ZEKARIA 11
11
Kuvungika kwa anyakupondereza
1Fungula misuwo yako, iwe Lebanoni,
towera moto upyereze miti yako yamkungudza!#11.1 miti yako yamkungudza: Miti pano ikuimirira madzinza amphamvu penu mafumu awo.
2Kalalani, imwe miti ya paina,
thangwi mikungudza yamala limbuka;
miti imbanyadira dziko ile yamala vungika!
Lirani imwe miti yamthundu ya ku Bashani
msitu wakuphopha ule
miti yache yamala temwa!
3Ngaveserani kukalala kunachita amakabuswa;
mpovu wawo onsene wamala vungwa!
Veserani kubangula kwa nkhalamu;
msitu wakupata wa Yorodani
lero uli mphalanga-mphalanga.
Amakabuswa awiri
4MBUYA Mulungu wanga adalonga kuna ine mbati, “Dyesa mwadidi mabira anafuna dzaphiwa ale. 5Anyakuagula ale ambaapha, kwache iwo nkhabe tchunyuswa tayu. Anyakuagulisa ambalonga kuti, ‘MBUYA mbakuzwe, ine ndafuma!’ Amakabuswawo#11.5 Amakabuswawo: Amakabuswa akumirira mafumu penu akadamu, pontho mabira akuimirira anthu awo penu anyakuatewerawo. ene nkhabe dzavera nsisi mabirawo tayu. 6Thangwi ine nkhabe dzaverave nsisi anthu a m'dziko yeneyi tayu. Anthu onsene ndinaapereka m'manja mwa atsanthembawo, pontho m'manja mwa mafumu awo. Iwo anapondereza dziko, tenepo ine nkhabe dzaapulumusa tayu m'manja mwawo. Ndalonga ndine MBUYA.”
7Natenepo ine ndidadyesa mwadidi mabira akhafuna dzaphiwa na anyakuagulisa ale,#11.7 na anyakuagulisa: penu: maka-maka mabira akhaponderezwa ale. Tenepo ndidakwata ndodo ziwiri, ibodzi ndidaithula Kukoma mtima, inangomboyo ndidaithula Mphatizano. Ine ndidadyesa mwadidi mabira. 8Pidakwana mwezi ubodzi ndidabulusa amakabuswa atatu ale. Mkumbi wa mabira udaipirwa nane, tenepo inembo sidakwanise kupirira nawo tayu, 9mbandilonga kuti, “Ine sinakhalave makabuswanu tayu. Bira anafuna kufa mbafe pyache, ule anafuna kutayika mbatayike pyache. Anyakusalirambo na moyo ale mbadyane pyawo.”
10Penepo ine ndidakwata ndodo yanga yakuchemerwa Kukoma mtima ile, mbandiikhumula pyanga, kukhonda chiverano chidachita ine na madzinza onsene. 11Chiveranocho chidamala pansiku yeneyo, tenepo anyakugula na kugulisa mabira akhandiyang'ana ale, adapidziwa kuti pidachita ine zikhali mphangwa zakubulukira kuna MBUYA.
12Ine ndidalonga kuna iwo kuti, “Ngakhala pinakukomerani ndipagalinitu mphapo; mbwenye ngakhala nkhabe, koyani pyanu kobiri zanu.” Tenepo iwo adandipagali masiliva makumatatu.#Mt. 27.9, 10. #Mt. 26.15.
13MBUYA adalonga kuna ine mbati, “Ziponye kobirizo m'chakukoyeramo kobiri,”#11.13 Ziponye…m'chakukoyeramo kobiri: Pyakuthumbusula pinango pyakale pyalonga penepi; m'Chiheberi muna Ziperekeni kuna nyakuumba pyombo. konta ya kobiri idalonga iwo kuti ndathema kuitambira ile! Tenepo ndidakwata masiliva makumatatu ale, mbandiaponya m'chakukoyeramo kobiri cha m'Nyumba ya Mulungu.
14Kubuluka penepo ndidakhumula ndodo inango yakuchemerwa Mphatizano ile, kufudza ubale wa pakati pa Yuda na Israele.
15Tenepo MBUYA adalonga kuna ine mbati, “Kwata pontho basa ya makabuswa, kwache mbuchite ninga makabuswa wakupupwa. 16Thangwi ine ndinaikha makabuswa m'dzikomo, ule nkhabe dzatsalakana mabira akutayika, penu kwenda kasaka anawo, penu kumanga pironda pya mabira akukuwazika, penu kudyesa mabira adidi tayu. Mbwenye anadya nyama ya mabira adidi makawo kubulusa na njondo zawo zene.
17“Dzedze kuna makabuswa wakupupwa
wakuthawa mabirache!
Talasada mbikhamwadze mkono wache
pontho diso yache ya madyo.
Mkono wache mbulamale
diso yache ya madyo mbileke na kuona kwene.”
Currently Selected:
ZEKARIA 11: SenaMw
Highlight
Share
Copy
Want to have your highlights saved across all your devices? Sign up or sign in
© Bible Society of Malawi
