Lukas 2

Yesus lahir

(Mat. 1:18-25)

1Waktu itu, ada raja basar Roma, dia pe nama Agustus. Dia kase kaluar parenta pa samua daera di dunia yang dia kuasai, supaya kase daftar samua orang pe nama. 2Ini pertama kali pemerinta Roma kase daftar orang-orang waktu Kirenius jadi gubernur di daera Siria. 3Samua orang musti pigi pa dorang pe kota yang dong pe orang tua dulu-dulu tinggal untuk kase daftar dorang pe nama.

4Bagitu lagi deng Yusuf. Dia barangkat dari Nazaret dia pe tampa tinggal di daera Galilea, kong dia pigi di kota yang pe nama Betlehem, di daera Yudea. Yusuf pigi di Daud pe kota, barang dia itu raja Daud pe turunan. 5Yusuf deng dia pe calon kawing Maria, barangkat sama-sama supaya dorang daftar dong dua pe nama di sana.

Waktu itu, Maria sementara hamil. 6Waktu dorang di Betlehem, so dia pe waktu Maria mo melahirkan. 7Maria melahirkan dia pe ana laki-laki, ana yang tua. Abis itu dia bungkus deng kaeng pa ana itu kong kase tidor di binatang pe tampa makanang, karna samua penginapan di situ so ponong.

Malaekat kase tau, Yesus so lahir

8Malam itu, ada orang-orang yang sementara jaga dong pe domba di lapangan rumpu di daera dekat kota Betlehem. Dorang itu yang orang jaga bilang gembala. 9Kage-kage dorang dapa lia Tuhan Allah pe malaekat kase tunju dia pe diri pa dorang. Turus, Tuhan Allah pe cahaya yang luar biasa basinar tutu pa dorang, kong dong tako skali. 10Tapi malaekat itu bilang pa dorang, “Jang tako! Dengar bae-bae. Kita datang kamari ini untuk kase tau kabar yang bae pa ngoni. Kabar yang bae ini biking samua orang yang dengar pe hati sanang skali. 11Kabar yang bae itu bagini: hari ini, Orang yang mo kase slamat pa manusia so lahir. Dia so lahir di Betlehem, raja Daud pe kota. Dia itu orang pangge Kristus, Raja yang Tuhan Allah janji mo kase slamat pa ngoni. Dia itu suda Tuhan. 12Nanti ngoni dapa kanal pa Dia deng tanda ini: ngoni akan lia Anak satu yang dong bungkus deng kaeng. Anak itu dong ada kase tidor di binatang pe tampa makanang.”

13Abis bilang bagitu, kage-kage ada malaekat lagi dari sorga yang banya skali kase tunju dong pe diri, dong sama-sama deng malaekat satu itu puji pa Tuhan Allah, bagini,

14“Puji deng hormat pa Tuhan Allah yang ada di sorga!

Kong di bumi ini, Tuhan Allah akan kase hati yang tenang pa orang-orang yang biking sanang Tuhan Allah pe hati.”

15Abis puji pa Tuhan Allah bagitu, malaekat-malaekat itu bale ulang di sorga. Kong gembala-gembala itu baku bilang bagini, “Mari torang pigi di Betlehem la tong lia apa yang Tuhan so bilang pa torang tadi.”

16Jadi dorang capat-capat pigi di Betlehem. Di sana, dorang baku dapa deng Maria deng Yusuf. Dorang lia lagi Anak kacil itu yang sementara tidor di binatang pe tampa makanang.

17Waktu dorang lia Anak itu, dong kase tau pa orang-orang di situ samua yang malaekat bilang pa dorang tentang Anak itu. 18Samua orang di situ jadi herang waktu dengar gembala-gembala itu pe carita. 19Tapi Maria simpang samua yang jadi itu di dia pe hati kong dia pikir bae-bae samua itu. 20Abis itu, gembala-gembala itu bale lagi pa dong pe domba-domba. Dorang puji deng hormat pa Tuhan Allah turus karna samua yang dorang dengar deng lia itu, sama persis deng yang malaekat bilang.

