Marako 9

1Eri nga ’yo yi tia kini, Ma ’yo emi tia ada, ’ba emini azini pa sopi ’doa ’diyi, ngani dra ma aji ’bi ’de ku, de nga yi ndreni suru Mungunini emuria okpo be ku.

Yesuni i ma wura ojazu ndu

2 # 2 Pet 1:17-18 O’du azia ma vutia Yesu nga Petero pi Yakobo pie Yohana pie ji i be oni izuru ma dria a’dule; wura erini nga ovu ojazaru ndu yi milia; 3bongo erini nga ovu dizaru emvendrindriru tu, econi ’ba bongo ojipi nyaku dri driarini ojizaru ’dini ku, 4Eliya pi Musa be nga ovu e’dazaru yi dri; yi ovu e’yo nzeria Yesu be. 5Petero nga e’yo omvi, nga ’yo Yesu tia kini, ’Ba ’ba Imbapiri, e’yo amani ovuzu ’doari onyiru tu; ama ma si boroko na, alu mini, alu Musani, alu Eliyani. 6Te eri nini e’yo erini ngale omvileri ku, yini ovule uri be turisi. 7#Mat 3:17; Mar 1:11; Luk 3:22; 2 Pet 1:17; Azi 18:15; ’Yeta 3:22Iriti nga emu yi a’buzu ci, o’duko enga iriti nde alia kini, ’Di Mvi-mani lele turi’i; emi ma eri e’yo erini. 8Coti yini angu luria yi ageia, yi ndreni ’ba azini dika ku, pe alu Yesu a’dule yi be.

9 # Mar 8:30 Yini siria oni dria va, eri nga yi azi okposi, kini yi ma olu ’ba azini tia afa yini ndreleri aluni ku, de nga Mvi ’bani engani ’ba draza eselia ku, 10Yi nga e’yo ’diri ma ta mba, e’yo ozizu yi ma eselia kini engata ’ba draza eseliari, efini bani ngoni ya? 11#Mal 3:23; Mat 11:14Yi nga zi tinia kini, Karani piyi ’yo kini Eliya ma emu oko raka a’disi ya? 12#Mal 4:5; Isa 53:3Eri nga ’yo yi tia, Eliya emu oko ada, eri nga di afa dria ’ba yi paria; yi si ndra Mvi ’bani ma e’yo ngoni, kini yi nga eri ecandi e’yo karakarausi, yi nga eri ’ba ’ba tokole ya? 13#Mat 11:14; 1 Opi 19:2, 10Te ma ’yo emi tia Eliya emu di ’bo, yi ’ye di afa yini leleri eri be ’bo indi, yini ndra sile eri ma e’yosirile.

Yesuni mva orindi onzi beri atizu

14 # Mat 17:14-21; Luk 9:37-42 Yi ka emu ’ba erini imbale ’diyi vu, yi ndre ’ba ongulumuru amboru yi ageia, karani piyini e’yo oziria yi tia. 15’Ba ongulumuru dria, coti yini eri ndreria, yi nga osu osu ambo, yini nzuria vunia yi nga eri zi ci ci. 16Eri nga zi yi tia kini, Emi a’di e’yo ozi yi tia ya? 17’Ba alu ’ba ongulumuru ma eselia nga e’yo omvi eri tia kini, ’Ba ’ba Imbapiri, ma eji mva mani ’doa mi yu, eri ovu orindi ndindiru be; 18ka avu pari, ngoa, eri ka eri bi ra, eri di eri o’be va; eri kafuto emi tilenia, eri si nya, eri eca okpo kokoru; ma ’yo te ’ba mini imbale ’diyi ma tia yi ma ofu eri amve, te econi yini ku. 19Eri nga e’yo omvi yi tia kini, Anzi a’ita kokoru la! ama nga ovu emi be ewu ngopi ya? Ma nga e’yo emini ku ’dani ewu ngapi ya? Emi eji eri ma vu. 20Yi nga eri eji vunia; eri ka eri ndre ’bo, orindi anzi nga eri rua osi tu, eri nga e’de va nyakua, nga i agu ogu kafuta emizu tilenia. 21Eri zi ati tia kini, Eri ovu ’dini ewu ngapi ya? Eri nga ’yo ra, Drio, gbu mvasi. 22Pale kakau eri o’be eri aci alia, azini yi alia, eri dri jazu; mi ka eco e’yo azini ’yezaru, mi asi ma ndri ndri, mi ko lama aza fo! 23#Mar 11:23Yesu nga ’yo tinia kini, Mi ka eco ra, ’dini! E’yo dria eco ’ba a’ipiri dri ra. 24#Luk 17:5Coti mva ati nga oyu uru, kini, Ma a’i ra mi ko a’itaako mani ma aza! 25Yesu ka ndre ’ba treni nzuria tualu, eri nga ega orindi onziri dria, kini, Mi orindi ndindiru e’yo eripi kuri, ma azi mi okporu, mi efu eri aliasi ra, mi fi alenia dika ku. 26#Mar 1:26Erini oyuria uru, erini eri osiria teketeke ’boria, eri nga ani, mva nga ovu ’ba avule; ’ba kakau nga ani ’yo ra kini, Eri dra ’bo. 27Te Yesu nga eri ma dri bi, nga eri enga uru, eri nga pa so ani. 28Eri ka fi joa ’bo, ’ba erini imbale ’diyi nga zi tinia erini ovuria a’dule, kini, Econi amani eri drozaru ku a’disi ya? 29Eri ’yo yi tia kini, Suruti ’dori, econi yini fuzaru e’yo azinisi aluni ku, pe alu Mungu zizasi.

