Mateyo 12

Makani aa Buzuba bwakulyookezya butegwa Sabata

(Maako 2.23-28; Luka 6.1-5)

1Mubuzuba bwa Kulyookezya butegwa Sabata, Jesu wakainda mumyuunda yamaila, basikwiiya bakwe bakafwa nzala. Eelyo bakatalika kupulula makunka aamaila balya. 2Bafalisi nibakabona boobo bakati kuli nguwe, “Bona basikwiiya bako bacita citazumizigwi amulawo mu Buzuba bwa Sabata.” 3Jesu wakabaingula kuti, “Sena tiimwakabala Devedi mbwaakacita, ciindi walo abaabo mbaakalaabo nibakafwa nzala? 4Tee bakanjila muŋanda ya Leza akulya cinkwa cacituulo kuli Leza, eeco ncibatakeelede kulya, ccita buyo bapaizi mbibakeelede kulya cinkwa eeco balikke? 5Naa tiimwakabala mbuli bapaizi ba muŋanda ya Leza mbubaali kutyola mulawo wa Buzuba oobu nikuba boobo taakwe nibakapegwa mulandu? 6Pele mpali aano wiinda ŋanda ya Leza. 7Nimwalizi ncokaamba kapango kati, ‘Ndiyanda lweengelelo kutali cipaizyo pe,’ nimwatatamikizya batakwe mulandu pe. 8Nkaambo Mwanaa Muntu ngomwami wa Buzuba bwa Sabata.”

Jesu mbwaakaponya muntu wakapuutide janza

(Maako 3.1-6; Luka 6.6-11)

9Lino Jesu naakazwa ooko wakainka akunjila mucikombelo ca Bajuda. 10Ooko kwakali mwaalumi umwi wakapuutide janza. Mpawo bantu bakabuzya Jesu kuti, “Sena kuleelede kuponya muntu mu Buzuba bwa Kulyookezya butegwa Sabata?” Bakabuzya boobu kuti bamujanine kaambo. 11Nkaako wakabaingula kuti, “Nguni aakati kanu ulaa mbelele yomwe nkabela yawida mudindi mu Buzuba bwa Sabata uunga takooigwisya? 12Kayi muntu ulayandika kapati kwiinda mbelele. Nkaako mulawo ulazumina kucita ciluleme mu Buzuba bwa Sabata.” 13Ucimana Jesu wakati kumwaalumi ooyo, “Vungununa janza.” Eelyo wakalivungununa, lyakapona akuba mbuli lyeenzinyina. 14Bafalisi bakazwa akuyoolivwiya kuti bamujaye buti Jesu.

Musale wa Leza

15Lino Jesu naakaziba mizeezo yabo wakazwa ooko. Nkabela bantu banji bakamutobela nkaako wakaponya balwazi boonse. 16Ucimana wakabalailila kuti batamuyubununi. 17Eeci caakucitika mbubonya mbwaakaambide musinsimi Izaya kuti,

18“Ngooyu mubelesi wangu ngundasala ngwenjandisisya.

Nzyacita zilandikkomanisya.

Ndiyoomupa muuya wangu,

nkabela uyoolungulula kuli bamasi kuti Leza uliluleme.

19Takooyoovulumuka nikuba kupozomoka pe.

Takooyoolituntaizya mumazila.

20Takooyootyola katete kacuzukide

nikuba kuzima kamuni kayaka.

Uyoofwida bantu luse kusikila bululami bwakwe bukazunde.

21Bulangizi bwabamasi buyooba muli nguwe.”

Zya Jesu a Belizebule

(Maako 3.20-30; Luka 11.14-23)

22Mpoonya bantu bakamuletela moofu, syataambi, wakanjidwe muuya mubi. Wakamuponya, watalika kwaambaula akubona. 23Lino bantu boonse bakagambwa akuti, “Sena ooyu ulakonzya kuba mwanaa Devedi ooyo?” 24Bafalisi nibakamvwa boobo bakati, “Peepe, ngu Belizebule, mwami wamyuuya mibi nguupa ooyu muntu nguzu zya kugwisya myuuya mibi.” 25Lino Jesu naakaziba ncibakali kuyeeya wakati kulimbabo, “Kuti bantu bacisi comwe babukilana, eeco cilooleka. Alimwi kuti bantu bamumunzi omwe naa mukwasyi babukilana, munzi naa mukwasyi ooyo ulooleka. 26Kuti naa Saatani wagwisya beenzinyina, nkokuti walilwana lwakwe. Ino inga bwami bwakwe bwakkala buti? 27Kuti naa ndilagwisya myuuya mibi anguzu zya Belizebule, amundaambile, ino baccilili banu baigwisya aanguzu zyani? Nkaako bayoomuzula akutondezya kuti mulilubizizye. 28Peepe tali Belizebule, pele Muuya wa Leza nguundipa nguzu zyakwiigwisya myuuya mibi, caamba kuti bwami bwa Leza bwasika kuli ndinywe. 29Kunyina muntu uukonzya kunjila muŋanda yasinguzu akusaala zintu zyakwe, ccita wasaanguna kwaanga singuzu ooyo. Ndendilyo nanga wakonzya kusaala zintu zyamuŋanda yakwe. 30Kufumbwa uuteendelani andime ngusinkondoma ayooyo uutabunganyi antoomwe andime ulamwaya. 31Nkaambo kaako ndamwaambila kuti Leza ulakonzya kumulekelela muntu cibi coonse, niciba cakumusampaula. Pele kuti naa muntu wasampaula Muuya Uusalala takooyoolekelelwa pe. 32Mbubonya oobo kufumbwa waamba cakubisya-bisya Mwanaa Muntu ulakonzya kulekelelwa, pele ooyo uukanana cakubisya-bisya Muuya Uusalala takooyoolekelelwa pe, kuciindi cino nikuba kuciindi ciboola.”

