Juan 19

Chjai̧dëri̧ japadëmȩ oa co ji̧ra̧ri̧ bide cjaeärëreji̧ri̧diro̧jo̧ȩ

1Ado ja̧dëa̧ ji̧ Pirato judi yo̧a̧ oaiä, jibëa̧ guadia judiro̧ co ji̧ra̧ri̧ biderëreji̧ri̧diro̧jo̧ȩ Jechu ju̧i̧, i pënȩ go̧a̧ti̧ chiamȩ biderea̧ra̧. 2Ado guadia judiro̧ jëdano̧rëreji̧ri̧diro̧jo̧ȩ ütë ja̧ yuarea̧mi̧ da oa, o̧ maeara̧. Ado Jechu pio ju̧i̧ acji yua̧diro̧jo̧ȩ. Ado ina̧ tänȩa̧diro̧jo̧ȩ ina̧rea̧ coëcoëara̧, ütërë ina̧rea̧mi̧dara̧. 3Ado pio ju̧i̧ ja̧ dëbëräpȩ chjaocjiaji̧ri̧rȩ ano̧ mire cjiadäräa̧ji̧ri̧rȩ yo̧a̧diro̧jo̧ȩ: “Aja̧ bucho ana̧ cjo̧ro̧täde judio ja̧ ütë üdë” yo̧a̧dirȩ. Ado ja̧di ta̧rëri̧ yo̧ ëte, co ji̧ra̧ri̧ ano̧ mire bide cjaeäa̧diro̧jo̧ȩ.

4Ado ja̧dëa ji̧ Jechu pio ju̧i̧ bide cjaeäa̧ duri oa, jibëa̧ bëri pio judiri ado go̧düa̧de Pirato judi. Ado Jechu pio ju̧i̧ jo̧rȩtamȩrȩ yo̧a̧dejȩrȩ pumȩ ji̧ri̧:

—Danȩrȩ, jiro üi̧ pio ju̧i̧ go̧dü tänȩpareconȩ mȩnȩro̧ chjadëri̧ dapea̧ oa. Jabechji̧ cüdë ju̧i̧ iëno̧ë ta̧rëa̧ ji̧, pio ju̧i̧ ütarë ta̧rëa̧ ji̧, 'jabechji̧ chjai̧dëri̧ japea̧dida’ quëna̧dëa̧reconȩ.

5Ado Pirato judi ja̧di ta̧rëri̧ yo̧a̧ duri oa, jo̧ tjori pio judiri go̧düa̧de Jechu judi. Ütë ja̧ yuarea̧mi̧ da oa yuamȩrȩ, o̧ra̧ japea̧ oa cjiamȩ yuarea̧ oa yuamȩrȩ go̧düa̧de, ina̧rea̧ coëcoëa oa ina̧mȩrȩ. Ado Pirato judi yo̧a̧dejȩrȩ pumȩ ji̧ri̧:

—Danȩrȩ, pio jiro üi̧ üdë pio yide.

6Ado tjamo̧ goë tuti ja̧bepaji̧ri̧ pio judiro̧ Jechu ju̧i̧ daea̧ ji̧, ado Ütë tjamo̧ ja̧ bë oa jidaji̧ri̧ guadia pio judiro̧ daea̧ ji̧, a̧ra̧a̧ra̧ jiäji̧ri̧rȩ to̧bari̧ ëna̧diäa̧dirȩ:

—Toro cjide ja̧bo tänȩchji̧jo̧ȩ. Toro cji̧de ja̧bo tänȩchji̧jo̧ȩ —ëna̧diäa̧dirȩ.

Jabo Pirato judi yo̧a̧dejȩrȩ:

—Jaechji̧vä ado ja̧di. Pio mȩnȩro̧ mitëtäreji̧ri̧renȩro̧jo̧ȩ. Pio mȩnȩro̧ toro cji̧dä ëte ja̧bo tänȩtäreji̧ri̧renȩro̧jo̧ȩ. Jabo cüdë, 'ja̧bo tänȩtäremȩcuni̧da' quëna̧dëmȩrȩ ütarë ta̧rëa̧reconȩ.