Yesuni drata ini ma e’yo ecezu pale iriri

30 # Mat 17:22, 23; Luk 9:43-45 # Yoh 7:1 Yi nga fu ’dasi, nga aga geri Galiliarisi. Eri leni ’ba azini ma ni ku; 31#Mar 8:31; 10:32-34a’disiku eri imba ’ba erini imbale ’diyi, eri ’yo yi tia kini, Mvi ’bani ma ovu fezaru ’ba dri, yi nga eri ’di ra; yi ka eri ’di ’bo, o’du na ma vutia eri nga enga ra. 32#Luk 9:45; 18:34Te yi vani e’yo erini ’yole ’diri ku, yi ru zizu tinia.

A’dini amboru ndenini ya?

33 # Mat 18:1-9; Luk 9:46-50 # Mat 17:24 Yi nga eca Kaperinaumua; erini ovuria joa eri nga zi yi tia kini, E’yo te emini ozile geriari ngoni ya? 34#Luk 22:24Yi nga ovu ciri; yini te agata gale yi eselia geria, kini a’dini amboru aga rani yarisi. 35#Mat 20:26-27; 23:11; Mar 10:43-44; Luk 22:26Eri nga ri va, eri nga ’ba mudri drini iri ’diyi omve i vu; eri nga ’yo yi tia kini, ’Ba azini ka le ovu ’ba okoriru, eri ma ovu ’ba dria ma vutiariru, azini ’ba dria ma aza kopiriru. 36#Mar 10:16Eri nga mva gaaru ’du dria, eri ’ba eri yi eselia; erini eri ’duria wua, eri ’yo yi tia kini, 37#Mat 10:40; Luk 10:16; Yoh 13:20’Ba azini ka anzi ’diyi ma azi alu a’i ma rusi, eri a’i ma ra; ’ba azini ka ma a’i ra, eri a’ini ma’i ku, te eri ’ba ma ti epepiri a’i’i,

’Ba ovupi ari’bo amaniru kuri ovu ’ba ama aza kopiri

38 # Kal 11:27, 28 Yohana ’yo tinia kini, ’Ba ’ba Imbapiri, ama ndre ndra ’ba azinini orindi onzi droria mi rusi; ama oga eri si, erini ama vuti bile kurisi. 39#1 Kor 12:3Yesu ’yo ra kini, Emi oga eri ku; ’ba azini ka tali ’ye ma rusi, econi erini ma ru o’dazaru onzi mbele ku. 40#Mat 12:30; Luk 11:23’Ba ama dri arupi kuri eri di ovu ama be tualu fo! 41#Mat 10:42’Ba azini ka erejea fe emi dri yi mvuzu, ma ma rusi, emini ovule ’ba Kristonirisi, ma ’yo emi tia ndi ndi, orodri erini ngani avi eri dri ku.

Obeta ’ba esepi e’yo olizi alia ’diyi

42’Ba azini ka anzi nyiri ma a’ipi ’diyi ma aluni fe abazu, yi ka oni amboru anya ’izuri ombe eri ombelekoa, ka eri ’be miri alia, ’yeke. 43I dri ka fe mi aba aba, mi li eri va; mini fizu idri ma alia dri otrulu be, ’diri onyiru aga mini muzu dri iri be jehanumaa, ad inyukokoruri ma aliari ra; 44pari eriagani drazu kuria, acini inyuzu kuria. 45Mi pa ka fe mi aba aba, mi li eri va; mini fizu idri ma alia acozaruri onyiru aga yini mi ’bezu pa iri be jehanumaari ra; 46pari eriagani drazu kuria, acini inyuzu kuria. 47#Mat 5:29Mi mile ka fe mi aba aba,mi nze eri ra; mini fizu suru Mungunia mile alu beri, ’di onyiru aga yini mi ’bezu mile iri be jehanumaari ra; 48#Isa 66:24pari eriagani drazu kuria, acini inyuzu kuria, 49#Lev 2:13Yi nga a’i aciniri ’ba ’ba dria ma ruaa. 50#Mat 5:13; Luk 14:34-35; Kol 4:6A’i eri onyiru; te a’i ma si ka fu ra, emi nga sini ede a’di afasi ya? Emi ma ovu a’ri be emi alia, te emi ovu asi anzuru be emi eselia.

Currently Selected:

Marako 9: LB66

Highlight

Copy