LUKA 23

Yesu adendesa kuna Pilato

(Mt. 27.1-2, 11-14; Mk. 15.1-5; Yoh. 18.28-38)

1Anthu onsene penepo adalamuka mbaenda na Yesu kuna Pilato. 2Iwo adatoma kumpangirira Yesu mbati, “Munthuyu tamgumana akudzudzumisa anthu athu. Akhaapanga kuti anthu aleke kukhoma msonkho kuna Mfumu wa Roma. Pontho iye akhalonga kuti ndi Khristu pontho mfumu.”

3Pilato adavunza Yesu mbati, “Ayi iwe ndiwedi Mfumu wa Ayuda?”

Yesu adatawira mbati, “Mwalonga tenepo ndimwe.”

4Penepo Pilato adaapanga anyansembe akulu na mwinji ule mbati, “Thangwi ya kutongera munthuyu nee ndikuionambobi.”

5Mbwenye iwo adakakamira kulonga mbati, “Chifunziso cha munthu weneyu chimbalamusa chimpiningu pakati pa anthu mu Yudea monsene. Iye adatomera ku Galilea, tenepo chinchino afika kuno ku Yudea.”

Yesu pamaso pa Herodi

6Pidava Pilato penepi, adavunza mbati, “Ayi munthu weneyu ngwa nthemba ya Galilea?” 7Pidapidziwa iye kuti Yesu akhali wa kunthemba yakutongwa na Herodi, adamtumiza kuna Herodi onthoyo, ule akhali mu Yerusalemu pandzidzi wenewo. 8Pidaona Herodi Yesu, adakomerwa pyakwanga, thangwi akhava mbiri yache, pontho pandzidzi ukulu akhafuna kuti aone Yesu. Iye akhadikhira kuonambo Yesu akuchita chinthu chakudodomesa. 9Herodi adamvunza Yesu pinthu pizinji, mbwenye Yesu hadamtawire tayu. 10Anyansembe akulu na afunzisi a mwambo adenda kutsogolo mbampangirira Yesu pikulu. 11Herodi na anyankhondo ache adaselusa Yesu mbamtikana. Iwo adamvazika mkhanjo wakubalika mbambweza pontho kuna Pilato. 12Herodi na Pilato kale akhazondana, mbwenye kubulukira pa nsiku yeneyo, adasanduka ashamwali.

Yesu atongwa kuti aphiwe

(Mt. 27.15-26; Mk. 15.6-15; Yoh. 18.39—19.16)

13Pilato adagumanyisa anyansembe akulu, akadamu a Chiyuda na anthu onsene pabodzi. 14Iye adaapanga mbati, “Mwadzesa munthuyu kuna ine na thangwi yakuti ngwakudzudzumisa anthu. Ine ndamvunza imwe mbamuli ponthopo, kwache sidamgumane na mseru na ubodzi ene papinthu pinampangirira imwepi tayu. 15Herodi ambweza kuno thangwi na iye enembo hadamgumane na mseru tayu. Weneyu hadasose chinthu chakuthema kumpha nacho tayu. 16Natenepo ndinalila kwene kumkwapulisa mbandimuleka kuti aende pyache.”#23.16 Natenepo…aende pyache: Pyakulembwa pinango pyakale pyathimiza vesi 17: Pilato adathema kusudzula nyaperezo mbodzi pandzidzi wa Phwando ya Paska.

18Mwinji onsene udakhuwa kuti, “Mpheni weneyu! Mutisudzulire Baraba!” 19Baraba akhadaikhwa m'perezo thangwi ya kupha anthu na kudzesa chimpiningu mumzinda.

20Pilato akhafuna pyakusudzula Yesu, natenepo adenda kalonga pontho na anthu ale. 21Mbwenye anthu ale adakhuwa pontho mbati, “Mkhomereni pamtanda! Mkhomereni pamtanda!”

22Pilato adalonga nawo kachitatu mbati, “Asosa mseru wanji munthuyu? Ine nkhabe gumana mseru wakumphera nawo tayu. Ndinati ndimkwapulise mbandimsudzula.”

23Mbwenye iwo adathimiza kukhuwa mwakugaluza fala kuti Yesu akhomerwe pamtanda. Pakumalisira pache Pilato adakundwa na kukhuwa kudachita iwo. 24Natenepo iye adatonga kuti pikhafuna anthu pile pichitike. 25Iye adaasudzulira munthu akhafuna iwo, ule akhadaikhwa m'perezo thangwi ya kupha anthu na kudzesa chimpiningu mumzinda. Iye adapereka Yesu kuna iwo kuti achite naye pikhafuna iwo.

Yesu akhomerwa pamtanda

(Mt. 27.32-44; Mk. 15.21-32; Yoh. 19.17-27)

26Anyankhondo adakwata Yesu mbaenda naye. Pikhaenda iwo, adagumanikana na munthu unango wa ku Kirene, dzinache Simoni, ule akhabulukira kumidzi kwenda kumzinda. Iwo adamphata mbamsanjika mtanda wa Yesu kuti authukule kutewera m'nduli mwa Yesu.

