Marko 4

Ntharika ya wakumija mbeu

(Mateyu 13.1-9; Luka 8.4-8)

1Ndipo wangwamba so kusambizga mu mphepete mu nyanja. Ndipo unguwungana kwaku iyo mzinda weni ukuru, viyo kuti wangusere mu ngaraŵa ndi kuja mu nyanja; ndipo mzinda wose wenga mu mphepete mu nyanja pa mutunda. 2Ndipo waŵasambizganga vinandi mu zintharika, ndipo waŵaneneyanga mu chisambizgu chake, 3“Vwani! Onani, wakumija wangutuwa kwachimija. 4Ndipo kunguŵa mu kumija ko yinyake yinguwa mumphepete mu nthowa ndipo viyuni vinguza ndi vinguyirgha. 5Yinyake yinguwa pa jarawe, po yengavi nyata yinandi; ndipo sosonukweni yingubuka, chifukwa yengavi nyata yakukiyakiya: 6lati lakwera dazi, yinguŵawuka; ndipo pakuŵavi nkhorozu, yingufota. 7Yinyake yinguwa mu minga; ndipo minga yingume, ndi yinguyifinyirizga, ndipo kuti yingupasa chipasi cha. 8Ndipo yinyake yinguwa mu nyata yeneko, yingume ndi yingukuwa; ndipo yingupasa vya machumi ghatatu, ndi vya machumi ghakhonde ndi limoza, ndi vyamachumi pe chumi.” 9Ndipo watinge, “Yose yo we ndi makutu kuvwa, wavwe.”

Uratu wa zintharika

(Mateyu 13.10-17; Luka 8.9-10)

10Ndipo penipo wangujideke, ŵakumzunguliya, pamoza ndi chumi ndi ŵaŵi wo ŵangumfumba vyapa ntharika yo. 11Ndipo waŵaneniyanga, “Kwaku imwe kupaskika mangari gho gha ufumu waku Chiuta: kweni kwaku ŵa ŵakubwaro vinthu vyose vituŵaŵiya mu zintharika: 12alinga kuti kuwona ŵangawona kweni ŵangawamo cha; vinu kokuli ŵangang'anamuka, ndipo ŵangagowokereka.”

Yesu wakonkhoma ntharika ya wakumija mbeu

(Mateyu 13.18-23; Luka 8.11-15)

13Ndipo watiti kwaku wo, “Kumbi kuti muwamo cha ntharika yeniyi? Na muwengemo uli ntharika zose? 14Wakumija wamija mazu. 15Ndipo ŵeniwo ŵemu mphepete mu nthowa, mwenimo ghamijika mazu; penipo ŵatiti ŵavwa, ruŵi watuza Satana, ndipo waghapoka mazu ghakumijika mwaku wo. 16Ndipo kwakukozgana yagha ndigho ghakumijika pa malo gha jarawe, ŵeniwo, po ŵaghavwa mazu, ruŵi ndi chimwemwe ŵati gharonde; 17ndipo ŵalive nkhorozu mwaku ŵija, kweni mba kanyengo; sono yichiŵaŵiya suzgu pamwe fingu pa chifwa cha mazu gho, ruŵi ŵaguŵiskika. 18Ndipo ghanyake ndigho ghakumijika muminga; ŵeniwo ndiwo ŵatiti ŵavwa mazu. 19Kweni chifukwa cha maghanaghano gha mgonezi wo, ndi fuvyu la usambasi, ndi makhumbiro gha vinthu vinyake ghakuseremu, sono vighafinyirizga mazu, ndipo ghatuwa ghazira vipasi. 20Ndipo yegha ndigho ghakumijika mu nyata yeneko; ŵeniwo wose ŵatuvwa mazu ŵaghoronde, ndi ŵapasa vipasi vya machumi ghatatu, ndi vya machumi ghankhonde ndi limoza, ndi vya machumi pe chumi.”

Nyali kusi ku mwesu

(Luka 8.16-18)

21Ndipo wangunena nawo, “Kumbi nyali yitoleke kuti yiŵikike kusi ku mwesu, pamwenga kusi ku chita, kuti yiŵikika pa chakujapo nyali cha? 22Chifukwa kuti kalipo kakubisika cha ko karekenge kurongoleka; chingana nkhuti kanthu kaŵe ka muchibisibisi ko karekenge kuziŵika pakweru. 23Asani munthu we ndi makutu, kuvwa, wavwe.” 24Ndipo wanguŵanene, “Chenjeni ndi cho mutuvwa: mu mwesu wo mutese, imwe namwe mwesekiyenge mwenimo, ndipo ukuskikiyengeko so kwaku imwe, 25chifukwa yose yo we nacho, chipaskikiyengeko kwaku iyo: ndipo yose yo walive, kwaku iyo chikwamphulikengeko chingana nchenicho we nacho.” 26Ndipo wanguti, “We viyo ufumu waku Chiuta, uyana ndi munthu wakuseŵa mbeu mu munda; 27ndipo wagona ndi wayuka usiku ndi msana, ndipo mbeu yo yibuka ndi yikuwa, iyo kuti waziŵa cha mo yimere. 28Charu chipasa chijachija, chidana jani, pavuli soyu, pavuli pake trigu lakukhoma mu soyu. 29Kweni penipo wacha, sono ŵatamba kuvuna pakuti yaŵandika nyengo ya chivuna.”

Ntharika ya kamuganje

(Mateyu 13.31; Luka 13.18-19)

30Ndipo wanguti, “Teruzgiyenge uli ufumu waku Chiuta? Pamwenga ntharika yakutinji tiupong'iyenge? 31We uli ndi nje ya kamuganje, yeniyo, po yimijika mu charu, chingana njimana ku mbeu zose zapacharu, 32ndipuuli asani yamijika, yime ndi yituŵa yikuruku ku sungwi zose, ndipo yitenga mphanda zikuru, viyo kuti viyuni vyamude viziŵa kuzenga vivimbu mu mduzi wake.”

33Ndipo ndi ntharika zinandi zaviyo warongoronga mazu kwaku wo, uli ndimo ŵaziŵiyanga kuvwa; 34kweni kwambura ntharika kuti wangurongoro nawo cha: kweni ku ubende wasambizi ŵake waŵafwatuliyanga vyose.

Yesu wachitamiska chilirondo

(Mateyu 8.23-27; Luka 8.22-25)

35Ndipo pa zuŵa liya kwati kwaŵa mazuro, watiti kwaku wo, “Tambukiye kusirgha.” 36Ndipo pakusiya mzinda wo, ŵangumronde mu ngaraŵa, uli ndipo wenge. Ngaraŵa zinyake zenga pamoza nayo. 37Ndipo linguŵapo liringa likuru la mphepu, ndipo mayigha ghadangamu mu ngaraŵa, viyo kuti ngaraŵa yo yazazanga maji. 38Iyo mweneko wenga ku matambi, wakura tulo pa msamiro; ndipo ŵangumyuska wanguti kwaku iyo, “Msambizgi, asi muphwere kuti tiyowa?” 39Ndipo wati wayuka wanguyichenya mphepu, ndipo wanguyinene nyanja, “Chetama ja bata!” Ndipo mphepu yingureka, ndipo kunguŵa bata likuru. 40Sono wanguŵanene, “Chifukwa chine mwe ŵamantha? Ndasono mundaŵe ndi chivwanu?” 41Ndipo ŵangopa ndi chopu chikuru, viyo ŵanenerananga, “Njani mwenuyu na, pakuti chingana ndi mphepu ndi nyanja yitumvwiya?”

Currently Selected:

Marko 4: TongaMw

Highlight

Copy