Intembauzyo 22
22
Lwiimbo lwa Devedi Kumweendelezi wanyimbo. Aimbye mbuli bwiimbwa ciyabilo cabuumba
1Akaka Leza wangu, Leza wangu, wandisiila nzi?
Nkaambo nzi ncotandigwasyi aasyoonto?
Nkaambo nzi ncotamvwi majwi aakulisinsukila kwangu?
2O Leza wangu, ndakulilila sikati, pele tondimvwi,
mbubonya amasiku nsilyookezyi pe.
3Uusalala uukkede acuuno cabwami nduwe,
uutembaula Baisilayeli nduwe.
4Wakali kusyoma basikale besu nduwe,
mukuti bakakusyoma wakabavuna.
5Nibakakulilila wakabafutula,
mukuti bakakusyoma taakwe nookabatyompya.
6Lino mebo ndili mbuli namula nsili muntu pe,
bantu balandifubaazya, balandisampaula.
7Bandibona boonse baide kundinonga,
balanditukana ooku kabapukusa mitwe kabati,
8“Aamufutule tubone Mwami Leza ngwasyoma,
aamuvune, tee nguuti Mwami Leza ulabotelwa mulinguwe.”
9Nduwe ookacitya kuti ndizyalwe,
nduwe ookandibamba nkecinyonka.
10Ndakabikkwa alinduwe mbwindakazyalilwa buyo,
kuzwa kukuzyalwa kwangu nduwe Leza wangu.
11Utanditantamuki mapenzi alaafwiifwi kundisikila,
uumbi uunga ulandigwasya taaku.
12Bandizinguluka banyati banji, bandeengela banyati banguzu baku Basyani,
aaba bandeengela mbuli basinkondoma.
13Bandaasamina mbuli basyuumbwa bavuluma, bayanda kundikwamauna.
14Ndaba mbubonya mbuli maanzi aatilwa,
zagejauka zifuwa zyangu zyoonse,
bweenzemuka bunzuka moyo mwangu mbuweenzemuka, nsicili sicamba pe.
15Nta mbuli lukaye mbuwayuma moyo wangu,
mulaka wangu wanamatila kucilakula,
ndafwa wandilazika mulusuko.
16Kwandeengela babwa, kwandizinguluka nkamu yabasizibi,
mbaaba bandiyasa kumaanza amaulu.
17Mafuwa aangu oonse ndakonzya kwaabala,
mumapenzi aangu balo balandilangisisya akukkomana.
18Baabana zisani zyangu akati kabo,
bacuumina cisolo cisani cangu.
19Pele yebo buyo O Mwami Leza utanditantamuki,
boola kufwambaana undigwasye O Singuzu wangu.
20Kuzwa kupanga lijaya ndivune,
vuna buumi bwangu buyandisi kuzwa kubabwa aaba.
21Ndivune kuzwa kumilomo yaba syuumbwa,
ndivune banyati balandiluma.
22Kubakwesu ndiyooambilizya zina lyako,
akati kambungano ndiyookutembaula.
23Amumutembaule Mwami Leza nywebo nomumuyoowa,
amumulemeke nywebo nyoonse nolunyungu lwa Jakobo,
amumulemeke nywebo nyoonse nolunyungu lwa Isilayeli.
24Ooyo uupenzegwa tamulekelezyi nikuba kumufutatila,
nalilila lugwasyo ulamuswiilila.
25Njookutembaula akati kambungano yoonse,
kumbele lyabaabo bakulemeka njoozuzukizya zikonke zyangu.
26Bayoolya akukkuta bacete, bayoomutembaula aabo
bayandaula kukomba Mwami Leza, ibe aabuumi myoyo yanu lyoonse alyoonse.
27Iyooyeeya misyobo yoonse yaanyika,
iyoosundukila ku Mwami Leza,
mikwasyi yamisyobo yoonse iyoomukotamina akumukomba.
28Mwami Leza ngomwami, nguulela zisi.
29Bakupukide boonse bayoolya akumukomba,
bantu buyo boonse bayoomufugamina,
abalo aabo batakonzyi kuba baumi lwabo beni bayoomukomba.
30Bana bayoomumanina milimo, mazyalani aaciza ayoobelekela Mwami.
31Bayooambilizya zyabululami bwakwe kuli baabo batana zyalwa,
bayoozimvwa zyoonse nzyaakacita.
Currently Selected:
Intembauzyo 22: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