Yusuf deng Maria serakan Yesus pa Tuhan Allah

21 # Luk. 1:31; Im. 12:3 Waktu Anak itu pe umur delapan hari, Dia musti dapa sunat, iko agama Yahudi pe aturan. Kong dong kase nama pa Dia, Yesus, sama deng nama yang malaekat bilang pa Maria waktu dia bolong hamil. 22#Im. 12:6-8 Bagitu ampa pulu hari abis Yesus lahir, Maria deng Yusuf musti iko acara ‘biking bersi diri’ iko aturan yang ada di lima kitab Musa. Jadi dorang pigi di kota Yerusalem deng bawa pa Yesus la mo serakan pa Tuhan, 23#Kel. 13:2, 12 sama deng aturan yang tatulis di lima kitab Musa bagini,

“Tiap ana laki-laki yang tua,

dia musti dapa serakan pa Tuhan la jadi Tuhan punya.”

24Deng dorang lagi kase burung tekukur satu pasang atau burung pombo muda dua ekor untuk jadi binatang korban persembahan, iko aturan di lima kitab Musa.

Simeon bilang Yesus itu dari Tuhan Allah

25Waktu itu di Yerusalem, ada satu orang dia pe nama Simeon. Dia itu hidup butul pa Tuhan Allah pe muka deng dia dengar-dengaran pa Tuhan Allah. Deng dia ada tunggu waktu yang nanti Tuhan Allah mo kase slamat pa bangsa Israel. Kong Roh Kudus salalu sama-sama deng dia. 26Roh Kudus so kase tau pa dia, dia tara akan mati kalu dia bolong lia pa Mesias, Raja yang Tuhan Allah janji mo kase slamat pa manusia.

27Jadi waktu Yusuf deng Maria mo maso di Ruma Ibada Pusat pe kompleks, Roh Kudus me suru pa Simeon pigi di situ. Simeon ka sana kong dia ada waktu Yusuf deng Maria mo serakan Yesus pa Tuhan Allah iko aturan di lima kitab Musa. 28Waktu Simeon lia Anak itu, langsung dia ka sana ambe, turus dukung deng puji pa Tuhan Allah. Dia bilang,

29“Ya Tuhan,

dulu Tuhan so janji pa kita,

kong skarang Tuhan pe janji itu so jadi pa kita,

kita yang jaga biking apa yang Tuhan suru.

Jadi skarang, biar suda kita mati deng hati yang tenang.

30Barang, kita so lia deng kita pe mata kapala sandiri Orang yang Tuhan Allah utus untuk kase slamat pa manusia.

31Orang yang mo kase slamat pa manusia itu,

Tuhan Allah pake pa Dia untuk kase slamat pa samua bangsa.

32 # Yes. 42:6, 49:6, 52:10 Orang itu nanti sama deng tarang,

yang kase tarang jalang.

Dia kase tarang orang-orang yang bukang Yahudi pe hati,

supaya dorang bole datang pa Tuhan Allah,

deng supaya orang-orang puji deng hormat pa Tuhan Allah pe umat, bangsa Israel.”

33Pe dengar Simeon bilang bagitu, Yusuf deng Maria jadi herang. 34Turus, Simeon berdoa supaya Tuhan Allah kase Dia pe bae pa Yusuf, Maria deng pa Anak itu. Kong dia bilang pa Maria, Anak itu pe mama, “Karna Anak ini, banya orang Israel akan tara percaya kong dapa hukum dari Tuhan Allah, tapi ada banya orang Israel laeng lagi yang mo percaya kong dapa slamat. Kong Anak ini jadi tanda, Dia dari Tuhan Allah, tapi banya orang tara akan tarima pa Dia. 35Deng bagitu, orang-orang pe isi hati mo dapa tau. Kong ngana Maria, nanti ngana pe hati mo sedi karna Anak ini, sama deng orang ada cucu deng panikam di ngana pe hati.”

