Lucas 13

"Mȩnȩro̧ chjai̧dëri̧ japea̧ pio ju̧i̧ chjiari ano̧ mire jo̧rȩtadërä judi, Ütë tjamo̧ pio judi bape chjaopadidibe" yo̧rëremȩde Jechu judi

1Ado pio jiro doro, Jechu pio ju̧i̧ ta̧rë chaji̧ri̧ pio judiro̧ orë ta̧rë tänȩrëreji̧ri̧diro̧jo̧ȩ ja̧bo tänȩa̧ oa cjiareji̧ri̧ pumȩ pio ji̧ri̧ chjiari. Tjamo̧ davä. Pio jiro pumȩrea̧ pio judiro̧, Garirea quȩmȩ chiriri pio judiriji̧ri̧ pio judiro̧, jabechji̧ Jerucharȩräpȩmo̧ järëreji̧ri̧dirȩ Ütë tjamo̧ ja̧ bëräpȩ goe gu̧rori̧ cäë yürüpea̧ oa. Jabo ju̧ri̧pȩ yürüji̧ri̧ pio judiro̧ ja̧bo tänȩa̧ oa cjiarëreji̧ri̧dirȩ guadia pio ji̧ri̧iä, Pirato pio judi jibëa̧ guadia ji̧ri̧ chjadüa̧ oaiä. Aja̧, pio ju̧i̧ chjiari ta̧rë tänȩrëreji̧ri̧diro̧jo̧ȩ Jechu ju̧i̧. 2Ado Jechu judi ja̧bo tänȩa̧ oa cjiaji̧ri̧ pio ji̧ri̧ chjiari ta̧rëa̧ oaiä, ja̧di ta̧rëri̧ yo̧mȩrȩ yo̧a̧dejȩrȩ:

—Aja̧, ja̧bo tänȩa̧ oa cjiarëreji̧ri̧ jirodirȩ. Jabo danȩrȩ, ¿yö̧ta dari̧ jo̧rȩtanȩrȩ ja̧boa̧ji̧ri̧ pio ji̧ri̧ chjiari? 'Aja̧, judiro̧ a̧dë chjäte chjai̧dëri̧ cjo̧ro̧rërea̧ oaiä ja̧bo tänȩa̧ oa cjiarëreji̧ri̧ jirodiro̧da' quëna̧ jo̧rȩtanȩrȩ? ¿Pio jiro pumȩ judiro̧ Garirearäpȩ cjo̧ro̧ji̧ri̧ pio ji̧ri̧iä ji̧dë u̧i̧ chjai̧dëri̧ cjo̧ro̧rërea̧ oaiä ja̧bo tänȩrea̧ yürürëremȩdiji̧ri̧da Ütë tjamo̧ judi' quëna̧ jo̧rȩtanȩrȩ? Jabechji̧ judiro̧ a̧dë chjäte chjai̧dëri̧ cjo̧ro̧dëa̧rä judicjȩ, 'jabechji̧ Ütë tjamo̧ judi ja̧bo tänȩrea̧ yürüdëa̧täremȩdiji̧ri̧da' ¿quëna̧ jo̧rȩtanȩrȩ? Jabechji̧ judiro̧ o ji̧ri̧iä ji̧dë u̧i̧ chjai̧dëri̧ japadëa̧rä judi, ja̧bechji̧ jabë cjo̧ro̧ baä matäreji̧ri̧ jirodiro̧da' quëna̧ jo̧rȩtapai̧ da jironȩrȩ. Jabo ¿yö̧ta dari̧ jo̧rȩtanȩrȩ pio jiro pumȩrea̧ pio ji̧ri̧ chjiari? —iëno̧ë ta̧rëa̧dejȩrȩ—. 'Aja̧, Garirea̧ quȩmȩ chiriräpȩ cjo̧ro̧ji̧ri̧ pio ji̧ri̧iä ji̧dë u̧i̧ chjai̧dëri̧ cjo̧ro̧a̧ oaiä, jabechji̧ ja̧bo tänȩa̧ oa cjiareji̧ri̧diro̧da' ¿quëna̧ jo̧rȩtanȩrȩ? ¿O pio ji̧ri̧iä ji̧dë u̧i̧ chjai̧dëri̧ cjo̧ro̧a̧ pio ju̧i̧iä ja̧boa̧diro̧da' quëna̧ jo̧rȩtanȩrȩ? 3Jabo cjäri̧ madirȩ —yo̧a̧dejȩrȩ Jechu judi—. Jibëa̧ pumȩ pio ji̧ri̧iä ji̧dë u̧i̧ chjai̧dëri̧ cjo̧ro̧dërëreji̧ri̧dirȩ. Jabechji̧ Garirearäpȩ cjo̧ro̧ji̧ri̧ pio judiro̧ cja̧rȩmȩ chjai̧dë chia maeadirȩ Ütë tjamo̧ pio ju̧i̧iä. Ado peaja̧dinȩrȩ mȩnȩro̧. Peaja̧di pio jiro chjai̧dë maea oa chia maeanȩrȩ. Ado pio ju̧i̧iä pio mȩnȩro̧ ano̧ mire jo̧rȩtadërä judi, peaja̧di bucho ana̧ aeno̧a̧ oa cjiapanȩrȩ —yo̧a̧dejȩrȩ—.