7Jabo pumȩ bubarë cjiadiädëji̧ri̧rȩ dëbë ëna̧diäa̧diro̧jo̧ȩ:

—“Ja̧bopea̧ chiade” yo̧diibe ibëa̧ ma̧ȩ üdë, tüdüa̧mi̧ darä cjo̧ro̧pea̧ ma̧ȩ üdë. Jechu judi ma̧i̧ da yo̧a̧ oaiä, “Ütë tjamo̧ ja̧ Jojarequede” yo̧a̧ oaiä, jabechji̧ ja̧bopea̧ chiade —yo̧a̧diro̧jo̧ȩ.

8Ado Pirato judi pio ju̧i̧ ta̧rëa̧ oaiä, uapa tjamo̧pea̧de. 9Ado chjereno̧ yu̧a̧de jibëa̧ bëräpȩ Jechu pio ju̧i̧ nö̧ta. Ado ja̧dëa ji̧ ado iëno̧ë ta̧rëa̧dejȩ:

—Jabo chjadëri̧ yo̧coe —yo̧a̧dejȩ. ¿Yudirimȩ tjamo̧renȩ? Yo̧coe.

Jabo Jechu judi cjapi maeari̧ cjiadiäa̧de, dëbë yo̧dëmȩrȩ.

10Ado pio ju̧i̧iä Pirato judi yo̧a̧dejȩ:

—¿Pio coaiäpȩmo̧ dëbë ni̧bädëpanȩ? Danȩ, ca̧ ma̧ȩ chja̧oerä cjiarenȩ. Pio cüdë tänȩa̧ oaiä, toro cji̧däa̧ oa ja̧bopai̧ darenȩ. Ado peaja̧di ca̧ ma̧ȩrä baäpai̧ darenȩ. Ca̧ ma̧ȩ chja̧oerä cjiarenȩ. Pio ju̧i̧iä chjadëri̧ dëbë yo̧täremȩrenȩque —yo̧a̧dejȩ Pirato judi.

11Jabo Jechu judi dëbë yo̧a̧dejȩ:

—Cjäri̧ marequede, na̧ chja̧oerä tjamo̧ri̧ cjiadërequede, jabo a̧dëräpȩ cjiamȩ Ütë pio ju̧i̧ ja̧ chja̧oerä tjamo̧ri̧ cjiarequede. Jabechji̧ pio judi mȩa tjamo̧ yo̧rea̧ yürüa̧ oaiämo̧i̧ eami̧ oa japarea̧ darenȩquȩ. Pio ju̧i̧iä ji̧dë u̧i̧ chjai̧dëri̧ japea̧dirȩ pio mȩaiäpȩmo̧ yürüa̧ji̧ri̧ judio judiro̧.

12Ado Pirato judi ado go̧düa̧de. Jechu pio ju̧i̧iä ado ta̧rëa̧ oaiä, jabechji̧ tjamo̧ri̧ baä tänȩtämi̧ cjiarëremȩdejȩ. Jabo pumȩ bubarë, cjäri̧ madirȩ, cjarari̧ cjiape baga̧ji̧ri̧rȩ ëna̧diä chjaorëreji̧ri̧dirȩ.

—Jabo cjäri̧ marenȩ, mȩnȩ pio ju̧i̧ baä tänȩrä judi, Domaräpȩ cjo̧ro̧mȩ ütë pio judi jo̧rȩtami̧ dari̧ jo̧rȩtadërenȩ —ëna̧diäa̧diro̧jo̧ȩ—. Tjamo̧ davä. Checha quȩmȩ ütë pio judi jo̧rȩtami̧ dari̧ jo̧rȩtadërenȩ. Danȩ, Jechu judi yo̧a̧ ji̧, “Tjamo̧ yo̧mȩrequede” yo̧a̧de pio jȩa chjiari. Ado eami̧ pumȩ üdë ja̧di ta̧rëri̧ ni̧bämȩ judi, jabechji̧ dëbëpe chjaodejȩ davä Domaräpȩ cjo̧ro̧mȩ ütë pio ju̧i̧, Checha pio ju̧i̧. Pio ju̧i̧iä pio yüdëje baä tänȩrea̧mi̧dëde —yo̧a̧diro̧jo̧ȩ.

