LUKA 14

Yesu awangisa mtenda

1Pa Nsiku inango Yakupuma Yesu adenda kadya kuna mbodzi wa akadamu a Afarisi, tenepo anthu akhamuyang'anisisa. 2Patsogolo pa Yesu pakhali munthu wakutupa miyendo na mikono. 3Yesu adavunza Afarisi na afunzisi a mwambo mbati, “Ayi mwambo wathu umbatawirisa kuwangisa pa Nsiku Yakupuma, penu tayu?”

4Mbwenye iwo hadabuluse fala tayu. Yesu adamphata munthu ule mbamuwangisa na kumgwinya pyache. 5Natenepo adaavunza mbati, “Mbani wa imwe, ngakhala mwanache penu ng'ombe yache inagwera mumchera pa Nsiku Yakupuma, ayi iye nkhabe kuibulusiramo kabodzi kene tayu?”#Mt. 12.11.

6Mbwenye iwo adapichimwana kumtawira.

Pya kupichepesa pontho pya kutambira alendo

7Pidaona Yesu kuti anyakuchemerwa anango akhasankhula mbuto zadidiletu, iye adalonga msangani kuna onsene ale mbati, 8“Ngakhala munthu unango anakuchemererani kuphwando yakukazhali, lekani kakhala pambuto yadidiletu. Thangwi pinakwanisika kuti unango wakufunika kupiringana imwe adachemerwambo,#Miy. 25.6, 7. 9nakuti nyakuchemera monsene uwirianu anadza mbalonga kuti, ‘Mbutoyi pasani ushu.’ Tenepo unachita manyadzo mbukhala pambuto yapansiletu. 10Mbwenye ungachemerwa, uende kakhala pambuto yapansiletu, towera nyakukuchemerayo akupange kuti, ‘Shamwalianga, dzakhale pambuto yadidiyi.’ Penepo unalemedzwa pamaso pa anyakuchemerwa onsene. 11Thangwi onsene anapikuza okha ene anachepeswa, pontho onsene anapichepesa okha ene anakuzwa.”#Mt. 23.12; Lk. 18.14.

12Yesu adalonga pontho kuna Mfarisi akhadamchemera kuti adye naye ule mbati, “Ungasasanya kudya kwa masikati penu kwa mawulo, leka kachemera ashamwali ako, penu abale ako, penu a kudzinzako, penu ashamwali ako amfuma, thangwi iwo anakuchemerambo kubwezera pinthu pidaachitira iwe. 13Mbwenye ungasasanya phwando, chemera anyakutcherenga, anyakulamala, anyamfutete na maboli-boli. 14Tenepo unakhala wakutsanzaya, thangwi iwo nkhabe chinthu chakuti akubwezerembo tayu. Mulungu ndiye anakubwezera pandzidzi unalamuka anthu akulungama kuimfa.”

Msangani wa Phwando Ikulu

(Mt. 22.1-10)

15Pidapiva munthu unango ule akhadya nawo pabodzi, adalonga kuna Yesu mbati, “Ngakutsanzaya anthu ale anafuna dzadya Phwando Ikulu mu Ufumu wa Mulungu.”

16Yesu adamtawira mbati, “Munthu unango adasasanya phwando ikulu mbachemera anthu azinji kuphwandoko. 17Pidakwana ndzidzi wa phwando ile, adatuma nyabasache kapanga anthu akhadachemerwa kuphwando ale mbati, ‘Idzani, pyonsene pyasasanywa kale.’ 18Mbwenye onsene ale adatoma mbodzi na mbodzi kupereka mathangwi akuachimwanisa kwenda kuphwandoko. Wakutoma adalonga kuna nyabasa ule mbati, ‘Ndagula kwene munda, tenepo ndathema kwenda kuti ndikauone. Ndaphata miyendo, sinakwanisa kudzako tayu.’ 19Unango adalonga mbati, ‘Ndagula kwene ng'ombe khumi za pachingolo, tenepo ndikwenda kaziyesa. Ndaphata miyendo, sinakwanisa kudzako tayu.’ 20Unango adalonga mbati, ‘Sinakwanisa kudzako tayu, thangwi ndasemba kwene chinchino pano.’

21“Nyabasa ule adabwerera mbakampanga mbuyache pyonsenepi. Natenepo mbuyache ule adaswirizwa napyo mbapanga nyabasache ule mbati, ‘Ndoko chinchino pano kunjira ikulu na ing'ono ene ya muluwani ukadze kuno na anyakutcherenga, anyakulamala, maboli-boli na anyamfutete.’ 22Sindzidzi nyabasa ule adabwererako mbalonga mbati, ‘Mbuya, ndachita pidanditonga imwe, kwache mbuto yasalira basi.’ 23Natenepo mbuya ule adapanga nyabasache ule mbati, ‘Ndoko kumisewu na kunjira za kunja kwa luwani ino, ukakhakhamize anthu kuti adze kuno, towera nyumbanga idzale. 24Ndikukupangani monsene kuti nkhabe mbodzi wa anthu akhadachemerwa mbakhonda ale, analawa phwando yanga.’ ”

Pyakuthema kukhala nyakufunza wa Yesu

(Mt. 10.37-38)

25Ndzidzi unango pikhatsagana Yesu na mwinji ukulu, Yesu adazungunuka mbaapanga mbati, 26“Munthu anadza kuna ine mbakhonda kundifuna piringana mumbafunira iye babache na mache, mkazache na anache, abale ache na anyamaingache, pontho ninga mumbapifunira iye mwenechiro, hanakwanisa kukhala nyakufunzanga tayu.#Mt. 10.37. 27Nyakukhonda sasanyika kuona nyatwa na kufa kwene na kunditewera hanakwanisa kukhala nyakufunzanga tayu.#Mt. 10.38; 16.24; Mk. 8.34; Lk. 9.23.

28“Ngakhala unango pakati panupa anafuna kumanga nyumba, chakutoma iye ambakhala pansi mbalengesa kobiri zakufunika, towera aone ngakhala ana kobiri zakukwana kumalisira nazo nyumba. 29Angakhonda chita tenepo, mwinango anaikha maziko a nyumbache ile basi mbapichimwana kuimalisa. Tenepo anthu onsene akuona penepi, anamseka. 30Iwo analonga kuti, ‘Munthuyu adatoma kuimanga nyumba, mbwenye apichimwana kuimalisa.’

31“Ngakhala mfumu wakukhala na anyankhondo pikwi khumi anafuna kwenda kachita nkhondo na mfumu unango wakukhala na anyankhondo pikwi makumawiri, chakutoma ambakhala pansi mbanyerezera ngakhala anapikwanisadi kamenyana naye mfumu weneyo. 32Ngakhala iye hanapikwanisa tayu, anatuma anyamphangwa kagumana na mfumu unangoyo, kampempha kuti averane pya mtendere mwenemo mbali kutali. 33Ntchibodzi-bodzi, nkhabe mbodzi pakati panu anakwanisa kukhala nyakufunzanga angakhonda kusiya pyache pyonsene pina iye.

Pya munyu wakusowa basa

(Mt. 5.13; Mk. 9.50)

34“Munyu ngwadidi, mbwenye ungasuluka, unanyung'unyiswa nanji pontho? 35Unakhala wakusowa basa m'munda na pakhuku ene; umbatayiwa. Ule ana makutu akuva, mbave!”

Currently Selected:

LUKA 14: SenaMw

Highlight

Copy