27Mwinji ukulu ukhamtewera. Pakati pa anthu enewo pakhali akazi akhalira na kusintili Yesu ale. 28Yesu adazungunukira kuna iwo mbalonga mbati, “Imwe akazi a ku Yerusalemu, lekani kundilira, mbwenye mupilire mwekha ene na ananu. 29Thangwi nsiku zikudza zinafuna dzalonga anthu kuti, ‘Anyakutsanzaya mbakazi akusowa ana, anthu okhonda bala, pontho ale adakhonda yamwiwa na kale ene!’ 30Wenewo unakhala ndzidzi unafuna dzalonga anthu kuna mapiri kuti, ‘Tigwereni pyanu!’ Mbalonga pontho kuna pitunda kuti, ‘Tibiseni pyanu!’#Hos. 10.8; Chid. 6.16. 31Ngakhala iwo akuchitira pinthu penepi kuna muti uwisi, apo kuna muti wakuuma ndiye tani?”

32Iwo adakwata mapanga anango awiri mbaenda nawo kuti akaphiwe pabodzi na Yesu. 33Pidafika iwo pambuto yakuchemerwa “Chibade cha Msolo,” adakhomera Yesu pamtanda pabodzi na mapanga awiri ale, mbodzi kumadyo, unangombo kumabzere kwa Yesu. 34Yesu adalonga mbati, “Baba, alekerereni pyakudawa pyawo, thangwi pinachita iwo nkhabe kupidziwa tayu.”#23.34 Yesu…nkhabe kupidziwa: Pyakulembwa pinango pyakale nkhabemo Yesu adalonga mbati, “Baba, alekerereni pyakudawa pyawo, thangwi pinachita iwo nkhabe kupidziwa tayu.”

Adagawana nguwo za Yesu pakuchita ntsango.#Mas. 22.18. 35Anthu adaimira penepo mbayang'ana mwenemo akadamu a Chiyuda akuselusa Yesu. Iwo akhalonga mbati, “Adapulumusa anango, mulekenimbo apipulumuse yekha ene ngakhala ndi Khristudi, Nyankhombo adasankhulwa na Mulungu.”#Mas. 22.7.

36Anyankhondo adamselusambo. Iwo adadza kuna iye mbampasa vinyu wakujuja#Mas. 69.21. 37mbalonga mbati, “Pipulumuse wekha ene ngakhala ndiwe Mfumu wa Ayuda!”

38Padzulu pache padalembwa mafala akuti, “Weneyu ndi Mfumu wa Ayuda.” 39Mbodzi wa mapanga awiri adakhomerwa pabodzi na iye ale adamtikana mbati, “Ayi si iwe Khristu ule tayu? Pipulumuse wekha ene na ife ene.”

40Mbwenye phanga unango ule adamulongera mwanzache mbati, “Kadi iwe nkhabe gopa Mulungu tayu? Iwe ukutchunyuswa sawasawambo na iye. 41Nyatwayi tikuitambira kuthemerana na pidachita ife, mbwenye iyeyu hadadawe tayu.” 42Tenepo adalonga kuna Yesu mbati, “Yesu mungabwera ninga mfumu mundikumbukembo.”

43Yesu adampanga mbati, “Ndikukupanga pyakuonadi kuti lero ene pano unati ukhale na ine kumbuto yakutsanzaya kudzulu.”

Kufa kwa Yesu

(Mt. 27.45-56; Mk. 15.33-41; Yoh. 19.28-30)

44Ora yakhumi na chiwiri masikati dzuwa idaleka kugaka, tenepo mdima udagudumira dziko yonsene kufikirana paora yachitatu kumawulo. 45#Kub. 26.31-33.Nguwo yakutchinga mbuto yakuchenesesa m'Nyumba ya Mulungu idang'ambika kati na kati. 46Yesu adakhuwa pikulu mbati, “Baba, ndinapereka mzimu wanga m'manja mwanu!” Pikhadalonga iye penepi, adafa.#Mas. 31.5.

47Mkadamu wa anyankhondo dzana adapiona pidachitikapyo mbalemedza Mulungu mbati, “Weneyu akhalidi munthu wakulungama!” 48Anthu akhadagumanyikana penepo dzaona ale, pidaona iwo pidachitikapyo, adenda kwawo akukhumata thangwi ya kutsukwala. 49Anthu onsene akhadziwa Yesu, kuthimizapo akazi akhamtewera kutomera ku Galilea ale, adaimira pakansinzo kupiona.#Lk. 8.2, 3.

Yesu aikhwa m'masiye

(Mt. 27.57-61; Mk. 15.42-47; Yoh. 10.38-42)

50-51Pakhali munthu dzinache, Yosefe wa kuluwani ya Arimatea m'nthemba ya Yudea. Iye akhali munthu wakulungama pontho wadidi. Iye akhadikhira kuti Mulungu akhazikise Ufumu wache. Podi kwene kuti iye akhali mbodzi wa Thando ya miseru ya Chiyuda, iye hadaphatizane na manyerezero pontho machitiro awo pa Yesu tayu. 52Iye adenda kuna Pilato mbakavunza mtembo wa Yesu. 53Tenepo adatchithisa mtembo wa Yesu mbaupyangirira na nguwo yakuchena. Adauikha m'masiye akuchita kusemwa m'mwala. Akhali masiye okhonda phatiswa basa na kale ene.

54Penepi pidachitwa pa Chishanu, tenepo Nsiku Yakupuma ikhali chifupi kutoma.

55Akazi akhadatewera Yesu kutomera ku Galilea ale adenda pabodzi na Yosefe mbakaona masiye na kuikhwa kwa Yesu. 56Tenepo adabwerera kumusa kasasanya pyakununkhira na mafuta kuti adzoze nawo mtembo wa Yesu. Pa Nsiku Yakupuma adapuma kuteweza mwambo.#Kub. 20.10; Deut. 5.14.

Currently Selected:

LUKA 23: SenaMw

Highlight

Copy