Génesis 50

Isaeli a lä didiqueno wejei tä a̦

1Bä fö̦ö e bufi lobe fa blocodalunö, yedu Josénö a nomöa däbolanö a fa̦locolema. Wäyäcu jo̦cocoablalama.

2Täbä a̦ waidou däjä, cama ai ebä nija José a wa̦ fama, Ejidoteli bä nofi jalili lä läbono wejei bä nija. Bä fö̦ö e jode jaöo mlaobä, nö li̦yoli toubänö, a jölöcamaö bufima.

Inaja a cuu ja, bä nofi jalili lä läbono wejei bä lä cuinö, Isaeli a nomawä jölöcamaje. 3A jölöcaö showaoje däjä, 40 tä mö didi mladamalemaje. Showadi inaja nomawä bä nö shino dedemaö cuaamaje. Ejidoteli bänö, a nomöa bou showaoje däjä, 70 tä mö didi cublaliyoma. 4A nomöa lä bou wejei tä fa waiconö, bada ebä nija, José a wa̦ fama.

—Cafä wamacönö wamale nofimabä ya waiquiwä ja, wamale nofi da ojodadalö. Bada nija, wamale a̦fa da wäyä, ¿ö̦jö tawä? Wama a wa̦libä. 5Fayänö wale a̦ nö wäamaö ja, abinaja a cuma. “Ya bufi mlaaö a lä cuimadi”, a cuma. “Canaana jamö ya didiobä, maa maca ca̦i lä cule, ya tä ulifi tabou waiquia. Ö̦jamö wale yai didiabä”, a cuma. Inaja a cuma cudeenö, ö̦jamö lä ya nia juu. ¿Ö̦jö tawä? Ö̦jamö ya fa dolequebofälönö, iba ya didiajalayobä. Ö̦jö däjä, eja ya nia waloo co̦o—José a cuma.

6Bada anö José a wa̦ juaö ja, abinaja e cuma.

—A da dolequebofälö, ö̦jö lä. Ö̦jamö faafä a didibalöcölö, wa wa̦ nö wäamaö ja, a lä cuno weinaja showawä —e cuma.

7Einaja a fa cunö, bä fö̦ö e nia lä didiaö wei jamö, Josénö bada bä bluca ca̦i dolequea showabefälöma. Bada a nija bä lä yädäono wei bä bluca ma cui, cama bada e yafi jamö bä lä läono wei bä ma cui, Ejidoteli bä bluca bada lä cublaono wei bä ma cui, José nija bä bluca jödödöwä yaulayoma.

8Cama José ebä ca̦i bluca juma. Cama mashi ebä ma cui, bä fö̦ö enö bä ca̦i bluca lä cuono wei bä ma cui, bä ca̦i bluca aa showalayoma. Cosena jamö, ijilu oshe bä shino cuo feyaama. Yalo oweja ebä ma cui, baca ebä ma cui, ö̦jö ebä bluca ca̦i cuo feyaaö showaoma.

9Bä bluca fa co̦camolufälönö bä ayoma. Läläamodima bä ja, ai bä fa lucälönö, cabayo jamö ai bä fa döcäicunö, bä befi ca̦i bluca dolequebefälöma. 10Jodana u jamö bä fa bucadubalunö, tä lä wawädole jamö, Josénö bä ca̦i yanöcödaliyoma. Adada jamö, showadi nii bä lä lo̦shiblamou wei jamö, Jacobo a nomöa bou showaoje däjä, 7 tä mö didi cublaliyoma. Bä a̦ nacläama. Bä a̦ nö dedeama.

11Ö̦jamö Canaanateli bä lä bälöblaono wei bä lä cuinö, bä yododoa dalalemaje. Adada jamö, showadi nii bä lä lo̦shiblamou wei jamö bä a̦ fa ji̦liläjenö,

—¡Shädayai! —bä cuma—, Ejidoteli ¡bejedi lä, bä a̦ nö bleaaö lä cule! —bä cuma.

Ö̦jö cudeenö, tä a̦fa ulifi Abemilaimi jilaquemaje, Jodana u bucadu mashi jamö tä ulifi lä cule.

12Inaja bä fa cuaanö, Jacobonö bei ijilubö ebä nowa lä tano weinaja, inaja showawä bä cuaaö cadidoma. 13Canaana tä jamö, a befi ca̦i nomawä fa bälacöjenö, Mabela jamö a ca̦i waloquemaje. Mamle tä lu̦locu jamö, motoca a lä faimaö wei tä mashi jamö, a ca̦i fa waloicujenö, ö̦jamö lä, maa maca lä cule jamö, a didiquemaje. Cama ebä nomawä didiobä, idida Eflono a lä cui nija, Ablaamönö tä ulifi jaba lä däleno wei jamö.

14Bä fö̦ö e fa didicöfälönö, Ejido jamö José a co̦a co̦layoma. Cama mashi ebä ma cui, cama bä nija bä bluca lä yauono wei bä ma cui, bä ca̦i bluca co̦a showalayofälöma.

