Mateyo 10

Zyabatumwa ba Jesu

(Maako 3.13-19; Luka 6.12-16)

1Lino Jesu wakaita basikwiiya bakwe bali kkumi ababili kuti babungane. Nkabela wakabapa nguzu zyakugwisya myuuya mibi, akuponya malwazi amaciswe aasiyene-siyene. 2Mazina aabo ngaaya: Saimoni uutegwa Pita a Andulu munyina, Jemusi mwanaa Zebedii a Joni munyina, 3Filipo, Baatolomeyo, Tomasi, Mateyo sikutezya, Jemusi mwana wa Alufayusi, Tadeyusi, 4Saimoni munkutwe a Judasi Isikaliyoti wakamwaaba.

Jesu mbwaakatuma basikwiiya bakwe

(Maako 6.7-13; Luka 9.1-6)

5Aaba bali kkumi ababili Jesu wakabatuma, amalailile aaya: “Mutainki kuli bamasi, alimwi mutakanjili nimuba mumunzi wa Basamaliya. 6Pele muleelede kuunka kubantu ba Isilayeli bali mbuli mbelele zisweekede. 7Mukakambauke kuti, ‘Bwami bwakujulu bwaswena.’ 8Amukaponye baciswa, abasizinsenda, mukabusye bafu, alimwi mukagwisye myuuya mibi. Mwapegwa buyo, anywebo mukape buyo. 9Mutabwezi mali muzikwama zyanu naaba aangolida, naaba ansiliva, naaba aamukuba. 10Mutatoli cibwezelo calweendo, niziba zibaki zyobilo, niziba ndyasyo niiba nkoli nkaambo similimo ulida amulimo wakwe.

11“Nkabela kufumbwa munzi ngomwanjila, mukayandaule muntu uunga wamutambula. Mukakkale anguwe mane kusikila mukazwe oomo. 12Nkabela mwaakunjila buyo muŋanda, mukati ‘Amube aaluumuno.’ 13Kuti naa bali mumo bamutambula, luumuno lwanu lukabe ambabo. Kuti naa tabamutambuli, mukazwe aluumuno lwanu. 14Naa kwabula muntu naba omwe uumutambula naa kuswiilila majwi aanu muŋanda yakwe naa mumunzi oonse ooyo mukakunkumune lusuko kumatende aanu cikabe cicenjezyo kulimbabo. 15Jesu wakati, ncobeni ndamwaambila kuti mulandu wa Sodomu a Gomola uzooba muniini mubuzuba bwalubeta kweelanya awako.

Mapenzi aaboola

(Maako 13.9-13; Luka 21.12-17)

16“Amubone ndamutuma mbuli mbelele aakati kabaumpe, nkaako amucenjele mbuli nzoka alimwi mubombe mbuli nkwilimba. 17Amukabacenjelele bantu, nkaambo bayoomutola mumbeta akuyoomuuma muzikombelo zyabo. 18Muyootolwa kubeendelezi abami nkaambo kangu, kuti mukandicitile bumboni kulimbabo akuli bamasi. 19Ciindi nibayoomujata, mutakalibiliki kuti ‘Ino tukaambe buti?’ naa ‘Tukakanane nzi?’ nkaambo Leza uyoomuzibya ncomuyooamba muciindi nciconya eeco. 20Ncobeni teensi ndinywe nomuti kaambe, pele Muuya Uusalala uuzwa kuli Uso uuli kujulu uyooba mulindinywe.

21“Ciindi eeco munyina uyooaba mwanookwabo kuti ajaigwe, abalo bamawisi bayoocita mbubonya buyo kubana babo, bana bayoobukila bazyali babo akubajaya. 22Kayi nywebo muyoosulaikwa abantu boonse akaambo kangu. Pele ooyo uukakatila mane kumamanino uyoofutuka. 23Ciindi nibayoomupenzya mumunzi umwi mukatijile kuluumbi. Ncobeni ndamwaambila kuti kamutana manizya mulimo wanu muminzi yoonse ya Isilayeli Mwanaa Muntu unoosikide kale.

24“Sena tamuzi kuti sikwiiya tali mupati kwiinda Mwiiyi wakwe, awalo mubelesi tali mupati kwiinda simalelo wakwe? 25Cileelede kuli sikwiiya kuti asoleke kuba mbuli Mwiiyi wakwe muluzibo, awalo mubelesi kuti abe mbuli simalelo wakwe. Kuti naa mwini ŋanda bamwiita kuti Belezebule, ino baŋanda yakwe bayoobabisya-bisya buti?

Weelede kuyoowegwa

(Luka 12.2-7)

26“Aboobo mutayoowi bantu. Taakwe civumbidwe citakooyooyubununwa, naa cisisidwe citakooyoozibwa. 27Nkabela eeco ncendamwaambila mumudima amucaambe mumumuni aceeco ncomumvwa mukupetekezya mucaambe antangalala. 28Mutabayoowi aabo bajaya mubili pele tabakonzyi kujaya muuya. Muyoowe ooyo uukonzya kujaya muuya antoomwe amubili mumulilo uutamani. 29Tee kayi tutiiti tobilo tuulwa kali komwe? Nikubaboobo taakwe nikaba komwe kato kanga kawida ansi akufwa Uso katazi. 30Anywebo masusu aamitwe yanu ulaabalide. 31Nkaambo kaako mutayoowi, kayi nywebo mulayandika kwiinda tutiiti tunji.

Zyakuzumina Jesu

(Luka 12.8-9)

32“Kufumbwa ooyo uundizumina kubantu, ambebo njoomuzumina kuli Taata uuli kujulu. 33Pele kufumbwa ooyo uundikaka kubantu ambebo ndiyoomukaka kuli Taata uuli kujulu.

Bantu bayooandaana akaambo ka Jesu

(Luka 12.51-53; 14.26-27)

34“Mutayeeyi kuti ndakaleta luumuno munyika. Taakwe nindakazida luumuno pe, pele nkondo. 35Nkaambo ndazida kwandaanya mwana mulombe awisi, musimbi abanyina, mukamwana abanyinazyala. 36Nkabela basinkondonyina muntu, bayooaba mbabonya bamukwasyi wakwe.

37“Kufumbwa uuyandisya wisi naa banyina kwiinda ndime teelede kuba wangu. Alimwi kufumbwa uuyandisya mwanaakwe mulombe naba musimbi teelede kuba wangu. 38Kufumbwa uutayumuni mapenzi mbuli ciingano akunditobela teelede kuba wangu. 39Kufumbwa ooyo uuyandaula buumi uyoobusweekelwa, nkabela kufumbwa uusweekelwa buumi bwakwe akaambo kangu uyoobujana.

Kulumbulwa

(Maako 9.41)

40“Kufumbwa uumutambula utambula ndime, alimwi ooyo uunditambula watambula ayooyo wakandituma. 41Kufumbwa uutambula mutumwa watumwa a Leza uyootambula cilumbo camutumwa wa Leza. Alimwi kufumbwa uutambula mululami uyootambula cilumbo cabululami. 42Ayooyo uupa naaba maanzi-cula kuli yooyo muniini wabandiccilila, ndamwaambila kuti ncobeni, takabuli cilumbo cakwe.”

Currently Selected:

Mateyo 10: Tonga96

Highlight

Copy