Taruparea̧ Ma̧ȩ 10

Noe ja̧ u̧ri̧ pio ji̧ri̧ chjiari ma̧ȩde pio yodë ma̧ȩ udë

1Noe judi ëbarëremȩdejȩrȩ jibëa̧ ja ji̧ri̧. Ado pio yoa ma̧ȩ üdë pio jiro u̧ri̧ pio judiri ja̧ji̧ri̧ pumȩ pio ji̧ri̧ chjiari ma̧ȩde. Aja̧, Chȩ pio judiri ja̧ji̧ri̧ pio ji̧ri̧ chjiari, Ca̧ pio judiri ja̧ji̧ri̧ pio ji̧ri̧ chjiari, ado Japje pio judiri ja̧ji̧ri̧ pio ji̧ri̧ chjiari ma̧ȩde. Jabechji̧ ui ana̧remȩ üdë chjätäa̧ duri oa bori̧ ji̧ra̧ tjamo̧ oa nö̧rirëreji̧ri̧diro̧jȩrȩ, pumȩ judiro̧ goëje ji̧ra̧pe bagarea̧mi̧ dari̧.

Pio yodë ma̧ȩ üdë Japje pio judiri ja̧ji̧ri̧ pio ji̧ri̧ chjiari ma̧ȩde

2Japje judi nö̧rirëremȩdejȩrȩ jibëa̧ ja ji̧ra̧ oa. Aja̧, Gome quȩmȩ oa, Mago quȩmȩ oa, Madai quȩmȩ oa, Javana̧ quȩmȩ oa, Tuba quȩmȩ oa, Mechecha quȩmȩ oa, ado Tira quȩmȩ oa nö̧rirëremȩdejȩrȩ. 3Ado joja judi, Gome quȩmȩ pio judi peaja̧di nö̧rirëremȩdejȩrȩ jibëa̧ ja ji̧ri̧. Achaquëna̧ quȩmȩ oa, Iripja quȩmȩ oa, ado Togoma quȩmȩ oa nö̧rirëremȩdejȩrȩ. 4Ado Gome ju̧i̧di ja̧mȩ judi, Javana̧ quȩmȩ pio judi peaja̧di nö̧rirëremȩdejȩrȩ jibëa̧ ja ji̧ri̧. Aja̧, Ericha quȩmȩ oa, Tarichi quȩmȩ oa, Quitimi quȩmȩ oa, ado Dodanimi quȩmȩ oa nö̧rirëremȩdejȩrȩ. 5Ado Japje ja̧ u̧ri̧ pio judiri ja̧ji̧ri̧ judiro̧ ui ana̧ yuroro cjo̧ro̧rëreji̧ri̧dirȩ, ui ana̧ tjoro a̧rȩmȩ chiriräbo. Jibëa̧ chiriräpȩ cjo̧ro̧ji̧ri̧rȩ cjo̧ro̧rëreji̧ri̧dirȩ jibëa̧ pumȩ pio ji̧ri̧ nö̧ta. Aja̧, jibëa̧ bubarä cjo̧ro̧ji̧ri̧rȩ, jibëa̧ ma̧ȩ oa ni̧bäji̧ri̧rȩ cjo̧ro̧rëreji̧ri̧dirȩ Japje pio judiri ja̧ji̧ri̧ judiro̧.

