Génesis 49

Jacobo ö̦jö cä lä a wa̦

nö lä wäono wei tä a̦

1Ö̦jö däjä, Jacobo bei ijilubö bluca ebä fa nacamalänö, abinaja a cuma.

—U̦asi, bä da yododoiquiyo. Cafä wamacö nija tä nia obi lä cublou wei, ya tä a̦fa wäabä. 2Ijiluyä wamacö lä cui, bä da co̦camoyo. Faafä Jacobo yamale a̦fa lä jilabou wei, Isaeli yamale a̦fa ca̦i lä jilabou wei wamale a̦ ji̦liabä.

3’Lubeni wa lä cui, cafä wa balöwä. Ya nö jaba lä wa̦lojano wei däjä, bäfä lä taqueno wei, ö̦jö wa. Ya jaba fiyao däjä, ya jaba lä lojodoano wei däjä, cafä bäfä jaba taquema. Cafä wa nofi yai doablamobä wa cuoma. Wa nö yai wa̦lojabä wa cuoma ma cui, 4mau ubä ja̦amoimi lä culenaja, cafä wa cuwä dicowä. Faafä ya lä cui, camiyä ya yai yacaobä tä ma cuono wei ma cui, wa icua fa dicoicunö, wa yawelemou dicooma. Ö̦jö cudeenö, wa nofi nia doablamoimi. Wa nö nia yai wa̦lojaimi.

5’Simeoni, Lewi wafäcö lä cui, cafä wafäcö nomöjöwä. Wafäcö dobloimi mö feduwä. Shocobi wafä bä lä tabole, wafäcö waitelimou bufi fa doblaonö, wafä bä tabou. 6Wäfacö a̦ lä shomiablalou wei däjä, ya lulumamou mlaobä, ya bufi läo. Cafä wäfacö nija ya yädäo mlaobä, ya bufi wasöo. Wäfäcö shino jushudou fa dodijioblonö, wafä täbä shäö si malä ijejei. Yalo baca bä ma cui, wafä bä jalili nö bleaamaö bufi malä doblao wei. 7Wafäcö lä jushuodii wei tä nowa ja, wafäcö nö bleaaö buo. Wafäcö nö malä quiliadii wei. Wafäcö nö wa̦lowä lä jushuodii wei tä nowa ja, cäcöbö nö bleaaö da bädao. Ai wafä täbä nö bleaamaö bufi malä doblao wei. Wafäcö nia bälöo lojodoo juo bashiomi. Iba ai bä nia yai bälöo lä lojodoo wei jamö, wafäcö nia co̦cablalou cuaaö. Isaeli nodiwä ai ebä lä bälöblai jamö, wafäcö nia shedecou cuaaö.

8’Judawä wa lä cui, cafä wa nomöjöwä. Bä nö lä nabämou wei bä nija, cafä wa nö nia shino wa̦lojaö ayao. Afä mashi bä nija, wa nofi nia doablamou. Ijiluyä bä lä cui, cafä nija bä möfe nia boo.

9’U̦asi. Cafä öla ocalo a waiteli lä culenaja wa cuwä. Wa nia fa niyablaonö, wa yäläalio. Wa fa isholunö, wa co̦a co̦layou. Inaja wa cuo däjä, ¿wedinö cafä wa li yabäcaö cuquei? 10U̦asi, Judawä. Cafä wa lä cui, showadi wa nö nia yai wa̦lojaö. Showadi wa bada nia läo. Afä bä nia lä nodiblou wei bä ma cui, bä nia ca̦i bada läo nomöjöo. Bä bluca bälöblawä lä yaiblai bä lä cuinö, showadi wa dobäbeje, bä nia waloo. Showadi wa nosie nia juaöje.

11’Wa ulifibö nö nia nijio. Uba shitobö bluca cudeenö, yalofä bä ma cui nija, wa shito jenabä nia nowamaimi. Yalofä bulo a ma cui, ö̦jö shito showawä ja, wa nia o̦cabou. Shitobö yai lä dodijidai shitobö ma cui, ö̦jö yalofä ijilubö a ma cui nija, wa shito jenabä nia ca̦i wamaö. ¿Ö̦jö tawä? Afä uba nashiwä toubä ca̦i bluca cudeenö, ö̦jö toubä ja, camishifä wa bä yaluu fa cunoja, toubä nö comi shee jäblou fe yadilayobö wei. Toubä ou fe balojowä cudeenö, ö̦jö toubä ja, afä camishi dodijidawä wa bä yaluu fa cunoja, toubä nö feiblou fe yadilayobö wei. 12Toubä bluca yalo, showadi wa mamocu nia wacäaö. Yalofä baca bä sujubä ca̦i bluca cudeenö, showadi wa nacö nia auo.

