Da̧de 12

Ja̧di dari̧ cjiadiäpade cjiadiäa̧ japamitërä

1Ado a̧dërimȩ mu̧i̧tjoi̧ üdë, tatari̧ cjiamȩ mu̧i̧tjoi̧ pio judi Da̧de pio ju̧i̧ ji̧dë u̧i̧ yo̧mȩrȩ ja̧di ta̧rëri̧ a̧de yo̧rëremȩdejȩ:

—Danȩ, cüdë mȩa yo̧a̧ pio judi chjätäa̧ duri oa, go̧düdäräpade Mi̧gë pio judi, na̧ pumȩ pio ji̧ri̧ tjamo̧ jidamȩ mu̧i̧tjoi̧ pio judi. Ado pio jiro japamitërä, cjäri̧ madirȩ, a̧dë chjäte chjai̧dë oa chjätäpadirȩ na̧ pumȩ judiro̧. Jabechji̧ pumȩ judiro̧ cja̧rȩmȩ co ja̧di dari̧ dadërërea̧ ji̧, jibëa̧ chiriräpȩ pearäri ja̧ cjo̧ro̧a̧ pio judiri yurori ja̧di dari̧ cja̧rȩmȩ co chjätädërërea̧ ji̧, jabechji̧ a̧dë chjäte ma̧i̧ da chjai̧dë oa chjätäpadirȩ, a̧dë chjäte goaedëti̧ oa. Jabo pio jiro japamitërä go̧ȩpea̧ oa cjiaji̧ri̧ pio judiro̧, bucho ana̧ cjo̧ro̧rea̧ joërä go̧ȩpea̧ oa cjiaji̧ri̧ pio judiro̧, jabechji̧ go̧dürea̧ dapadirȩ. 2Jabechji̧ ja̧boa̧ oa cjiarëreji̧ri̧ pio judiro̧, daburo na̧ra̧ oa cjiarëreji̧ri̧ pio judiro̧ bëdüpadirȩ. Ado judiro̧ orë bëdüa̧ oa cjiarä, ma̧ chiadëri̧ cjia tjamo̧ji̧ri̧rȩ cjo̧ro̧padirȩ bucho ana̧. Jabo o judiro̧ bëdüa̧ oa cjiarä, cjäri̧ madirȩ, a̧dë chjäte idëri̧ cjia tjamo̧ji̧ri̧rȩ cjiadiäpadirȩ, bucho ana̧ jiada̧ oa cjiaji̧ri̧rȩ. 3Ado urëdi tjamo̧ oa jo̧rȩtami̧ dari̧ jo̧rȩtaji̧ri̧ pio judiro̧, jabechji̧ tatari̧ cjiapadirȩ, a̧dë i üdë tatami̧ dari̧. Ado o ji̧ri̧ a̧dorea̧ chiaji̧ri̧ pio judiro̧, o ji̧ri̧ no̧ coëma oa jämi̧ dari̧ cjo̧ro̧pea̧ ji̧ a̧doji̧ri̧ pio judiro̧, jabechji̧ bucho ana̧ tatari̧ cjiapadirȩ büërë tatami̧ dari̧.

4Jabo danȩ Da̧de, cüdë mȩa ni̧bä chjaoa̧ ma̧ȩ üdë, jabechji̧ ni̧bä chjaodëpea̧de jabo goadimi̧ dari̧ boeapea̧de. Ado mȩnȩ pio jiro ma̧ȩ oa go̧ȩ i go̧a̧ti̧rä go̧ȩpa ëte, chjadëri̧ purijo̧ȩ. Ado puri ëte, go̧ȩ i chiri oa ji̧cha̧parȩjo̧ȩ eami̧rȩ mu̧i̧ iarea̧mi̧dëri̧, eami̧ pumȩrȩ jabërä go̧ȩ ni̧bärea̧mi̧dëri̧. Jabechji̧ cjiadiäa̧ japamitërä yuro china̧chjari̧ tutia̧ oa cjiapea̧ oa ji̧cha̧parȩjo̧ȩ. Ado danȩ, pio jiro japamitërä, cjiadiäa̧ japamitërä, jabechji̧ no̧i̧dë tjamo̧padirȩ oëra̧ti̧ oa tai̧ chjaopaji̧ri̧ judiro̧, tjamo̧ri̧ dabapatämi̧ cjiaji̧ri̧ judiro̧. Aja̧, na̧taji̧ri̧mi̧ dari̧ iëno̧ iëno̧ ta̧rë cjiapadirȩ oëra̧ti̧ oa ji̧dë u̧i̧ dabapapea̧ oa, jënȩro̧ pearä dabarërea̧ pio ju̧i̧ u̧i̧ ji̧ra̧ oa dabapapea̧ oa —yo̧mȩ oa ta̧rërämi̧ cjiaremȩreconȩ a̧dërimȩ mu̧i̧tjoi̧ oa pio coa ni̧bä chjaorërea̧ ji̧.