Musamu ulazibwa amicelo yawo

(Luka 6.43-45)

33“Mbuli mbomuzi kuti musamu kuuli mubotu ayalo micelo yawo mibotu, musamu mubi ulazyala micelo mibi. Kayi musamu uuli woonse ulazibwa amicelo yawo. 34Nywebo nobana banzoka! Ino inga mulaamba buti cibotu, kakuli nywebo muli babi? Nkaambo muntu waamba cizwide mumoyo wakwe. 35Muntu mubotu ulaamba zibotu nzyayobola muli nguwe, muntu mubi ulaamba zibi zili muli nguwe. 36Ncobeni ndamwaambila kuti mubuzuba bwalubeta bantu bayoopegwa mulandu akaambo kamajwi oonse ngubakali kwaamba. 37Nkaambo mbuli mbwaya kukanana muntu uyoozulwa naa kutapegwa mulandu.”

Cikonzyanyo ca Jona

(Maako 8.11-12; Luka 11.16, 29-32)

38Lino bamwi bamayi ba Mulawo a Bafalisi bakati kuli Jesu, “Omwiiyi tuyanda kuti utucitile maleele.” 39Jesu wakabaingula kuti, “Basizibi batasyomeki kuli Leza balayanda kubona maleele, pele taakwe nobatitondezegwe, ccita ambweni cakacitika kuli Jona musinsimi. 40Nkaambo mbubonya mbuli Jona mbwaakali mwida lyanswi mpati kwamazuba otatwe, mbubonya oobo awalo Mwanaa Muntu mbwayooba mazuba otatwe mubulongo. 41Nkaako baku Nineva bayoomuzula, mubuzuba bwalubeta, balo bakeempa nibakakambaukilwa a Jona. Lino aano mpali wiinda Jona. 42Alimwi mubuzuba bwalubeta mwami mukaintu uuzwa kumusanza uyoomuzula nkaambo wakeenda kuzwa kumagolelo aanyika kuzoomvwa busongo bwamwami Solomoni. Lino aano mpali wiinda Solomoni.

Kubweeda kwamuuya uusofwaazya mumuntu

(Luka 11.24-26)

43“Kuti muuya uusofwaazya wazwa mumuntu uleendeenda mucimpayuma kuyabuyandaula cilyookezelo, pele ulacibula. 44Wacibula ulati, ‘Ndabweeda kumuntu wangu nkwindazwida!’ Nkabela ciindi ncuupiluka ulajana taakwe cilimo, muntu ooyo uli buyo kabotu. 45Mpoonya aawo ulainka wakweeta iimbi myuuya iili ciloba mibi kwiinda nguwo, nkabela ilanjila akukkala mumuntu ooyo. Eelyo kumamanino buumi bwamuntu ooyo bulabija kwiinda mbwaakali kusaanguna. Mbombubo mbokuyooba kubantu babi mbaazuba aano.”

Bamukowa wa Jesu

(Maako 3.31-35; Luka 8.19-21)

46Jesu naakacili kwaambaula kubantu, kwakasika banyina ababunyina bakaima aanze, kabayanda kwaambaula anguwe. 47Nkabela muntu umwi wakamwaambila kuti, “Banyoko abana bokwanu bali anze bayanda kwaambaula anduwe.” 48Jesu wakaingula muntu ooyo wakamwaambila kuti, “Ino baama mbaani, abalo bana bokwesu mbaani?” 49Lino wakatondeka ooko kwakakkede basikwiiya bakwe, wakati, “Tee baama abana bokwesu mbaaba! 50Nkaambo kufumbwa ooyo uucita ziyanda Taata uuli kujulu, ngomukwesu, ngomucizi alimwi mbabaama.”

Currently Selected:

Mateyo 12: Tonga96

Highlight

Copy