Génesis 45

José a wa̦fa lä

wämoqueno wei tä a̦

1Judawä a wa̦ ja, José a fa wajäaimadunö, a bufi ujudublaliyoma. Ejidoteli bä ca̦i bluca lä cuono wei bä siboo showadaobä, a wa̦ falayoma. Yami a wa̦fa wäamamou juobä, bä famalema.

2A ö̦cölayoma. A wa̦ fa nacläanö, Ejidoteli bä lä siboblai bänö a wa̦ ji̦liamaje. Bada a yai lä cui e yafi jamö ma cui, ö̦jamö José a wa̦fa ö̦cöö ca̦i ji̦liaö showaomaje.

3Cama mashi ebä nija, José a wa̦fa wämoquema.

—Camiyä cä ya. José ya. ¿Bejedi lä wamacö a̦ yai tawä? ¿Fayä a demi bälöa showaa cule, ö̦jö lä? —a cuma.

Ö̦jö ma cui, bä fa quililalunö bä a̦ juonomi. Ö̦jö a wa̦ ja, bä fe taläblaliyoma.

4Ö̦jö cudeenö, José a wa̦ faö co̦oma.

—Camiyä nija bä da ajedoima, ¿ö̦jö tawä? —a fa cunö, bä ajedeblaliyoma.

—Fääshäfä José ya. Camiyä bämacö bluca. Ejido jamö wale lulubobeje, blada bä ja wamale lä jöbäqueno wei, ö̦jö cä ya. 5¿Ö̦jö tawä? Bä quili dijä. Wamale lä jöbäqueno wei däjä, wamale nö ma bleaamano wei ma cui, bä bufi cuaa dijä. Täbä demi feiablalou fe yadiobä, Yai Bada tänö wale li bälöa balömaquema. 6Täbä ulifibö lä ofäö wei, lasha bolacabö a faö ma waiquii, tä nö nia dedeaö co̦o. Täbä nö ulifibö ofäaö showai ja, lasha 5 a faö ma co̦o wei ma cui, nii bä döamobä tä nia cuomi. Nii bä tamobä tä nia ca̦i cuomi.

7’Wamacö demi feio fe yadiobä, cafä wamacö nija, Yai Bada tänö eja wale bälöa balömaquema. Ijilufä nodiwä ebä bälöo nomöjöo juo fe yadiobä. 8¿Ö̦jö tawä? Eja ya lä cule, cafä wamacönö wamale shömanomi. Yai Bada cama a lä cuinö wale li shömöa cadidilema. Bada a yai lä cuinö wale a̦ ji̦liabä, Yai Bada tänö bada wale tablamalema. Ö̦jö bluca ebä nija ya bada läobä, Ejido tä ulifi blaucuwä jamö ya nosiemobä, bada wale tablamalema.

9’¡Bei! —a cuu co̦oma—. Fayä nijamö, lobe bä dolequea da co̦bofälö. A da yömöladuje. “Ijilufä Josénö wa nacaö lä cublelei”, wama a nowa tabä. Ejido jamö ya nosiemou blaucobä, Yai Bada tänö wale bada lä tablamaleno wei, tä a̦fa da wäyäduje. Ö̦jamö a nö dedeaö majöo mlai, camiyä nija wama a ca̦i dömöo jaödao showadaobä.

10’Eja, Cosena jamö fayä a bälöoyolubä. Camiyä ya lä bälöle tä ajede jamö, fayänö wamacö ca̦i cuobä, ¿ö̦jö tawä? Cafä wamacö ijilubö ma cui, wamacö yalobö oweja bä ma cui, baca bä ma cui, bluca wama bä madofi lä tabole bä ma cui, camiyä nija wama bä ca̦i ajedeblobä. 11Ö̦jamö lä fayänö wamacö ca̦i bluca ajedeblaliyo ja, bämacö bayeliblaö wä, wamacö ofi nö bleaaö mlaobä. Tä nö ofäo showao däjä, lasha 5 a nia faö malä co̦o wei. Fayä a ma cui, cafä wama ecö bluca ma cui, wamacö yalobö ma cui, wamacö nö ofili bleaaö mlaobä, bämacö nia bayeliblaö.

12Abinaja José a ca̦i cuma.

—Bei. Fääshäyä Bejamino wa lä cuinö, a̦iwä bluca wamacö ca̦i lä cuinö, fei däjä, wamale dablaö cadidia malä co̦le. Wamale a̦ ji̦liaö malä wawädole. 13Fayä nija, wamale a̦fa wäyä. Ejido jamö dodijidawä ya lä bälöle, ya nofi lä doamole, wama tä a̦ bluca wäyäjälobä. Eja wama tä lä dalaleno wei, fayä nija tä a̦ da wäyäje. Eja, fayä lobe wama a ca̦i dömöa co̦balu —bä nowa tama.