13Ado Pirato judi pio jiro ma̧ȩ oa ta̧rëa̧ oaiä, ado go̧dü tänȩrëremȩdejȩ Jechu ju̧i̧. Ado ja̧dëa ji̧ järëremȩde ado cja̧rȩmo̧ charea̧räpȩ, bë yuroro cjiamȩ ta̧dë pjatërë cjiamȩräpȩ. Aja̧, pio ju̧ri̧pȩ jäa̧de bape chjaopea̧ ma̧ȩ oa ni̧bärea̧räpȩ. Ado judio judiro̧ ebereo ma̧ȩra̧ pio jiro charea̧ oa yo̧a̧ ji̧, Gabata yo̧a̧diro̧jo̧ȩ. Ado ju̧ri̧pȩ charëremȩde Pirato judi, ütarë ta̧rë chaji̧ri̧ judiro̧ charea̧räpȩ. 14Ado do üdë tjomo̧diäa̧de. Ado uëmo̧ a̧dë chjätärea̧ do üdë tarupapea̧ ji̧ querediä tjamo̧rëremȩde. Pio ju̧i̧iä jabechji̧ jëdano̧rea̧ dorëremȩde chjö̧na̧i̧ oa chjadëri̧ jëdano̧pea̧ oa. Ado Pirato judi ütarë ta̧rë chaji̧ri̧ judiro̧ charea̧räpȩ chamȩrȩ yo̧a̧dejȩrȩ judio ji̧ri̧:

—Danȩrȩ, pio yide dibë tjamo̧ yo̧mȩ judi —yo̧a̧dejȩrȩ.

15Jabo to̧bari̧ dëbë ëna̧diä chjaoa̧diro̧jo̧ȩ:

—Ja̧bo tänȩjo̧ȩ. Ja̧bo tänȩjo̧ȩ. Toro cji̧dä ëte, ja̧bo tänȩjo̧ȩ —ëna̧diäa̧dirȩ.

Jabo Pirato judi iëno̧ë ta̧rëa̧dejȩrȩ:

—¿Jabo yö̧ta dari̧ jo̧rȩtanȩrȩ? ¿Dibëa̧ ütë pio ju̧i̧ ja̧bo tänȩtä earenȩro̧coe?

Jabo tjamo̧ goë tuti ja̧bepaji̧ri̧ pio judiro̧ dëbë yo̧a̧diro̧jo̧ȩ:

—Cjäri made, ibëa̧ ütëdëde. Domaräpȩ cjo̧ro̧mȩ ütë pio ju̧i̧mo̧i̧ goarea̧ro̧jo̧ȩ. Ütëdëde pio yüdëje —dëbë yo̧a̧diro̧jo̧ȩ.

16Ja̧dëa ji̧ Pirato judi yürürëremȩdejȩrȩ Jechu pio ju̧i̧. Domano guadia pio ji̧ri̧ yürürëremȩdejȩrȩ toro cji̧de ja̧bo tänȩpea̧ oa.

Toro cji̧därëreji̧ri̧diro̧jo̧ȩ Jechu ju̧i̧

Mateo 27:32-44; Marco 15:21-32; Uruca 23:26-43

17Ado ja̧dëa ji̧ domano guadia judiro̧ mitëa̧diro̧jo̧ȩ Jechu ju̧i̧. Ado jënȩ ja̧bopea̧ to pio ju̧i̧ ara jä tänȩrëreji̧ri̧diro̧jo̧ȩ. “Tjübë Ju” quȩmȩräpȩmo̧ ara jä tänȩrëreji̧ri̧diro̧jo̧ȩ. Ado judio judiro̧ ebereo ma̧ȩra̧ ‘Tjübë Ju’ yo̧a̧ ji̧, jabechji̧ “Gogota” yo̧a̧diro̧jo̧ȩ. Aja̧, ja̧dira̧ ara järëremȩde Jechu judi jënȩ ja̧bopea̧ to pio ju̧i̧. 18Ado ju̧ri̧pȩ go̧düdäräa̧rä, toro cji̧därëreji̧ri̧diro̧jo̧ȩ. Jabo pio ju̧i̧mo̧i̧ ja̧bo tänȩdëa̧diro̧jo̧ȩ. Peaja̧di ja̧bo tänȩa̧diro̧jȩrȩ ado cja̧rȩmo̧ oa, yo̧a̧ri̧ oa. Ji̧ri̧ ja̧ tjoro cji̧därëreji̧ri̧diro̧jo̧ȩ Jechu pio ju̧i̧.

