Marako 13

Dri jaza hekaluni pi eceta ewu tini: asizuri ecezu ’diyi be

1 # Mat 24:1-51; Luk 21:5-36 Erini efuria hekaluarisi, ’ba erini imbaleri ma azi nga ’yo’tinia kini, ’Ba ’ba Imbapiri, mi ne oni ’diyi pi jo siza ’diyi be ndri ’doni ya! 2Yesu nga ’yo tinia kini, Mi ndre jo siza ambo ambo ’diyi ya? Oni alu ngani ace i agyi dria asukokoru aluani ku.

3Erini riria oni Mizeituni dria, hekalu be otizaru, Petero pi, Yakobo pie, Yohana pie, Andarea pie, yi nga eri zi ndindiru kini, 4Mi olu ama dri e’yo ’diyi nga yi ’ye a’dungare ya? Ewu e’yo ’diyini ngazu yi ’yezu cazu tinia driari ma ecetani ngoni ya? 5Yesu nga ’ba ’yo yi tia kini, Emi ovu mile be, ’ba azini ma ici emi ku, 6’Ba karakarau nga emu ma rusi, ’yozu kini, Ma eri’i! Yi nga ’ba ici karakarau. 7Emi ka nga e’yo ombani eri ra, androta ombani be, emi asi ma oti ku; e’yo ’diyi nga yi ’ye be, te ewu angu tini asizuri nga yo, 8#Isa 19:2; 2 Sur 15:6Suruni nga enga suru azini be, opi nyazani nga enga opi nyaza azini be dria ombaru; oyakiani nga ovu anguasi ndu ndu, likini nga ovu indi; e’yo ’diyi bani rua suza ma tini e’dozuri’i.,

9 # Mat 10:17-20; Luk 12:11-12 Emi ovu mile be emi ma ngulupi ma agei tezu; yi nga emi ji diwania; yi nga emi co pari ’bani yi okuzuria; emi nga pa so e’yo manisi ’ba ’ba dri cepi ’diyi pi ma milia opi be, ovuzu e’yo etiru yi dri, 10#Mar 16:15Te ma olu e’yo bari suru dria vu oko. 11Yi ka emi ji fe e’yo lizu emi dria, emi asi ma oti e’yo emini ’yolerisi oko ku; te e’yo dria ngapi ovupi fezaru emi dri sawa ’dasiri emi ’yo’i te ’ba e’yo ’yopiri emi’i yo, eri Orindi Alatararu’i. 12#Mik 7:6Adripini nga adripini fe drazu, atani nga mvini fe drazu, anzi yi nga enga ombaru ’ba yi tipi ’diyi be, yi nga yi fe odra ra; 13#Mat 10:22; Yoh 15:21’ba dria yi nga emi ngu onzi ma rusi. Te ’ba asi tepi troa ewu angu tini asiriari, eri nga i pa ra.

14 # Dan 9:27; 11:31; 12:11 Emi ka afa ngule onzi ’ba dri jazuri ndre erini pa soria pari ogale siria (’ba waraga lapiri ma va e’yo ’diri), ’ba angu Yudiaa ’diyi ma apa oni eselia; 15#Luk 17:31’ba ovupi jo driari ma si va fizu afa ’duzu joarisi ku; 16’ba ovupi nga aliari ma atri dri vile koti erini ’duzu ku. 17Candi oku okporovuru ’diyi dri, odekua endrupi ’diyi be. 18Emi ma zi Mungu e’yo nderi ma ovu ewu egbenisi ku. 19#Dan 12:1; ’Yeta 7:14; Yoe 2:2O’du nde ’dayisi inzatani nga ovu indi, inzata azini engazu Munguni e’dozu nyaku ’bazurisi cazu kpere curu’do ndra nga ’dinileni yo, ngani vini eca ’dini ku indi. 20Opi ka o’du ’diyi li alinaru ku, ’ba ndi aluni ngani i pa ku; te ’ba opeza erini opele ’diyi ma e’yosi eri nga o’du ’diyi li alinaru ra. 21Ewu ’dasi ’ba azini ka di ’yo emi tia kini, Mi ndre, Kristo eri ’do’i kani, Mi ndre, eri ’da’i! emi a’i ku. 22#Azi 13:1Kristo inzoru piyi nabi inzoru ’diyi be nga enga ra, yi nga eceta piyi ’ye tali be ’ba icizu ani, ka eco ra, ’ba opeza pie dria. 23Emi ma ovu mile be; emi ndre, ma olu emi tia e’yo dria drio okorisi ’bo.

E’yo Mvi ’banini ngazu emuzu dikari

24 # Isa 13:10; Eze 32:7; Yoe 2:10, 31; 3:15; Eceza 6:12 O’du nde ’dayisi, inzata ’dari ma vutia, etuni nga ovu bizaru iniru, mba ngani angu mve ku, 25#Isa 34:4; Yoe 2:10; ’Yeta 6:13’bi’bio yi nga o’de ’buarisi va, okpo ’bua ’diyi nga oya oya. 26#Dan 7:13; Eceza 1:7Yi nga di Mvi ’bani ndre erini emuria iriti ma alia, okpo amboru be, diza be tu. 27#Zek 2:6; Azi 30:4; Mat 13:41Eri nga malaika erini ti pe, yi nga ’ba opeza erini oku tualu engazu oli su ’diyi ma alia, engazu angu ma kalatini asizuria cazu kpere ’bu ma kalatini asizuria.

28Emi oni e’yo eti o’beza elioni arakalani efuria aroru ’bo, bini ka idi ra, emi ni kini ewu lozuri eca ogogo. 29’Dinile emi alu indi, emi ka e’yo ’diyi ndre, yini yi ’yeria, emi nga ni kini eri ovu ogogo, va jotilia. 30Ma ’yo emi tia ndi ndi, a’bianzi ’diyi ngani yi de ku de nga e’yo ’diyi dria ’yeni yi ku. 31’Bu pi nyaku be, nga yi de ra, te e’yo,mani ngani i de ku.

32 # Mat 24:36 0’du ’dari pi ma e’yo, etuniri be, ’ba aluni nini ku, kani malaika ’bua ’diyi Mvi be ti, kiri Ata’i a’dule, 33Emi ma ovu mile be, emi ko o’du ku, emi zi Mungu tia; emini,ewuni ovuzu a’dungareari nile kurisi. 34#Luk 12:36-38; 19:12; Mat 25:14Eri ovu ’ba mupi angu andinia rile, erini jo erini kuria, erini e’yo ’taziria ati’ba erini ma tia, azi awazu yi vusi alu alu yiniru, eri nga ’ba jotile agei tepiri azi ma te angu ma agei mile be, 35#Luk 12:38Emi ma ovu: mile be ani-emini jo e’ini eca a’dungareari nile kurisi, kani ondre be, kani iniayii, kani a’uatani cere ’beria, kani o’biti be yani- 36eri kazu emuzu rugbu emi isuzu o’du koria ku. 37Mani ’yole emi tiari, ma ’yo ’ba tia dria ’dini: Emi ma! ovu ndrile be.

Currently Selected:

Marako 13: LB66

Highlight

Copy