14Ö̦jö däjä, bei fääshä Bejamino a fa fa̦locoblaicunö, cäcöbö fa̦locayoma. Cäcöbö nomöa däayolayoma. 15Bei a̦iyobö ebä sho bä bluca fa̦locayou fa nomöjöonö, bä judädayoma. Bä nomöa bluca däayolayoma. Ya̦cumö, bä a̦ waiblou däjä, bei a̦iyobö ebänö a wa̦ wayomamaje.

Josénö bä fö̦ö e co̦amaö

lä bufino wei tä a̦

16Bada a yai lä cui e yafi jamö, José mashi ebä a̦fa co̦blou fa ji̦liläjenö, bada a lä cuinö, cama ebä bufi ca̦i bluca doblaloma. 17Ö̦jö däjä, José nija, bada a yai lä cui a wa̦ fama.

—Aifä bä da yömöla. Abinaja wa bä taamabä. Bulo bä ja, cama bä niibö fa yefiamolalunö, Canaana jamö bä ca̦i co̦jamö co̦obeje. 18Bä fö̦ö e fa co̦läfälöjenö, cama ebä bluca ca̦i fa co̦lufälöjenö, eja bä ca̦i juu co̦imabeje. Ejido jamö tä yai lä dodijidai tä ulifi ja, wa bä dobäbä. Bä nii yai lä dodijidai bä ja, wa bä iyamabä.

19’Abinaja wa bä ca̦i taamabä —a cuma—. Eja, Ejido jamö, läläamodima bä fa däalalöjenö, ö̦jö bä ja, faafä a ca̦i juu co̦imabeje. Cama oshe bä lä cui, bä suwäbö bä ca̦i lä cui, bä fa döcäamabodujenö, bä befi ca̦i läläaö co̦imabeje. 20Cama bä madofibö ja, bä bufi jalujama dijä. Ejido jamö täbä yai madofi lä dodijidai, bä yai tabou nomöjöo wejeicätä —a cuma.

21Isaeli bei ijilubö ebänö tä a̦ fa ji̦liläjenö, inaja bä cuaaö showadaoma. Bada a lä cui a wa̦ ja, Josénö läläamodima bä jöbäa showaquema. Bä iyafälöbä, bä niibö ca̦i yädäamaquema. 22Bä didiobä, camishi dodijidawä, liyäjäwä bä ja, bä bluca ca̦i dobälalema. Bluca bä ma dobälaleno wei ma cui, Bejamino comi ebä shino jöböquema. Ö̦jö nija, bä camishi lä dodijidai, bä lä liyäjäi, 5 ebä fa jöböcönö, blada bä lä jude wei, 300 ebä ca̦i yädämaquema.

23Bä fö̦ö etäbä lä cui, abinaja etäbä jöböa taquema. Bulo 10 bä ja, Ejido jamö täbä yai lä dodijidai, täbä talö yefimaquema. Bulo 10 bä suwä mö feduwä nija, nii bluca bä talö yefia mö fedumaquema. Bä fö̦ö e juimaö ja, a nia fa iyamaimanö, liyä täbä ma cui, cobe täbä ma cui, ö̦jö täbä bluca shömölema.

24Ö̦jö däjä, Josénö cama ebä mashi shömaö yalo, abinaja bä nowa tama.

—Bufi yanöcöwä, dodijidawä wamacö co̦ofälöbä —a cuma.

Jacobo nija, José a wa̦fa

lä wäyäjolono wejei tä a̦

25Ejido jamö bä cuoma, bä dolequea fa co̦bofälönö, Canaana jamö, bä fö̦ö Jacobo nija bä co̦blou co̦layoma. 26Abinaja a nowa taö showadaojolomaje.

—Fabe. Ijilufä José a demi showawä. Ejido tä ulifi blaucuwä jamö a nosiemobä, a bada läa —bä cuma.

Ö̦jö bä a̦ ja, a fe taläblaliyoma. Bä a̦ bejedi bufibonomi. 27Ö̦jö ma cui, José a wa̦ lä ji̦lileno wejei tä a̦ wäyäö fa cadidojenö, a bufi yanöcö owäjäblou co̦layoma. Cama Jacobo a bälamobä, Josénö läläamodima bä lä shömöleno wei bä ca̦i fa dalalönö, a bufi liyäjäblou co̦layoma. 28Abinaja Isaeli a cuma.

—Inaja lä waiquiwä. Iba ijluyä José a jo̦wa demia showaa nö culai. Einaja ya bufi lojodoblalou cuo showao däjä, ya nia möö mö alayou —a cudaliyoma.

Currently Selected:

Génesis 45: GUU

Highlight

Copy