4Ado danȩrȩ, peaja̧di ja̧borëreji̧ri̧dirȩ pumȩ judiro̧ Jerucharȩräpȩ ju̧ri̧. Jabechji̧ Chiroe quȩmȩ tja yuroro cjiamȩ bë ana̧ üdë cjätäa̧ ji̧, uë tjamo̧ cjiamȩ bë üdë cjatäa̧ ji̧, pumȩ pio ji̧ri̧ acji cjatärëremȩdejȩrȩ. Aja̧, 18 pumȩrea̧ ja̧borëreji̧ri̧dirȩ. ¿Ado danȩrȩ, yö̧ta dari̧ jo̧rȩtatäreji̧ri̧rea̧rȩ pio ji̧ri̧ chjiari? ¿Jerucharȩräpȩ cjo̧ro̧ji̧ri̧ pio ji̧ri̧iä ji̧dë u̧i̧ chjai̧dëri̧ cjo̧ro̧rëreji̧ri̧dirȩ? Ado judiro̧ o ji̧ri̧iä ji̧dë u̧i̧ chjai̧dëri̧ cjo̧ro̧a̧ oaiä 'ja̧boa̧diro̧da' ¿quëna̧pea̧? 5Jabo cjäri̧ madirȩ ca̧ pumȩ. O ji̧ri̧iä ji̧dë u̧i̧ chjai̧dëri̧ cjo̧ro̧dërëreji̧ri̧dirȩ. Jabechji̧ pumȩ judiro̧ ütëborë cja̧rȩmȩ chjai̧dë maea oa chia maeadirȩ Ütë tjamo̧ pio ju̧i̧iä. Ado pio mȩnȩro̧ peaja̧di ano̧ mire jo̧rȩtadërä judi, peaja̧di bucho ana̧ aeno̧a̧ oa cjiapanȩrȩ —yo̧mȩrȩ ni̧bä chjaorëremȩdejȩrȩ Jechu judi.

Igo jurarea̧ chiadëmȩ to pio ju̧i̧ chjiari na̧rȩrea̧ ma̧ȩ yürüdejȩrȩ Jechu judi

6Ja̧dëa ji̧ Jechu judi na̧rȩrea̧ ma̧ȩra̧ ni̧bä chjaorëremȩdejȩrȩ:

—Tjado ana̧mȩ pio judi igo cho oa ponȩrëremȩde jibëa̧ tjadoro —yo̧a̧dejȩrȩ—. Ado ütëpea̧rä, babui̧ra̧ goë goë daediärëremȩdejȩ pio ju̧i̧ irä ütarë dapea̧ oa. 'Aja̧, jurarea̧ chiapamȩ jirodida' quëna̧mȩrȩ jädiärëremȩdejȩ. Jabo cjäri̧ made, judi jäa̧mi̧ nö̧ta, pjö̧da maea oa darëremȩdejȩ. Ji̧dë ma ma̧diä cjia tänȩa̧dejȩ. 7Ja̧dëa ji̧ tjarari̧ ui chjätä ëte, yo̧a̧dejȩ jibëa̧ mu̧i̧tjoi̧ oa, jibëa̧ tjado oa jidamȩ pio ju̧i̧: "Danȩ, tuti dejo̧ȩ to oa. Jurarea̧ yürüdë madique. Jabechji̧ igo jurarea̧ cja̧rȩmȩ oa yürüdë madique. Jabechji̧ dejo̧ȩ. Ado cja̧rȩmo̧ to oa ano̧ mire cji̧däpea̧de pio jiro torë cjiarërea̧räpȩ. Jabechji̧ cüdë ado cja̧rȩmo̧ to pio ju̧i̧iä chjadëri̧ juratärea̧ ji̧, jurarea̧ goae oa ado cja̧rȩmo̧ to pio ju̧i̧iä täatärea̧ ji̧, cjäri̧ madique, pio yodë to üdë badëri̧ cjiade" yo̧a̧dejȩ. 8Jabo tjado jidamȩ judi pio ju̧i̧ ta̧rëa̧ oaiä, dëbë yo̧a̧dejȩ: "Danȩ ano̧mȩ, jabë jëreeadëjo̧ȩ. Jabë cja̧rȩmȩ ui codë oa chjätä tänȩjo̧ȩ pio jiro to oa. Ado pio cüdë chjadëri̧ jidapareconȩ. Jabechji̧ to yuroti̧ oa chjadëri̧ cabëpa ëte, tüdüpareconȩ. Ado ja̧dëa ji̧ dabu oa ara̧ mirepareconȩ. Jabechji̧ jurarea̧ oa chjadëri̧ yürürea̧mi̧ dari̧ jidapareconȩ chjadëri̧. 9Ado ja̧dëa ji̧ cja̧rȩmȩ ui chjätä ëte jurarea̧ oa chiamȩpea̧rä judi, chjadë tjamo̧täremȩde. Jabo danȩ, cja̧rȩmȩ ui chjätä ëte chiadë marä judi, jabechji̧ tuti deparemo̧nȩ" yo̧mȩrȩ yo̧a̧dejȩ bë ano̧mȩ pio ju̧i̧ tjado jidamȩ judi.

Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ pumȩ ji̧ri̧ Jechu judi.

Jechu judi iei̧ pio ji̧ chjaparȩrëremȩdejȩ järätä chjaparea̧ doro

10Ado cja̧rȩmo̧ doremȩrä järätä chjaparea̧ doro, Jechu judi a̧ra̧ano̧rëremȩdejȩrȩ pumȩ ji̧ri̧ judiorë a̧doparea̧ bëräpȩ. 11Ado a̧ra̧ano̧mȩrȩ daea̧dejȩ iei̧ ji̧, yaröca chiayi̧ ji̧, chjere china̧yi̧ ji̧. Ado yaröca pio judi tänȩ oaiä, jabechji̧ jibëa̧ putu ju üdë yarëa̧ oa cjiami̧ dari̧ cjiarëremȩde, toboe cjitërea̧mi̧dëri̧. Jabechji̧ ja̧di dari̧ cjo̧ro̧rëreyi̧nȩ 18 uiri ja̧. 12Ado Jechu judi pio ji̧ daea̧ ji̧, pio jȩaiäpȩ jätä ëna̧diäa̧dejȩ. Ado pio jȩaiäpȩ jädäräa̧yi̧ oa, yo̧a̧dejȩ:

—Iei̧, pio jiro gito ja̧ chja̧oeri pio judiri go̧düa̧ oa cjiaje jarerea̧mi̧ dari̧ —yo̧a̧dejȩ.

13Ado Jechu judi jibëa̧ ichira̧ iei̧ ji̧ idamȩrȩ chjaodëri̧ chjapea̧dejȩ. Toboe cjitërea̧mi̧ dari̧ chjaparȩa̧dejȩ. Ado Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtayi̧rȩ ni̧bäyi̧pea̧nȩ. 14Jabo judiorë a̧doparea̧ bë tjamo̧ yo̧mȩ pio judi ërecjiapea̧de. Jabechji̧ Jechu judi järätä chjaparea̧ doro chjaparȩa̧ pio ju̧i̧iä, cjiadiäa̧ doro chjaparȩa̧ pio ju̧i̧iä ërecjiapea̧de. Ado pio ju̧i̧iä yo̧a̧dejȩrȩ pumȩ ji̧ri̧:

—Danȩrȩ, 6 do üdë ja̧beparea̧ do maeade. Ado pio jiro doro chjö̧na̧i̧ oa ja̧bepapea̧de jabo järätä chjaparea̧ do üdë, jabechji̧ ja̧bepadërea̧ dode. Ado pio ju̧i̧iä yo̧requededibe. Mȩnȩro̧ chjaparȩa̧ oa cjiatämi̧ cjiarä judi, jabechji̧ järätä chjaparea̧ dodërä jana̧täreji̧ri̧nȩrȩ —yo̧mȩrȩ yo̧rëremȩdejȩrȩ pumȩ ji̧ri̧, ërecjia tjamo̧mȩrȩ.

