Kutoma 4
4
Kaini na Abele
1Tenepo Adamu adapita m'bonde na mkazache. Mkaziyo adakwata mimba mbabala mwana wamamuna. Iye adalonga mbati, “Na chiphedzo cha MBUYA ndatambira mwana wamamuna.” Natenepo mkaziyo mwanayo adamthula Kaini.#4.1 Kaini: Dzina yeneyi imbaveka sasawa na mafala a m'Chiheberi akulonga kuti “kutambira.” 2Kubuluka penepo adabala pontho mwana unango wamamuna dzinache Abele. Abele akhali makabuswa, Kaini akhali nyakulima. 3Pidagwanda ndzidzi ene, Kaini adadza na pinango pidavuna iye mbapipereka nsembe kuna MBUYA. 4Abele adadza na mwanabira mbodzi wakutoma kubalwa kubulukira pa mkumbi wache. Iye adampha mbapereka nsembe khundu zache zadidiletu kuna MBUYA. Tenepo MBUYA adakomerwa na Abele mbatambira nsembe yache.#Aheb. 11.4. 5Mbwenye iye adakhonda Kaini na nsembe yache ene. Natenepo Kaini adazhangali pyakwanga mbaswirizwa napyo. 6Tenepo MBUYA adalonga kuna Kaini mbati, “Watani unazhangali? Watani unaswirizwa? 7Iwe mbudachita pinthu pyakulungama, ayi ine mbidakomerwa nawe#4.7 mbidakomerwa nawe: penu mbidatambira nsembe yako. tayu? Mbwenye iwe ungakhonda kuchita pinthu pyakulungama, kudawa kwakunjunjira pamsuwo pako, kufuna kukuikha pansi pa utongi wache, tenepo iwe wathema kukundwa.”
8Tenepo Kaini adalonga kuna Abele mbaleache mbati, “Tende kumunda.”#4.8 Tende kumunda: Pyakuthumbusula pinango pyakale pyalonga penepi; m'Chiheberi nkhabemo mafala enewa. Pikhali iwo kumunda kule Kaini adasandukira Abele mbaleache mbampha.#Mt. 23.35; Lk. 11.51; 1Yoh. 3.12.
9MBUYA adamvunza Kaini mbati, “Mbaleako Abele ali kupi?”
Iye adatawira mbati, “Sinakudziwa tayu kuna iye. Kadi ine ndine nyakuyang'anira mbaleanga?”
10Tenepo MBUYA adalonga mbati, “Thangwi ninji wachita chinthu chakugoswa ninga chenechi? Chiropa cha mbaleako chikundilirira kubulukira m'mataka.#Aheb. 12.24. 11Iwe chinchino ndiwe wakutembererwa, pontho hunalimave tayu pamataka, ale adafungula mulomo wache kutambira chiropa cha mbaleako kubulukira m'manja mwako. 12Ungayesa kulima, mataka hanabalisa chinthu na chibodzi chene tayu. Iwe unakhala manzenza, okhonda khazikika padziko yapansi.”
13Kaini adalonga kuna MBUYA mbati, “Kutchunyuswa kwanga nkhukulu mwakuti sinakwanisa kukupirira tayu. 14Lero imwe mukundithamangisa m'dziko muno, pontho ndabuluswa na pamaso panu pene mbandikhala manzenza, okhonda kukhazikika, tenepo munthu anandigumanayo anati andiphe.”
15Mbwenye MBUYA adatawira mbati, “Nkhabe tayu: ngakhala munthu anakupha anthu anomwe anaphiwa kubwezera kuphiwa kuchitwa iweko.” Natenepo MBUYA adaikha chidzindikiro pana Kaini kucheuza munthu onsene anagumanikana na Kaini kuti aleke kumpha. 16Tenepo Kaini adenda pyache kubuluka pamaso pa MBUYA mbakakhala m'dziko inango yakuchemerwa “Manzenza,” ile ili kumabulukiro dzuwa a Munda wa Edeni.
Pidzukulu pya Kaini
17Kaini adapita m'bonde na mkazache, tenepo mkazache adakwata mimba mbabala mwana wamamuna dzinache Enoki. Kaini adamanga mzinda mbaithula, Enoki, dzina ya mwanacheyo. 18Enoki adabala Iradi, Iradi adabala Mehujaele, Mehujaele adabala Metushaele, Metushaele adabala Lameki. 19Lameki akhali na akazi awiri, Ada na Zila. 20Ada adabala Yabala, ule akhali kholo wa anthu akufuya pifuyo na akukhala m'makumbi ale. 21Mbaleache akhali Yubala, kholo wa anthu onsene akuimba anyakatangale na pitoliro.
22Zila adabala Tubali-Kaini, kholo ya amisiri onsene akufula pida pyamtundu na mtundu#4.22 akufula pida…mtundu: Chakuthumbusula chinango chibodzi chalonga kholo ya anyakufula ntove onsene. kubulukira kunkuwa na simbi. Nyamaingache Tubali-Kaini akhali Naama.
23Lameki adalonga kuna akazache mbati,
“Ada na Zila, ngavani kuno,
ine ndapha mwana mphale unango, thangwi iye andimenya.
24Ngakhala ndimodi kuti munthu anapha Kaini,
anthu anomwe anaphiwa kubwezera kuphiwa kwacheko,
tenepo munthu anafunambo kundiphayo,
anthu makumanomwe na anomwe anaphiwa kubwezera kuphiwa kwangako.”#Mt. 18.22.
Seti na Enosi
25Adamu adapita m'bonde na Hava mbabala pontho mwana unango wamamuna. Hava adalonga mbati, “Mulungu andipasa mwana kupita m'mbuto ya Abele thangwi adaphiwa na Kaini.” Natenepo mwanayo adamthula Seti.#4.25 Seti: Dzina yeneyi imbaveka ninga ya Chiheberi yakuti “Apasa.” 26Seti adabala mwana wamamuna mbamthula Enosi. Pandzidzi wenewo anthu adatoma kuphatisa basa dzina ya MBUYA kumpembedza.
Currently Selected:
Kutoma 4: SenaMw
Highlight
Share
Copy
Want to have your highlights saved across all your devices? Sign up or sign in
© Bible Society of Malawi