Lukas 21

Janda miskin pe derma

(Mrk. 12:41-44)

1Waktu Yesus masi ada di Ruma Ibada Pusat, Dia perhatikan pa orang-orang kaya yang datang taru dong pe derma di kotak persembahan.#21:1: Lia kotak persembahan pe keterangan deng gambar di kamus. 2Yesus me ada perhatikan pa janda miskin satu yang datang taru dia pe derma di kotak itu. Tapi, dia pe derma itu cuma doi logam dua, yang dia pe nilai paling kacil. 3Turus Yesus bilang, “Dengar bae-bae e, pa Tuhan Allah pe muka, janda miskin ini so kase lebe banya dari samua orang yang ada bakase itu. 4Barang, orang-orang kaya, biar dorang bakase banya, tapi pa dorang masi tasisa banya. Sedangkan janda ini, biar dia susa me, dia so bakase samua yang dia punya.”

Ruma Ibada Pusat mo dapa kase ancor

(Mat. 24:1-2; Mrk. 13:1-2)

5Waktu itu, Yesus pe murit babarapa orang ada carita tentang Ruma Ibada Pusat#21:5: Ruma Ibada Pusat itu satu bangunan yang dia pe kompleks luas skali. Lia Ruma Ibada Pusat pe keterangan deng gambar di kamus. itu pe bagus, barang ada hias deng batu-batu yang bagus deng macam-macam barang yang orang ada kase untuk dong pe sukur pa Tuhan Allah.

Kong Yesus bilang pa dorang, 6“Yang ngoni lia di Ruma Ibada Pusat itu, nanti ada dia pe waktu, samua itu akan dapa kase ancor sampe rata, kong tara ada satu batu yang mo tasusun pa dia pe tampa lagi.”

Yesus kase tau apa yang mo jadi sebelum hari kiamat

(Mat. 24:3-14; Mrk. 13:3-13)

7Kong Yesus pe murit-murit tanya pa Dia, “Guru, yang Guru bilang tadi itu, tempo apa mo jadi? Deng dia pe tanda apa kalu samua itu so mo jadi?”

8Yesus bilang pa dorang, “Ngoni ati-ati e, jang sampe ngoni dapa tipu. Barang, banya orang akan datang pake Kita pe nama, deng dorang bilang bagini, ‘Kita ini Dia suda, Raja yang Tuhan Allah janji mo kase slamat pa manusia!’ Dorang me akan bilang, hari kiamat so dekat. Tapi jang ngoni iko pa dorang itu. 9Kong kalu ngoni dengar kabar ada orang baku prang, deng orang marontak pa pemerinta, jang ngoni tako. Samua itu memang musti mo jadi kamuka, tapi itu bukang berarti dunia so mo langsung kiamat.”

10Turus, Yesus bilang lagi pa dorang, “Nanti, suku deng suku akan baku prang, deng satu kerajaan deng kerajaan laeng akan baku prang. 11Kong nanti ada lagi tana goyang kuat skali, deng akan ada panyake yang tajangke pa orang-orang di mana-mana, deng akan ada lagi kelaparan. Kong akan mo jadi hal-hal yang biking tako deng tanda-tanda yang hebat dari langit. 12Tapi kalu samua itu bolong jadi, ngoni akan dapa tangka deng dapa siksa karna ngoni percaya pa Kita. Dorang akan serakan pa ngoni di ruma-ruma ibada agama Yahudi, kong mo adili pa ngoni baru kase maso pa ngoni di penjara. Deng ngoni akan dapa kase mangada pa raja-raja deng pa gubernur-gubernur. Samua itu mo jadi pa ngoni, karna ngoni ada iko pa Kita. 13Tapi waktu ngoni dapa adili itu, itu jadi kesempatan pa ngoni untuk kase tau tentang Kita pa dorang. 14#Luk. 12:11-12 Karna itu, kase kuat suda ngoni pe hati, supaya jang ngoni pikir-pikir apa yang musti ngoni bilang untuk mo babela ngoni pe diri nanti. 15Barang, Kita sandiri yang mo biking ngoni pande bajawab, sampe ngoni pe musu-musu tara mampo mo balas ngoni pe bicara atau mo baku malawang deng ngoni. 16-17Samua orang akan binci pa ngoni karna ngoni iko pa Kita. Ngoni pe papa deng mama, ngoni pe ade kaka, ngoni pe sudara yang laeng deng ngoni pe tamang-tamang, dorang yang tara percaya pa Kita itu mo serakan pa ngoni. Deng babarapa dari ngoni akan dapa bunu. 18Tapi jang ngoni tako, karna tarada satu dari ngoni pe rambu di kapala yang akan mo ilang.#21:18: Tarada satu dari ngoni pe rambu di kapala yang akan mo ilang, kata ini pe arti bole bagini: 1. Ngoni tetap mo aman; 2. Biar ngoni pe jiwa dapa siksa, tapi tetap mo slamat; atau 3. Apa saja yang jadi, itu iko Tuhan pe mau. 19Kalu ngoni tetap batahang percaya pa Kita, ngoni dapa hidup deng Tuhan Allah slama-lamanya.”

