Lukas 3
3
Yohanes Pembaptis suru orang bertobat supaya siap tarima pa Tuhan
(Mat. 3:1-12; Mrk. 1:1-8; Yoh. 1:19-28)
1Tiberius so jadi raja basar Roma, kong waktu maso taong kelima blas, Pontius Pilatus yang jadi gubernur di daera Yudea, deng Herodes jadi raja di daera Galilea, Herodes pe sudara nama Filipus jadi raja di daera Iturea deng daera Trakhonitis, turus Lisanias jadi raja di daera Abilene. 2Yang jadi imam basar di agama Yahudi, dorang pe nama Hanas deng Kayafas. Waktu itu Tuhan Allah bicara pa Yohanes, Zakharia pe ana, di Yudea di padang gurun, tampa yang sunyi deng jao dari kampong. 3Karna itu, Yohanes pigi di samua daera dekat kali Yordan, kong kase tau pa orang-orang bagini, “Bertobat suda kong iko pa Tuhan Allah, deng bagitu Tuhan Allah mo kase ampun pa ngoni. Kong kase suda ngoni pe diri la dapa baptis, itu tanda ngoni so bertobat.”
4 #
Yes. 40:3-5
Yohanes itu orang yang dulu Tuhan Allah bilang mo datang, kong itu ada tatulis di kitab nabi Yesaya bagini,
“Nanti ada orang yang mo bicara kuat-kuat pa orang-orang yang bakumpul di padang gurun.
Dia bilang, ‘Buka jalang untuk tarima pa Tuhan,
kase lurus jalang la sambut pa Dia.’
5Tiap jurang akan dapa tutu deng tana,
tiap gunung deng bukit akan dapa kase rata.
Jalang yang babelok-belok akan dapa kase lurus,
deng jalang yang babalobang akan dapa kase rata,
6deng samua orang akan mo lia bagimana Tuhan Allah kase slamat manusia dari dorang pe dosa-dosa.”
7 #
Mat. 12:34, 23:33 Orang banya datang pa Yohanes supaya Yohanes baptis pa dorang. Kong Yohanes bilang pa dorang, “Ee, ngoni orang-orang jahat! Ngoni pe jahat sama deng ular bisa. Jang ngoni kira kalu ngoni so datang kamari dapa baptis, ngoni bole mo dapa lolos dari Tuhan Allah pe hukuman. 8#Yoh. 8:33 Kalu ngoni butul so bertobat, ngoni musti biking hal yang bae turus supaya ada bukti ngoni itu so bertobat. Itu sama deng pohong yang subur, dia pe bua me bagus-bagus. Jang ngoni pikir ngoni so bebas dari hukuman karna ngoni Abraham pe turunan. Kita bilang pa ngoni, kalu Tuhan Allah mau, Dia bisa biking batu-batu ini jadi Abraham pe turunan. 9#Mat. 7:19 Tuhan Allah so siap mo hukum pa samua orang yang tara iko Dia pe mau. Itu sama deng satu orang yang so siap-siap deng tamako mo potong pohong yang tara babua bagus, turus buang pohong itu di api.”
10Kong, banya orang batanya pa dia, “Apa yang torang musti biking supaya Tuhan Allah tara hukum pa torang?”
11Yohanes bilang, “Sapa yang ada baju dua, satu musti kase pa orang yang tarada baju, deng sapa yang ada makanang, musti kase lagi pa orang yang tarada makanang.”
12 #
Luk. 7:29
Orang-orang yang tukang tagi pajak me datang pa Yohanes, minta Yohanes baptis pa dorang. Dorang tanya pa Yohanes, “Guru, apa yang torang musti biking?”
13Yohanes bilang bagini, “Waktu ngoni batagi pajak, jang batagi lebe dari yang pemerinta suru ngoni tagi.”
14Di situ, ada lagi tentara-tentara yang datang. Dorang tanya pa Yohanes, “Kalu torang, apa yang torang musti biking?”
Kong Yohanes jawab pa dorang, “Jang ancam orang kong ambe dorang pe doi, deng jang tudu orang bilang dong sala la dong kase doi pa ngoni. Rasa puas suda deng ngoni pe gaji yang ngoni tarima.”
15Pe dengar Yohanes pe bicara, orang-orang batanya di dong pe dalam hati, “Mangkali Yohanes ini suda Mesias, Raja yang torang tunggu-tunggu deng harap-harap, yang Tuhan Allah janji mo kase slamat pa torang.”
16Tapi Yohanes bilang pa dorang samua, “Kita baptis pa ngoni deng aer, tanda ngoni so bertobat kong iko pa Tuhan Allah. Tapi nanti, ada satu Orang yang mo datang, Dia pe kuasa lebe basar dari kita. Kong mo jadi Dia pe tukang suru-suru, yang buka Dia pe tali sandal saja me, kita tara pantas. Dia itu nanti yang mo baptis pa ngoni pake Roh Kudus deng api. 17Dia mo kase pisa pa orang yang iko pa Dia deng orang yang tara iko pa Dia. Itu sama deng orang batapis gandum untuk kase pisa dari konga. Gandum yang bagus dia simpang di dia pe lumbung, tapi konga dia buang di api yang tara mati-mati.”