15Jabo Jechu judi a̧doparea̧ bë tjamo̧ yo̧mȩ pio ju̧i̧ dëbë yo̧a̧dejȩ:

—Jabo cjäri̧ marenȩ, jabomo̧ quëna̧cji̧ quëna̧ japamȩrenȩ. Ado na̧ jadü pio judiro̧borë jabomo̧ quëna̧cji̧ quëna̧ japaji̧ri̧nȩrȩ —yo̧a̧dejȩrȩ—. Danȩrȩ, pio mȩnȩro̧ ütëborë ja̧bepanȩrȩ davä järätä chjaparea̧ doro. Jabechji̧ dibëa̧ baca oa, dibëa̧ buro oa jare ëte, ¿ui jararea̧räpȩ mu̧i̧ jädë marenȩro̧jo̧ȩ? ¿Doti̧mi̧ cjiadiärea̧ doräbo japadënȩrȩ? Dëdë, japanȩrȩ. 16Ado pio yi̧ro̧ iei̧ pio jini̧, ¿buro pio ju̧i̧iä ji̧dë u̧i̧ ba chiadënȩ? Dëdë, buro pio ju̧i̧ u̧i̧ ba chianȩ. Aja̧, pio yi̧nëjȩ, Abaraa̧rea̧ pio judiri ja̧yi̧ pio jini̧ buro pio ju̧i̧ u̧i̧ ba chianȩ. Ado pio jini̧borë cjiadiärea̧ doro jarea̧ oa cjiami̧ dari̧ cjiarä judi, ¿jabechji̧ chjadëdëde? Pio jini̧borë Ichiae pio ju̧i̧iä bae tabüa̧ oa cjiami̧ dari̧ cjiarërea̧ ji̧, Ichiae judi jibëa̧ putu ju oa chjere tänȩrërea̧ ji̧, jarea̧ oa cjiami̧ dari̧ cjiarä judi, 18 uiri ja̧ tabüa̧ oa cjiami̧ dari̧ cjia ëte jarea̧ oa cjiami̧ dari̧ cjiarä judi, ¿jabechji̧ chjadëdëde? Dëdë, jabechji̧ chjadëde —yo̧mȩrȩ yo̧rëremȩdejȩ Jechu judi tjamo̧ yo̧mȩ ju̧i̧, jibëa̧ jadü pio ji̧ri̧iäpȩmo̧bo.

17Jabo cjäri̧ madirȩ, Jechu ju̧i̧ eadëji̧ri̧ pio judiro̧ Jechu ja̧ ma̧ȩ pio ju̧i̧ ta̧rëa̧ oaiä, idëri̧ cjiaji̧ri̧pea̧dirȩ. Jabo o judiro̧, ütëborë ma̧ chiadëri̧ cjiarëreji̧ri̧dirȩ judi a̧dë chjäte chjadëi̧ oa jape chjaoa̧ pio ju̧i̧iä.

Motacha quȩmȩ cho pio ju̧i̧ chjiari na̧rȩrea̧mi̧ da ma̧ȩra̧ a̧ra̧ano̧rëremȩdejȩrȩ Jechu judi

Mateo 13:31-32; Marco 4:30-32

18Ado Jechu judi ado ni̧bä chjaorëremȩdejȩrȩ pumȩ buba pio ji̧ri̧iäpȩmo̧:

—Danȩrȩ, Ütërë yo̧a̧ chja̧oerä cjo̧ro̧pea̧ japamitë üdë ¿tjana̧mi̧ dade? ¿Tjana̧ na̧rȩrea̧ ma̧ȩra̧ ni̧bä chjaotäremȩrequededibe pio ju̧i̧ chjiari? —iëno̧ë ta̧rëa̧dejȩrȩ— 19Tjana̧ na̧rȩrea̧ ma̧ȩra̧dë, jabechji̧ motacha quȩmȩ cho pio ju̧i̧ chjiari ma̧ȩra̧ ni̧bä chjaotäremȩrequededibe —yo̧a̧dejȩrȩ—. Danȩrȩ, Ütërë yo̧a̧ chja̧oerä cjo̧ro̧pea̧ japamitë üdë motacha quȩmȩ chomi̧ dade. Ado pio jiro cho üdë, jabechji̧ boi̧chji̧ tjamo̧de. Jabo tjado ana̧mȩ judi pio jiro cho oa jibëa̧ tjadoro ponȩ ëte, ado buiu ëte, jabechji̧ cjitëde to ana̧ tjamo̧pe järea̧mi̧ dari̧. Ado to üdë ana̧pea̧rä, jabechji̧ pua no̧i̧dërë to chjiaräpȩ ju̧ri̧ joëparea̧ dadirȩ, to üdë ana̧ tjamo̧pea̧ tara. Aja̧, pio jiro cho üdë boi̧chji̧ tjamo̧räbo, jabechji̧ to ana̧chja tjamo̧pe bagade. Ado peaja̧dimi̧ dari̧ ana̧pe bagapade Ütërë yo̧a̧ chja̧oerä cjo̧ro̧pea̧ üdë. Tjamo̧ davä. A̧ra̧ano̧rea̧ ma̧ȩ üdë boi̧chji̧mi̧ daräbo, pumȩ judiro̧ pio ju̧i̧ ba chia dadëräbo, jabechji̧ ana̧ tjamo̧pe bagami̧ dari̧ cjiade, oëra̧ti̧ oa chjuchjupechärea̧mi̧ dari̧ —yo̧mȩrȩ na̧rȩrea̧ ma̧ȩmi̧ dara̧ ni̧bä chjaorëremȩdejȩrȩ Jechu judi Ütërë yo̧a̧ chja̧oerä cjo̧ro̧pea̧ pio ju̧i̧ chjiari.

