LUKA 9

Yesu atuma anyakufunza khumi na awiri

(Mt. 10.5-15; Mk. 6.7-13)

1Yesu adachemera anyakufunza khumi na awiri pabodzi pene mbaapasa mphamvu na utongi wakubulusira mizimu yakuipa yonsene, pontho kuwangisa atenda. 2Tenepo adaatuma kalalika mphangwa za Ufumu wa Mulungu, pontho kawangisa atenda. 3#Lk. 10.4-11.Iye adaapanga mbati, “Lekani kwata chinthu na chibodzi chene paulendo; nee mthondodzo, nee budu ya paulendo, nee phoso, nee kobiri penu mayala apapezi. 4Pamsuwo panakatambirwa imwepo kakhaleni ponthopo kufikirana mubuluke muluwanimo. 5Kunakhonda imwe katambirwako, mukabuluke muluwani yeneyo mbamugubudza fumbi kumanyalo kwanu kuti pikhale pyakuacheuza.”#Mab. 13.51.

6Anyakufunza adabuluka mbafamba-famba m'midzi yonsene, kulalika Mphangwa Zadidi, na kuwangisa anthu konsene kwene.

Kudzudzumika kwa mfumu Herodi

(Mt. 14.1-12; Mk. 6.14-29)

7Pidava Herodi, mtongi wa Galilea pinthu pyonsene pikhachitikapyo, adadodoma pyakwanga, thangwi anthu anango akhalonga kuti Yohani Nyakubatiza alamuka kuimfa.#Mt. 16.14; Mk. 8.28; Lk. 9.19. 8Anango akhalonga kuti mprofeti Elia aonekera, anangombo akhalonga kuti mbodzi wa maprofeti akale ene alamuka kuimfa. 9Herodi adalonga mbati, “Yohani ndidamgwandisa msolo, apo munthu anava ine akulongwayu mbani?” Tenepo akhayesa-yesa basi kuti amuone Yesu.

Yesu adyesa mwinji ukulu

(Mt. 14.13-21; Mk. 6.30-44; Yoh. 6.1-14)

10Pidabwerera anyakutumwa ale, adapanga Yesu pinthu pyonsene pidachita iwo. Tenepo Yesu adaakwata mbaenda nawo pabodzi kuluwani ya Betesaida. 11Anthu azinji adapiva, natenepo adamtewera. Iye adaatambira mbalonga nawo pya Ufumu wa Mulungu, mbawangisa atenda.

12Pikhathobila dzuwa, anyakufunza khumi na awiri adadza kuna Yesu mbati, “Apangeni anthuwa aende pyawo kumidzi na kuminda ili chifupiyi kuti akapisakire okha ene kudya na mbuto zakugona, thangwi kuno nkhutsanga.”

13Mbwenye Yesu adaapanga mbati, “Imwe maka apaseni pyakudya.” Iwo adamtawira mbati, “Pina ife pano ndi mikate mishanu na nsomba ziwiri zene basi. Ayi munafuna kuti ife tiende kagula kudya kwakudyesa mwinji onsenewu?” 14Kulengesapo amunakulu okha akhali pikwi pishanu.

Yesu adapanga anyakufunzache mbati, “Akhazikeni anthuwa m'magulu a makumashanu.”

15Pidamala anyakufunza kuchita tenepo, onsene adakhala pansi. 16Yesu adakwata mikate mishanu na nsomba ziwiri zile mbayang'ana kudzulu, tenepo adapereka takhuta kuna Mulungu thangwi ya mikate na nsombazo. Iye adapimenya-menya mbapipereka kuna anyakufunzache kuti agawize anthu ale. 17Anthu onsene adadya mbakhuta. Anyakufunza adalokota pyakusalira mbadzaza pitundu khumi na piwiri.

Peturo alonga pya Yesu

(Mt. 16.13-19; Mk. 8.27-29)

18Nsiku inango pikhapemphera Yesu pa yekha ene, anyakufunza adadza kuna iye. Iye adaavunza mbati, “Anthu ambalonga kuti ndine ani?”

19Iwo adamtawira mbati, “Anango ambalonga kuti ndimwe Yohani Nyakubatiza, anango ati ndimwe Elia, anangombo ati ndimwe mbodzi wa maprofeti akale ule alamuka kuimfa.”#Mt. 14.1, 2; Mk. 6.14, 15; Lk. 9.7, 8.

20Iye adaavunza mbati, “Apo imwembo, mumbalonga kuti ndine ani?”

Peturo adalonga mbati, “Ndimwe Khristu wakusankhulika wa Mulungu.”#Yoh. 6.68, 69.

21Yesu adaapanga mwakugogomeza kuti aleke kalonga penepi kuna munthu na mbodzi ene.