18Ada banya nasehat laeng lagi yang Yohanes bilang pa orang banya itu la dorang bertobat, deng supaya dorang iko Kabar Bae dari Tuhan Allah. 19#Mat. 14:3-4; Mrk. 6:17-18 Yohanes me togor pa raja Herodes. Herodes ini berkuasa di daera Galilea. Yohanes togor pa Herodes, barang Herodes kawing deng Herodias, dia pe ipar sandiri. Yohanes me togor lagi pa Herodes, barang banya skali kajahatan laeng yang Herodes biking. 20Tapi Herodes tara bertobat. Mala dia lebe tamba jahat, dia kase maso pa Yohanes di penjara.
Yohanes baptis pa Yesus
(Mat. 3:13-17; Mrk. 1:9-11)
21Waktu Herodes bolong kase maso pa Yohanes di penjara, Yohanes ada baptis banya orang. Termasuk Yesus, dia baptis. Waktu Yesus dapa baptis, Dia berdoa kong langit tabalá. 22#Kej. 22:2; Mzm. 2:7; Yes. 42:1; Mat. 3:17; Mrk. 1:11; Luk. 9:35 Turus, Roh Kudus datang pa Dia. Roh itu pe model sama deng burung pombo. Kong dapa dengar Tuhan Allah pe suara dari langit bagini, “Ngana ini Kita pe Anak, Kita paling sayang pa Ngana. Ngana yang biking Kita pe hati sanang.”
Yesus Kristus pe orang tua dulu-dulu pe turunan
(Mat. 1:1-17)
23Yesus mulai biking Dia pe pelayanan waktu Dia pe umur kira-kira tiga pulu taong. Orang di sana kanal, Yesus itu Yusuf pe ana.
Ini dia pe orang tua dulu-dulu pe nama-nama, rekeng dari Yusuf.
Yusuf pe papa pe nama Eli.
24Eli pe papa Matat,
Matat pe papa Lewi,
Lewi pe papa Malkhi,
Malkhi pe papa Yanai,
Yanai pe papa Yusuf,
25Yusuf pe papa Matica,
Matica pe papa Amos,
Amos pe papa Nahum,
Nahum pe papa Hesli,
Hesli pe papa Nagai,
26Nagai pe papa Maat,
Maat pe papa Matica,
Matica pe papa Simei,
Simei pe papa Yosekh,
Yosekh pe papa Yoda,
27Yoda pe papa Yohanan,
Yohanan pe papa Resa,
Resa pe papa Zerubabel,
Zerubabel pe papa Sealtiel,
Sealtiel pe papa Neri,
28Neri pe papa Malkhi,
Malkhi pe papa Adi,
Adi pe papa Kosam,
Kosam pe papa Elmadam,
Elmadam pe papa Er,
29Er pe papa Yesua,
Yesua pe papa Eliezer,
Eliezer pe papa Yorim,
Yorim pe papa Matat,
Matat pe papa Lewi,
30Lewi pe papa Simeon,
Simeon pe papa Yehuda,
Yehuda pe papa Yusuf,
Yusuf pe papa Yonam,
Yonam pe papa Elyakim.
31Turus Elyakim pe papa Melea,
Melea pe papa Mina,
Mina pe papa Matata,
Matata pe papa Natan,
kong Natan pe papa Daud,
32Daud pe papa Isai,
Isai pe papa Obed,
Obed pe papa Boas,
Boas pe papa Salmon,
Salmon pe papa Nahason,
33Nahason pe papa Aminadab,
Aminadab pe papa Admin,
Admin pe papa Arni,
Arni pe papa Hezron,
Hezron pe papa Peres,
Peres pe papa Yehuda,
34Yehuda pe papa Yakub,
Yakub pe papa Ishak,
Ishak pe papa Abraham,
Abraham pe papa Terah,
Terah pe papa Nahor,
35Nahor pe papa Serug,
Serug pe papa Rehu,
Rehu pe papa Peleg,
Peleg pe papa Eber,
Eber pe papa Salmon,
36Salmon pe papa Kenan,
Kenan pe papa Arpakhsad,
Arpakhsad pe papa Sem,
Sem pe papa Nuh,
Nuh pe papa Lamekh,
37Lamekh pe papa Metusalah,
Metusalah pe papa Henokh,
Henokh pe papa Yared,
Yared pe papa Mahalaleel,
Mahalaleel pe papa Kenan,
38Kenan pe papa Enos,
Enos pe papa Set,
Set pe papa Adam.
Kong Adam itu, Tuhan Allah sandiri yang biking dia jadi Tuhan Allah pe ana.
Currently Selected:
Lukas 3: PB MMU
Highlight
Share
Copy
Want to have your highlights saved across all your devices? Sign up or sign in
Perjanjian Baru Bahasa Melayu Maluku Utara @ Lembaga Alkitab Indonesia 2020
