Machitidu gha Ŵakutumika 19

Paulo mu Efeso

1Ndipo kunguŵa kuti, Apolo weche mu Korinte, Paulo, wati wadumuwa muvigaŵa vyanena, wangufika ku Efeso, ndi wangusaniya ŵasambizi ŵanyake: 2ndipo wanguti kwaku iwo, “Kumbi munguronde Mzimu Wakupaturika po munguvwana?” Ndipo ŵangumunene iwo, “Awa na, tengavi kuvwa chingana nkhuti Mzimu Wakupaturika walipo.” 3Ndipo wanguti, “Na, mungubatizikiya chine?” Ndipo iwo ŵanguti, “Mu chibatizo chaku Yohane.” 4Ndipo wanguti Paulo, “Yohane wangubatiza chibatizo cha ching'anamuka, pakukambiya khamu lo, kuti ŵavwane mwaku yo wakhasanga kuza pavuli pake, ndiku kuti, paku Yesu.” 5Ndipo ŵachivwa, ŵangubatizikiya mu zina la Ambuya Yesu. 6Ndipo penipo Paulo wanguŵika manja paku iwo Mzimu Wakupaturika wanguza paku wo; ndipo ŵarongoronga ndi malilime, ndipo ŵaloskanga. 7Ndipo wose ŵenga akhumba ŵanthurumi chumi ndi ŵaŵi.

8Ndipo wangusere mu sinagoge lo, ndi wangukamba ndi chiganga myezi yitatu, wakuŵanduliya ndi wakuŵakope vyapa ufumu waku Chiuta. 9Kweni po ŵanyake ŵenga ŵanononu ndi ŵamtafu, ŵakukambiya uheni pa nthowa yo paurongo pa urapasi wo, wangutuwako kwawo, ndi wanguŵapatuwa ŵasambizi, wakuŵanduliya zuŵa ndi zuŵa mu skulu yaku Turano. 10Ndipo chenichi chinguchitika virimika Viŵi; viyo kuti wose wo ŵajanga mu Asia ŵavwanga mazu gha Ambuya, ŵaYuda ndi so ŵaGriki.

Ŵana ŵaku Skeva

11Ndipo Chiuta wachitiyanga vyanthazi vyakuzungura ndi manja ghaku Paulo; 12viyo kuti saru zakuleske kutuwa ku liŵavu lake pamwenga zo mpangu zingutoreke ku ŵarwali nthenda zinguŵataya, ndipo so mizimu yiheni yingutuwamo. 13Kweni ŵanyake ŵa ŵaYuda ŵakuyingayinga, vyanusi, ŵangujitole kudaniya paku ŵeniwo ŵenga ndi mizimu yiheni zina la Ambuya Yesu, ŵakuti, “Ndikurapiyani ndi Yesu mweniyo wamemeza Paulo!” 14Ndipo kwenga ŵana ŵanthurumi ŵankhonde ndi ŵaŵi ŵaku Skeva, muYuda, mzukuru mura, wo ŵachitanga ichi. 15Ndipo mzimu uheni wo ungwamuka, ndi ungunena nawo, “Yesu ndimzomera, ndipo Paulo ndimziŵa; kweni imwe mwe ŵayani?” 16Ndipo munthu mwaku yo mwenga mzimu uheni wo, wanguzininikiya paku wo, ndipo pakuŵa ndi nthazi wose ŵaŵi, wanguŵagoda, viyo kuti ŵangusotopokamo mu nyumba ŵankhuli ndi ŵakupotekeka. 17Ndipo ichi chinguŵa chakuziŵika kwaku wose, ku ŵaYuda ndi so ku ŵaGriki, ŵakuja mu Efeso; ndipo wofi unguŵawiya, ndipo lakuzgikanga zina la Ambuya Yesu. 18Anandi so ŵaku wo ŵanguvwana ŵazanga, ŵakujisumuwa ndi ŵakuzomera machitidu ghawo. 19Ndipo ŵanandi ŵaku wo ŵachitanga mayera, ŵanguwunjika mabuku ghawo, ndipo ŵangughawocha paurongo paku wose; ndipo pakupenda mitengu yawo ŵangusaniya vyasiliva vikwi machumi ghankhonde. 20Kwamazaza viyo ghakuwanga ndi ghapundanga mazu gha Ambuya.