Pio yodë ma̧ȩ üdë Ca̧ pio judiri ja̧ji̧ri̧ pio ji̧ri̧ chjiari ma̧ȩde

6Ado Ca̧ pio judi peaja̧di nö̧rirëremȩdejȩrȩ jibëa̧ ja ji̧ri̧. Cucho quȩmȩ oa, Miraima quȩmȩ oa, Pjutu quȩmȩ oa ado Canaa̧ quȩmȩ oa nö̧rirëremȩdejȩrȩ. 7Ado pio jiro pumȩ judiro̧ nö̧tarë, taru tjamo̧ji̧ri̧pe baga maearë nö̧rirëreji̧ri̧dirȩ pumȩ ji̧ra̧ oa, ado cja̧rȩmo̧ buba oa, ado cja̧rȩmo̧ pumȩ ji̧ri̧. Ado Cucho judi peaja̧di nö̧rirëremȩdejȩrȩ jibëa̧ ja ji̧ri̧. Cheba quȩmȩ oa, Avira quȩmȩ oa, Chabata quȩmȩ oa, Arama quȩmȩ oa, ado Chateca quȩmȩ oa nö̧rirëremȩdejȩrȩ. Ado Arama quȩmȩ pio judi peaja̧di nö̧rirëremȩdejȩrȩ jibëa̧ ja ji̧ri̧. Cheba quȩmȩ oa, Dedana quȩmȩ oa nö̧rirëremȩdejȩrȩ.

8Ado Cucho judi peaja̧di nö̧rirëremȩdejȩ Nimirode quȩmȩ oa. Ado pio judi ütëpea̧rä, jabechji̧ tjamo̧ cjo̧ro̧mȩpea̧de. Tjamo̧ yo̧rea̧ chiamȩpea̧de. Ju chia tjamo̧mȩpea̧de. Ado chiri nö̧tai̧ oa cjo̧ro̧ji̧ri̧ judiro̧ cja̧rȩmȩ co tjamo̧ cjo̧ro̧ji̧ri̧rȩ cjo̧ro̧dërërea̧ ji̧, jabechji̧ pio judi tjamo̧ cjo̧ro̧mȩpea̧de, pumȩ ba chia tjamo̧mȩrȩ. Jabechji̧ cja̧rȩmȩ pumȩrȩ pio judimi̧ dari̧ cjo̧ro̧dërërea̧ ji̧, chiri nö̧tai̧ cjo̧ro̧ji̧ri̧ judiro̧ cja̧rȩmȩrȩ pio judimi̧ dari̧ cjo̧ro̧dërërea̧ ji̧, jabechji̧ ja̧di dari̧ cjo̧ro̧mȩpea̧de. 9Ado Ütë tjamo̧ judi chjadëri̧ ae tai̧rea̧ yürüa̧ oaiä, jabechji̧ goae tarari̧ ae tai̧mȩrȩ cjo̧ro̧rëremȩde, ji̧dë ma tjamo̧i̧ cjiari̧ ae quirë cjiamȩrȩ. Ado Nimirode judi ja̧di dari̧ ae tai̧mȩrȩ cjo̧ro̧a̧ oaiä, jabechji̧ pumȩ judiro̧ eami̧ pumȩ oa daea̧ ji̧, tjamo̧i̧ cjiari̧ ae tai̧mȩ pio ju̧i̧ daea̧ ji̧, jabechji̧ "Nimirode pio judimi̧ dari̧ cho̧mȩrenȩ" yo̧ji̧ri̧rȩ yo̧rëreji̧ri̧diro̧jo̧ȩ. 10Ado Nimirode judi ana̧ri̧ ja̧bepamȩrȩ bë ma̧ri̧ ji̧ra̧ oa cji̧därëremȩde oëra̧ti̧ oa. Aja̧, cja̧rȩmȩ maea oa cji̧däa̧ ma ja̧didë, jabo ji̧ra̧ oa cji̧därëremȩde. Babe quȩmȩ bë ma̧ri̧ oa, Ereca quȩmȩ bë ma̧ri̧ oa, Achabe quȩmȩ bë ma̧ri̧ oa, ado Carane quȩmȩ bë ma̧ri̧ oa cji̧därëremȩde peaja̧di. Aja̧, China̧ quȩmȩ chiri ana̧räpȩ ju̧ri̧ cji̧därëremȩde pio jiro bë ma̧ri̧ ji̧ra̧ oa. Ado pio jiro bë ma̧ri̧ ji̧ra̧rä cjo̧ro̧ji̧ri̧ pio judiro̧ Nimirode ja̧ chja̧oerämo̧ cjo̧ro̧rëreji̧ri̧dirȩ. Jabechji̧ tjamo̧ cjo̧ro̧mȩrȩ cjo̧ro̧rëremȩde.

Currently Selected:

Taruparea̧ Ma̧ȩ 10: Pume

Highlight

Copy