5Ado mu̧i̧tjoi̧ üdë pio jiro ma̧ȩ oa yo̧a̧ duri oa, cüdë, Da̧de pio judi, uëräpȩmo̧ gatë damȩrȩ darämi̧ cjiaremȩrequedejȩrȩ ado cja̧rȩmo̧ mu̧i̧tjoi̧ ji̧ri̧. Aja̧, a̧dëriji̧ri̧ mu̧i̧tjoi̧ pio ji̧ri̧ darämi̧ cjiaremȩrequedejȩrȩ yo̧a̧ri̧ oa. Cja̧rȩmȩ oa daea̧reconȩ bea oëräpȩ cjiamȩ oa, ado jadü oa daea̧reconȩ bea jauëta̧ra̧ri cjiamȩ oa. Jabechji̧ dëbëribo cjiaji̧ri̧ oa darämi̧ cjiaremȩrequedejȩre. 6Ado judiro̧ cja̧rȩmȩrȩ iëno̧ë ta̧rëa̧dejȩ ado cja̧rȩmo̧ mu̧i̧tjoi̧ oa, chjibo bërebëreai̧ tjamo̧ oa ina̧mȩ oa, bea uëmo̧i̧ cjiamȩ oa. Aja̧ ja̧di ta̧rëri̧ yo̧mȩrȩ iëno̧ë ta̧rëa̧dejȩ:

Danȩ, pumȩ judiro̧ a̧dë chjäte ma̧i̧ da chjai̧dë oa chjätärä, ¿napai̧ japamitë chjätä ëte yuropapade? —yo̧mȩrȩ iëno̧ë ta̧rëa̧dejȩ.

7Ja̧dëa ji̧ chjibo bërebëreai̧ tjamo̧ra̧ ina̧ oa cjiamȩ mu̧i̧tjoi̧ üdë, bea uëmo̧ cjiamȩ mu̧i̧tjoi̧ pio judi, jibëa̧ ichi ju dëbëribo uëräpȩmo̧ cjiari̧ ichipe cjiamȩpea̧de a̧dë iräpȩmo̧. Ado ja̧di ta̧rëri̧ dëbë yo̧a̧dejȩ ado cja̧rȩmo̧ mu̧i̧tjoi̧ oa:

—Napai̧ japamitëdë, pio jiro ma̧i̧ da chjai̧dë üdë yuropapade japamitë chjätä ëte, tjarari̧ ui codë tjomo̧ra̧ a̧de chjätä ëte. Jabechji̧ Ütë tjamo̧ ja̧ pumȩ pio ji̧ri̧ ja̧ ju chiarea̧ üdë goarijäa̧rä, judiro̧ acji jana̧ji̧ri̧ pio ji̧ri̧ dëbëpe chjaorea̧ chiadëji̧ri̧pea̧rä yuropapade pio jiro chjai̧dë üdë. Aja̧, ja̧di ta̧rëri̧ yo̧requedemȩ, bucho ana̧ cjo̧ro̧mȩ Ütë pio ju̧i̧ ja̧ dachoro cjiamȩrȩ, mȩa tjamo̧i̧ cjiari̧ baämȩ ma̧ȩ oa yo̧mȩrȩ —yo̧a̧dejȩ.

8Ado cüdë, Da̧de pio judi, dëdë, ta̧rëa̧reconȩ jabo 'pio ju̧i̧ yo̧dida' quëna̧ dabadëmȩrȩ ta̧rëa̧reconȩ. Ado pio ju̧i̧iä iëno̧ë ta̧rëa̧reconȩ:

—Jabo danȩ ca̧ ano̧mȩ, chjadëri̧ yo̧coe. Chjö̧na̧i̧rȩ yuropaparä, ¿yö̧ta dari̧ yuropapade? —yo̧mȩrȩ iëno̧ë ta̧rëa̧reconȩ bea uëmo̧i̧ cjiamȩ pio ju̧i̧.

