Maka 5
5
Jisu ko reriko ko ziolo kala maba kale azo
(Matiu 8:28-34; Luke 8:26-39)
1Ni vo Jisu ni voko disaipeli madu ta ke varerikake Qalili toupa ko koa pake Qerasa peuru ko sipole. 2Ni so keru Jisu ni voko disaipeli madu ke saqora keru vaka topi azo, vota o vati toraekiniake kala maba o saqorani kekai mutazatako kea kale azo. Ni nea maba ta ziolo kovai onobatani, 3ni vota kea kale inio o evakoi kiada keru, ni seini kale melai pui kevai rovea pirieve. 4Ni matu kubo taku inio seta ke madoeka tava pirieko voko kiti ni ṉase, melai vota o paqoeka koa seini ni o mujarika ko aeani voko kiti kale ama. Ni vota puliala maba o rovea dokolivo tu o ibu, ako vota piza kala sea kiadamu azo sole. 5Ipu ni ṉaniu vota o utu lipilipita kea poso kale ni sopu poso kale, upaupatole, ni vota tabi ma tabi ota eva o ṉavi lado kale.
6Ni vaṉʼazo inio nea maba ta o veake vo Jisu, ni ota rereake vokasi, ni ota iqeiqeake voko tanama kale. 7-8Nio vo Jisu ta o bazuekake koa ziolo tu ko saqoro voa maba kale azo. Nio koa ziolo ta kota karakararautake matuma kora kale ni eri kikolake, “Jisu, vo matu raura kala Baṉara vo Meqora ṉa! Noni ṉo ilo kinola inio aṉa? Vo Baṉara ko ṉikale, aṉata a baseṉa ṉo tu pui ṉo qoqotaelo aṉa,” kikolake. 9Ni Jisu ta o kuimaekake koa ziolo ni eri kiolake, “Lama ikio ṉoko ṉi?” kiolake, ni kota ko vati tiorikake ni eri kikolake, “Aṉako ṉi ta Vaki, ako eṉeta matu kubo ṉela inio sole.” 10Ni sea ziolo poso ta kebe vai titiake pasevo vo Jisu tu pui o rerimo se koa zaekale azo.
11Ni sai ta matuma rovaṉa bolo kobeta niuqelake sopu kale koa zae ko ketaketa. 12So sole sea ziolo poso ta kevai zaivotake vo Jisu, tu vota o soroemo se koa bolo rovaṉa kasi tu ke elo kokale. 13Ni vo Jisu ta o zariemake sea ziolo poso, ni seta keta saqorake voa maba tona azo ni keta amaqeake koa bolo poso kale. Ni koa pado ama bolo rovaṉa ta omuqa vuro tiniavo ni kota matu rerikiniake tabale ni kota jourake Qalili toupa kale, ni koa kiadama ti kota kujoike.
14Ni so keru koa bolo rovaṉa ke kati vailani ke kea keru ko quli koko ereivako, seta ke rereake koa peuru kale ni kiaro poso kale ni ke bazuemake kiadamu. So sole kiadamu ta ke olake tu kepa kelo ko quli ko ereivako quli sai. 15Ni so keru sea maba poso kevai baroa keru vo Jisu, seta ke veake voa maba ko ziolo poso kovai onobateni, obeta papuake sai sabosabo ala, ni voko kerukeru melai uri. So sole sea maba poso ta keta matu ṉake ke vea keru vo. 16So sole se maba poso ke keveni komi quli ta kemai bazubazuekake ko quli ko ereima nea maba kasi, ni koa bolo rovaṉa kasi. 17Ni seta keva titiake vo Jisu tu vota o vaeko seko zae.
18Nio so keru vo Jisu o zazua keru vaka topi, vo ziolo kovai onobateni maba ta ovai titiake vo Jisu, ni eri kiolake, “Zariela tu a lulueṉo,” kiolake. 19Melai Jisu ta pui o zarievake vo tu vota o luluevou vo, melai vota eri kiolake vokasi, “Ṉota vaite ṉo bade kasi tu pa mea ṉo mabamu, ni ṉota ṉo ziovou ni ṉo bazuemou se vo Baṉara ko urikiṉo voko baiseo kale.”
20So sole voa maba ta o vaemake, ni ota olake koa Tonipeuru kale ni omai bazubazuekake Jisu ko urikivo vo. Ni kiadamu seke viqeni ta keta matu vuzeike.