19Ado Pirato judi ma̧ȩ oa go̧ȩparëremȩde Jechu pio ju̧i̧ chjiari. Ado Jechu ja̧ tjübë uërä ju̧ri̧ cji̧däa̧ oa cjia tänȩa̧dejȩ toro. “Jechu judi Nacharerimȩ judi, judio ja̧ Ütëde” yo̧mȩ ma̧ȩ oa go̧ȩparëremȩde. 20Ado Jechu ju̧i̧ toro cji̧däa̧räpȩ üdë Jerucharȩ queri̧räpȩrëremȩde. Ado pio ju̧i̧iä pumȩ no̧i̧dërë daea̧diro̧jo̧ȩ ma̧ȩ oa. Uëmo̧ a̧dë chjätärea̧ do nö̧ta a̧dopera̧pea̧ji̧ri̧ pio judiro̧ no̧i̧dërë darëreji̧ri̧diro̧jo̧ȩ jibëa̧ ma̧ȩra̧ go̧ȩpea̧ oa cjiamȩ oa. Ado go̧ȩ ni̧bäa̧diro̧jo̧ȩ. Jabechji̧ Pirato judi go̧ȩpea̧ ma̧ȩ üdë tja̧ra̧ri̧ ma̧ȩra̧ go̧ȩpea̧ oa cjiarëremȩde. Ebereo ma̧ȩra̧, datina ma̧ȩra̧, ado giriego ma̧ȩra̧. Aja̧, tjarari̧ ma̧ȩra̧ go̧ȩpea̧ oa cjiarëremȩde. Ado pio ju̧i̧iä chjadëri̧ go̧ȩ ni̧bärea̧ darëreji̧ri̧diro̧jo̧ȩ pumȩ judiro̧ ütëborë. 21Jabo goae tjamo̧dërëremȩde tjamo̧ goë tuti ja̧bepaji̧ri̧ pio ji̧ri̧iä. Ado pio ju̧i̧iä yo̧a̧diro̧jo̧ȩ ütë oa:

—Jabo cjäri̧ ma —yo̧a̧diro̧jo̧ȩ Pirato ju̧i̧—. Ja̧di dari̧ go̧ȩpadëvä. “Judio ja̧ Ütëde” yo̧mȩ ma̧ȩ pio ju̧i̧ go̧ȩpadëvä. Ano̧ mire go̧ȩpatäremȩrenȩjo̧ȩ. “Pio yüdëje Judio ja̧ Ütërequede yo̧rëremȩde” yo̧mȩ ma̧ȩ pio ju̧i̧ ano̧ mire go̧ȩpatäremȩrenȩ —yo̧a̧diro̧jo̧ȩ. 22Jabo Pirato judi ta̧rë ja̧bodëa̧dejȩrȩ:

—Cüdë go̧ȩpea̧ üdë jabechji̧de. Ano̧ mire go̧ȩpadëpareconȩ jabechji̧ —yo̧a̧dejȩrȩ.

23Ado guadia judiro̧ Jechu pio ju̧i̧ toro cji̧däa̧ duri oa, chjarapë mitërëreji̧ri̧diro̧jo̧ȩ jibëa̧remȩ pio ju̧i̧. Jibëa̧ chjibo oa, jibëa̧ cada boarea̧ oa, jibëa̧ pachecherea̧ oa, ado jibëa̧ ta jo̧ë oa chjarapë mitëa̧diro̧jo̧ȩ. Jabechji̧ jadüchiami̧rëreji̧ri̧dirȩ guadia judiro̧. Ado judiro̧ nö̧tarë cja̧rȩmȩ oa mitërea̧ daea̧dirȩ. Jabo ja̧dëa ji̧ mitëa̧diro̧jo̧ȩ Jechu ja̧ tjori ina̧rea̧ chjibo oa. Cja̧rȩmȩ codë go̧a̧ti̧ri̧ taria̧ oa cjiarëremȩde pënȩ decjiarë, goë cara̧ oa cjiadëmȩrȩ. 24Ado guadia judiro̧ jibëa̧ dëbëti̧ra̧ yo̧a̧dirȩ:

—Danȩrȩ, cja̧rȩmȩ codë tara, mu̧i̧ quiradëtäreji̧ri̧rea̧ro̧jo̧ȩ. Jabechji̧ ta̧dë chjaocjiarea̧ra̧ japa ëte, cja̧rȩmȩrȩ mitëtäremȩdejȩ codë oa —yo̧a̧dirȩ. Ado judiro̧ ja̧di dari̧ japabëmi̧ jabërä go̧ȩpea̧ oa cjiarëremȩde ma̧ȩ üdë pio ji̧ri̧ chjiari.

