Matiu 8

Jesu Iva Velake Valeke I Pala Mokoso Voremake

(Maka 1.40-45; Luka 5.12-16)

1Maramuzina Jesu i qoqoro me kubolo ne, topu sasakata basoero iri lulu muzi ne ia. 2Gonae kaki valeke i pala mokoso voremake i lamae, de ikoego Jesu. I koloku tutuṉue tarakenaqana Jesu igo, “Batu, ṉalu aro qo soko go, qo mazala va velakava era.”

3Jesu i kazara ne karisina mana isiba valeke ne igo, “Qatoqe ne, ono velaka to.” Gonae voremake ne ikasi ne valeke ne. 4Jesu i sine ne valeke ne, “Oniki va gata ze kaki basoe, do ono za totoloṉe so dekoe patere go mara toere go. Mana ono zazu ne sosovolomo i sine bana go Mosese, go basoero ne tarina vaogoti go aro qo velaka to.”

Jesu Iva Tavoisi Valeke Zazu Ia Batu Ria Vano Soldia Na Rom

(Luka 7.1-10)

5Jesu i zae Kapanaum. Ṉalu iza doka ia i lama kaki batu ria vano soldia, i pene Jesu mara tavisi ne igo, 6“Batu igo, kakia valeke zazu era i mokoso iko me komala ne. I makure va vizu na tokamana mana i lete vokarego.”

7Jesu i sine ne ia, “Na garetu tanuqu ara va velake go”.

8Batu ria vano soldia ne igo, “Batu, ki torava kaega tuna va keba zigo pade era. Seko so aro valeke zazu era mazala so velaka go. 9Era tanuqu do iko nava so mazala, qa koe pola qira batubatu lavata ro remu, topu napu ria vano soldia ro iri koe polaqu era, ṉalu qa sine ne era kaki valeke, ‘Ono za,’ ia iza mana ṉalu qa koru, ‘Lamae dena qa go era,’ ia i lama, valeke zazu era ṉalu qa sine ne, ‘Ono zazu ne pata dena,’ ia i zazu ne.”

10Ṉalu Jesu i gata sekoro dena, i nureke mana i sine ne qira basoero iri lulua go, “Ma sine ne qamu pata ogoto, igo Jesu kaega kaki basoe na Izirel qa soba ze vaogoto i gere go vaogoto ia valeke dena. 11Ma sine ne qamu pata ogoto, topu basoero tarina reqe mego osina dia kolabana pua tarina kelo tavisi qira Abra-am, Aisak, mana Jekop go tarina ṉaṉa tavise go Too ikoego vari miasoka ia God. 12Do basoero ivine bana qira go God tarina koego Too ikoego vari miasoka ia ne, ria nae to God tina kale vasiporo napu qira qe de i rodoko go. Dego tarina za dae mana vari kizaka ne saqe qira go.” 13Gonae Jesu i sine ne batu ria vano soldia, “Gado ule za komala aro, tanego qo vaogote God, mana valeke zazu aro tina tavoisi.” Torana so nae valeke zazu ia batu ria vano soldia ne i tavoisi to.

Jesu Iva Velaka Qira Topu Basoero

(Maka 1.29-34; Luka 4.38-41)

14Jesu i zae pade ia Pita mana iza mia qole ravana Pita i pala mokoso poloqotoro mana i kekele vesu ia. 15Jesu i siba ze karisina gonae i tavoisi, mana i tapa degere i vanama ne pata gege Jesu.

16Raravi nae basoero ne iri valama qirae de i koe Jesu topu vano i kakabu qira manuru sakata ro. I kameka seko so Jesu kasi ne qira so go basoero ne manuru sakata ro ne. Mana ria iri mokoso go iva tavoisi lupo qira. 17Jesu i zazune pataro dena go tina vavoto seko ro i sine bana propeta Isaia, “Ia i pala vakuziki ne soso mokoso ro mana vokara ro ita. Mana i kakale vazao qira pataro iva mokoso qita go.”

