2 Tesalunikawaraita 3
3
Uputari aintaupurandu sese
1Asui anyu aramawaa yambeu penye arama yanemuita, pepurandu yanerese yambeu arama yaneruixawa nyenga, aintaumee arama kuri purangawaa sese kuaye pemunyawaa yawe.
2Uyurawa arama yande aintasui kuaita apigawaita tiwaita ukuawa, puxuwerawaita, nyãse timaa panye apigawaita uruyari ae.
3Maa puranga yaneruixawa umunya penye arama, uxari kuri peiku santa; umukaturu kuri penye isui kua Yurupari.
4Asui yande yuiri yaneruixawa uxari yakuawa perese pemunya kuaye yamunduwaa yawe pemunya, asui yakuawate pemunya ae yawewarawate.
5Kuiri yaputari yaneruixawa urasu pepia Deus gustarisawa rese, sese yuiri kua peiku aramawaa sese yawewarawate Kristu rese.
Yamunya puranga yawewarawate
6Kuiri penye semuita, yamundu penye yaneruixawa Jesus Kristu rera rese, petirika isui kua uikuwaa retentuwaa kua tiwa umunya kuaye yambeuwaa yawe penye arama.
7Nyãse pekuawate pemunya kuaye yamunyawaa yawe, nyãse nẽ yepe viaji yaiku retentu pepiterupi.
8Nyãse nẽ yepe viaji yambau peirumu yawentu, maa yapurara yapuraki muiri ara, muiri pituna yuiri, tiarama iwasu yande penye arama.
9Yawe yamunya tisa maa tiresewara yapuderi, maa yaputari yamunya kuaye pemaa arama perangawa.
10Nyãse yaiku ramere peirumu, yambeu penye arama tiarama pexari umbau peirumu kua tiwa uputari upuraki.
11Nyãse yawe yasendu peresewara, yepeyepe pesuiwara aintauiku retentu, timaa aintaupuraki, aintauwata aintauwike retentu aintaumbeu amu rese.
12Asui kuaita yawewaita yambeu ainta supe, yamundu ainta yaneruixawa Jesus Kristu rese, aintaupuraki arama, aintaukiririntu, aintauriku arama kuri aintayara arama.
13Asui penye yanemuita, tepekuere pemunya arama puranga.
14Tirame yepe uputari uruyari kua nyenga yampinimawaa kua papera, pemuyukuawa ae, pemaantu ixupe uyumutiĩ arama.
15Maa tepemaa ixupe kuaye peruanyana yawe, maa pembeu ixupe kuaye pemu yawe.
16Kuiri yaputari kua timaaresesawa ruixawa uxari arama timaarese penye yawewarawate mairamentu. Yaneruixawa uiku kuri peirumu panye.
17Ixe Paulu hampinima penye arama kua kuekatu seipu irumu. Yawe hamusangawa panye hampinimawaita, yawe hampinima seipu irumu.
18Kuiri yaneruixawa Jesus Kristu purangasawa uiku peirumu panye penye.
Currently Selected:
2 Tesalunikawaraita 3: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