Yesu alongeratu pya kusanyika na kufa kwache

(Mt. 16.20-28; Mk. 8.30—9.1)

22Iye adaapanga pontho mbati, “Mwana Munthu anati asanyike pyakwanga mbakhondwa na akulu-akulu, anyansembe akulu, na afunzisi a mwambo. Iye anaphiwa, mbwenye pangagwanda nsiku zitatu analamuka mbakhala na moyo.”

23Tenepo adaapanga onsene mbati, “Ngakhala munthu anafuna kunditewera, athema kupikhonda yekha ene, pontho nsiku na nsiku asasanyike kuona nyatwa na kufa kwene, tenepo anditewere.#Mt. 10.38; Lk. 14.27. 24Thangwi munthu anafuna kupulumusa moyo wacheyo, anati autaye; mbwenye anataya moyo wache thangwi ya ine, anati aupulumuse.#Mt. 10.39; Lk. 17.33; Yoh. 12.25. 25Munthu anaganyalinji angakhala napyo pyonsene pya pansi pano, mbataya na kuvunga moyo wache? Nkhabe tayu! 26Ngakhala munthu anachita manyadzo na ine, pontho na chifunziso changa, Mwana Munthu anachitambo naye manyadzo angafika mudemelero yache, na demelero ya Babache, pontho ya angelo akuchena. 27Ndikukupangani pyakuonadi kuti alipo anango pano ale hanafa tayu kufikirana iwo aone Mulungu akukhazikisa Ufumu wache.”

Kusanduzika kwa Yesu

(Mt. 17.1-8; Mk. 9.2-8)

28 # 2Pet. 1.17, 18. Pidagwanda nsiku zisere, pikhadamala Yesu kulonga pinthu penepi, adakwata Peturo, Yohani na Yakobo mbaenda nawo paphiri kapemphera. 29Yesu mbali kupemphera, nkhope yache idasanduzika, pontho nguwo zache zidayetima ninga dzuwa. 30Sindzidzi amuna awiri, Mose na Elia, akhalonga naye. 31Iwo adaonekera na demelero mbalonga na Yesu pya kufa kwache kukhafuna iye kuchita mu Yerusalemu kuti achitise kufuna kwa Mulungu kukwana-kwana. 32Peturo na anzache akhali m'chitulo chakufa nacho. Pidalamuka iwo, adaona demelero ya Yesu, na ya amuna awiri adaimira pabodzi na iye ale. 33Pikhaenda Mose na Elia, Peturo adapanga Yesu mbati, “Mbuya, mphyadidi kuti ife tili pano. Tinati timange makumbi matatu, ibodzi yanu, inango ya Mose, inangombo ya Elia.” Pikhalonga iye nee akhapidziwabi.

34Iye mbali kulonga, padadza makole mbaagudumira. Anyakufunza adaphatwa na mantha pikhagudumirwa iwo na makolewo. 35Fala idaveka kubulukira m'makolemo kuti, “Weneyu ndi mwananga asankhula ine, mvereni!”#Yes. 42.1; Mt. 3.17; 12.18; Mk. 1.11; Lk. 3.22.

36Pidamatama falayo, anyakufunza adamuona Yesu ali yekha ene. Anyakufunza adafunga milomo yawo nsiku zenezo. Iwo hadapange munthu na mbodzi ene tayu pinthu pikhadaona iwo pile.

Yesu awangisa mphale wakuphatwa na mzimu wakuipa

(Mt. 17.14-15; Mk. 9.14-27)

37Mangwana mwache, Yesu na anyakufunza atatu ale adatchitha paphiri pale, tenepo mwinji ukulu udenda kagumanikana naye. 38Munthu unango pakati pa anthu ale adakhuwa mbati, “Mfunzisi, ndaphata miyendo! Ndionerenimbo mwanangayu, mwananga ndi mbodzi eneyu basi. 39Mzimu wakuipa ungamphata, ambakhuwa mwakututumuka, mbumtsandisa pyakwanga mwakuti phovu imbakhala chinjiri-chinjiri kukanwa. Umbamkuwaza pikulu, pontho humbafuna kubulukamo tayu! 40Ndidapempha anyakufunzanu kuti aubuluse mzimu wakuipawu, kwache iwo adapichimwana.”

41Yesu adaapanga mbati, “Sha! Imwe ndimwedi anthu akuipa pontho akukhonda khulupira! Ndikhale na kupirira namwe kufikirana lini?” Tenepo adampanga munthu ule mbati, “Idza naye mwanakoyo kuno.”