Hana puji pa Tuhan Allah karna Yesus so lahir

36Di Ruma Ibada Pusat itu me ada nene satu yang pe nama Hana. Dia itu nabi, yang jaga kase turus Tuhan Allah pe pasáng pa orang-orang. Hana ini pe papa pe nama Fanuel dari suku Asyer. Dia perna kawing kong hidup sama-sama deng dia pe laki tuju taong, 37tapi dia pe laki so mati, jadi dia so janda. Dia pe umur so delapan pulu ampa taong. Dia tara perna kase tinggal Ruma Ibada Pusat. Siang malam dia semba pa Tuhan Allah. Dia jaga bapuasa deng berdoa. 38Waktu Simeon sementara bacarita deng Yusuf deng Maria, Hana datang di situ, kong mulai puji pa Tuhan Allah. Dia kase tau tentang Anak itu pa samua orang yang ada di situ yang sementara tunggu Raja yang Tuhan Allah janji mo kase bebas pa bangsa Israel.

Dong Yusuf bale lagi di Nazaret

39 # Mat. 2:23 Bagitu Yusuf deng Maria so abis biking samua acara iko Tuhan Allah pe aturan di lima kitab Musa, dorang samua pulang pa dong pe ruma di kota Nazaret, di daera Galilea. 40Turus, Yesus lebe hari lebe tamba basar deng jadi kuat. Dia me jadi orang yang tau banya hal, deng Tuhan Allah sayang pa Dia.

Yesus di Ruma Ibada Pusat

41 # Kel. 12:1-27; Ul. 16:1-8 Tiap taong, Yesus pe orang tua pigi di Yerusalem untuk iko agama Yahudi pe hari raya Paska. Hari raya itu dorang inga waktu Tuhan Allah kase bebas pa dorang pe orang tua dulu-dulu dari bangsa Mesir yang jaja pa dorang. 42Waktu Yesus umur dua blas taong, Dia pe orang tua pigi di Yerusalem iko hari raya itu sama biasa. Waktu itu, dorang bawa pa Yesus. 43Bagitu hari raya itu so abis, Yesus pe orang tua mulai pulang di Galilea. Dorang tara tau Yesus masi di Yerusalem 44karna dorang kira, Yesus so bajalang sama-sama deng orang-orang laeng yang bajalang. Bagitu dorang so bajalang satu hari, baru dorang cari-cari pa Yesus di dorang pe sudara-sudara deng orang-orang yang dorang kanal yang sementara bajalang itu. 45Tapi dorang tara dapa pa Dia. Jadi dorang bale lagi di Yerusalem la cari pa Dia di sana. 46Pe hari ketiga, baru dorang dapa pa Dia di Ruma Ibada Pusat pe kompleks. Dia ada sementara dudu di guru-guru agama Yahudi pe tenga-tenga, Dia dengar deng tanya-tanya pa dorang. 47Samua orang yang dengar Yesus pe bicara, dorang jadi taherang-herang, barang Dia mangarti skali deng Dia bajawab butul samua. 48Pe lia bagitu, Yesus pe papa deng mama me jadi herang. Kong Dia pe mama bilang pa Dia, “Yesus, papa deng mama so tako skali, torang cari-cari pa Ngana kasana-kamari. Bikiapa kong Ngana biking pa papa deng mama bagini?”

49Yesus bilang pa dorang, “Papa deng mama tara perlu cari pa Kita. Karna papa deng mama pasti so tau, Kita ini musti ada pa Kita pe Bapa pe ruma.” 50Dia bilang bagitu, tapi dorang tara mangarti Dia pe maksut.

51Abis itu, Yesus pulang di Nazaret sama-sama deng dorang, kong Dia tetap dengar-dengaran pa dorang. Tapi Dia pe mama inga-inga turus apa yang Yesus bilang tadi kong tanya-tanya dalam hati apa itu dia pe arti. 52#1Sam. 2:26; Ams. 3:4 Yesus lebe tamba basar kong lebe tau banya hal. Tuhan Allah tamba sayang pa Dia, deng orang-orang me tamba sanang deng Dia.

Currently Selected:

Lukas 2: PB MMU

Highlight

Copy