Kisah Para Rasul 12

Yakobus dapa bunu deng Petrus dapa tangka

1Waktu itu, raja Herodes mulai jaga siksa pa babarapa anggota jemaat di kota Yerusalem. 2Dia parenta supaya bunu pa Yohanes pe sudara Yakobus itu deng parang. 3Waktu raja Herodes lia apa yang dia biking itu biking pemimpin-pemimpin agama Yahudi pe hati sanang, dia suru tangka lagi pa Petrus. Waktu itu, pas di hari raya Roti Tara Pake Ragi. 4#Kel. 12:1-27 Abis tangka pa Petrus, raja Herodes suru kase maso pa dia di penjara, kong suru tentara ampa regu baku ganti-ganti jaga pa Petrus. Tiap regu ada ampa tentara. Nanti kalu agama Yahudi pe hari raya Paska#12:4: Hari raya Paska itu, orang Yahudi inga waktu Tuhan Allah kase bebas pa dorang pe orang tua dulu-dulu dari bangsa Mesir yang jaja pa dorang. so abis, baru raja Herodes pe rencana mo urus pa Petrus di orang banya pe muka. 5Jadi Petrus dapa tahang di penjara. Tapi biar bagitu me, orang-orang yang percaya tara berenti-berenti berdoa pa Tuhan Allah untuk Petrus.

Tuhan kase kaluar pa Petrus dari penjara

6Di dalam penjara, Petrus tidor di tentara dua pe tenga-tenga, dia pe tangan ada dapa ika deng rante besi sama-sama deng tentara dua itu pe tangan. Baru ada tentara-tentara laeng lagi yang bajaga di pintu gerbang pe muka. Kong malam itu suda yang dia pe beso raja Herodes mo urus pa Petrus di muka orang banya, 7kage-kage Tuhan pe malaekat badiri di Petrus pe pinggir, kong penjara itu jadi tarang skali. Turus, dia kore pa Petrus kase bangun, dia bilang, “Petrus, bangun suda capat!” Pe abis malaekat bilang bagitu, rante yang dong kase ika pa Petrus pe tangan itu langsung talapas. 8Abis itu, malaekat bilang pa Petrus, “Pake suda ngana pe baju deng spatu.” Turus Petrus biking sama deng yang malaekat itu suru pa dia. Abis itu, malaekat bilang lagi pa dia, “Pake ngana pe juba kong iko pa kita.”

9Pe dengar itu, Petrus me iko pa malaekat sampe kaluar dari penjara itu. Waktu itu, Petrus kira apa yang jadi itu tara sunggu-sunggu, macam deng cuma mimpi saja. Padahal apa yang dia lia itu, butul-butul malaekat ada bawa pa dia kaluar dari penjara. 10Dorang bajalang iko di pos jaga yang pertama, turus iko pos jaga yang kedua, sampe di pintu gerbang yang dari besi. Pintu gerbang itu kalu mo pigi di kota musti iko di situ. Pe sampe di sana, pintu itu tabuka sandiri, turus dorang bajalang kaluar dari situ sampe di ujung jalang. Di situ, kage-kage malaekat itu kase tinggal pa Petrus.

11Abis itu, Petrus sadar, kong dia bilang, “Skarang baru kita tau butul-butul Tuhan Allah so utus Dia pe malaekat la kase slamat pa kita dari raja Herodes deng dari orang-orang Yahudi pe rencana jahat samua.”

12Abis Petrus pikir itu sadiki, dia pigi pa Maria pe ruma. Maria itu Yohanes pe mama, kong Yohanes itu yang orang jaga pangge Markus. Di Maria pa ruma itu, banya orang percaya ada bakumpul la berdoa. 13Pe sampe di situ, Petrus batoki pintu gerbang. Kong pembantu parampuang satu yang pe nama Rode, dia ka sana di pintu gerbang la mo lia sapa yang batoki. 14Kong waktu pembantu dengar suara itu, langsung dia kanal itu Petrus pe suara. Tapi karna dia talalu sanang, dia tara buka pintu gerbang itu, mala dia maso ulang di dalam ruma kong kase tau pa orang-orang, Petrus ada di muka pintu gerbang.

15Tapi orang-orang di situ bilang pa pembantu parampuang itu, “Ngana so gila kaapa!”

Tapi pembantu itu bakaras bilang, di sana itu butul-butul Petrus.

Dorang bilang lagi, “Itu mangkali cuma Tuhan pe malaekat yang jaga pa Petrus kaapa.”

16Sementara itu, Petrus masi batoki-toki turus di luar. Kong, waktu dorang buka pintu kong dapa lia pa Petrus, dorang langsung herang. 17Tapi Petrus kase kode deng dia pe tangan supaya dorang badiam. Abis itu, Petrus carita pa dorang, bagimana Tuhan bawa pa dia kaluar dari penjara. Kong Petrus bilang lagi pa dorang, “Ngoni kase tau suda ini samua pa Yakobus deng pa sudara-sudara laeng yang percaya pa Yesus.” Abis bilang bagitu, Petrus langsung kaluar kong pigi di tampa laeng.

18Dia pe beso pagi, tentara-tentara kage, barang Petrus so tara ada di penjara. Dorang bingung, kong dong baku-baku tanya, apa yang so jadi pa Petrus. 19Waktu raja Herodes dapa tau, dia suru orang pigi cari pa Petrus, tapi dorang tara dapa. Turus, Herodes suru urus pa tentara-tentara yang bajaga pa Petrus itu kong bunu pa dorang. Abis itu, raja Herodes kase tinggal daera Yudea kong pigi di Kaisarea, turus tinggal di situ.

Herodes mati

20Raja Herodes paling mara pa orang dari kota Tirus deng Sidon. Padahal dorang jaga babili makanang di daera yang raja Herodes kuasai. Jadi dorang baku ator mo datang mangada pa dia. Dorang buju dulu pa Blastus, orang yang jaga urus Herodes pe istana, supaya dia bantu pa dorang la baku bae deng Herodes.

21Turus, Herodes tentukan waktu untuk tarima pa dorang. Di hari itu, dia pake dia pe baju raja kong dudu di kursi raja, turus dia mulai bicara pa dorang. 22Bagitu orang-orang Tirus deng Sidon dengar dia pe suara, dorang puji pa dia deng suara kuat-kuat, “Ini tuhan pe suara, bukang manusia pe suara!” 23Waktu itu, Herodes kase biar dorang puji deng hormat pa dia. Dia tara bilang dorang musti puji deng hormat pa Tuhan Allah. Jadi, waktu itu suda Tuhan pe malaekat tampeleng pa Herodes, kong cacing-cacing makang pa dia sampe mati.

24Kong mulai dari itu, orang lebe kase carita Tuhan Allah pe Kabar Bae tentang Yesus Kristus, jadi so lebe banya orang yang percaya pa Dia.

25Waktu Barnabas deng Saulus so abis bawa sumbangan di Yerusalem, dorang bale ulang di kota Antiokhia. Dorang ada bawa satu orang yang pe nama Yohanes, yang orang jaga pangge Markus.

Currently Selected:

Kisah Para Rasul 12: PB MMU

Highlight

Copy