Yohanes 16

1Yesus bilang lagi pa Dia pe murit-murit, “Kita bilang samua itu pa ngoni, supaya ngoni tara berenti percaya pa Kita. 2Barang, deng ngoni iko pa Kita, nanti ada dia pe waktu, pemimpin-pemimpin agama Yahudi so tara kase bae pa ngoni mo baibada lagi di ruma-ruma ibada. Mala mo ada dia pe waktu lagi, orang-orang mo bunu pa ngoni, barang dorang pikir, itu Tuhan Allah pe mau. 3Dorang mo biking bagitu pa ngoni karna dorang tara kanal butul pa Kita pe Bapa deng dorang lagi tara kanal pa Kita. 4Kita kase tau samua itu mo jadi pa ngoni, supaya nanti kalu dorang siksa pa ngoni, ngoni mo inga Kita so perna kase tau itu pa ngoni. Kita tara bilang itu dari pertama waktu ngoni baru jadi Kita pe murit, barang Kita masi ada sama-sama deng ngoni.”

Yesus kase tau tentang Roh Kudus yang mo tolong pa orang-orang yang percaya pa Yesus

5“Skarang, Kita mo pigi pa Kita pe Bapa yang so utus pa Kita. Tapi tara ada dari ngoni yang tanya pa Kita mo pigi ka mana? 6Tapi skarang ngoni pe hati sedi skali, barang Kita bilang Kita so mo pigi. 7Tapi butul, lebe bae Kita pigi, itu untuk ngoni pe bae. Barang kalu Kita pigi, Kita mo kase Roh Kudus supaya tolong pa ngoni. Tapi kalu Kita tara pigi, Roh Kudus itu tara akan datang pa ngoni.

8Kong kalu Roh Kudus itu so datang, Dia mo kase sadar pa orang-orang di dunia ini tentang dosa, tentang apa yang butul pa Tuhan Allah pe muka deng tentang Tuhan Allah pe hukuman. 9Pertama tentang dosa, Roh Kudus mo kase sadar pa orang-orang di dunia, dorang itu so biking dosa karna dorang tara percaya pa Kita. 10Kedua, Dia mo kase sadar pa dorang, Kita itu butul pa Tuhan Allah pe muka, karna Kita pigi pa Kita pe Bapa. Kong waktu Kita pigi itu ngoni so tara dapa lia lagi pa Kita. 11Kong ketiga, Dia lagi mo kase sadar pa dorang, Tuhan Allah pasti mo hukum pa orang-orang yang biking dosa, karna Iblis, setang-setang pe raja yang berkuasa di dunia ini so dapa hukuman.

12Masi banya lagi yang Kita mo bilang pa ngoni, tapi skarang ngoni bolong mampo mangarti. 13Nanti kalu Roh Kudus yang mo tolong itu so datang, Dia mo kase ajar pa ngoni sampe ngoni bole mangarti samua yang butul. Barang, Roh Kudus itu tara bicara iko apa yang ada pa Dia pe pikiran sandiri, tapi Dia bicara iko apa yang Dia dengar dari Tuhan Allah. Kong Roh Kudus lagi yang mo kase tau pa ngoni apa yang mo jadi nanti. 14Roh Kudus itu mo hormati pa Kita, karna Dia kase tau pa ngoni apa yang Dia so kamuka dengar dari Kita. 15Samua yang Kita pe Bapa punya, itu lagi Kita punya. Jadi ngoni bole tau pasti, apa saja yang Roh Kudus kase tau pa ngoni, Dia dapa itu dari Kita.”

Murit-murit pe hati mo sedi waktu Yesus mati, tapi nanti dong mo sanang waktu Yesus hidup ulang

16Yesus bilang lagi pa Dia pe murit-murit, “So tara lama, ngoni tara lia lagi pa Kita. Kong abis itu, so tara lama lagi ngoni mo baku dapa ulang deng Kita.”

17Pe dengar Yesus bilang bagitu, babarapa orang dari Dia pe murit baku-baku tanya bagini, “Dia pe maksut apa kong bilang so tara lama torang tara lia lagi pa Dia, kong abis itu so tara lama lagi torang mo baku dapa ulang deng Dia? Kong bikiapa lagi Dia bilang Dia mo pigi pa Bapa?” 18Yesus pe murit-murit turus baku-baku tanya, “Apa Dia pe maksut Dia bilang so tara lama lagi? Torang tara mangarti Dia pe maksut itu.”

