Chituwa 21
21
Dangu lapa muŵanda
(Marangu 15.12-18)
1“Sono ivi ndi vyeruzgu vyo ukaŵikanga paurongo pawo. 2Asani mugula muŵanda wachiHebere, wakatatanga kwa virimika vinkhonde ndi chimoza ndipo pa chachinkhonde ndi chiŵi wakarutanga mu wanangwa, kwambura kurondapo kanthu. 3Asani pakuza wenga yija, wakarutanga yija; asani wanguza wakuto, iku muwoli wake wakarutanga nayo. 4Asani mbuyake wakampaskanga munthukazi kuto ndipo wamubaliya ŵana ŵanthurumi pamwenga ŵanthukazi muwoli ndi ŵana ŵakaŵanga ŵambuyake ndipo iyo wakarutanga yija. 5Kweni asani muŵanda wakakabanga pakweru, ‘Nditanja mbuya wangu, ndi ŵana ŵangu; kuti ndikarutanga mu wanangwa cha,’ 6sono po mbuyaki wakayanga nayo kwaka Chiuta, ndipo wakazanga nayo ku khomo pamwanga nchindamiru ya pa khomo; ndipo mbuyake wakatoronga makutu ghake ndi zingani; ndipo wakamutataliyanga mpaka nyifwa.
7“Asani munthu wakaguliskanga mwana wake munthukazi kuŵa muŵanda kuti wakarutanga nge ndimo ŵachitiya ŵaŵanda ŵanthurumi cha. 8Asani kuti wakondwereska mbuyake cha yo wamukhumbiya kumuto, iku wakamuzomerezganga kuwomboreka; wakaŵangavi mazaza ghakumuguliskiya ku ŵanthu ŵalendo, pakuwona kuti wachita nayo kuura magomekezgeka. 9Asani wangumukhumbiya nayo mwana wake munthurumi ipu wakamuchitiyanga uli ndi mwana wake munthukazi. 10Asani watijitore munthukazi munyake, kuti wapunguwengepo unandi wa chakurgha chake cha, vyakuvwara vyake cha, pamwenga mazaza ghake gha nthengwa cha. 11Ndipo asani warekenge kumuchitiya vinthu ivi vitatu wakarutanga waka kwambura kulipapo ndrama.
12“We yose wakupuma munthu, ndipo watufwa, wakabayikanga. 13Kweni asani kuti wangumukhazga cha, kweni Chiuta ndiyo wamupong'a mu janja lake, po ndipo ndikakutemiyaninga malo kweniko wangathaŵiya. 14Kweni asani munthu wakoso munyake yo wamufinganga kale kuti wamubaye, mukamutuzgangako ku chiguŵa changu cha sembe, kuti wafwe.
15“We yose wakukoso awiske pamwenga anyina, wabayikenge.
16“We yose wakuba munthu, manyi watimuguliska pamwenga wasanirika ndi iyo, wabayikenge.
17“We yose wakutemba awiske pamwenga anyina, wabayikenge.
18“Asani ŵanthu ŵahohotana, ndipo munyake wakoso munyake ndi mwa pamwenga ndi nkhonyu yake, ndi munthu yo kuti wafwa cha kweni watama pa chita, 19ndipo asani yuwa munthu wayuka so ndi watendayenda ndi ndodo yake, yuwa wangumupuma waŵengevi kafukwa; kweni wakalipanga pakumutayiska nyengo pe, ndipo wakamuchizganga kwakufikapo.
20“Asani munthu wakoso muŵanda wake munthurumi pamwenga munthukazi, ndi ndodo, ndipo muŵanda yo watufwa penipo wakarangikanga. 21Kweni asani muŵanda watuŵa wamoyo zuŵa limoza pamwenga ghaŵi, kuti wakarangikanga cha, pakuti muŵanda yo ndi ndrama zake.
22“Asani ŵanthu ŵakorana ndi kulimbana ndipo ŵapweteka munthukazi wanthumbu viyo kuti wawere vuli, kweni paulavi so unonono unyake, yuwa wangumupweteka wakalipiskikanga, kwakulingana ndimo murumi waku yuwa munthukazi wakaŵangiyanga kwaku iyo: ndipo wakalipanga nge ndimo ŵeruzgi ŵangalanguliya. 23Asani patuzachiŵa unonono sono mukalangulanga kuti umoyo ku umoyo, 24jiso ku jiso, jinu ku jinu, janja ku janja, rundi ku rundi, 25kocha ku kocha, bala ku bala, chikukusa ku chikukusa.
26“Penipo munthu wapuma jiso la muŵanda wake munthurumi pamwenga munthukazi, ndi watilitoro, wakafwatuwanga muŵanda yo kuti waŵe mwanangwa chifukwa cha jiso. 27Asani wagontho jinu la muŵanda wake, munthurumi pamwenga munthukazi, wakamufwatuwanga muŵanda yo kuti waŵe mwanangwa chifukwa cha jinu.
28“Asani ng'ombe yagwaza munthurumi ndi sengwe, pamwenga munthukazi, ku mubaya, ng'ombe yipong'eke mya, ndipo nyama yake kurgha cha, kweni mweneko wa ng'ombe wakaulangavi kalema. 29Kweni asani ng'ombe yo yinguziŵiriya kale kugwaza ndi masengwe; ndipo mweneko waku yo wanguchenjezgeka kweni kuti wayimanga cha, ndipo yibaya munthurumi pamwenga muthukazi, ng'ombe yikadinikanga ndi mya ndipo mweneko waku yo wabayikenge. 30Asani walangulikiyenge chiwombo, po ndipo wakaperekanga pa chiwombo cha umoyo wake chose cho chalangulika paku iyo. 31Asani yitachigwaza mwana munthurumi pamwenga munthukazi wa munthu, mweneko wakachitikiyanga kwakukozgana ndi langulu lenili. 32Asani ng'ombe yangwaza muŵanda munthurumi pamwenga munthukazi, mweneko waku yo wakalipanga ku mbuya wawo ndrama machumi ghatatu (30) za siliva, ndipo ng'ombe yidinikenge ndi mya.
33“Asani wasiya mbuna ya mwazi, pamwenga asani munthu wakumba mbuna ndipo kuti wavunikapo cha, ndipo ng'ombe pamwenga mbunda yituwa mwenimo, 34mweneko wa mbuna yo wakalipanga, wakapaskanga ndrama ku mweneko waku yo, ndipo nyama yakufwa yikaŵanga yake.
35“Asani ng'ombe ya munthu yapweteka ya munyake, ndi kufwa yafwa, sono wakaguliskanga ng'ombe yo njamoyo ndipo ŵakagaŵananga mtengo wake, ndipo nyama yakufwa nayo ŵakagaŵananga. 36Pamwenga asani kwaziŵikwa kuti ng'ombe yinguziŵiriya kugwaza kale ndipo mweneko waku yo wengavi kuyimanga, wakalipanga ng'ombe pa ng'ombe ndipo nyama yakufwa yikaŵanga yake.
Currently Selected:
Chituwa 21: TongaMw
Highlight
Share
Copy
Want to have your highlights saved across all your devices? Sign up or sign in
Bible Society of Malawi