13’Sabulono wa lä cui, cafä wa nomöjöwä. Modu u bada casö jamö wa nia bälödio. Cafä nijamö, täbä madofi nomöjayolubeje, showadi dodijidawä wa täbä canawäbö ebä nia bada ca̦mabou. Sidono tä ulifi jamö, afä tä ulifi casö nia wädöo.

14’Isacala wa lä cui, cafä wa nomöjöwä. Yalo bulo a lä culenaja, cafä wa cuwä. A ma lojode wei ma cui, ö̦jö a ja, bä madofi bluca fa maqueacöjenö, bä ca̦i yäläo däjä, a nia ca̦i jocäblou buomi. 15Dodijidawä wa nia bälöoma. Wa yanöcöobä, wa tä ulifi dodijidawä dalalema. Ö̦jö ma cui, cafä nija jude tä nia lä yefiamano wejei däjä, wa fa loblalunö, wa ubladou co̦daanomi dicowä. Cama bä nosie juamobä, wa tabou nomöjöoje.

16’Dani wa lä cui, cafä wa nomöjöwä. Cafäteli wamacö nija, wa nia bada läo. Camiyä Isaeli ya lä cui, iba ai bä nodiwä bälöblawä yaio lä culenaja, afä wa bä ca̦i cuo mö feduo wä. 17Bei yo casö jamö, olu cäcö waiteli läo lä culenaja, cafä wa nia cuo. Cabayo ajamö, bä nö lä nabämou wei bä befi ca̦i läläaö jayuaö däjä, olu cäcö läa mö fa baalunö cäcö isholayou. Cabayo a mamicö si wädöa fa jayuläfälönö, a ninili yudulayou. A fa yudulunö, a lä döcäo wei, bei jumabö jamö a quelayou.

18’Cafä Jeobaa wa lä cui nija, yamacö nia lä bayeliblamou wei, bejedi lä, ya tä a̦ nofi mölabou.

19’Cadö wa lä cui, cafä wa nomöjöwä. Cafä wa nabä ma queo wejei ma cui, wa täbä nia yashublaö showadao.

20’Aselo wa lä cui, cafä wa nomöjöwä. Cafä wa ulifibö nö nia shino nijio dodijio. Bada täbä yai lä bälöo wei täbä ma cui nija, cafä wa niibö nia bufiblamou.

21’Nefitali wa lä cui, cafä wa nomöjöwä. Jaya a ja̦blou fa mlacunö, a läläaö dodijidawä lä culenaja, cafä wa cuwä. Bei ijilubö ebä dodijaö nodiabä, bä wai liyäjäwä tablaö.

22’José wa lä cui, cafä wa nomöjöwä. Too totobä nö lä nijiblou wei shitobä lä culenaja, cafä wa cuwä. Showadi mau u lä faö wei u casö jamö, shitobä nö niji lä culenaja showawä. ¿Ö̦jö tawä? Shitobä ca̦i calalu fa̦yocaö ösöaö blaucou lä cuaaö weinaja, cafä bei wa cuwä. 23Bä nö lä nabäono wei bänö, wa nabä ma quequeno wejei ma cui, wa ma shu̦lucublaano wejei ma cui, wa nö bleaamabeje, bä nosi ma blacäcono wei ma cui, 24afä fa̦do wa nafi jujei mlai ja, wa nafi lojodobou fe yadio showaoma. Yai Bada a nö lä wa̦lojaö wei a lä cuinö, camiyä Jacobonö, iba ya lä bufiblaö wei a showawä lä cuinö, wa imicö moyawämaboma. Ö̦jö Yai Bada a lä cui, Cama oweja ebä ca̦i lä juu wei, a wa̦fa ca̦i jilabouje. Isaeli a nofi yashuobä maa ma lä blei, a wa̦fa ca̦i jilabouje. 25Ö̦jö Yai Bada a lä cui nija wa bayeliblamoma, camiyä faafä ya lä cuinö, iba ya lä bufiblaö wei a showawä lä cui nija.