Ado cja̧rȩmo̧ na̧rȩrea̧ ma̧ȩmi̧ dara̧ ni̧bä chjaorëremȩdejȩrȩ Jechu judi pjuru chiaparȩrea̧ pio ju̧i̧ chjiari

Mateo 13:33

20Ado Jechu judi cjiadiädëmȩrȩ ji̧dë u̧i̧ ni̧bä chjaorëremȩdejȩrȩ:

—Danȩrȩ, ¿tjana̧mi̧ dade Ütërë yo̧a̧ chja̧oerä cjo̧ro̧pea̧ üdë? 21Tjana̧mi̧ dadë, danȩrȩ, pjuru chiaparȩrea̧mi̧ dade —yo̧a̧dejȩrȩ—. Danȩrȩ, cja̧rȩmȩ iei̧ pio jini̧, chja̧pe japatämi̧ cjiayi̧ pio jini̧ mitënȩjȩ a̧de mirerea̧ oa, pjuru chiaparȩrea̧ pio ju̧i̧. Jabechji̧ pjuru chiaparȩrea̧ jabëtari̧mi̧ oa mitënȩ tirigo pjo̧no̧ pio ju̧i̧ nö̧ta mirepea̧ oa, tjarari̧ mö̧reda̧ pjo̧no̧ oa mirepea̧ oa. Ado pjuru chiaparȩrea̧ üdë ji̧ra̧ tjamo̧dëräbo, jabechji̧ tirigo pjo̧no̧ chjö̧na̧i̧ oa boadärädejȩ, ana̧pe bagari̧, pjuru chiape bagari̧. Ado peaja̧dimi̧ dari̧ baäde Ütërë yo̧a̧ chja̧oerä cjo̧ro̧pea̧ üdë. Jabechji̧ chjuchjupechärea̧mi̧ dari̧ baäde oëra̧ti̧ oa, pumȩ ja̧ chji̧ ji̧ra̧ tjamo̧ro boadärärea̧mi̧ dari̧ —yo̧mȩrȩ ni̧bä chjaorëremȩdejȩrȩ Jechu judi Ütërë yo̧a̧ chja̧oerä cjo̧ro̧rea̧ japamitë pio ju̧i̧ chjiari.

Yo̧a̧ri̧ joë yami̧ dade ado yo̧a̧ri̧ no̧mi̧ dade

Mateo 7:13-14, 21-23

22Ado Jechu judi Jerucharȩräpȩ jätämi̧ cjiamȩrȩ bë ma̧ri̧ nö̧tai̧ oa chjätämȩrȩ a̧ra̧ano̧riä tai̧rëremȩde, bë ma̧ri̧ bori̧bo. 23Ado cja̧rȩmȩ pumȩ üdë bë ma̧ri̧ boi̧chji̧rä cjo̧ro̧mȩ pio judi ja̧di ta̧rëri̧ iëno̧ë ta̧rëa̧dejȩ:

—Danȩ Ano̧mȩ, ¿pumȩ judiro̧ ji̧ra̧dërë chjätärea̧ dapadirȩ? Judiro̧ aeno̧a̧ oa cjiatärea̧ ji̧, ¿ji̧ra̧dërë chjätärea̧ dapadirȩ? —yo̧mȩrȩ iëno̧ë ta̧rëa̧dejȩ.

Ado Jechu judi dëbë yo̧a̧dejȩ:

24—Danȩrȩ, mȩnȩro̧ nö̧tarä yuro järichji̧vä yu̧a̧rea̧ joë ya jujuai̧räpȩmo̧ chjadëri̧ yu̧a̧pea̧ ji̧ —yo̧a̧dejȩrȩ—. Jabechji̧ pumȩ no̧i̧dërë tjamo̧ri̧ yu̧a̧tämi̧ cjiaräbo, järiji̧ri̧rȩ yu̧a̧taräbo, cjäri̧ madirȩ, yu̧a̧rea̧ dadëpadirȩ —yo̧a̧dejȩrȩ—. 25Danȩrȩ, bë ana̧mȩ judi joë ya oa chjuari̧ tuti cara̧ oaiä, jabechji̧ yu̧a̧rea̧mi̧dëpea̧de. Ado mȩnȩro̧ orë dairäpȩ tutia̧ oa cjiapanȩrȩ joë ya oa tao tao eari̧ gu̧na̧ gu̧na̧ cjiaji̧ri̧rȩ. Ado ja̧di ta̧rëri̧ ëna̧diäji̧ri̧rȩ yo̧panȩrȩ: "Aja̧ Ano̧mȩ, chjadëri̧ areië yürüibe" yo̧pa. Jabo joë ya Ano̧mȩ pio judi dëbë yo̧padidibe: "Cjäri̧ marequededibe, tjamo̧ri̧ dabadërequededibe. 'Jabechji̧ pio judiri ma̧na̧diro̧coada' quëna̧ dabadërequededibe" yo̧pa. 26Jabo mȩnȩro̧ cjiadiädëji̧ri̧rȩ ado yo̧parenȩro̧jo̧ȩ: "Jabo danȩ, pio mȩa nö̧ta ëba jurarëreji̧ri̧rea̧ro̧mȩ. Ëba jararëreji̧ri̧rea̧ro̧mȩ. Ado ja̧dëa ji̧ a̧ro̧rȩ cjo̧ro̧mȩ bë yuroro, a̧ro̧rȩ järea̧ no̧robo, jabechji̧ a̧ra̧ano̧rëremȩrenȩibe mȩnȩ. Jabechji̧ tjamo̧ri̧ dabarea̧ro̧mȩ" yo̧parenȩrojo̧ȩ. 27Ado ja̧dëa ji̧ Ano̧mȩ judi dëbë yo̧padidibe: "Jabo cjäri̧ marequededibe, tjamo̧ri̧ dabadërequededibe. 'Ado pio judiri ma̧na̧diro̧coada' quëna̧ dabadërequededibe peaja̧di. Ado pio ju̧i̧iä jabechji̧, jachi oa a̧dë baächji̧coe. Aja̧, chjai̧dëri̧ japaji̧ri̧ pio mȩnȩro̧ ütëborë jachi oa a̧dë baächji̧coe" dëbë yo̧mȩrȩ yo̧padidibe.

28Ado mȩnȩro̧ ja̧di dari̧ aeno̧a̧ oa cjiarä, cjäri̧ manȩrȩ, ejaro cjiaji̧ri̧rȩ, a a ma cjiaji̧ri̧rȩ daparenȩro̧jȩrȩ Abaraa̧ pio ju̧i̧, Icha pio ju̧i̧, ado Jacobo pio ju̧i̧bo. Ado pio ji̧ri̧ uëri Ütërë ea jana̧ chjadüa̧ oa ni̧bärëreji̧ri̧ pio ji̧ri̧ ütëbo oa daparenȩro̧jȩrȩ peaja̧di. Aja̧, ütëbo oa daparenȩro̧jȩrȩ Ütërë yo̧a̧ chja̧oeräpȩji̧ri̧ oa. Jabo mȩnȩro̧, cjäri̧ manȩrȩ, aeno̧a̧ oa cjiapanȩrȩ. Jabechji̧ mȩnȩro̧ Ütërë yo̧a̧ chja̧oeräji̧ri̧ pio ji̧ri̧iäpȩ yu̧a̧rea̧ datärea̧ ji̧, yu̧a̧rea̧ dadëpanȩrȩ jabo uapai̧ da tjamo̧ro aeno̧a̧ oa cjiapanȩrȩ tuti japarea̧ decjiari̧. 29Jabo judiodë pio judiro̧ noi̧dërë, chiriräpȩti̧ oa cjo̧ro̧ji̧ri̧ pio judiro̧, jabechji̧ pio ju̧ri̧pȩ yu̧a̧rea̧ dapadirȩ. Jabechji̧ dorë cjitëmȩräpȩmo̧ a̧rȩmȩ chiriri pio judiri, dorë biramȩräpȩmo̧ a̧rȩmȩ chiriri pio judiri, chirina̧räpȩmo̧ a̧rȩmȩ chiriri pio judiri, ado ca̧i̧ta̧ra̧ pënȩräpȩmo̧ a̧rȩmȩ chiriri pio judiri go̧dü chjaopadirȩ davä Ütërë yo̧a̧ chja̧oeräpȩ cjo̧ro̧pea̧ oa, Ütërë yo̧a̧ chja̧oerä cjiamȩ mechjaräpȩ jura chapea̧ oa.

