ZEKARIA 4
4
Masomphenya a pya chakuikhirapo nyale
1Penepo mngelo akhalonga na ine ule adadza pontho mbandilamusa ninga mumbalamusirwa munthu kuchitulo.
2Iye adandivunza mbati, “Ayi ukuonanji?”
Ine ndidatawira kuti, “Ndikuona chakuikhirapo nyale cha golidi chakukhala na ndilo padzulu pache pontho nyale zinomwe, nyale ibodzi yakukhala na matsakala anomwe. 3M'khundu mwache mukhali miti miwiri yaolivi, ubodzi kukhundu ya kumadyo, unangombo kukhundu ya kumabzere.”#Chid. 11.4.
4Ine ndidavunza mngelo akhalonga na ine ule kuti, “Ayi penepi ninji, mbuya?”
5Iye adatawira mbati, “Ayi iwe nkhabe dziwa tayu kuti penepi ninji?”
Ine ndidatawira kuti, “Nkhabe tayu, mbuya.”
6Tenepo iye adalonga kuna ine mbati, “Enewa ndi mafala a MBUYA kuna Zerubabele: MBUYA Wamphamvu zonsene alonga kuti, ‘Nee na mphamvu, penu na nkhondo tayu, mbwenye na Mzimu wanga. Ndalonga ndine MBUYA Wamphamvu zonsene.’ ”#Ezr. 5.2.
7Ayi iwe phiri ikulu, ndiwe ani? Pamaso pa Zerubabele iwe unasalazwa. Iye anamanga pontho Nyumba ya MBUYA, tenepo pinaikha iye mwala wa pankhomo anthu anakhuwa kuti, “Ikukoma m'maso! Ikukoma m'maso!”
8Tenepo MBUYA adalonga kuna ine mbati, 9“Manja a Zerubabele ndiye amanga maziko a Nyumba ya MBUYA, manjache ndiye anafuna kuimalisa. Penepo imwe munapidziwa kuti MBUYA Wamphamvu zonsene ndiye andituma kuna imwe.
10“Mbani analulupisa nsiku ya pinthu ping'ono? Anthu anasekera angaona mdida wa nkhambala m'manja mwa Zerubabele.
“Enewa ndi maso anomwe a MBUYA, ale ambaona konsene kwene padziko yapansi.”#Chid. 5.6.
11Tenepo ndidavunza mngelo ule kuti, “Apo miti yaolivi ili kumadyo na kumabzere kwa chakuikhirapo nyalechi mphyanji napyo?”#Chid. 11.4.
12Ine ndidavunza pontho kuti, “Ayi nthambi ziwiri zaolivi m'khundu mwa mipembe iwiri ya golidi, ile imbabulusa mafuta a golidi njanji nayo?”
13Iye adatawira mbati, “Ayi iwe nkhabe dziwa tayu kuti penepi ninji?”
Ine ndidatawira kuti, “Nkhabe tayu, mbuya!”
14Natenepo iye adalonga mbati, “Enewa mbanthu awiri ale adzozwa kuti atumikire Mbuya wa dziko yonsene yapansi.”
Currently Selected:
ZEKARIA 4: SenaMw
Highlight
Share
Copy
Want to have your highlights saved across all your devices? Sign up or sign in
© Bible Society of Malawi
