Génesis 48

Jeobaa nija, Jacobonö bä fääshä

cäcöbö lä bayelimano wei tä a̦

1Tä nö fa dedejedalönö, Josénö bä fö̦ö e a̦fa jalili ji̦lilema. E a̦fa jalili fa ji̦lilänö, bei ijilubö ecöbö fa nacaläfälönö, Manasesi, Eflaini sho cäcöbö ca̦i ayoma. 2A jalili lä blaono wei jamö, Jacobo a yömölalemaje. “Ijilufä José a waloquei lä cufe”, ebä cuu ja, Isaeli a bufi fa lojododalunö, a diböblaliyoma.

3José nija abinaja Jacobo a cuma.

—Canaana jamö ya cuo däjä, Lusi tä ulufi jamö, camiyä nija Yai Bada tä nö lä wa̦lojaö wei tä fa wawäblalunö, ya nia lä bayeliblamono wei tä a̦fa wäbema. 4Abinaja wale nowa tama. “Bei. Bämacö fa balamalönö, ijilufä bä nodiwä nia blucablou. Bä bluca bälöjou yaiblamou cuaabä, ya bä nia tablamaö. Ei tä ulifi lä cui, ijilufä bä nodiwä lä cuinö tä tabou lojodoo shi wa̦lii juobeje, ya tä ulifi nia jöböaö”, a cuma. 5¿Ö̦jö tawä, U̦asi?

’Eja ya waloo showao mlao däjä, ijilufä wa cöbö lä taqueno wei, Eflaini a lä cui, Manasesi a ca̦i lä cui, ö̦jö iba cäcöbö li ca̦i waiquiwä. ¿Ö̦jö tawä? Yai Bada tänö tä a̦fa ulifi lä wäbeno wei tä ulifi ca̦i tabou juoböbä, ya wa̦. Ijiluyä Lubeni, Simeoni cäcöbö lä cui, iba cäcöbö nofi tabou lä cuaaö wejeinaja, cäcöbö nofi ca̦i tabou mö feduobeje. 6Ai bä cublou lä nomöjöo wei, afä bä li cuobä. Ö̦jö bä lä cui, iba bä nofi tabou ma mlajei ma cui, bei a̦iyobö ecöbö nija, bä fa yädäblalunö, Yai Bada tänö tä a̦fa ulifi lä wäbeno wei jamö, bä co̦cao weicätä.

7’Naafä Laquela nija ya bufi nofi jushublaa showaa yalo, ya wa̦ malä cui —a ca̦i cuma—. Badanalama jamö culanö ya juimaö däjä, a bufi malä mlaqueno wei. Canaana jamö, Eflada tä jamö ya ca̦i blajawä juu showao däjä, yamacö ö̦cöma. Eflada yo lä shadile yo casö ja, ya nomawä didiquema. Eflada tä ulifi lä cule, Belena tä a̦fa ulifi ca̦i lä jilabolajei jamö —a Jacobo cuma.

8Ö̦jö däjä, Isaeli a lä cuinö, José bei ijilubö ecöbö fa dalalönö, cäcöbö wa̦lima.

—¿Fei wedi ecöbö li? —a cuma.

9—Ijiluyä cäcöbö. Eja Yai Bada tänö cäcöbö lä jöböbeno wei cäcöbö —José a cuma, bä fö̦ö e nija.

—Cäcöbö ca̦i da ajedoima, ¿ö̦jö tawä? Jeobaa nija, ya cöbö bayelimabä —a cuma.

10¿Ö̦jö tawä? Isaeli a wa̦lobada fa jubäböonö, manashi täbä möö bädaoma. Inaja tä fa cuonö, Josénö cäcöbö ca̦i ajedequema. Jacobonö cäcöbö fa̦locolanö cäcöbö judädama. 11José nija abinaja Isaeli a cuma.

—“Ijiluyä ya nö dablaö co̦daabimi”, ya bufi ma cuno wei ma cui, fei däjä, bäfä dablaö lä cule. Cafä bäfä shino dablaö ayao mlai, ijilufä cäcöbö ma cui, Yai Bada tänö cäcöbö mömaö lä cule —a cuma.

12Ö̦jö däjä, Jacobo wacucu ja cäcöbö lä dicläono wei, Josénö cäcöbö co̦a fa co̦länö, mashita jamö a möfe boquema.

13Abinaja José a cuaaö nomöjöoma. Bei ijilubö ecöbö fa öbölänö, bä fö̦ö Isaeli e nijamö cäcöbö ajedea co̦maquema. Jayu imicönö Eflaini a fa öbölönö, Isaeli acasi imicö ja, a nia däamama. José acasi imicönö, Manasesi a öböa mö fa fedulänö, Isaeli jayu imicö ja, a nia yai däamama, ö̦jö a shino yai bayelimabä. Jaba a malä cuono wei.

