Yamni Kulki Lawana 5
5
Waitna ba
1Giadinki ra pat bal dimri sa,
laikra lupia, wal kut taki mairka,
sîka mâka kîa painkira bara isint kîa auhni nani brisna ba pat briri sa,
nasmiki laya ba pat dabi kaikri sa,
wainki laya bara bîpki tialka laya sin pat diri.
Aiwani nani ba
Pâinika nani,
pi banhs bara sin di banhs,
nahki din mai dauki ba kat dis.
Lawana walhwal ba
Mairin ba
2Yang yapi katna, kuna kupi lika raya kan.
Bara yang walri laitwankira waitna ba,
dur ra kingbi kan:
“¡Yang ra dur sâks,
laitwankira mairin;
laikra lupia, butkuki lupia!
¡Laila ba diwas laya ni buswan sa!
¡Tihmia diwaska laya tâiwa bâk iswisa!”
3“Kwailka pat daikri sa;
nanara kli dimaia sna;
mini nani pat sikbri sa;
nanara kli tâski nani alkbia.”
4Laitwankira waitna,
ai mihta kum dur prakaika unta lupia bâk dingkan,
¡bara baha mita kupi ba turban kan!
5Yang laitwankira waitna ba
durka sakaia buri,
mihti nani wina,
baku sin mihti sirpi nani wina,
sîka mâka kîa painkira laya tahwan
dur bukutbaika ba purara.
¡Bîla baikra ba walri ba ra,
pat yang pruisna daihra walri!
6Laitwankira waitna ra
yang durka sakri,
kuna laitwankira ba
witin bâra âpu kan.
Witin ba plikri,
kuna sip sakras katna;
witin ra winri,
sakuna yang ra pana ai aisaras kata.
7Aihwawakra nani,
tawan kir tauki banhwi ba wal prawri;
witin nani ai prukan,
wîni ra sin klakan,
tawan dimaika durka aihwaki nani ba mita,
yang maiwan pura bikaika kwalka ba,
uba praut wal kalki sakan.
8Man nani ra swer takisna,
Jerusalem mairka nani,
man nani laitwankira waitna ba wal prawma kaka,
wima, yang bui witin ra latwan uba kaikisna mita pruisna.
Aiwani nani ba
9¿Man ra lamtwankira waitna ba,
dîa bâk sakan baku brisa ki,
mairin nani tilara
kau painkira sma ba?
¿Dîa bâk sakan brisa,
man lamtwankira ba,
bara yang nani baku, swer taki pramis mai munaia sna ba?
Mairin ba
10Waitniki laitwankira ba,
taya sai, tâwa pauni sa,
waitna tausin nani tilara,
witin ba sip tiwras sa.
11Witin lal ba, gul pali baku sa;
tâwa ba siksa pali, yaka-yaka,
sim kuskuspiram taya baku sa.
12Ai nakra nani ba butku nani wâl,
bîp tialka ra aihtabi taki,
lî watla kum lamara, uli bui ba baku sa.
13Ai mawan prana nani ba lika,
tangni kîa painkira giadinka nani baku sa.
Ai un nani ba,
tangni pauni nani baku sa;
baha bâk sika, sîka mâka kîa painkira laya tahwisa.
14Ai mihta nani ba lika,
gul mihtadingka nani sa,
taya pura ba walpa klauhira siakni ni yukan baku sa;
ai wîna tara ba pihni pali sa,
taya ba walpa klauhira sangni ni purak yukan sa.
15Ai kuhma nani ba,
sin walpa pihni painkira playka nani baku sa,
gul painkira plamaika nani purara bapi mangkan ba baku;
wan nakra ra witin ba Líbano yalamka dusa painkira nani ba baku sa.
16Ai bîla ba kiawalaia damni pali sa:
¡witin ai wîna aiska ba,
painkira pali sa!
Naku sa laitwankira waitna ba,
naku sa yang laitwankira ba,
Jerusalem mairka nani.
Currently Selected:
Yamni Kulki Lawana 5: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
