Taruparea̧ Ma̧ȩ 8
8
Ui decjiape järi̧ pjaepa tänȩrëremȩde Ütë tjamo̧ judi
1Jabo Ütë tjamo̧ judi a̧dë jo̧rȩtadërëremȩdejȩ Noe ju̧i̧. Pio ju̧i̧ nö̧taji̧ri̧ pio ji̧ri̧ a̧dë jo̧rȩtadëa̧dejȩrȩ. Pumȩrȩ goa̧ pio ji̧ri̧, chirirä cjo̧ro̧ji̧ri̧ pio ji̧ri̧ a̧dë jo̧rȩtadëa̧dejȩrȩ. Jabechji̧ pio ji̧ri̧ jo̧rȩtamȩrȩ pjaepa tänȩrëremȩde chiri üdë gape järea̧mi̧ dari̧. 2Ado ui üdë dabu ëteri pio judiri uëräpȩmo̧ acji cjitërërea̧ ji̧, urëdi tjamo̧ri pio judiri acji cjitërërea̧ ji̧, jabechji̧ tuti cara̧mi̧ dari̧ cjiadiärëremȩde. Ado judiri cjitëdëa̧de. Ado a̧dë i uëmo̧ bararemȩ ui üdë ma̧i̧ dari̧ gu̧ro baärërea̧ ji̧, peaja̧di tutia̧ oa cjiadiämi̧ dari̧ cjiadiärëremȩde. Ado judiri gu̧rodëa̧de. Ado ituri̧ cjürërea̧ ji̧, peaja̧di cjüdëpea̧de. 3Ado ui üdë cjücjürü tjamo̧rërea̧ ji̧, jabechji̧ ji̧dë ma gape järëremȩde. Aja̧, 150 do nö̧ta gape järëremȩde, ca̧i̧ta̧ra̧ ichiri cja̧rȩmȩ gupënȩ nö̧ta. 4Ado japamitë chjätä ëte chiri üdë gapea̧ oaiä, jabechji̧ chadärärërea̧de chara ana̧ üdë Ararate quȩmȩ ya̧mi̧räpȩ. Ca̧i̧ta̧ra̧ ichiri cja̧rȩmȩ gupënȩ chjätä ëte, do mapea̧rä, 16 do chjätäa̧ doro chadärärërea̧de. 5Ado ui üdë, jabechji̧ jaerira̧ bira baärëremȩde cjücjürü tjamo̧rërea̧ ji̧. Ado tjarari̧ gupënȩ chjätä ëte pea a̧rȩdiäa̧rä, jabechji̧ ya̧mi̧ üdë dai oa cjiadërërea̧ ji̧, dai oa cjiarëremȩde, jabo tocoi̧mi̧rȩ, ütëbodë. Ya̧mi̧ codërë ui ëteräpȩrërea̧ ji̧, jabechji̧ dairäpȩ cjiadiärëremȩde jabomo̧ boi̧chji̧ma̧i̧.
Noe judi pua oa idë chjadürërea̧dejȩ yo̧a̧ri̧ oa
6Ado 40 do chjätä ëte, Noe judi are iarëremȩdejȩ darea̧ joë ya oa, jënȩ chara ana̧rä cji̧därërea̧ joë ya oa, jënȩ jëdano̧a̧rä cjiamȩ joë ya oa. 7Ado darea̧ joë ya oa are ia ëte, idë chjadürërea̧dejȩ pua oa, iuri puami̧ da oa, jabo ji̧dë u̧i̧ ana̧ chja oa. Ado jiro pua üdë, jabechji̧ oëra̧ti̧ oa paero paeroti̧ cjiariämȩrȩ pjo̧a̧ baärëremȩde chiri üdë gapadäräa̧rä yuro. 8Ja̧dëa ji̧ ji̧dë duri oa ano̧ mire idë chjadürërea̧dejȩ jotoco pua oa. ‘Jabechji̧ chiri üdë gapadäräa̧ jirodida yaba̧’ quëna̧ jo̧rȩtamȩrȩ idë chjadürëremȩdejȩ pua oa. 9Jabo cjäri̧ made, ado chjereno̧ pjo̧a̧ ma̧na̧rëremȩde chararäpȩmo̧ ui üdë jabë ji̧ra̧ oaiä, jabë chadärärea̧ to oa dadëa̧ oaiä. Jabechji̧ chiri üdë jabë dairä a̧rȩdëa̧ oaiä, ado chjereno̧ idë gatë yu̧a̧ tänȩa̧dejȩ jotoco pua oa Noe judi.
