ZEKARIA 9
9
Anyamalwa a Israele atchunyuswa
Mphangwa zakubulukira kuna Mulungu
1MBUYA akupokanyisana na dziko ya Hadiraki;
iye anati atchunyuse Damasiko,
thangwi mzinda ukulu wa Aramu ngwa MBUYA,
sasawambo madzinza onsene a Israele ngache.#Yes. 17.1-3; Yer. 49.23-27; Amo. 1.3-5. #Yes. 23.1-18; Ezk. 26.1—28.26; Yow. 3.4-8; Amo. 1.9, 10; Mt. 11.21, 22; Lk. 10.13, 14.
2Mzinda wa Hamati ngwache pontho,
ule ndi tsamadire wa Hadiraki;
Turo na Sidoni ngache,
podi kwene kuti iwo ngaluso pyakwanga.
3Turo apimangira yekha ene mpanda wamphamvu;
iye apimulukira siliva ninga fumbi
pontho golidi ninga mataka mumsewu.
4Kwache Mbuya anati ampokosere mfumache,
mbatayira m'bara pyonsene pimbanyindira iye,
pontho iye anati avungwe na moto.
5Ashikeloni anapiona mbachita mantha;
Gaza anakhunyata thangwi ya kuva kupha,
Ekroni chibodzi-bodzi,
thangwi chidikhiro chache chinamala unyala.
Gaza anataya mfumu wache,
Ashikelonimbo anati asiyiwe yekha ene.#Yes. 14.29-31; Yer. 47.1-7; Ezk. 25.15-17; Yow. 3.4-8; Amo. 1.6-8; Zef. 2.4-7.
6Mtundu wakuvungazikana
unakhazikika mu Ashidodi.
MBUYA akulonga kuti,
“Kunyada konsene kwa Afilisti
ndinati ndikumalise.
7Ine ndinaakhondesa kudya nyama
ikali na chiropa chache monthomo,
penu pyakudya pinango pyokhonda chena.
Anyakusalira na moyo ale
anakhala ache a Mulungu wathu
mbasanduka ninga dzinza ya Yuda;
Ekroni anasandukambo ninga Ayebusi.#9.7 Ayebusi: Mzika zakutoma za Yerusalemu, ale adakhala pansi pa utongi wa Davite, pidakunda iye mzindawo.
8Kwache ine ndinalondali Nyumbanga,
towera paleke gwanda nyamalwa na mbodzi ene,
anyakupondereza nkhabe dzavuyave anthu anga tayu,
thangwi maso anga ali pana iwo.”
Kudza kwa mfumu wa Zioni
9Sekerani pikulu pene imwe, anyakukhala mu Zioni,
khuwani, imwe anthu a mu Yerusalemu!
Ngayang'anani mfumu wanu akudza kuna imwe,
wakulungama pontho wakukunda,
wakupichepesa pontho uku apakira bulu, mwana bulu.#Mt. 21.5; Yoh. 12.15.
10MBUYA akulonga kuti,
“Ine ndinapokosera pingolo pya Eferemu,
pontho pingolo pyankhondo pya mu Yerusalemu,
na mauta ankhondo ene anati akhumulwe.
Mfumuyo anakhazikisa mtendere
pakati pa madzinza onsene.
Utongi wache unatanthawira
kubulukira kubara mpakana kubara,
pontho kubulukira kumkulo wa Yufurate
mpakana kumadolomero a dziko yapansi.#Mas. 72.8.
11Kulonga pya imwe,
na thangwi ya chiverano chakutsikimizirwa na chiropa
chidachita ine namwe chile,
ndinasudzula anyaperezo onsene
ale ali m'dzenje yakusowa madzi.#Kub. 24.8.
12Ngabwererani kumpanda kwanu,
imwe anyaperezo akukhala na chidikhiro,
podi chinchino ene pano ndikulalika kuti
ndinati ndikubwezereni kawiri
pinthu pikhadapokoserwa imwe pile.
13Ndinakukunga iwe Yuda
ninga mumbachitira ine na utanga,
pontho Eferemu anakhala ninga tswimo yanga.
Anako iwe Zioni ndinaakwata
kuti akamenyane na ana a Grisi,
mbandikuchitisa kukhala ninga
talasada yankhondo ya nyamphamvu.”
MBUYA anati abwere
14Tenepo MBUYA anaonekera pakati pawo;
matswimo ache anachetuma
ninga ching'ani-ng'ani.
MBUYA Mulungu analiza ngomache;
iye anaenda na mlikiti na chonzi chakumwera.
15Tenepo MBUYA Wamphamvu zonsene
ndiye anafuna dzakhala chakugedera matswimo chawo.
Iwo anavunga mbakunda anyamalwawo
pakuponyera miyala.
Iwo anamwa chiropa chawo
mbakhuwa ninga anthu akuledzera vinyu;
iwo anakhuta ninga ndilo yakudzala
yakuwazira nayo chiropa kunyanga za guwa yansembe.
16Pansiku yeneyo MBUYA Mulungu wawo
anapulumusa anthu ache
thangwi iwo ndi mabirache.
Iwo anakhazimira m'dziko mwache
ninga pyakuthemesera m'chipewu chachifumu.
17Iwo anakhala akusiririka pontho akubalika;
aphale na atsikana anachitiswa kukhala amphamvu,
thangwi ya kuinjipa kwa mapira na vinyu wachinchino.
Currently Selected:
ZEKARIA 9: SenaMw
Highlight
Share
Copy
Want to have your highlights saved across all your devices? Sign up or sign in
© Bible Society of Malawi
