Luka 6

Makani aa Buzuba bwa Kulyookezya butegwa Sabata

(Mateyo 12.1-8; Maako 2.23-28)

1Lino Jesu wakaandulula akati kamyuunda yamaila mu Buzuba bwa Kulyookezya butegwa Sabata. Nkabela basikwiiya bakwe bakatalika kupulula makunka amaila, bakaapuka-puka mumaanza aabo, akulya nseke. 2Bamwi ba Bafalisi bakaamba kuti, “Ino nkaambo nzi ncomucita citazumizigwi amulawo mu Buzuba bwa Sabata?” 3Walo Jesu wakaingula kuti, “Sena tiimwakabala Devedi mbwaakacita ciindi walo abaabo mbaakalaabo nibakafwa nzala? 4Tee kayi bakanjila muŋanda ya Leza akulya cinkwa cacituulo kuli Leza, eeco ncibatakeelede. Lino kwiindila mu Mulawo wesu, bapaizi balikke mbabazumizigwa kulya cinkwa eeci, pele Devedi wakacilya akucaabana abaabo mbaakalaabo.” 5Aboobo Jesu wakati kulimbabo, “Mwanaa Muntu ngo Mwami wa Buzuba bwa Sabata.”

Jesu mbwaakaponya muntu wakapuutide janza

(Mateyo 12.9-14; Maako 3.1-6)

6Mu Buzuba bwa Kulyookezya bumwi butegwa Sabata Jesu wakanjila mucikombelo ca Bajuda akuyooiisya. Mucikombelo oomo mwakali mwaalumi wakapuutide janza lyalulyo. 7Bamwi bamayi ba Mulawo abamwi Bafalisi bakamulangisisya kubona kuti naa Jesu ulaponya muntu mu Buzuba oobu kutegwa bamujanine mpawo kaambo. 8Pele Jesu wakalizi kale miyeeyo yabo, aboobo wakaambila muntu ooyo wakapuutide janza kuti, “Konyamuka, koza kuno kumbele.” Muntu ooyo wakanyamuka, wakaakwiima mpoonya aawo mpaakaambilwa. 9Eelyo Jesu wakati kulimbabo, Ono ndilamubuzya kuti, “Mulawo wesu utuzumizya kucita nzi mubuzuba bwa Sabata? Kucita cibotu naa kucita cibi? Kufutula buumi bwamuntu naa kubunyonyoona?”

10Mpoonya wakabacebaukila boonse. Eelyo wakaambila muntu wakapuutide janza kuti, “Vungununa janza lyako.” Wakacita oobo, mpoonya-mpoonya wakapona. 11Pele balo bakanyema cakulutila, bakatalika kuvwiya-vwiya mulicabo, kuti bayeeye mbobanga bamucita Jesu.

Jesu mbwaakasala batumwa bali kkumi ababili

(Mateyo 10.1-4; Maako 3.13-19)

12Kuciindi eeco Jesu wakaya kucilundu kuyookomba. Wakakomba masiku oonse kuli Leza. 13Nibwakaca, wakaita basikwiiya bakwe. Akati kabo wakasala bakali kkumi ababili mbaakaulika kuti mbatumwa bakwe. 14Balo mbaaba, Saimoni ngwaakaulika zina lya Pita, Andulu mwana wokwabo Pita, Jemusi a Joni, Filipo a Baatolomeyo, 15Mateyo a Tomasi, Jemusi mwana wa Alufayusi, a Saimoni munkutwe, 16a Judasi mwanaa Jemusi a Judasi Isikaliyoti wakamwaaba.

Jesu mbwaakaiisya akuponya

(Mateyo 4.23-25)

17Naakaselemuka acilundu antoomwe abatumwa, Jesu wakaima abusena bubambasede. Wakali ankamu mpati yabasikwiiya bakwe, alimwi amakamu aabantu bamwi bakazwa mucisi coonse ca Judiya amumunzi mupati wa Jelusalemu. Bamwi bakazwa muminzi yaku Taya a Sidoni yakabembelekede nkomwe yalwizi. 18Bakaboolela kuzoomvwa Jesu akuti bazooponyezegwe. Abalo bakali kupenzegwa amyuuya mibi bakaponyezegwa. 19Bantu boonse bakali kuyanda kumuguma, nkaambo nguzu zyakali kuzwa mulinguwe, zyakali kubaponya boonse.

Jesu mbwaakakambauka acilundu

(Mateyo 5.1-12)

20Lino Jesu wakalanga kuli basikwiiya bakwe waamba wati,

“Mulilelekedwe nywebo nobacete,

nkaambo bwami bwa Leza mbubwanu.

21“Mulilelekedwe nywebo nomufwa nzala lino,

nkaambo Leza uyoomupa nzyomubula!

“Mulilelekedwe nywebo nomulila ciindi cino,

nkaambo muyooseka!

22“Mulilelekedwe nywebo nomusulaikwa abantu, anobamukaka akumutukila akumwaamba kuti muli babi, akaambo kakutobela Mwanaa Muntu! 23Amukatangale caakucitika eeci, iiyi, mukasotooke mukabotelwe zyaakucitika, nkaambo bulumbu bwanu kujulu mbupati. Nkaambo mbubonya oobo bamawisi mbubakacita kubasinsimi.