Ado chjereno̧ idë chjadürërea̧dejȩ jotoco pua oa Noe judi
10Ado Noe judi, 'Aja̧, jabë jirodida ui üdë, chiri üdë jabë gapadärädëa̧ jirodida' quëna̧ jo̧rȩtamȩrȩ jidatarëremȩde. Ado ca̧i̧ta̧ra̧ ichiri yo̧a̧ri̧ do chjätä ëte, ado chjereno̧ idë chjadürërea̧dejȩ jocoto pua oa. 11Ado do üdë burëmi̧ charä, pjo̧a̧ ma̧na̧rëremȩde orivo to pjö̧da uchja oa juimȩrȩ. Peaja̧ to go̧düa̧mȩ oa jui ma̧na̧rëremȩdejȩ. Ado Noe judi pio ju̧i̧ daea̧ oaiä, ‘jabechji̧ chiri üdë gape jädida, gapadäräpea̧ querediä tjamo̧dida' quëna̧ jo̧rȩtamȩpea̧de. 12Ado ja̧dëa ji̧ ca̧i̧ta̧ra̧ ichiri yo̧a̧ri̧ do chjätä ëte ado chjereno̧ idë chjadürërea̧dejȩ jotoco pua oa dairäpȩmo̧. Ado jabechji̧ baäa̧mi̧ baäa̧de. Ado chereno̧ pjo̧a̧ ma̧na̧dëa̧de.
Chara ana̧ri pio judiri go̧dürëreji̧ri̧dirȩ
13Ado Noe judi ui ji̧ra̧ tjamo̧ goamȩpea̧rä, 601 ui goamȩpea̧rä, jabechji̧ gaüpe bagarëremȩde chiri üdë ui marërea̧ ji̧. Tjamo̧ davä. Ui peaja̧ üdë pea tarupea̧rä, yabo baämȩ gupënȩ üdë pea a̧rȩdiäa̧rä, yabo baämȩ doro, jabechji̧ gaüpadäräa̧ oa cjiadiärëremȩde chiri üdë. Uidë mapea̧de. Ado pio ju̧i̧iä Noe judi chara cjae ina̧rea̧ pio ju̧i̧ coëno̧a̧dejȩ. Judiro̧ dairäpȩmo̧ chjadëri̧ darea̧mi̧ dari̧ coëno̧a̧dejȩ ya cjürëpe järi̧. Ado chararäji̧ri̧ pio judiro̧ ado darëreji̧ri̧diro̧jo̧ȩ chiri oa. Ui decjia oa daea̧diro̧jo̧ȩ, jabë uchja oa. 14Ado yo̧a̧ri̧ gupënȩ chjätä ëte, ado 27 dobo chjätä ëte, ui ana̧rëremȩ ui pio judi decjiapea̧de. Jabechji̧ ga maearë cjiadiärëremȩde chiri üdë. 15Ja̧dëa ji̧ Ütë tjamo̧ judi ma̧ȩ yürürëremȩdejȩ Noe ju̧i̧ ja̧di ta̧rëri̧ yo̧mȩrȩ:
16—Danȩ, chara ana̧ri pio judiri go̧düvä na̧ pumȩ pio ji̧ri̧ nö̧ta. Na̧ iei̧ pio ji̧ nö̧ta, na̧ u̧ri̧ pio ji̧ri̧ nö̧ta, na̧ u̧ri̧ ja̧ ivi pio ji̧ri̧ nö̧ta go̧düvä —yo̧a̧dejȩ—. 17Ado pua ütëbo oa peaja̧di go̧dü tänȩjȩrȩ. Jabechji̧ pio mȩa nö̧taji̧ri̧ pio ji̧ri̧ go̧dü tänȩjȩrȩ ütëbo oa. Chirirä cjo̧ro̧ji̧ri̧ pio ji̧ri̧, coë jäji̧ri̧ pio ji̧ri̧ go̧dü tänȩjȩrȩ. Judiro̧ chiri nö̧ta oa cjo̧ro̧pea̧ oa, goë jeji̧ra̧pe jäpea̧ oa go̧dü tänȩjȩrȩ —yo̧mȩrȩ ma̧ȩ yürürëremȩdejȩ Noe ju̧i̧ Ütë tjamo̧ judi.
18Ja̧dëa ji̧ Ütë tjamo̧ ja̧ ma̧ȩ pio ju̧i̧ ta̧rëa̧ oaiä, go̧dürëreji̧ri̧dirȩ. Noe judi, jibëa̧ iei̧ jini̧, jibëa̧ u̧ri̧ judiro̧, jibëa̧ u̧ri̧ ja̧ ivi jini̧ro̧ go̧dü marëreji̧ri̧dirȩ chara ana̧ri. 19Ado pua chjö̧na̧i̧rȩ peaja̧di go̧dürëreji̧ri̧dirȩ. Chirirä cjo̧ro̧ji̧ri̧ judiro̧ peaja̧di go̧dürëreji̧ri̧dirȩ coë jäji̧ri̧borë. Jibëa̧ buba go̧dü marëreji̧ri̧dirȩ jibëa̧ pumȩ pio ji̧ri̧ nö̧ta.