“Aja̧, judiro̧ chjarapë mitëa̧dirȩ ca̧ chjiboremȩ pio ju̧i̧. Ado chjaocjiarea̧ ta̧dëra̧ pio ju̧ri̧ra̧ japea̧dirȩ ca̧ chjibo oa mitëpea̧ oa, tjori ina̧rea̧ chjibo pio ju̧i̧ mitëpea̧ oa, cja̧rȩmȩrȩ."

Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë. Ado tjamo̧i̧ cjiari̧ cjiadiäa̧de guadia pio judiro̧ ja̧di dari̧ japea̧ oaiä.

25Ado Jechu ju̧i̧ toro cji̧däa̧ queri̧räpȩ ju̧ri̧ cjiarëreyi̧nȩ pio ju̧i̧ arayi̧ jini̧. Pio ji̧di ja̧yi̧ pio jini̧borë cjiarëreyi̧nȩ, Coropa quȩmȩ ja̧ iei̧ pio jini̧, peaja̧di Maria quȩyi̧ pio jini̧. Ado Maria Madarena pio jini̧borë cjiarëreyi̧nȩ pio ji̧ri̧ nö̧ta. 26Ado Jechu judi pio jȩa arayi̧ pio ji̧ daea̧ ji̧, ado jënȩ ea̧ jadü pio ju̧i̧bo daea̧ ji̧, to queri̧räpȩ cjiaji̧ri̧ oa daea̧ ji̧, jabechji̧ yo̧a̧dejȩ jibëa̧ ai̧ ji̧:

—Damȩ ca̧ a̧i, pio yoaje na̧ jami̧ da oa daju̧i̧ —yo̧a̧dejȩ. 27Ado ji̧iäpȩmo̧ yo̧a̧ duri oa ano̧ mire yo̧a̧dejȩ jibëa̧ jadü oa:

—Danȩ Juan, pio yi̧aje na̧ ai̧mi̧ da oa dajȩ.

Ado Jechurë yo̧a̧ oaiä, jabechji̧ ëba baärëremȩdejȩ Maria ji̧ pio ju̧i̧ ja̧ bëräpȩ chjadëri̧ ëba cjo̧ro̧pea̧ oa. Jabechji̧ pio judiri yurori pio ju̧i̧ ja̧ jadü üdë chjadëri̧ ëba cjo̧ro̧rëremȩdejȩ Jechu ju̧i̧ arayi̧ pio ji̧, jibëa̧ ai̧ ëbarëmi̧ cjiari̧.

Jechu judi ja̧boa̧de

Mateo 27:45-56; Marco 15:33-41; Uruca 23:44-49

28Ado Jechu judi toro cjiamȩrȩ jo̧rȩtarëremȩde. ‘Aja̧, japadäräa̧quëda, ca̧ Ama̧i̧ judi jo̧rȩta̧mi̧ japadäräa̧quëda’ quëna̧ jo̧rȩtarëremȩde. Ado ja̧dëa ji̧ Ütë tjamo̧ ja̧ ma̧ȩ üdë tjamo̧i̧ cjiari̧ cjiadiäpea̧ oa, ja̧di ta̧rëri̧ yo̧rëremȩde:

—Ui ja̧borequede —yo̧a̧.

29Ado ju̧ri̧pȩrëremȩde tachja üdë. Bino quȩmȩ ërü oa chiarëremȩde, ba chiadë oa, cho̧ro̧ cho̧ro̧a oa. Ado tachjaräremȩ pio ju̧i̧ chuda̧ oaiä, yu̧i̧a̧ oa cjiadiäa̧de bücübücüa üdë. Ado ja̧dëa ji̧ guadia üdë to go̧a̧ti̧ra̧ gua ëte, uëräpȩmo̧ cjiari̧ arë gatëa̧dejȩ bücübücüa oa Jechu ja̧ yaräpȩmo̧. 30Ado Jechu judi bino quȩmȩ ërü oa cho̧ro̧cho̧ro̧a oa yu̧ȩ cjia jara̧dejȩ. Ado ja̧dëa ji̧ japamitë chjätä ëte, yo̧a̧de:

—Ba ano̧däräa̧ oa cjiade.