42Pikhadza mphaleyo, mzimu wakuipa udamgwisa pansi mbumtsandisa pyakwanga. Yesu adatonga mzimu wakuipa ule kuti ubulukemo, tenepo adamuwangisa mphaleyo mbampereka kuna babache. 43Anthu onsene adadodoma na mphamvu zikulu za Mulungu.

Yesu alonga kachiwiri pya kufa kwache

(Mt. 17.22-23; Mk. 9.30-32)

Pikhali anthu m'kati kudodoma na pinthu pyonsene pidachita Yesuyo, iye adapanga anyakufunzache mbati, 44“Lekani duwalira pinafuna kukupangani inepi! Mwana Munthu anaperekwa m'manja mwa anthu.” 45Mbwenye anyakufunza hadavesese pikhalonga iye tayu, thangwi pikhali pyakuzimbaisa kuna iwo mwakuti hadapivese mwadidi tayu. Iwo akhagopa kumvunza penepi.

Mkulu mbani

(Mt. 18.1-5; Mk. 9.33-37)

46Mphoka idalamuka pakati pa anyakufunza yakuti mkulu mbani.#Lk. 22.24. 47Yesu adadziwa pikhanyerezera iwo, natenepo adakwata kamwana mbakaimisa m'khundu mwache, 48mbaapanga mbati, “Munthu onsene anatambira mwadidi kamwanaka thangwi ya ine, atambirambo ine. Pontho munthu onsene anatambira ine mwadidi, atambirambo adandituma ule. Thangwi mng'onoletu pakati pa imwe monsene, ndiye mkululetu.”#Mt. 10.40; Lk. 10.16; Yoh. 13.20.

Munthu anakhonda pokanyana namwe, weneyo ngwanu

(Mk. 9.38-40)

49Yohani adalonga mbati, “Mbuya, tidaona munthu akubulusa mizimu yakuipa na dzinanu. Tenepo tidampanga kuti abasikeletu thangwi si mbodzi wa gulu yathu tayu.”

50Yesu adaapanga mbati, “Lekani kumkhondesa, thangwi munthu anakhonda pokanyana namwe, weneyo ngwanu.”

Mudzi wa Samaria wakhonda tambira Yesu

51Pidafika nsiku chifupi zakuti Yesu akwatwe kwenda kudzulu, iye adanyerezera pyakwenda ku Yerusalemu, tenepo adendakodi. 52Adatuma anyamphangwa patsogolo pache, ale adenda kumudzi wa Samaria kuti akamsasanyire pinthu pyonsene. 53Mbwenye anthu a m'mudzimo hadamtambire tayu, thangwi iwo akhapidziwa kuti iye akhaenda ku Yerusalemu. 54Awiri a anyakufunza, Yohani na Yakobo, pidaona iwo penepi, adavunza Yesu mbati, “Mbuya, munafuna kuti tichemere moto kubulukira kudzulu kuti udzaapise?”#9.54 udzaapise: Pyakulembwa pinango pyakale pyathimiza ninga mudachitira Elia.#2Maf. 1.9-16.

55Mbwenye Yesu adazungunuka mbaalongera.#9.55 mbaalongera: Pyakulembwa pinango pyakale pyathimiza mbalonga mbati, “Imwe nkhabe dziwa mtundu wa mzimu una imwe; thangwi Mwana Munthu hadadzere dzavunga miyoyo ya anthu tayu, mbwenye dzaapulumusa.” 56Tenepo iwo adenda kumudzi unango.

Mbani athema kutewera Yesu

(Mt. 8.19-22)

57Pikhafamba iwo m'njira, munthu unango adalonga kuna Yesu mbati, “Ndinakutewerani konsene kunaenda imwe.”

58Yesu adamtawira mbati, “Mibinzi ina madzimba, pontho mbalame zina pisa, mbwenye Mwana Munthu nkhabe mbuto yakugona penu yakupumirapo tayu.”

59Yesu adapanga munthu unango mbati, “Nditewere!” Mbwenye munthu ule adalonga mbati, “Mbuya, nditawiriseni kuti nditome kaikha maliro a babanga.”

60Yesu adatawira mbati, “Aleke anyakufa aikhane anyakufa okhokha. Mbwenye iwe, kalalike mphangwa za Ufumu wa Mulungu.”

61Munthu unango pontho adapanga Yesu mbati, “Ndinakutewerani, Mbuya, kwache nditawiriseni nditome kagoneka kumsuwo kwanga.”#1Maf. 19.20.

62Yesu adamtawira mbati, “Munthu angalima na phaza yakukweyiwa na ng'ombe mbayang'ana m'nduli, munthu weneyo hadatheme kuphata basa mu Ufumu wa Mulungu tayu.”

Currently Selected:

LUKA 9: SenaMw

Highlight

Copy