9Ado ja̧di ta̧rëri̧ yo̧mȩrȩ dëbë yo̧a̧dique:

—Pio ju̧i̧ chjiari bücjüri̧ cjiadëvä Da̧de. Jabechji̧ mȩnȩ coa iëno̧ë ta̧rëa̧ üdë, jabechji̧ goadia̧ oa cjiami̧ dari̧ cjiadiäpade Ütë tjamo̧ pio ju̧i̧iä cjiadiäa̧ japamitë üdë ma̧na̧rä yuro. 10Ado pio yoa ma̧ȩbo a̧de yo̧requedemȩ. Danȩ, no̧i̧dë tjamo̧padirȩ Ütë tjamo̧ ja̧ pumȩ judiro̧ coëma cjiari̧ ano̧ mire cjo̧ro̧paji̧ri̧ judiro̧, jënȩro̧ coëma cjiari̧ cjo̧ro̧dërërea̧ ji̧. Jabechji̧ judiro̧ ma̧i̧ da chjai̧dë oa chjätäa̧ oaiä, judiro̧ goaedëti̧ oa chjätäa̧ oaiä, coëma cjiari̧ ano̧ mire cjo̧ro̧padirȩ, judiro̧ coëma cjiari̧ cjo̧ro̧dërërea̧ ji̧. Judiro̧ Ütë tjamo̧ judi yo̧a̧mi̧ cjo̧ro̧dërërea̧ ji̧, co chjami̧ dari̧ ano̧ mire cjo̧ro̧padirȩ, chjai̧dë pio ju̧i̧ tjamo̧ri̧ japadëri̧ cjiaji̧ri̧rȩ. Ado pio jiro pumȩ judiro̧ na̧e chiapadirȩ cüdë ni̧bä chjaoa̧ pio ju̧i̧ chjiari, pio yaba̧mȩ oa ni̧bä chjaoa̧ pio ju̧i̧ chjiari. Jabo chjai̧dë pio ju̧i̧ ji̧dë ma japatämi̧ cjiaji̧ri̧ pio judiro̧, cjäri̧ madirȩ, na̧e chiadëpadirȩ, jabo ji̧dë ma chjai̧dëri̧ jape cjiaji̧ri̧rȩ cjo̧ro̧padirȩ.

11Jabo cjiadiäa̧ japamitërä, Ütë tjamo̧ pio ju̧i̧ ana̧ri̧ dëbëpe chjaomȩ pio judi ma̧i̧ dari̧ japapade. Jabechji̧ pumȩ judiro̧ Ütë tjamo̧ ja̧ bëräpȩ ju̧ri̧ doti̧mi̧ goe gu̧rori̧ cäë yürürërea̧ ji̧, cjäri̧ madejȩrȩ, japarea̧ yürüdëpadejȩrȩ. Ado pio ju̧i̧ uëri a̧dë chjäte ma̧i̧ damȩ pio ju̧i̧ are cji̧däpadejȩ Ütë tjamo̧ ja̧ bëräpȩ, pumȩ judiro̧ teracaba pio ju̧i̧ ano̧ mire chjacjiamȩri̧ jo̧rȩtapea̧ oa. Tjamo̧ davä. China̧chja tjamo̧ pio ju̧i̧, Ütë tjamo̧ pio ju̧i̧iä a̧dë chjäte goaedëti̧ pio ju̧i̧ are cji̧däpadejȩ. Ado danȩ, judi ja̧di dari̧ are cji̧dä ëte, jabechji̧ Ütë tjamo̧ ja̧ pumȩ pio judiro̧ gitoi̧ dari̧ conȩda̧ oa cjiapadirȩ 1.290 do nö̧ta. 12Ado pio yoa ma̧ȩbo a̧de yo̧requedemȩ. Danȩ Da̧de, Ütë tjamo̧ pio ju̧i̧ ma̧ chjua jidataji̧ri̧ pio judiro̧, 1.335 do nö̧ta Ütë tjamo̧ pio ju̧i̧ chjuari̧ quëna̧ji̧ri̧rȩ jidataji̧ri̧ pio judiro̧, jabechji̧ ma̧ chiadëri̧ cjia tjamo̧padirȩ.

13Jabo mȩnȩ Da̧de, bücjüri̧ cjiamȩrȩ cjo̧ro̧dëvä, jabo jabechji̧ Ütë tjamo̧ pio ju̧i̧iäpȩmo̧ ji̧dë ma chjuari̧ quëna̧mȩrȩ cjo̧ro̧vä mȩnȩ ja̧boa̧rä yuro. Ado ja̧dëa ji̧ cjiadiäa̧ japamitërä, jabechji̧ bëdüparenȩ Ütë tjamo̧ judi yürüpea̧ pio ju̧i̧ mitëpea̧ oa, mȩnȩ pio ju̧i̧ ja̧ oa chjadëri̧ ja̧bepea̧ ba oa mitëpea̧ oa —yo̧mȩrȩ ni̧bä chjaomȩ oa ta̧rërämi̧ cjiaremȩreconȩ mu̧i̧tjoi̧ oa. Ado judiri cjiadiäremȩde.

Currently Selected:

Da̧de 12: Pume

Highlight

Copy