita supe.
20Erastu uikure Kurintu upe. Haxariana Trufimu Miletu upe, imãsire ae.
21Reyuiri sepiri paranawasu rundere. Eubulo umundu kuekatu inde arama, yawete yuiri Prodenti, Linu yuiri, Klaudia yuiri, panye kuaita yanemuita yuiri.
22Haputari yaneruixawa uiku nepia irumu. Haputari ipurangasawa uiku peirumu.
Currently Selected:
2 Timuteu 4: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