Pataro Tina Toqe Ne Vana Nena Basoe I Soko Luluna Jesu

(Luka 9.57-62)

18Ṉalu Jesu i mia qira topu sasakata basoero iri lama teṉo kolo go, ia i sine ne qira disipoloro ia, mata zae kedo kava masi Qalili. 19Kaki kameka ria vano tarove na tamana i lama mia Jesu igo, “Batu, era qa vanama neto kade tono zae to aro lulu go so.”

20Jesu i sine ne ia, “Sika piru ro i ko de kamukamu ria mana pale ro i ko kubasa ria, do Tuna Basoe i kaega kade tina zakoe go tina ziṉo velake go.”

21Kakia valeke napu, kakia so ria disipoloro ia, igo, “Batu, kenaqana go ṉara lulu go, era ma gado tekere komala za vovua mamae iara le so.”

22Do Jesu igo, “Aro ono lama disipolo rera, vano le mara vari vou tanuqira.”

Jesu Iva Bule Sokoro Lavata

(Maka 4.35-41; Luka 8.22-25)

23Jesu i goe koluka ne, mana ria disipoloro ia iri lulua go. 24Iri ara za dokae so ria vari lobori na masi pipika ne i lama kameka sokoro lavata i lama vae koluka ne mana ubolo lavatana masi ne i lama sapua koluka ne mana ivele zunu to go. Do Jesu i kamuku so. 25Iri za ria disipoloro ia zava dogara, mana iri sine ne, “Vakavele qita, Batu,” iri go. “Qata garogaro vele oraṉa to.”

26Jesu i sine qira, “Avigo tane qamu lete sareki go? Vaogoto ramu dekoe God i lete suka bana so.” Gonae Jesu i degere i sine ne sokoro mana tubitubina masi tina bule. Goto nae sokoro ne i mamanava to mana masi ne iara lete bule velaka to, igo.

27Osiqira iri nureke lupo. Iri go, “Ava basoena bana tane dena? Patavolomo sokoro mana masi, do iri vaogote so pata i sine ne qira go.”

Jesu Iva Velaka Qiru Karua Valeke I Siqane Qiru Manuru Sakata

(Maka 5.1-20; Luka 8.26-39)

28Ṉalu iri za dokae kene tepa na masi pipika ne, tepa kena na Gadara, Jesu isoba qiru karua valeke i saqana qiru manuru sakata. Karua valeke dena, iru koego lena iri taru qirae vanole ria vano Jiu. Iru poro varitara e de iri koego basoero ne, iago i makuru ka basoe tina za garogaro qiru go. 29Ṉalu iru mia Jesu, iru koru va lavata, “Ava na tane qo soko qemue go remu Tuna God? Iara kaebo doka ṉalu ia do, qo lama go do vakimata bana qemu to remu qo go?”

30Garogaro na dego iri koe topuna boko ro iri ṉaṉa. 31Gonae manuru sakata ro ne iri pene Jesu, “Ṉalu qo kakale va siporo qemu ego riru dena, ono vazao qemue de iri koe go topuna boko ro ne.”

32Jesu i sine ne qira, “Muna za,” gonae iri kasine qiru riru iri totoloṉo zaso de iri koe boko ro ne. Pasi nae topuna to bokoro nae iri teteṉe za rikisina baba ne soru za masi ne uqi lupo so iri go.

33Ria iri miasoka go boko ro ne, iri paqa gado za komala. Iri za pepeua pataro i sadaka go mana iri za pepeu napua riru i siqana qiru manuru sakata ne. 34Gonae osiqira to basoero ria iri koe komala ne, iri za mara za soba Jesu iri go. Ṉalu iri za mia Jesu iri sine ne ia mara kasi ne kena ria iri go.

Currently Selected:

Matiu 8: VRSNT

Highlight

Copy