Ado ja̧di ta̧rëri̧ yo̧ ëte, jibëa̧ tjo oa baä tänȩa̧mȩrȩ ëteräpȩmo̧ baramȩpea̧de jibëa̧ tjübë üdë, uëräpȩmo̧ cjiarërea̧ ji̧.

Guadia judi cjacjarë gua̧dejȩ Jechu ja̧ pjatëtu ju chjia yuroi̧rä ju̧ri̧

31Järätä chjaparea̧ do ba chiarë ma̧na̧pea̧ ji̧ querediä tjamo̧ oaiä, jëreea tjamo̧rëreji̧ri̧dirȩ judio tjamo̧ yo̧ji̧ri̧ judiro̧ ja̧boa̧ji̧ri̧ ja̧ icjara oa tori pio judiri bira tänȩpea̧ ji̧. Jabechji̧ a̧dë chjäte ba chiarëremȩde pio jiro do üdë. Ado judio pio ji̧ri̧iä china̧chjarëremȩde ja̧boa̧ji̧ri̧ ja̧ icjara üdë toro cjiadiäpea̧ ji̧ jiro doro. Ado pio ju̧i̧iä goëdepea̧diro̧jo̧ȩ Pirato ju̧i̧, jibëa̧ guadia pio ji̧ri̧ chjadütä, toro cjiaji̧ri̧ pio ji̧ri̧ ja̧ ta ju oa chjichji gu̧na̧tä. Jabechji̧ judiro̧ jo̧ȩra̧pe ja̧bopea̧ oa, jibëa̧ ju oaiä tjätjäpë cjiaji̧ri̧rȩ ji̧dë ma jȩoarea̧ dachea oa, jënȩro̧ jo̧ȩra̧pe bira tänȩrea̧ dapea̧ oa, cjo̧depea̧diro̧jo̧ȩ. 32Ado pio ju̧i̧iä guadia judiro̧ jäa̧dirȩ. Ado chjichji gu̧na̧diro̧jȩrȩ Jechu ja̧ yuroro cji̧däa̧ oa cjiaji̧ri̧ pio ji̧ri̧ ja̧ ta ju oa, Jechu pio ju̧i̧ nö̧ta toro ja̧boa̧ji̧ri̧ pio ji̧ri̧. 33Jabo ja̧dëa ji̧ Jechu pio ju̧i̧iäpȩ go̧düdäräa̧rä, peadë ja̧boa̧mȩ oa daea̧diro̧jo̧ȩ. Ado pio ju̧i̧iä chjichji gu̧na̧dëa̧diro̧jo̧ȩ jibëa̧ ju oa. 34Jabo guadia cja̧rȩmȩrȩ jibëa̧ yipjatë oa mitë ëte, chjaodëri̧ cjacjarë gua̧dejȩ pjatëtu ju chjia yuroi̧rä ju̧ri̧. Ado chjaodëri̧ go̧dürëremȩde goe üdë, uibo. 35Ado ja̧di dari̧ japaji̧ri̧ oa irä darëremȩ pio judirequede cüdë. Irä daea̧mȩrȩ go̧ȩparequede pio yoa ma̧ȩ oa mȩnȩro̧ quëna̧rea̧ dapea̧ oa. Ma̧ȩ chjádë yürüdërequededibe, jabo ma̧ȩ coëma cjia maea oa yürürequededibe. 36Aja̧, ja̧di dari̧ japaji̧ri̧ oa irä daea̧requedejȩrȩ. Ado guadia judiro̧ Jechu ja̧ ta ju oa chjichji gu̧na̧dëa̧ oaiä, pio ju̧i̧ ja̧ go̧a̧ oa cjacjarë gua̧ oaiä, jabechji̧ tjamo̧i̧ cjiari̧ cjiadiäa̧de jabërä go̧ȩpea̧ oa cjiarërea̧ ma̧ȩ üdë. Danȩrȩ, “Ju̧i̧ ja̧ ju üdë cja̧rȩmȩrȩ yarëa̧ oa cjiadëpade” yo̧mȩ ma̧ȩ üdë jabërä go̧ȩpea̧ oa cjiarëremȩde Jechu pio ju̧i̧ chjiari. 37Ado cja̧rȩmo̧ ma̧ȩ üdë pio ju̧i̧ chjiari jabërä go̧ȩpea̧ oa cjiarëremȩde peaja̧di. Ja̧di ta̧rëri̧ yo̧diibe: “Ado dapadiro̧jo̧ȩ jënȩro̧ cjacjarë gua̧ pio ju̧i̧iäpȩmo̧.” Aja̧, jabërä ja̧di ta̧rëri̧ go̧ȩpea̧ oa cjiarëremȩde ma̧ȩ üdë, Jechu pio ju̧i̧iäpȩmo̧ ja̧di dari̧ japabëmi̧.

