Marako 11

Yesuni jizu Yerusalemua inzita be

1 # Mat 21:1-9; Luk 19:29-38; Yoh 12:12-16 Yi ka eca Yerusalemu pi vu ogogo, Betefage pie, Betani pie, oni Mizeituni ma etia, eri nga ’ba erini imbale ’diyi ma azi iri ’diyi ma ti pe, 2’yo yi tia kini, Emi mu fi aku ovupi emi driliaria; coti emini firia eri ma alia emi nga akanyamva lisu ’izaru, ’ba aluni nga rizu drinia kuri’i; emi etru eri, eji eri. 3#Mar 14:14’Ba lazini ka ’yo emi tia, Emi ’ye ’dini la’disi ya? emi nga ’yo kini, Opi le erini, eri nga eri ti pe coti dika ’doa. 4Yi nga mu, nga akanyamva isu ’izaru jotilia, geri aritia amve; yi nga leri tru ra, 5’Ba pa sopi ’daa ’diyi ma azi nga ’yo yi tia kini, Emi a’di ’ye, emi akanyamva tru a’disi ya? 6Yi nga ’yo yi tia Yesuni te ’yolerile; yi nga a’i yi dri ani. 7Yi nga akanyamva nderi eji Yesu vu, nga bongo yini o’be eri ngukua, eri nga ri drinia ani. 8’Ba kakau nga bongo yini aja va geria; ’ba azini nga pati arakala bi be yini gale va nga alia ’diyi aja. 9#Zab 118:25-26’Ba mupi drilenia ’diyi pi ’ba mupi vutinisi ’diyi be nga oyu uru kini, Hosana! Asi ndriza ’ba emupi Opi ma rusiri dri! 10Asi ndriza suru emupi a’bi amani Daudiniri dri! Hosana ’bua tu!

11 # Mat 21:12-22; Luk 19:45-48 Eri nga fi Yerusalemua hekalua; eri ka afa olu dria ’bo, etuni ’yeria ’deria ’boria eri nga fu mu Betania, ’ba mudri drini iri ’diyi be.

E’yo Yesuni elio trizuri

12Dru ’dini, yi ka fu Betaniasi ’bo, abiri nga eri fu ra. 13#Luk 3:9; 13:6-9Erini elio pati bi beri ndreria re ’dani, eri mu ra, kani eri nga afa isu ruania yani, Eri ka eca vunia ogogo, eri isuni afa ku, kiri pati bini a’dule, erini ovule ewu elioni kazuri’i kurisi. 14#Mar 11:20Eri nga e’yo ’yo tinia kini, ’Ba aluni ma nya efi mini dika ’dani ’dani ku. ’Ba erini imbale ’diyi nga e’yo eri ra.

E’yo Yesuni hekalu ’bazu alaruri

15 # Yoh 2:14-16 Yi nga eca Yerusalemua, Eri nga fi hekalua, eri ’ba ’ba afa ozipi ’diyi pi ofu amve, ’ba afa olepi hekalua ’diyi be, eri nga ’ba silingi ofupi ’diyi ma mesa pi ogu va, ’ba a’balau ozipi ’diyi ma kiti be; 16eri a’ini ’ba azinini afazu jizu agazu yi be hekalu alesi ku. 17#Isa 56:7; Yer 7:11Eri nga ’ba imba, nga ’yo yi tia kini, Yi sini ndra ’dini ku ya, kini, Yi nga jo mani omve jo Mungu zizu suru dri driari’i? Te emi ’ba eri oji ’ba afa opapi diyiniru. 18Kuhani amboru piyi karani pie nga e’yo ’diri eri ra, yi nga ’ba geri ndru eri dri jazu; yini ovule erisi urisirisi, te ’ba ongulumuru dria osu tu eri ma imbatasi. 19Etuzu ondre vusi ondre vusi eri adri fu aku amboruasi amve.

Imbata elio ’wizani ma driari

20 # Mar 11:14 O’bitisi yini agaria, yi ndre elio pati nde ’wi ’bo, olani be dria. 21Peteroni e’yo egaria i asia nga ’yo tinia kini, ’Ba ’ba Imbapiri, mi lu! Elio mini trile ajeri ’wi teketeke ’bo. 22#Yoh 14:1Yesuni e’yo omviria, nga ’yo yi tia kini, Emi ovu a’ita be Mungu vu. 23#Mat 17:20; 1 Kor 13:2; Luk 17:6Ma ’yo emi tia ndi ndi, ’ba azini ka ’yo oni ’diri ma tia, Mi nze mi ra, mi ’be mi miri alia; ka e’yo nduni ega i asia kuria, te ka a’i e’yo erini ’yoleri nga i ’ye ra, e’yo nde nga i ’ye eri dri ra. 24#Mat 7:7; Yoh 14:13; 16:23E’yo ’disi ma ’yo emi tia ndi ndi, e’yo dria emini zile emini a’ile Mungu tiari, emi ma a’i emi asia kini emi bi e’yo nde ’bo, te yi nga ovu emini ra. 25#Mat 6:14-15; 5:23Te etu dria emini pa soria e’yo ziria Mungu tia, emi ka ovu e’yo be ’ba azini vu, emi ku e’yo nde ja; Ata emini ’buari ma ku ezata emini ja ani. 26Te emi ka e’yo ku ja ku, Ata emini ’buari ngani vini ezata emini ku ku indi.

Okpo Yesuni ecozu ani e’yo ’yezuri zizu Yesu tia

27 # Mat 21:23-27; Luk 20:1-8 Yi nga eca Yerusalemua dika. Erini aciria hekalua, kuhani amboru piyi karani pie, ’ba wara ’diyi be nga emu vunia, 28yi nga ’yo tinia kini, Mi e’yo ’diyi ’ye okpo ngorisi ya? A’di fe mi dri okpo ’diri e’yo ’diyi ’yezuni ya? 29Yesu nga ’yo yi tia kini, Ma nga e’yo alu zi emi tia; emi omvi mani, ma nga di okpo ngori mani ani e’yo ’diyi ’yezu yari ma e’yo olu emi tia. 30Baputizi Yohanani enga ’bua, kani ’ba vu ya? Emi omvi mani. 31Yi nga e’yo ozi yi eselia ceni ceni, kini, Ama ka ’yo, ’Bua, eri nga ’yo, Ka’dini emi a’ini eri ku a’disi ya? 32Te ama ka ’yo, ’Ba vu,-te yi ovu ’ba ongulumurusi urisi, ’ba driani a’ile kini Yohanani nabi adadanirisi. 33Yi nga e’yo omvi Yesu tia kini, Ama nini ku, Te Yesu nga ’yo yi tia kini, Ma’i alu indi, ma ngani okpo ngori mani e’yo ’diyi ’yezu aniri ma; e’yo olu emi tia ku.

Currently Selected:

Marako 11: LB66

Highlight

Copy