Kota Yerusalem mo dapa kase ancor

(Mat. 24:15-21; Mrk. 13:14-19)

20Yesus bilang lagi pa dorang, “Nanti kalu ngoni lia tentara-tentara so kuliling kota Yerusalem, ngoni akan dapa tau, kota itu so tara lama lagi mo dapa kase ancor. 21Waktu itu, orang-orang yang ada di daera Yudea lebe bae capat lari di gunung-gunung. Deng orang-orang yang ada di kota, lebe bae capat mengungsi pigi kaluar kota, deng orang-orang yang ada di kampong-kampong, jang maso lagi di dalam kota itu. 22#Hos. 9:7 Karna hari-hari itu, Tuhan Allah mo kase hukuman, supaya apa yang ada janji di Kitab Suci itu samua mo jadi. 23Kong yang paling sengsara waktu itu, ibu-ibu hamil deng ibu-ibu yang masi kase toto dong pe ana. Barang, akan ada penderitaan yang hebat skali di seluru tana Israel, kong Tuhan Allah mo hukum bangsa ini. 24Ada yang akan dapa bunu deng parang, ada lagi yang akan dapa bawa jadi tahanan di samua suku bangsa. Kong suku-suku yang tara kanal pa Tuhan Allah mo injang-injang kota Yerusalem, sampe batas waktu yang Tuhan Allah so tentukan untuk bangsa-bangsa itu.”

Tanda-tanda sebelum Yesus datang ulang

(Mat. 24:29-31; Mrk. 13:24-27)

25 # Yes. 13:10; Yeh. 32:7; Yl. 2:31; Why. 6:12-13 Yesus bilang lagi pa Dia pe murit-murit, “Nanti ada tanda-tanda yang biking orang herang di matahari, bulan deng bintang-bintang. Deng di dunia, manusia dari sagala suku bangsa akan jadi tako deng bingung gara-gara omba basar yang babunyi kuat. 26Orang-orang akan totofore stenga mati mo pikir apa yang akan mo jadi di seluru dunia ini, gara-gara samua yang ada di langit mo jadi kaco. 27#Dan. 7:13; Why. 1:7 Kong waktu itu suda, orang akan dapa lia pa Anak Manusia yang dari sorga di tenga-tenga awan deng samua kuasa deng cahaya yang luar biasa. 28Kalu samua itu so mulai jadi, bangun kong kase kuat suda ngoni pe hati, karna so tara lama lagi ngoni akan dapa kase slamat.”

Hari-hari sengsara jadi tanda Yesus mo datang ulang

(Mat. 24:32-35; Mrk. 13:28-31)

29Turus, Yesus kase carita umpama satu pa dorang. Dia bilang bagini, “Coba ngoni perhatikan bae-bae pohong ara atau pohong apa saja. 30Kalu ngoni lia pohong-pohong itu so batunas, ngoni sandiri jadi tau, itu tanda musim panas so dekat. 31Bagitu lagi kalu hari-hari sengsara yang Kita bilang itu so mulai jadi, ngoni jadi tau, so tara lama lagi Tuhan Allah mo Berkuasa sebagai Raja pa Dia pe umat.

32Inga bae-bae yang Kita bilang ini, orang-orang yang hidup skarang ini ada yang masi hidup sampe samua itu jadi. 33Langit deng bumi mo abis, tapi Kita pe kata-kata akan tetap ada sampe slama-lamanya.”

Nasehat supaya siap waktu Yesus mo datang ulang

34Yesus bilang lagi, “Jaga ngoni pe diri bae-bae, jang sampe ngoni cuma bapikir tentang pesta sasaja deng baminum sampe mabo, atau ngoni kase hawater tentang ngoni pe hidup hari-hari. Karna kalu ngoni pe pikiran macam bagitu, ngoni tara akan siap waktu Anak Manusia yang dari sorga datang tiba-tiba, itu sama deng binatang yang tiba-tiba takanal dodeso. 35Karna hari itu mo datang pa samua orang di dunia tara sangka-sangka. 36Tapi, ngoni musti turus-turus jaga diri bae-bae, deng berdoa supaya ngoni jadi kuat batahang untuk hadapi samua sengsara yang mo jadi itu sampe ngoni lolos dari itu. Deng bagitu, ngoni siap mo mangada pa Anak Manusia.”

37 # Luk. 19:47 Tiap hari, waktu so siang, Yesus pi mangajar di Ruma Ibada Pusat pe kompleks, deng tiap malam, Yesus kaluar dari kota Yerusalem itu, kong tidor di bukit yang pe nama Zaitun. 38Tiap pagi, orang banya datang pa Yesus di Ruma Ibada Pusat pe kompleks la mo dengar Yesus mangajar di situ.

Currently Selected:

Lukas 21: PB MMU

Highlight

Copy