Josénö cama mashi ebä

nofi lä ojodabono wei tä a̦

15Bä fö̦ö e bufi lä mlaqueno wei däjä, José ebä mashi lä cui, bä nofi jo̦lijioma. Abinaja bä nowa tayoma.

—José bäma a nö lä bleaamano wei tä nowa ja, tä nowa tabou showaa bäa fa cule. Ei däjä a nö yai yua bälayou fa cui —bä nowa tayoma.

16Inaja bä nowa fa tayolunö, José nija tä a̦ wäamaö bufimaje. Abinaja bä cuma.

—Fayä a bufi mlao showao mlao däjä, yamalecö yömölalema. 17“José nija bä a̦ da fa”, yamalecö nowa tama. “Wamacö doblou lä mlaono wei, tä nowa tabou mlaobä. Wama a nö lä bleaamano wei, tä bufiblaö mlaobä”, a cuma. ¿Ö̦jö tawä? Bei. Fayänö Yai Bada a lä bufiblano wei a lä cui, ö̦jö yama a wa̦ juabä yama ecö mö feduwä malä cui. Yamacö doblono lä mlai tä ja, yamalecö nofi da asibo, jai yamacö nofi jushuanomi wa cuobä —bä cuma.

Josénö bä a̦ lä ji̦lileno wei däjä, bä nofi jo̦lijibou ja, a ö̦cölayoma.

18José nija, cama mashi ebä icua fa nomöjöicunö, bä fa blaoiquiyonö, bä möfe bluca booyoluma. Abinaja a nowa tamaje.

—Bei. Cafä wa nosie juamobä yamacö— bä cuma ma cui, 19abinaja Josénö bä nowa tama.

—Bä quili dijä. Camiyänö ya tä nowa tabobä yami. Yai Bada tä malä cule. 20Cafä wamacönö, wamale nö bleaamabä wama tä ma tano wei ma cui, Yai Bada tänö tä liyäjäblamalema. Yanowamö bluca täbä demi cuo fe yadiobä, tä cadejeblalema. Täbä malä demi wei. 21¿Ö̦jö tawä? Bä quili dijä, ö̦jö lä. Wama bä ca̦i bluca lä cule, showadi bämacö nia bayeliblaö. Cafä wamacö ma cui, afä bä oshe ma cui, wamacö jo̦limou nö bleaaö mlaobä, bämacö dobäö wä— a fa cunö, bä bufi lojodomaboma.

José a wa̦ fa ji̦liläjenö, bä bufi dodijidablou co̦layoma.

José a bufi lä mlaqueno wei tä a̦

22Inaja tä fa cublalunö, Ejido jamö José a bälöo showaoma. Bä fö̦ö enö bä cai̦ jaba lä cuono wei bä lä cui, Josénö bä ca̦i cuo juoma. A demi bälöo showao däjä, lasha 110 a fa famalönö, a bufi ya̦cumö mlaquema.

23José a nomaö showao mlao däjä, bei ijilubö Eflaini nija, bä fääshä ebä lä wawäblaliyono wei ebä dalalema. Bä fääshä ebä ma cui, cama bei ijilubö ebä ca̦i dablaö nodio showaoma. José bei ijilubö ai a lä cui nija, Manasesi a lä cui nija, bä fääshä ai e ca̦i dalalema. Maquili e a̦fa cuoma. Ö̦jö Maquili a lä cui nija, bei fääshä ai ebä lä wawäblaliyono wei ebä ca̦i dablaö nodio fa showaonö, bä nofi bluca ibaboma.

24Ya̦cumö, cama mashi ebä nija, José a wa̦ fama.

—Ya bufi mlaaö a lä cuimadi. Ö̦jö ma cui, Yai Bada tänö wamacö fe nia waloo juoyoluu. Wamacö nia co̦aö. Tä a̦fa ulifi jaba lä wäyäno wei jamö, wamacö nia lulubou co̦ofälöö. Ablaamö nija ma cui, Isaacö nija ma cui, fayä Jacobo nija ma cui, a wa̦ nö wäo malä balöono wei —a cuma.

25Ö̦jö däjä, Isaeli bei ijilubö ebä a̦ nö wäamaö ja, abinaja José e cuma.

—Wamacö bayeliblabä, Yai Bada tänö wamacö fe nia walou. Wamacö nia ca̦i dolecou co̦ofälöö. Wamacö dolecou co̦ofälöbä jamö, wamale ubä fa co̦länö, wamale ubä ca̦i co̦ofälöbä —a cuma.

26¿Ö̦jö tawä? Lasha 110 a fa famalönö, José a bufi fa mlaicunö, a nomawä jölöcölemaje. Ö̦jamö lä, Ejido jamö, fii fi ca ja, showadi bä nomawä didiaö lä taano wejeinaja, a didia taquemaje.

Currently Selected:

Génesis 50: GUU

Highlight

Copy