Luka 18

Ntharika ya choko ndi mweruzgi

1Ndipo wanguŵakambiya ntharika yakuti nkhwakwenere iwo kuromba rutaruta, ndi kudembereka cha: 2wakuti, “Kwenga mu msumba wakuti mweruzgi ngana, wamburakopa Chiuta ndi wambura kuphwere munthu: 3ndipo mwenga choko mu msumba weniwuwa, ndipo chazanga kwaku iyo, chakuti, ‘Nditaskeni ku mphindikwa yangu.’ 4Ndipo kwa nyengo kuti wakhumbanga cha: kweni pavuli po wanguti mwaku yija, ‘Chingana kuti nditopa Chiuta cha, chingana kuti ndiphwere munthu cha; 5kweni chifukwa choko chenichi chitindisuzga, ndichitaskenge, vinu pakuziyaziya mpaka umari chingandijenyeska.’ ” 6Kweni Mbuya wanguti, “Pulikizgani chenicho watiti mweruzgi wambura urunji. 7Ndipo asi Chiuta wangaŵachitiya utaski ŵakusankhika ŵake, wo ŵabongore kwaku iyo msana ndi usiku, kumbi wakunthiyengepo ŵaka paku iwo? 8Ndikuneniyani kuti, waŵachitiyenge utaski ruŵi. Posepose napo, wachiza Mwana wa munthu, wachisaniyenge chivwanu pa charu, kumbi?”

Ntharika ya muFarisi ndi wamsonkho

9Ndipo so wangukambiya ntharika yeniyi ku ŵanyake wo ŵangugomekezga mwaku ŵija kuti ŵenga ŵarunji, ndi ŵanguyuyuwa ŵakujapo: 10“Ŵanthu ŵaŵi ŵangukwere ku kasopi kwachiromba: yumoza muFarisi, ndi munyake wamsonkho. 11Yo mu Farisi wakusoka warombanga viyo kwaku yija, ‘A Chiuta, ndiwonga imwe, kuti nde nge mbakujapo ŵa ŵanthu cha, ŵalikwanukwanu, ŵamburu urunji, ŵarowozi, pamwenga napo nge ndi mwenuyu wamsonkho. 12Ndifunga kaŵi mu sabata; ndipaskaku chakuchumikiya chaku vyose vyenivyo nditanduwa.’ 13Kweni wamsonkho yo, wakuma kutari, kuti wakhumbanga cha kuyinuskiya chingana ndi maso ghake kuchanya, kweni wapamanthanga chifuŵa chake, wakuti, ‘A Chiuta, mupepeskeke kwaku ine ndamulakwi!’ 14Ndikuneniyani, wangusikiya uyu wakurunjiskika ku nyumba yake, kwakuruska yuwa; pakuti yose wakujikuzga wayuyulikenge; kweni wakujiyuyuwa wakuzgikenge.”

Yesu watumbika twana

(Mateyu 19.13-15; Marko 10.13-16)

15Ndipo ŵatoliyanga kwaku iyo malitema nagho, alinga kuti waghakwaske: kweni ŵasambizi ŵachiwona ŵanguŵachenya. 16Kweni Yesu wangughadaniya kwake, wakuti, “Tuzomerezgeni twana kuza kwaku ine, ndi mungatukanizganga cha; chifukwa ngwa twaviyo ufumu waku Chiuta. 17Ndikuneneskiyani, yose yo warekenge kuronde ufumu waku Chiuta nge nkhana, kuti wangasere mwaku wo cha.”

