Chituwa 24

Mosese ndi ŵaraŵara wakwera mu phiri

1Ndipo wanguti kwaku Mosese, “Kwere kuno ku Ambuya, iwe ndi Aroni, Nadaba, ndi Abihu ndi ŵaraŵara ŵa ŵaYisraele machumi ghankhonde ndi ghaŵi (70) ndi musope katatu. 2Mosese pe ndiyo wakazanga pafupi ku Ambuya; kweni ŵanyake kuti ŵakazanga kufupi cha, ndipo ŵanthu kuti ŵakakweriyangako pamoza nayo cha.”

3Mosese wanguza ndi wanguŵakambiya ŵanthu mazu ghose gha Ambuya ndi vyeruzgu vyose; ndipo ŵanthu wose ŵangwamuka ndi mazu ghamoza, ndi ŵanguti, “Mazu ghose gho Ambuya akamba tikachitanga.” 4Ndipo Mosese wanguremba mazu ghose gha Ambuya. Ndipo wangusoka ndi mlenjilenji, ndi wanguzenga jochero la sembe pa sina pa phiri ndi mizati chumi ndi yiŵi, kwakulingana ndi mitundu chumi ndi yiŵi ya ŵaYisraele. 5Ndipo wangutuma ŵanyamata ŵa ŵaYisraele, wo ŵangupereka mpasku wakocha ndi ŵanguchita visopo vya chimangu vya ng'ombe ku Ambuya. 6Ndipo Mosese wanguto chigaŵa chimoza cha ndopa ndi wanguziŵika mu zimbale, ndipo chigaŵa chinyake cha ndopa wanguwazgiya ku jochero la sembe. 7Sono wanguto buku la chipanganu, ndi wanguliŵerenga mu makutu gha ŵanthu; ndipo iwo ŵanguti, “Vyose vyo Ambuya akamba tikachitanga, ndipo tikaŵanga ŵakuvwiya.” 8Ndipo Mosese wanguto ndopa ndi wanguwazgiya ku ŵanthu ndi wanguti, “Awonani ndopa za chipanganu cho ŵachita ndi Imwe Ambuya kwakulingana ndi mazu yagha ghose.” 9Sono Mosese ndi Aroni, Nadaba, ndi Abihu ndi ŵaraŵara ŵa ŵaYisraele machumi ghankhonde ndi ghaŵi (70) ŵangukwera, 10ndipo ŵanguwona Chiuta wa ŵaYisraele, ndipo pasi pa marwayo ghake penga uli nkhanthowa ka mya yasangarawe, kukozgana ndi kuchanya iko kungweruka. 11Ndipo kuti wanguŵika janja lake pa mikoku ya ŵaYisraele cha; ŵanguwona Chiuta, ndipo ŵangurgha ndi ŵangumwa.

12Ambuya anguti kwaku Mosese, “Kwere kuno kwangu pa phiri ndipo ukarindizge penipa, ndipo ndikakupaskanga magome gha mwa ndi dangu ndi langulu vyo ndakurembe kuŵarunguchizga.” 13Mosese wangusoka ndi mteŵeti wake Yoswa, ndipo Mosese wangukwere mu phiri laku Chiuta. 14Ndipo wanguti ku ŵaraŵara, “Mutirinde pano, mpaka penipo tawere so kwaku imwe. Aroni ndi Huru ŵe namwe pamoza; we yose wangaŵa ndi kanthu waye kwaku iwo.”

15Sono Mosese wangukwere pa phiri ndipo mtambo unguvimba phiri lo. 16Unkhankhu wa Ambuya unguma pa phiri Sinai, ndipo mtambo ungulivimba mazuŵa ghankhonde ndi limoza; ndipo pa zuŵa la chinkhonde ndi chiŵi wangudanilizga kwaku Mosese kutuliya mu mtambo. 17Sono kawonekedu ka unkhankhu wa Ambuya kenga uli ndi moto wakocha pachanya pa phiri mu maso gha ŵaYisraele. 18Ndipo Mosese wangusere mu mtambo ndi wangukwere pa phiri. Ndipo Mosese wenga pa phiri mazuŵa machumi ghanayi (40) ndi mausiku machumi ghanayi (40).

Currently Selected:

Chituwa 24: TongaMw

Highlight

Copy