Noe judi goe gu̧rori̧ yürürëremȩdejȩ Ütë tjamo̧ ju̧i̧
20Ja̧dëa ji̧ Noe judi Jeova pio ju̧i̧iäpȩmo̧ yürüpea̧ oa yürürea̧ mechja oa japeno̧rëremȩdejȩ. Ado goe gu̧rori̧ yürüpea̧ oa mitërëremȩdejȩrȩ chirirä cjo̧ro̧ji̧ri̧ pio ji̧ri̧, pua pio ji̧ri̧bo. Ado pio ji̧ri̧ goe gu̧rori̧ ja̧bo tänȩ ëte, jabechji̧ cäa̧dejȩrȩ icjara oa, codë oa. Yürürea̧ mechjarä yürürëremȩde. 21Ado Jeova judi goaeri̧ pjȩa̧ cjitëmȩ pio ju̧i̧ pji̧däa̧ oaiä, jabechji̧ ja̧di dari̧ jo̧rȩtamȩpea̧de. ‘Aja̧, chiri oa adodëpaquëda, jabechji̧ pumȩ judiro̧ chjai̧dëri̧ japea̧ ba oa ado chjereno̧ japadëpaquëda, ca̧ ërecjia̧ pio ju̧i̧ ado chjereno̧ acji cjatä tänȩdëpacuni̧da, jabechji̧ pumȩ pio ji̧ri̧ chjiari dabaquëda, boi̧chji̧räcji̧ ji̧dë ma chjai̧dëri̧ jo̧rȩtaji̧ri̧diro̧da, ado pio ju̧i̧iä chiri oa adodëpaquëda, judiro̧ chjai̧dëri̧ japea̧ oaiä adodëpaquëda, ado chirirä cjo̧ro̧ji̧ri̧ ütëbodärä oa ado chjereno̧ jȩmu̧i̧ ja̧bo tänȩdëpaquiji̧ri̧da, ado pua oa peaja̧di ado chjereno̧ yuropa tänȩdëpaquiji̧ri̧da, jabechji̧ cjo̧ro̧ji̧ri̧ ütëbodäräti̧ oa ado ja̧bo tänȩdëpaquiji̧ri̧da’ quëna̧ jo̧rȩtamȩrȩ yo̧rëremȩde Ütë tjamo̧ judi, jibëa̧ ma̧na̧ri̧ jo̧rȩtamȩrȩ. Aja̧, ja̧di ta̧rëri̧ yo̧mȩrȩ yo̧rëremȩde jënȩ goaeri̧ pjȩa̧ cjitëmȩ pio ju̧i̧ pji̧däa̧ oaiä. Ado ja̧dëa ji̧ ji̧dë u̧i̧ jo̧rȩtamȩrȩ ja̧di dari̧ jo̧rȩtamȩpea̧de. 22‘Aja̧, dabu üdë cjiadiäa̧ nö̧ta, cüdë pareapea̧ dabu üdë cjiadiäa̧ nöta, jabechji̧ pumȩ judiro̧ chjadëri̧ ponȩrea̧ dapadiro̧da, chjadëri̧ guarea̧ dapadiro̧da, ado joechjapea̧rä jabechji̧ mitërea̧ dapadiro̧da, jabechji̧ jibëa̧ jurarea̧ oa jurapea̧ oa chjadëri̧ mitërea̧ dapadiro̧da, jabechji̧ dabu üdë yuropea̧rä yuro ja̧di dari̧ japarea̧ dapadiro̧da’ quëna̧ jo̧rȩtamȩrȩ yo̧rëremȩde. ‘Aja̧, dabu üdë cjiadiäa̧ nö̧ta, jabechji̧ ji̧dë ma ano̧ mire jono̧pe jä chjaopadida, uiparërea̧ ji̧ ano̧ mire jono̧pe jä chjaopadida, ado jono̧rërea̧ ji̧ ano̧ mire uipe jäpadida, ado do üdë ji̧dë ma cjitë chjaopadida, gȩnȩ decjiape bagari̧ cjitë chjaopadida, chiri üdë ano̧ mire cjüëtope bagari̧ cjitë chjaopadida, chjöchjadëpe bagari̧ cjitë chjaopadida, ja̧di maeari̧ cjiadiäpadida chiri üdë, dabu üdë yuropea̧rä yuro ja̧di maeari̧ cjiadiäpadida’ quëna̧ jo̧rȩtamȩrȩ yo̧rëremȩde Ütë tjamo̧ judi.
Currently Selected:
Taruparea̧ Ma̧ȩ 8: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
