Chiyambo 15

Ambuya apangana ndi Abramu

1Pavuli pa vinthu ivi mazu gha Ambuya ghanguza kwaku Abramu mu chakuwona, “Ungopanga cha Abramu, Ine nde nguru yako; mphoto yako yikaŵanga yikuru ukongwa.” 2Kweni Abramu wanguti. “Ambuya Chiuta, mundipaskenge chine? Pakuti ndichalivi mwana, ndipo nuhari wa nyumba yangu ndi Eliezere waku Damasko?” 3Ndipo Abramu wanguti, “Ehe, mulivi kundipaska mphapu; ndipo muŵanda wakuwiya mu nyumba yangu wakaŵanga muhari wangu.” 4Sono mazu gha Ambuya ghanguza kwaku iyo, “Uyu kuti wakaŵanga muhari wako cha; mwana waku wamweni ndiyo wakaŵanga muhari wako.” 5Ndipo wangumutuzgiya kubwalo ndi wanguti, “Lereska kuchanya, ndi uŵerenge nyenyezi zo, asani ungaziŵa kuziŵerenga.” Sono wanguti kwaku iyo, “Viyo ndimu yikaŵiyanga mphapu yako.” 6Ndipo wangugomezga mu Ambuya, ndipo Chiuta wangumupima kuŵa murunji. 7Ndipo wanguti kwaku iyo, “Ndine Ambuya mweniyo wangukutuzga ku Uru wa ŵaKaldiya kuzachikupaska charu ichi kuchihara.” 8Kweni iyo wanguti, “Ambuya Chiuta, ndikaziŵanga uli ine kuti ndikachiharanga?” 9Wanguti kwaku iyo, “Nditole ng'ombe yinthukazi ya virimika vitatu, mbuzi yinthukazi ya virimika vitatu, mberere yinthurumi ya virimika vitatu, njiŵa yimoza ndi ka nkhunda.” 10Ndipo wangumtole ivi vyose ndi wanguvipikita pakati, ndipo wanguŵika chipikita chose kuthyana ndi chinyake; kweni viyuni vyo kuti wanguvipikita cha. 11Ndipo penipo makuŵi ghangusikiya pa vitanda, Abramu wangughadikiska. 12Lichisere lumwi, tulo tuzitu tunguŵa paku Abramu ndipo ehe, mdima wakofya ndi ukuru unguŵa paku iyo. 13Sono Ambuya anguti kwaku Abramu, “Ziŵa kwakuneneska kuti mphapu yako yikatandalanga mu charu cho kuti nchawo cha, ndipo ŵakaŵanga ŵaŵandamwenimuwa, ndipo ŵakaŵasuzganga virimika machumi pe chumi ghanayi (400); 14Kweni ndazamtole cheruzgu pa mtundu wo ŵakatataliyanga, ndipo pavuli ŵazamtuwamo ndi usambasi unandi. 15Kweni iwe, ukarutanga ku ausu mu chimangu; ukafwanga pa ukhongwe weneko. 16Ndipo ŵazamuwere kuno mu mgonezi wa chinayi; pakuti ubendezi wa Amori wenga undafiskike.” 17Penipo lumwi lingusere ndi kungufipa, ehe, chiŵiya cha moto chakusunkha usi ndo lumbuni lakukole vingudumuwapo pakati pa vipitika ivi. 18Mu zuŵa leniliya Ambuya anguchita phanganu ndi Abramu lakuti, “Ku mphapu yako ndipaska charu ichi, kwamba pa msinji wa Egipiti kufika ku msinji ukuru zina lake Efrate, 19charu cha ŵaKeni, ŵaKenizi, waKadamoni, 20ŵaHiti, ŵaPerizi, ŵaRefa, 21Amori, ŵaKanani, ŵaGirgashi, ndi ŵaYebusi.”

Currently Selected:

Chiyambo 15: TongaMw

Highlight

Copy