YOHANI Mafala akutoma nawo
Mafala akutoma nawo
Mphangwa Zadidi za Yesu Khristu zakulembwa na Yohani zikuonesa kuti Yesu ndi Mafala okhonda mala a Mulungu, ule “adasanduka munthu mbakhala pakati pathu.” Ninga munapilongera bukhuyi yokha ene kuti mphangwazi zidalembwa towera anyakuwerengache akhulupire kuti Yesu, Mwana Mulungu, ndi Khristu, pontho kuti kudzera m'chikhulupiro chawo muna iye, iwo akhale na moyo chadi-chadi. Khristu nkhulonga kuti Nyankhombo wakusankhulwa na Mulungu kukhala Mfumu (20.31).
Kubuluka pa mafala akutoma nawo, ale adzindikirisa kuti Mafala okhonda mala a Mulungu ndi Yesu, khundu ya kutoma ya mphangwazi ikuonesa pidzindikiro pyakusiyana-siyana, pile pikupangiza kuti Yesu ndi Nyankhombo Wakusankhulika, Mwana Mulungu. Penepi pyatsagana na pifunziso pile pyafuthula pinthu pidavumbulwa na pidzindikiro. Khundu yeneyi ya bukhu ikulonga mule mudakhulupira anthu anango mbasanduka anyakutewera Yesu, mwenemo anango mbampokanya mbakhonda pyawo kukhulupira. Ndima 13-17 zalembwa mwakulapha pya kuphatizana chadi-chadi kwa Yesu na anyakufunzache mosiku udamangwa iye, pontho na mafalache akusasanyikira, pontho akuwangisa mtima kuna anyakufunzawo mosiku wa nsiku yakukhomerwa kwache pamtanda mbidzati fika. Ndima zakumalisira zikulonga pya kumangwa, kutongwa, kukhomerwa pamtanda na kulamuka kwa Yesu kuimfa, pontho na kuonekera kwache kuna anyakufunzache pidalamuka iye kuimfa.
Mbiri ya mkazi adaphatwa na uputa ule (8.1-11) chafungirwa na chidzindikiro ichi […], thangwi mabukhu anango akale azinji na kuthumbusula kwa kutoma kwa bukhuyi hachidalembwe tayu, mbwenye anango adachilemba m'mbuto zinango.
Yohani akudimbirira kulonga pya mtukwa wa moyo okhonda mala kudzera muna Khristu, mtukwa ule watoma chinchino, pontho ule umbadza kuna anthu, ale atawira kuti Yesu ndi njira, pyakuonadi, pontho moyo chadi-chadi. Chidziwiso cha bukhu ya Yohani chakudziwika nacho ndi maphatisiro ache basa a pinthu pyene pyapyo pya moyo wa nsiku na nsiku, kuonesa pinthu pya uzimu chadi-chadi. Akuphatisa basa pinthu ninga ipi; madzi, mkate, cheza, makabuswa na mabirache, pontho mfesa na nsapo zache.
Pya m'bwalomu
Mafala akufungula nawo 1.1-18
Yohani Nyakubatiza na anyakufunza akutoma a Yesu 1.19-51
Basa ya pakwecha ya Yesu 2.1—12.50
Nsiku zakumalisa mu Yerusalemu na m'nthemba zakuzungulira 13.1—19.42
Kulamuka kuimfa na kuonekera kwa Mbuya kuna anthu 20.1-31
Mafala akufunga nawo: kuonekera kwinango kwa Mbuya m'nthemba ya Galilea 21.1-25
Currently Selected:
YOHANI Mafala akutoma nawo: SenaMw
Highlight
Share
Copy
Want to have your highlights saved across all your devices? Sign up or sign in
© Bible Society of Malawi