Munthu msambasi

(Mateyu 19.16-30; Marko 10.17-31)

18Ndipo mura yumoza wangumfumba, wakuti, “Muwomba wamampha, nkhachitanga chine kuti ndihare umoyo wamuyaya?” 19Kweni Yesu wanguti kwaku iyo, “Unditamuliyanji wamampha? Palive wamampha, kweni yumoza, ndiyo Chiuta. 20Marangu ughaziŵa; ‘Ungareŵanga, ungabayanga, ungabanga, ungasimikizganga kwautesi, tumbika ausu ndi anyoko.’ ” 21Kweni wanguti iyo, “Vyenivyo vyose ndasungirizga kutuwa ku uhurwa wangu.” 22Ndipo wachivwa Yesu wanguti kwaku iyo, “Chimoza chechekupereŵe kwako: vyose vyenivyo we navyo saskanga, ndi paskanga ku ŵakavu, ndipo uŵenge ndi mbiku kuchanya: ndipo zanga, rondo ine.” 23Kweni wachivwa vyenivyo iyo, wanguŵa wachitima ukongwa; chifukwa wenga mromba ukongwa. 24Ndipo Yesu pakumuwona wanguti, “Kwaunononu ŵaserenge mu ufumu waku Chiuta wo mbakuŵa ndi vyuma. 25Chifukwa nchiyuyu ku gamila kusere mu jiso la katimu porotu, kwakuruska ku mromba kusere mu ufumu waku Chiuta.” 26Ndipo wo ŵanguvwa ŵanguti, “Ndipo njani waziŵa kutaskika?” 27Kweni iyo wanguti, “Vyambura machitika ku ŵanthu vyamachitika kwaku Chiuta.” 28Ndipo Petro wanguti, “Awonani, ifwe tareka vyaku taŵeni, ndipo tarondo imwe.” 29Ndipo iyo wanguŵanene, “Ndikuneneskiyani, Palive yumoza mweniyo warekenge nyumba, pamwenga muwoli, pamwenga ŵabali, pamwenga ŵapapi, pamwenga ŵana, pa chifukwa cha ufumu waku Chiuta, 30mweniyo warekenge kuronde vinandiku munyengo iyi, ndi mu mgonezi wo utuza umoyo wamuyaya.”

Wakamba so ndi nyifwa yake nyengo ya chitatu

(Mateyu 20.17-19; Marko 10.32-34)

31Ndipo pakujitole chumi ndi ŵaŵi wo, wanguti kwaku wo, “Awonani tikwere ku Yerusalemu, ndipo vyose vyakulembeka ndi ŵamchimi vifiskikiyenge ku Mwana wa munthu. 32Chifukwa wakombolekiyenge ku Mitundu, ndipo watombozgekenge, ndi walengeskekenge, ndi wafunyirikenge; 33ndipo ŵati ŵamkwechuwa, ŵambayenge: ndipo pa zuŵa lachitatu wakayukanga so.” 34Ndipo iwo kuti ŵanguwamo kanthu kaku vyenivi cha; ndipo nenedu lenili lenga lakubisika kwaku wo, ndipo kuti ŵateskanga cha makambidu gho.

Yesu wachizga wachiburumutiya, mupempha

(Mateyu 20.29-34; Marko 10.46-52)

35Ndipo kunguŵa po waŵandikanga iyo ku Yeriko, wachiburumutiya ngana wajanga mu mphepeti mu nthowa wakupempha; 36ndipo wanguti wavwa mzinda wakukapo, wafumbiriyanga, chingaŵa chine chenichi. 37Ndipo ŵangumunene kuti ndi “Yesu waku Nazarete yo watukapo.” 38Ndipo wangukambura, wakuti, “Yesu, mwa mwana waku Davidi, ndichitiyeni lisungu.” 39Ndipo wo ŵangudanjiya ŵamchenyanga kuti wachetame: kweni mweneko wabongonga ukongwaku, “Mwa mwana waku Davidi, ndichitiyeni lisungu.” 40Ndipo wanguti wama Yesu, wangulanguliya kuti warongozgeke kwake: ndipo wanguti waŵandika, wangumfumba, 41“Ukhumba kuti ndikuchitiye chine?” Ndipo iyo wanguti, “Mbuya, kuti ndilereske.” 42Ndipo Yesu wanguti kwaku iyo, “Lereska: chivwanu chako chakutaska.” 43Ndipo sosonukweni wangulereska so, ndipo wamrondonga wakukankhuska Chiuta: ndipo khamu lo lose, lichiwona, linguthamika Chiuta.

Currently Selected:

Luka 18: TongaMw

Highlight

Copy