19Yesus tau, dorang mo batanya pa Dia. Jadi, Dia bilang pa dorang, “Ngoni ini ada baku-baku tanya tentang apa yang Kita bilang tadi to? Kita bilang, ‘So tara lama lagi ngoni tara lia lagi pa Kita. Kong abis itu, so tara lama lagi ngoni mo baku dapa ulang deng Kita.’ 20Inga bae-bae yang Kita mo bilang ini. Waktu ngoni so tara lia lagi pa Kita, ngoni memang mo manangis deng bataria, tapi orang-orang yang tara percaya pa Kita mo sanang. Ngoni mo sedi, tapi nanti ngoni pe sedi itu mo beruba jadi sanang. 21Itu sama deng parampuang yang menderita waktu mo melahirkan, tapi abis dia so melahirkan dia pe ana, dia so tara inga lagi dia pe menderita itu. Barang, dia so jadi sanang skali waktu dia pe ana so lahir. 22Bagitu lagi deng ngoni. Skarang ini ngoni pe hati sedi, tapi nanti torang mo baku dapa ulang. Di situ, ngoni pe hati mo sanang skali kong tara ada orang biar cuma satu yang bole rampas ngoni pe sanang itu.

23Kong waktu torang baku dapa ulang#16:23: Yesus bilang ini, Dia pe maksut tentang Dia pe kematian, deng Dia mo hidup ulang. Dia pe maksut lagi, waktu Dia so pigi di sorga, Dia pe murit-murit nanti mo lia Roh Kudus pe karja di dunia ini, sama deng dorang ada lia Yesus pe karja lagi. itu, ngoni so tara mo tanya apa-apa lagi pa Kita. Kita bilang pa ngoni, waktu itu lagi, samua yang ngoni minta pa Kita pe Bapa, Dia mo kase pa ngoni karna ngoni so jadi Kita pe umat. 24Dari dulu sampe skarang ngoni bolong minta apa-apa pa Kita pe Bapa pake Kita pe nama. Minta suda apa yang ngoni perlu kong ngoni akan dapa itu, supaya ngoni pe hati mo jadi sanang skali.

25Samua ini Kita bilang pa ngoni pake umpama. Tapi akan ada dia pe waktu Kita mo bicara pa ngoni so tara pake umpama lagi, tapi deng turus tarang Kita mo kase tau tentang Kita pe Bapa. 26Waktu itu lagi, ngoni baminta langsung pa Bapa pake Kita pe nama. Kita tara perlu mo minta pa Bapa untuk ngoni, 27karna Bapa sandiri sayang pa ngoni, barang ngoni lagi sayang pa Kita deng percaya Kita ini yang Dia utus. 28Kita datang di dunia ini dari Kita pe Bapa. Tapi skarang, Kita mo kase tinggal dunia ini kong bale ulang pa Kita pe Bapa.”

29Yesus pe murit-murit bilang pa Dia, “Aa, skarang Guru so bicara deng turus tarang pa torang, deng Guru so tara pake umpama lagi. 30Skarang torang tau, Guru tau samua hal, kong orang so tara perlu mo tanya-tanya lagi pa Guru. Karna itu torang so percaya, Guru itu dari Tuhan Allah.”

31Yesus tanya pa dorang, “Jadi, ngoni so percaya skarang? 32Inga, ada dia pe waktu, deng memang so dia pe waktu, ngoni samua mo lari kase tinggal pa Kita, ngoni mo lari pulang tapisa-pisa pa ngoni pe kampong masing-masing. Tapi Kita tara sandiri, karna Kita pe Bapa ada sama-sama deng Kita.

33Kita kase tau samua yang mo jadi itu, supaya ngoni bole hidup deng hati tenang, karna ngoni so percaya pa Kita. Di dunia ini ngoni mo rasa menderita karna mo dapa siksa, tapi kase kuat suda ngoni pe hati! Barang, Kita so kase kala samua kuasa di dunia ini.”

Currently Selected:

Yohanes 16: PB MMU

Highlight

Copy