30Ado danȩrȩ ca̧ pumȩ, chjadëri̧ jo̧rȩtatäreji̧ri̧nȩrȩ pio yoa ma̧ȩ pio ju̧i̧ chjiari. Danȩrȩ, 'ba chia tjamo̧dëquëda jabo o judiro̧ pio coaiä ji̧dë u̧i̧ ba chiadiro̧da' quëna̧ji̧ri̧ pio judiro̧, jabechji̧ ütara̧ doro o ji̧ri̧iä ji̧dë u̧i̧ ba chiapadirȩ. Ado o judiro̧, 'Aja̧, ba chia tjamo̧quëda, o pio ji̧ri̧iä ji̧dë u̧i̧ ba chiaquëda' quëna̧ji̧ri̧ pio judiro̧, jabechji̧ ütara̧ doro badë maearë cjiadiäpadirȩ —yo̧mȩrȩ a̧de ni̧bä chjaorëremȩdejȩrȩ Jechu judi, na̧rȩrea̧ ma̧ȩmi̧ dara̧ pio ju̧ri̧ra̧.

Erode A̧tipa judi, Juan pio ju̧i̧ ja̧bo tänȩrëremȩrȩ ano̧ mire ja̧bo tänȩtämi̧ cjiarëremȩdejȩ Jechu pio ju̧i̧bo

31Ado judirä pjaricheo judiro̧ yo̧era̧rëreji̧ri̧diro̧jo̧ȩ Jechu pio ju̧i̧, ja̧di ta̧rëri̧ yo̧ji̧ri̧rȩ:

—Danȩ, mȩnȩ tjamo̧ri̧ cjo̧ro̧tämi̧ cjiarä judi, mȩnȩ ja̧bodëri̧ cjiarä judi, jabechji̧ pio yudiri baävä. Jabechji̧ Erode A̧tipa pio judi ja̧bo tänȩtämi̧ cjiadimȩ —yo̧a̧diro̧jo̧ȩ.

32Jabo Jechu judi dëbë yo̧a̧dejȩrȩ:

—Danȩrȩ, ja̧di ta̧rëri̧ yo̧eji̧ri̧renȩro̧jo̧ȩ Erode A̧tipa pio ju̧i̧ —yo̧a̧dejȩrȩ—. "Jabechji̧ baädërequede jabo ji̧dë ma ja̧bepatämi̧ cjiarequede" yo̧eji̧ri̧renȩro̧jo̧ȩ. "Aja̧, ira̧diä cjaeäji̧ri̧ pio ji̧ri̧ ji̧dë ma baä tänȩparequedejȩrȩ. Ado gito ja̧boji̧ri̧ pio ji̧ri̧ ji̧dë ma chjaparȩparequedejȩrȩ peaja̧di" yo̧eji̧ri̧renȩro̧jo̧ȩ. "Aja̧, pio yaba̧ domȩ oa, ado jaco domȩ oa, jabechji̧ ji̧dë ma ja̧bepamȩrȩ ja̧bepaparequede ca̧ea̧ ja̧beparea̧ pio ju̧i̧, cüdë ütarë jo̧rȩtarërea̧ pio ju̧i̧. Ado ja̧dëa ji̧ jaco dopea̧rä, jabechji̧ cüdë ütarë jo̧rȩtarërea̧ pio ju̧i̧ ja̧bepadärärea̧ daparequede peaja̧di" yo̧eji̧ri̧renȩro̧jo̧ȩ Erode A̧tipa pio ju̧i̧iäpȩmo̧, oariromi̧ damȩ pio ju̧i̧iäpȩmo̧, o ji̧ri̧ ji̧dë ma ja̧bo tänȩmȩ ju̧i̧. Aja̧, cüdë yo̧a̧ pio ju̧i̧ yo̧eji̧ri̧nȩro̧jo̧ȩ —yo̧mȩrȩ yo̧rëremȩdejȩrȩ.

Jechu judi gito ana̧ri̧ jo̧rȩtarëremȩde Jerucharȩräpȩ cjo̧ro̧ji̧ri̧ pio ji̧ri̧ chjiari

Mateo 23:37-39

33Ado Jechu judi ji̧dë u̧i̧ ni̧bämȩrȩ ja̧di ta̧rëri̧ a̧de ni̧bä chjaorëremȩde:

—Aja̧, Erode judi pio coa ja̧bo tänȩtämi̧ cjiaräbo, jabechji̧ cjiadiärea̧ decjiari̧ jäpea̧ chiarequede Jerucharȩräpȩ. Ado ju̧ri̧pȩ go̧düdäräpea̧ üdë tjarari̧ dode. Ado pio ju̧i̧iä pio yaba̧ domȩ oa, ado jaco domȩ oa, ado jaco dopea̧rä, jabechji̧ ji̧dë ma jäpea̧ chiarequede chjadëri̧ go̧düdäräpea̧ oa pio ju̧ri̧pȩ. Jabechji̧ Jerucharȩräpȩ pio ju̧ri̧ ja̧bo tänȩ marëreji̧ri̧diro̧jȩrȩ Ütërë ea jana̧ chjadüa̧ oa ni̧bärëreji̧ri̧ pio ji̧ri̧. Ado pio cüdëbo tara, pio cüdëborë Ütërë ea jana̧ chjadüa̧ oa ni̧bämȩ tara, jabechji̧ pio cüdëborë chjadëri̧ go̧düdäräpea̧ chiarequede Jerucharȩräpȩ ju̧ri̧. Jabechji̧ pio coabo ja̧bo tänȩpea̧ oa, pio coabo pio ju̧ri̧pȩ ja̧bo tänȩpea̧ oa, ado cja̧rȩmo̧ chiriräpȩ ja̧bo tänȩa̧ oa cjiachea oa, pio ju̧ri̧pȩ chjadëri̧ go̧düdäräpea̧ chiarequede —yo̧mȩrȩ yo̧rëremȩde Jechu judi, jënȩ Jerucharȩräpȩ ja̧bopea̧ pio ju̧i̧ chjiari.

34Ado Jechu judi cjiadiädëmȩrȩ ja̧di ta̧rëri̧ a̧de ni̧bä chjaorëremȩde Jerucharȩräpȩ cjo̧ro̧ji̧ri̧ pio ji̧ri̧ chjiari, gito ana̧ri̧ jo̧rȩtamȩrȩ:

—Chia chia, Jerucharȩräpȩ cjo̧ro̧ji̧ri̧ pio ji̧ri̧ cjäri̧ri̧ cjia jo̧rȩtamȩrȩ ni̧bärequededibe —yo̧a̧de—. Jabechji̧ Ütë tjamo̧ judi pio dibëiäpȩmo̧ chjadüa̧ pumȩ pio ji̧ri̧ ji̧dë ma ja̧bo tänȩ chjaorenȩro̧jȩrȩ. Tjamo̧ davä. Ütërë ea jana̧ chjadüa̧ oa ni̧bäji̧ri̧ pio ji̧ri̧ ji̧dë ma ja̧bo tänȩ chjaorenȩro̧jȩrȩ. Ado o ji̧ri̧, Ütë tjamo̧ judi pio dibëiäpȩmo̧ chjadüa̧ pio ji̧ri̧ peaja̧di ta̧dëra̧ ae ja̧bo tänȩ chjaonȩro̧jȩrȩ. Ado mȩnȩro̧ ja̧di dari̧ japea̧räbo, jabechji̧ ana̧ri̧ a̧doa̧täremȩrequededibe. Jabechji̧ pio dibë chjadëri̧ a̧dopa tänȩa̧täremȩrequededibe dibë chjadëri̧ jidapea̧ oa. Tjamo̧ davä. Ocararo iei̧ jini̧ jibëa̧ bori̧ pio ji̧ri̧ pjö̧dato ëtemo̧ a̧dopa tänȩmi̧ dari̧ japea̧täremȩrequededibe babui̧ra̧, jabo cjäri̧ marenȩro̧coe, jiada̧renȩro̧coe —yo̧a̧dejȩrȩ—. 35Ado pio ju̧i̧iä Ütë tjamo̧ judi, jabechji̧ a̧dë baämi̧ dari̧ japapadidibe. Dibëa̧ cjo̧ro̧rea̧ bëremȩ üdë, Jerucharȩ quȩmȩ bë mari̧ üdë bë cjaramape bagarea̧mi̧ dari̧ japapadidibe dibë a̧dë baämi̧ dari̧ japea̧ oaiä. Ado yaba̧ pio yoa ma̧ȩ oa yo̧requededibe mȩnȩro̧ dabadëchea oa —yo̧a̧dejȩrȩ—. Danȩrȩ, ado chjereno̧ yu̧a̧parequede dibëa̧ bë ma̧ri̧ oa pio yaba̧. Ado ja̧dëa ji̧ pio judiri yurori dadëparenȩro̧coe. Jabo cüdë ado chjereno̧ ma̧na̧rä, dëdë, daparenȩro̧coe. Ado mȩnȩro̧ coa darä, jabechji̧ ja̧di ta̧rëri̧ yo̧parenȩrȩ pio coa chjiari: "Aja̧, chjacjiamȩri̧ ni̧bätäro̧jo̧ȩ Ano̧mȩ judi chjadüa̧ pio ju̧i̧iäpȩmo̧” yo̧mȩ ma̧ȩ pio ju̧i̧ yo̧parenȩro̧coe cüdë ado chjereno̧ ma̧na̧mȩ oa.

Ado Jechu judi ja̧di ta̧rëri̧ yo̧ ëte, cjiadiärëremȩde.

Currently Selected:

Lucas 13: Pume

Highlight

Copy