24“Pele maawe kulindinywe nomuvubide mazuba aano,

nkaambo mwakatambula kale bulumbu bwanu!

25“Maawe kulindinywe nomukkuta mazuba aano,

nkaambo muyoofwa nzala.

“Maawe kulindinywe nomuseka ciindi cino,

nkaambo muyooungumana akulila!

26“Maawe kulindinywe nomwaambwa kuba kabotu abantu boonse, nkaambo mbombuboobo abamawisi mbubakali kucita kubasinsimi babeji.

Zyakuyanda basinkondonyoko

(Mateyo 5.38-48; 7.12)

27“Pele ndati kulindinywe nyoonse nomundiswiilila, amuyande basinkondonyoko, amubacitile kabotu aabo bamusulaika. 28Amukumbile Leza kuti aleleke aabo bamusinganya, amubakombele aabo batamucitili kabotu. 29Kuti muntu wakuuma kusaya, umusandwide alimwi saya. Alimwi kuti umwi wakunyanga cibaki, umuleke atolelele ajansi. 30Ubape boonse bakukumbila, awalo uutola lubono lwako, utamusesi kuti alupilusye alimwi pe. 31Kufumbwa eezyo zimuyanda kuti bantu bamucitile, amubacitile mbubonya anywebo.

32“Kuti naa kamuyanda buyo aabo bamuyanda, sena muleelede kulumbaizigwa? Kayi abalo basizibi balayanda aabo babayanda! 33Alimwi kuti naa kamucita kabotu kuli baabo bamucitila kabotu, sena muleelede kulumbulwa? Kayi abalo basizibi mbobacita oobo! 34Kuti naa kamukolotesya buyo bantu mbomusyoma kuti bayoomuboozezya, ino inga mwalumbaizigwa buti? Kayi abalo basizibi mbobacita oobo, balakolotesya basizibinyina alimwi balangila kutambula kweelede mbubonya!

35“Pele mweelede kuyanda basinkondonyoko, alimwi mubacitile kabotu, amukolotesye kamutalangili kuboozezegwa, niciba cimwi cintu! Eelyo bulumbu bwanu bwakujulu buyooba bupati. Muyooba bana ba Leza Sijulu wamajulu, uubacitila kabotu aabo batamulumbi babi. 36Amube alweengelelo mbubonya mbuli Uso mbwali aalweengelelo.

Makani aakubeteka bamwi

(Mateyo 7.1-5)

37“Mutabeteki, nkokuti anywebo Leza atakamubeteki, mutapi muntu mulandu, kutegwa anywebo mutakapegwi mulandu. Mubalekelele bamwi, eelyo Leza uyoomulekelela anywebo. 38Amupe kuli bamwi nzyobabula, eelyo Leza uyoomupa ncobeni kwiindilila, cisindaidwe citikimwidwe, alimwi cizwide mwaa! Nkaambo ncoelekela bamwi, ncencico Leza ncayoobelesya akulinduwe.”

39Lino Jesu wakabaambila cikozyanyo cakuti, “Sena muntu moofu ulakonzya kusololela moofunyina? Tee kayi boonse bobilo bayoowida mudindi. 40Sikwiiya tali mupati kwiinda mwiiyi wakwe pe, pele amanizya kwiiya, awalo ulaba mbuli wakamwiisya.

41“Ino mbubuti mbobona kakwa kali muliso lyamunyoko, waleka tanda lili muliso lyako? 42Alimwi ulaamba buti kumunyoko kuti, ‘Akaka musa, koza, ndikufule kakwa kali muliso lyako,’ kotabwene tanda lili muli liso lyako? Yebo osikuupaupa ameso, saanguna kugwisya tanda lili muliso lyako, eelyo notikonzye kufula kakwa kali muliso lyamunyoko.

Makani aamusamu amicelo yawo

(Mateyo 7.16-20; 12.33-35)

43“Alimwi taakwe musamu mubotu uuzyala micelo mibi, nuuba musamu mubi uuzyala micelo mibotu. 44Musamu uuli woonse ulazibwa kumicelo yawo, nkaambo taakwe nkuyu zicelwa kumutube-tube, niziba nsaansa zicelwa kumuunga. 45Muntu mubotu ulaamba nzyayobola mumoyo wakwe, awalo mubi ulaamba zibi zili mumoyo wakwe, nkaambo waamba cili mumoyo wakwe.

Zyamaanda obilo

(Mateyo 7.24-27)

46“Ino mundiitila nzi kuti, ‘Mwami, Mwami,’ pele tamuciti ncemwaambila? 47Ooyo oonse uuboola kulindime akumvwa majwi aangu, akwaacita, ndamutondezya mbwabede. 48Uli mbuli muntu wakayaka ŋanda, pele katana talika kuyaka, wakasya mwiimbi mulamfu wakweenzya bbwe, eelyo wakatalika kuyaka atala abbwe. Lino mvula nji niyakaboola, amulonga niwakazula akupaya, maanzi akauma kuŋanda eeyo, pele taakwe niyakawa, nkaambo yakayakwa kabotu. 49Pele ooyo uuswiilila majwi aangu akutaacita, uli mbuli muntu wakayaka ŋanda katasyi mwiimbi kabotu. Maanzi aamulonga naakapaya akuuma alinjiyo, yakooleka kufwambaana yanyonyooka!”

Currently Selected:

Luka 6: Tonga96

Highlight

Copy