Inaja cäcöbö öböa fa tacönö, Isaeli nija cäcöbö ajedemaquema ma cui, 14oshe a yai nia fa bayelimanö, Isaeli imicö majöblaliyoma. ¿Ö̦jö tawä? Imicö fa majöblalunö, jayu imicönö, oshe a lä cui, Eflaini fe ja imicö maquequema. Acasi boco lä cui, Manasesi fe ja imicö maquea mö feduquema. Manasesi jaba a ma cuono wei ma cui, acasi boco lä cui, imicö maquealiyoma.

15Imicö fa maqueicunö, Jeobaa nija, José ebä bayelimaö bufima.

—Fayä Isaacö sho, a̦iwä Ablaamö sho cäcöbö lä cuinö, showadi Yai Bada a nosie fa juabönö, cäcöbö bufi cadidoma. Ö̦jö a Yai Bada showawä lä cuinö, camiyä showadi wale lulubou cudeenö, wale lulubou malä showale. 16Ö̦jö Jeobaa etä a̦jele lä cuinö, wa̦lidiwä tä bluca lä cuono wei tä ja, showadi wale nowamaö cudeenö, wale bayelibou showaa lä cule. Ö̦jö Yai Bada nija, ei cäcöbö ijilu lä cui cäcöbö fa bayeliblamonö, cäcöbö bayeliobä. “Jacobo nija cäcöbö nodiblaliyoma cäcöbö”, cäcöbö nofi tabou juobeje. Fayä Isaacö a ma cui, a̦iwä Ablaamö a ma cui, “Ö̦jö lä ecöbö nodiwä yai”, cäcöbö nofi tabobeje. Cäcöbö fa balalönö, bei ijilubö ebä nodiwä ca̦i blucablou mö feduo showaobä —a cuma.

17Jacobo jayu imicö lä cui, oshe Eflaini a lä cui fe ja, imicö maqueo yalo, José a bufi jalujublaliyoma. “U̦asimi bada a yai lä cui, a wa̦fa nö shino li bayeli wäaö mlai”, a bufi fa cudalunö, a bufi jalujublaliyoma. Bei ijilubö bada e nija, bä fö̦ö imicö nia maqueamaö fa nomöjöonö, imicö jocäblalama. 18Bä fö̦ö imicö fa jocäblalanö, abinaja e cuma.

—Inaja mlai, Fabe. Ei a lä cui, jaba bei a. Ei a lä cui fe ja, jayu wa imicö shino yai maqueobä —a cuma ma cui, 19bä fö̦ö enö a wa̦ ji̦lianomi.

—Ö̦jö ma cui, U̦asi. Ya tä malä dale. Ijilufä bada a lä cui, ö̦jö bei ijilubö nodiwä ebä nia lojode ca̦i bälöblamou yaiblamou cuaaö mö feduo. A wa̦ nia ca̦i ji̦limou blaucou cuaaö mö feduo. Ö̦jö ma cui, bei fääshä e lä cui, e a̦ yai nia ji̦limou blaucaö dodijio. Ö̦jö bei ijilubö nodiwä ebä yai fa balalönö, bluca bä nia yai bälöjou yaiblamou dodijio —José a nowa tama.

20Einaja a fa cunö, ö̦jö däjä showawä, Yai Bada nija cäcöbö bayelimaö bufima.

—Isaeli ebä nodiwänö, tä nö bayeli wäaö nomöjöo juoje däjä, showadi cafä wafäcö a̦fa nia shino jayudaö juoje. “Eflaini, Manasesi sho cäcöbö bayeliblamou lä cuono weinaja, inaja showawä, Yai Bada nija wamacö bayeliblamou cuo mö feduobä”, showadi bä nia cuu yauaö —Jacobo a cuma.

¿Ö̦jö tawä? “Eflaini, Manasesi sho”, a cuma. Showadi bada a wa̦fa jayumamou balöobä a ma cuono wei ma cui, oshe bei a wa̦fa jayumaö baläläoma. Inaja showawä, cäcöbö nia lä bayeliblamono wei, Eflaini a ma osheono wei ma cui, ö̦jö a nia yai bayeliblamou fe balojooma.

21Ö̦jö däjä, José nija, abinaja Jacobo a cuma.

—Bei. Ya bufi mlaaö a lä cuimadi. Ö̦jö ma cui, Yai Bada tänö wa ca̦i cuo juo weicätä. Afä bada bä lä cuono wei bä ulifibö jamö, wa luluaö co̦ofälöo wä.

22’Abinaja ca̦i, José. Cafä nija, ai ya tä ulifi yädäamaö co̦a lä cule. Aifä bä nija mlai, cafä wa dodijiwä nija, Siquemö ya tä balöcö yai jöböaö. Iba shocobi anö, iba shelecawä cäcönö, ya nö fa wa̦lojanö, amoleo ya bä fa yashublalönö, ya bä ulifibö däa lä leleno wei tä ulifi ja, bäfä dobäö lä cule —Jacobo a cuma.

Currently Selected:

Génesis 48: GUU

Highlight

Copy