Jaerasi ko meqora ni rekoreko koko tibaekema Jisu ko sabosabo
(Matiu 9:18-26; Luke 8:40-56)
21Ni Jisu ni voko disaipeli madu ta keta vaitake ni keta pakeake koa toupa ko ka pake. Ni koa pake ke baroa keru inio matuma vaki ta kevai padoivake vo Jisu. 22Ni kala ilusato ko pade ko vilua pikopiko, o ṉi ta Jaerasi, ta o olake sai ni o veake vo Jisu ni ota iqeiqeake voko kiti raki kasi, 23ni ovai titiake vo Jisu, ni eri kiolake, “Lekasa, aṉako sinaqu rusu meqora ta kota matu verepa ni aṉata aṉai zaivota ṉo tu ṉo qilou ni ṉoba kai ivikou ṉoko ṉase, nio kota ko urikou.” 24So sole vo Jisu ta o luluevake voa tanala. Ni matu kubo maba melai ke luluevake vo ni keta zaitikiniake voko omuqa rana. 25Ni sai ta kama rekoreko malea vere ko koako toni omuqa sabere, 26ni kota kokai jairoka mati vailiko koa vere se dokita madu, melai koko vere ta pui ko epeza. Ni kota lula ko ṉamuke kiadama koko takula tu ke urikiko kikola melai koko vere ta matu kota eva. 27Ni kota ko viqake Jisu ko bazu ni ko kuevake Jisu ko tova, koa vaki ko tiania 28ni eri kikolake, “Aṉata a dibaekou pala vo Jisu ko sabosabo ko paka ti ada urikou,” kikolake. 29Ni kota ko tibaekake voko sabosabo ni koko dara ta kota epezake rereo, ni kota ko lainikake ta kota kota urikake koko vere kale azo.
30Ni koa omadeuma taku inio Jisu ta okai nianiiake ta voko pizato ta ko urikiva kala maba, so sole vota o lilitake sea vaki kasi ni eri kiolake, “Lala inio ota la tibaeka aṉako sabosabo?” kiolake. 31Ni voko disaipeli madu ta ke vati tiorikake, ni eri kikelake, “Ṉota ṉobe mea nio nia vaki ta keta zaitikinia ṉokasi, ni noi sole inio ṉota eri kiṉola, ‘Lala inio o tibaela?’ kiṉola?” kikelake. 32Melai vo Jisu ta o vailikake lama ikio ko tibaevako vo. 33Nio koa rekoreko ta kokai nianiiake koko uriko, so sole kota ko olake Jisu kasi dederole ni ṉalole ni ko iqeiqeake Jisu ko tanama kale ni kovai bazuekake vo koko uriko. 34Nio vo Jisu ta eri kiolake koa rekoreko kasi, “Meqora, ṉoko vai oqu vo Baṉara ta ko urikiṉa ṉo. Sole ṉota pui ṉo ṉalou, ako ṉota lula ṉoda urika sole.”
35Ni vo Jisu puliako okotiko voko pesipesito inio kake bazu ke borikani Jaerasi ko pade kasi azo ta ke baroake, ni eri va kikelake vo Jaerasi, “Noko meqora ta lula kota voula, sole ṉota pui utu riteraite ivo vo Tanala,” kikelake. 36Melai vo Jisu ta pui ota ma didiekake se kikelani melai vota eri kiolake Jaerasi kasi, “Pui ṉalo, melai kai kerui aṉako pizato,” kiolake. 37Ni vo Jisu ta o dokolimake se maba madu tu pui ke luluevou vo. Melai Pita, ni nioqa tamania Jemisi ni Jone pala inio o zariemake tu ke luluevo. 38Ni so keru seke baroa keru Jaerasi ko pade kasi, Jisu ta o meake matu kubo madu seke ziani ni ke upaupatani ni ke tibaraputani. 39Ni vo Jisu ta o amaqeake koa pade ko poro kale, ni vota eri ma kiolake se, “Noi sole inio meta meda zia ni meda tibaraputa, ako koa meqora ta pui ko vouva, melai kota kota maroṉa inio!” kiolake. 40Melai nia maba poso ta kevai niureake vo. So sole vo Jisu ta o saqorimake sea maba poso koa pade kale azo, ni vota o mati amaqeake koa meqora vo mama ni koko niania ni voko zouke disaipeli madu koa lose kale, sai koa toni omuqa sabere ama meqora ko tekuakoi. 41Ni vota ota ka noqoekake koko ṉase ni eri kiolake, “Talita kumu,” koko kio ni kalo Jiu mu ko pesio kale ta “Ṉoiza, aṉata eri kiala, ṉota zolai!” 42Ni koa meqora ta kota zolaike, ni kota taliake. Ni so keru sea maba poso ke kea keru koko uriko ta seta keta matu vuzeike. 43Ni vo Jisu ta o katimake se matu piza kama bazu tu seta pui kekai bazutou kake kasi. Ni vota mata eri kiolake, “Meta katikomo ko sailao tu ko vuato,” kiolake.
Currently Selected:
Maka 5: BLBNT
Highlight
Share
Copy

Want to have your highlights saved across all your devices? Sign up or sign in
The New Testament in the Bilua language, Solomon Islands © The Bible Society of the South Pacific, 1995.