1 Kurintuwaraita 3
3
Aintaugustarire aintapuxuwerasawa
1Semuita, tihapuderi hambeu penye arama kuaye yambeuwaa yawe ainta supe kuaita usenduwaita kirimbawa kua Espiritu, maa hambeu penye arama kuaye yambeuwaa yawe ainta supe kuaita umunyawaitare kuaye aintapira uputariwaa yawe, kuaye tainaita yawe Kristu rese.
2Kuxima hamee peu arama kambi yukise, timaa hamee pembau sukuera, nyãse tire pepuderi, kuiri yuiri hamanduari tire pepuderi nyãse pemunyare kuaye pepira uputariwaa yawe.
3Nyãse pemuasire, peyuyakaware, ape yakuawate pemunya kuaye pepira uputariwaa yawe aintayawe kuaita apigawaita tiwaita uruyari.
4Yepe umbeu: "Paulu yara ixe," asui amu umbeu: "Apulu yara ixe." Maitaa tiserá pemunya kuaye pepira uputariwaa yawe?
5Awataa kua Apulu? Awataa kua Paulu? Anyunte aintate umbuewaita penye pexari arama pepia Deus rese kuaye umunduwaa yawe yambue.
6Hayupiru hayutima Deus nyenga, asui Apulu uyusena ii sese, maa kua Deus uxari uyukiriari.
7Timaa arama kua uyutimasara, tiyuiri kua uyusenasara, anyunte purangawaa kua Deus uxariwaa uyukiriari.
8Yepewasute kua uyutimasara irumu kua uyusenasara, asui Deus kuri upagari ainta supe sikuyara kua aintaupurakiwaa.
9Upurakiwaita yande Deus irumu. Penyete Deus kupixawa, penyete Deus ruka.
Yamaa yanesui sese kua yamunya arama
10Hayupiru haxari kua ingreja uikuwaa rendawa kuaye upurakiwaa ukuawawaa yawe, kuaye Deus uxari asui amuita upuraki serakakuera. Kuiri panye kuaita upurakiwaita aintaurikute aintaumaa aintasui yawaite puxuwera aintaupuraki sese.
11Nyãse tiawa upuderi uyupiru amu ingreja uikuwaa rendawa isui kua Deus uxariwaa kuxima, aete kua Kristu kua ingreja uikuwaa rendawa.
12Kuiri yepeyepe upuraki sese kua ingreja uikuwaa rendawa uru irumu, amu prata irumu, ita purangawaa irumu, mirá irumu, kapĩ irumu, kaa irumu yuiri.
13Yakuawa kuri maye aintaumunya kuaita miraita muiri ainta, uri rame Jesus yamaa kuri maye aintaumunya aintauiku ramere kua mundu upe, tata irumu yamaa kuri ae, asui tata uxari kuri yakuawa maye aintaumunyawaa muiri ainta.
14Deus kuri upagari kua apigawa tirame ukaiwaa kua umunyawaa Kristu rese.
15Ukaiwaa rame kua umunyawaa Kristu rese tikuri Deus upagari kua apigawa, maa umukaturu kuri ae kuaye yayuka yawe mira tata sui.
16Maitaa tiserá pekuawa Deus ruka penye? Maitaa tiserá pekuawa Deus Espiritu uiku pepia upe?
17Awa rame umuaiwa Deus ruka, Deus kuri uxari ukanyemu nyãse purangawaa kua Deus ruka, penyete kua Deus ruka.
Timaa arama apigawaita ukuawasawa
18Tepeyuganani penyepawa. Kua pesuiwara umanduari ukuawa ae ukuawasawa irumu urikute umburi isui ae ukuawa arama kuri puranga Deus irumu.
19Nyãse tenyuntuwara Deus umaa aintaukuawasawa kuaita mundu puraita, yawe aintaumpinima kuxima: "Uxari aintaupurara aintaukuawasawa resewara."
20Asui aintaumpinima yuiri: "Yaneruixawa ukuawate tenyuntu aintaumanduarisawa kuaita ukuawaita."
21Ape tepexari yepe umbeu purangawaa aintarese kuaita apigawaita. Nyãse peyara panye.
22Paulu, Apulu yuiri, Sefa yuiri, mundu upewaraita yuiri, sikuesawa yuiri, manusawa yuiri, panye kuiriwaraita yuiri, panye uriwaita kuri yuiri peyaraita panye ainta.
23Asui Kristu yaraita penye, asui Deus yara kua Kristu.
Currently Selected:
1 Kurintuwaraita 3: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