Chivulupi mu Efeso

21Ndipo penipo vingufiskika vyenivi, Paulo wangupukwa mu mtima, wanguti wadumuwamo mu Makedonia ndi Akhaia, kuruta ku Yerusalemu, wakuti, “Ndati ndajapo nkhawonanga ku Roma nako.” 22Ndipo wati watuma ku Makedonia ŵaŵi ŵaku wo ŵamumiriyanga Timote ndi Erasto, wangutandara iyo mu Asia kanyengo.

23Ndipo ku nyengo yiya chinguŵapo chiyaghayizga, chikuru, chapa vya nthowa yo. 24Chifukwa yumoza, ndi zina Demetrio, msuzi wa siliva, yo wasulanga twakavuŵa twasiliva twaku Diana, wangutole ŵanchitu ŵake wanduzi, umana cha; 25wo wanguŵawungang'a pamoza, ndi ŵasuzi ŵanyawo ndi wanguti, “Mwaŵanthu, muziŵa kuti ku uwomba wenuwu te nawo usambasi. 26Ndipo muwona ndi mutuvwa, kuti mu Efeso pe cha, kweni viŵiviŵi mu Asia yose mwenuyu Paulo wakopa ndi wapuruska urapasi wa ŵanthu, pakukamba kuti mbachiuta cha wo ŵachitika ndi manja: 27ndiviyo kwe urwani wakuti uwomba widu pe cha wo uyuyulikenge, kweni so kuti kasopi waku chiutakazi Diana nayo wapimikenge kanthu cha, ndi so kuti wanangikenge ukuru wake, waku mweniyo Asia yose ndi charu viyo chisopa.” 28Kweni ŵachivwa ghenigho ŵanguzazika kandundu, ndipo ŵakamburanga kuti, “Mura ndiyo Diana wa ŵaEfeso!” 29Ndipo msumba wose unguzazika ndi bwawatu: ndipo ŵangumotoke ndi mtima umoza mululuwa la maseŵero, ŵakugumizgiyamo Gayo ndi Aristarko, ŵaMakedonia, ŵalendo ŵanasi ŵaku Paulo. 30Ndipo penipo Paulo wakhumbanga kusere ku khamu lo, ŵasambizi ŵengavi kumzomerezga. 31Ndipo ŵanyake ŵa ŵara ŵaku Asia nawo, pakuŵa ŵabwezi ŵake, ŵangutuma kwaku iyo, ndi kumjuŵeyere kusere cha mu luluwa lo la maseŵero. 32Viyo ŵanyake ŵangukambura kakuti, ŵanyake kamwenga: pakuti unganu wo wenga wa chimtimbaheka; ndipo urapasi kuti unguziŵa cha cho ŵanguziya pamoza. 33Ndipo mzinda wo wungutuzga Alekezandara, yo ŵaYuda ŵangumkuzga. Ndipo Alekezandara, pakukonozga ndi janja, wakhumbanga kujiŵeke ku khamu lo. 34Kweni pakuteska iwo kuti wenga muYuda, kunguŵa bwawatu limoza kwaku wose, nge mpha maora ghaŵi, “Mura ndiyo Diana wa ŵaEfeso!” 35Ndipo wati wachetamiska mzinda wo mlembi wa msumba, wanguti, “Mwaŵanthu mwaŵaEfeso, njani mu ŵanthu, yo walive kuziŵa kuti mu msumba waEfeso ndimo musungika kasopi waku Diana Mura ndi ŵangoza ŵakumbotoka pasi kutuwa kwaku Zeu! 36Viyo pakuŵa vyenivi vyambura ma suskika, mutenere kujitintha ndi kuchita kanthu ndi mawara cha. 37Chifukwa mwatole kuno ŵanthurumi yaŵa, wo kuti mbakuskowa ŵakasopi cha, chingana mbakutokoska chiutakazi widu cha. 38Viyo asani Demetrio, ndi ŵasuzi pamoza nayo, ŵe nagho makani pa ŵanthu yaŵa, mphara ye mwazi, ndi ŵakazembe ŵalipo; ŵasumulane. 39Kweni asani mufumbiriya kanthu kapa makani ghanyake, kadumulikiye mu unganu wa dangu. 40Chifukwa nadi te mu urwani kusumulika pachivurupi cha msana wale, pakuwuravi chifukwa chake; ndipo kuti tiziŵenge cha kukonkhoma nkhani ya chimotoka chinichi.” 41Ndipo wanguti wakamba vyenivi, wanguwutuzga unganu wo.

Currently Selected:

Machitidu gha Ŵakutumika 19: TongaMw

Highlight

Copy