’Yai Bada a nö lä wa̦lojaö wei a lä cui nija, wa bayeliblamou lä waiquilayono weinaja, ¡showadi wa bayeliblamamodibä! Fedu jamö u lä taboladi u ja, maa a fa shömanö wa bayeliblamobä. Co̦jomo jamö u lä tabole u ca̦i ja, wa nö bayeli fa famanö, wa ulifibö jälälämabobä. Ö̦jönö wa yai fa bayelibonö, ijilufä bä bluca yai cuobä. Yalofä bä ma cui, inaja showawä, bä balamaö cuobä.

26’U̦asi, faafä ya lä cui, ¡bejedi lä ya bayeliblamolayoma! Bei mabä lä ba̦limi wei, ö̦jö mabä ma bufiblamou wei ma cui, camiyä nija tä nö bayeli yai lä wäbeno wejei, tä yai bejedi cublaliyoma. Bä jefu cua shi lä wa̦lile, ö̦jö bä ca̦i ma bufiblamou wei ma cui, iba a yai lojode. Camiyä wale bayelimaöje ja, bä lä cuno weinaja, ¡tä yai cublou dodijilayoma! Showadi camiyä ya bayeliblamou lä cuono weinaja, cafä wa taamamou cuo juo nomöjöobä. Afä mashi bä nija, wa lä yaimolayono wei wa lä cui, ¡inaja wa bayeliblamou cuo nomöjöobä!

27’Bejamino wa lä cui, cafä wa nomöjöwä. Ji̦ima ulifitelimi bänö bä nabä queoje ja, bä waiteli läläo lä culenaja, cafä wa nö wa̦lojaö cuwä mö feduwä. Wa nabä quea fa fenaicunö, wa walei. Shee tä ya̦jicö lä cui, wa tä ya̦jicö weyade shedequeblalei —Jacobo a cuma.

Einaja Jacobonö bä ijilubö ebä nowa taö ja, a cuma. 28Ei bä bluca lä yömölano wei, Isaeli bei ijilubö 12 ebä cuoma, bä nia bälöo yaio lä juono wei. Inaja bä fö̦ö enö bä nowa bluca tama, a wa̦ nö lä wäono wei däjä. Bluca ebä nija a wa̦ fadou fa cuaanö, tä nö lä cublaliyobö weinaja, inaja showawä bä nowa tadama.

Jacobo a bufi wa̦lobada

lä mlaqueno wei tä a̦

29Ö̦jö däjä, bei ijilubö ebä yömölalema. Abinaja e cuma.

—Fei däjä ya bufi mlaaö a lä cuimadi, iba bada bä jaba lä culaliyono weinaja showawä. ¿Ö̦jö tawä? Canaana jamö, iba bada bä lä didiblaano wejei jamö, yamale didia mö feducu. Idida Eflono a wa̦fa lä cule etä ulifi jamö, maa maca lä cule jamö. 30¿Ö̦jö tawä? Canaana jamö, Mabela jamö maca ca lä cule jamö. Mamle tä lu̦locu jamö, motoca a lä faimaö wei tä mashi jamö. Cama ebä nomawä didiabä, ö̦jö idida Eflono a lä cui nija, Ablaamönö tä ulifi lä däleno wei jamö. Maa maca befi ca̦i lä lululeno wei jamö. 31Ablaamö a ma cui, bei suwäbö Sara a ma cui, Isaacö a ma cui, ö̦jö bei suwäbö Lebeca a ma cui, ö̦jamö showawä bä bluca didia. Ö̦jamö Leami a ma cui ya nomawä ca̦i didiquema, 32idida bä nija, maa maca befi ca̦i lä däamono wei jamö —a cuma.

33Bei ijilubö ebä yömölaö ja, a wa̦ lä waiblole däjä, ö̦jö däjä showawä a fa buushidaicunö, a fö̦shöacö mladaliyoma, cama bä nö badabö lä culaliyono weinaja showawä.

Currently Selected:

Génesis 49: GUU

Highlight

Copy