Jechu ja̧ icjara pio ju̧i̧ ta̧dë cjararä arë a̧ra̧diro̧jo̧ȩ

Mateo 27:57-61; Marco 15:42-47; Uruca 23:50-56

38Cja̧rȩmȩrȩ, Joche quȩmȩ üdë, Aramatea quȩmȩ bë ma̧ri̧räpȩ cjo̧ro̧rëremȩde. Jechu pio ju̧i̧ cho̧rë jämȩrȩ cjo̧ro̧rëremȩde, jabo goadi quëna̧mi̧ dari̧ quëna̧rëremȩde judio tjamo̧ yo̧ji̧ri̧ pio ji̧ri̧ uapa tara. Ado judi goëdepea̧dejȩ Pirato ju̧i̧. Jabechji̧ Jechu ja̧ icjara oa tori pio judiri bira tänȩpamȩrȩ cjo̧dëa̧dejȩ. Ado judi cjo̧dëa̧mi̧ japarea̧ yürüa̧dejȩ Pirato judi. Ado pio ju̧i̧iä bira tänȩrëremȩdejȩ. Ado goa baäa̧dejȩ. 39Jabo jibëa̧ma̧i̧ jädëa̧de, jabo jadü chiarë jäa̧de Nicodemo quȩmȩ pio ju̧i̧ nö̧ta, Jechu pio ju̧i̧ gȩnȩrä goëderemȩ pio ju̧i̧ nö̧ta. Ado goaeri̧ pjȩa̧mȩ joarea̧ ji̧ra̧ tjamo̧ oa goamȩrȩ järëremȩde, 30 kilo chacha oa. Jabechji̧ mira quȩmȩ mirerea̧ra̧, aro quȩmȩ mirerea̧ra̧ mirea̧ oa cjiarëremȩde goaeri̧ pjȩa̧mȩ joarea̧ üdë. 40Ado judiro̧ yo̧a̧ri̧borë Jechu ja̧ icjara oa bira tänȩ ëte, puria̧diro̧jo̧ȩ chjibo cotora̧ pio ju̧ri̧ra̧. Jabechji̧ judiorë a̧ra̧ano̧rërea̧mi̧ goaeri̧ pjȩa̧mȩ joarea̧ra̧ pio ju̧ri̧ra̧ yu̧i̧ tänȩa̧diro̧jo̧ȩ chjibo coto oa. Ado ja̧di dari̧ japa ëte, puria̧diro̧jo̧ȩ jibëa̧ icjara nö̧tai̧ oa. Icjara üdë ta̧dë cjararä chjadëri̧ arë a̧ra̧ oa cjiabëmi̧ ja̧di dari̧ jëdano̧rëreji̧ri̧diro̧jo̧ȩ. 41Ado Jechu ju̧i̧ ja̧bo tänȩa̧räpȩ ju̧ri̧ cjiarëremȩde tjado üdë. Ado pio jiro tjadoro cjiarëremȩde ta̧dë cjara üdë, ja̧boa̧mȩ pio ju̧i̧ arë a̧ra̧pea̧ ta̧dë cjara üdë. Pea japea̧ oa cjiarëremȩde. Ado pio ju̧ri̧pȩ ja̧boa̧mȩ ja̧ icjara oa cja̧rȩmȩ co arë a̧ra̧ oa cjiadërëremȩde. 42Ado järätä chjaparea̧ do üdë ma̧na̧pea̧ querediä tjamo̧ oaiä, jabechji̧ pio jiro ta̧dë cjararä ju̧ri̧ arë a̧ra̧diro̧jo̧ȩ Jechu ja̧ icjara oa, queri̧räpȩ tara.

Currently Selected:

Juan 19: Pume

Highlight

Copy