Luka 3

Kukambauka kwa Joni Mubbapatizi

(Mateyo 3.1-12; Maako 1.1-8; Joni 1.19-28)

1Wakali mwaka wakkumi aisanu Tibeliyasi kali ngo Muleli Mupati waku Loma, ciindi eeco Pontiyasi Pilato wakali mweendelezi wacisi coonse ca Judiya. Helodi wakali ngomwami wacisi ca Galilii. Filipo, mwanookwabo Helodi, wakali mwami wazisi zya Ituliya a Tilakanitisi. Lisaniyasi wakali mwami wacisi ca Abilini. 2Alimwi ciindi nciconya eeco Anasi a Kayafa bakali mbabapaizi bapati. Ndendilyo eelyo ijwi lya Leza nilyakasika kuli Joni, mwanaa Zekaliya, naakali munkanda. 3Joni wakainka mucisi coonse cakazingulukide mulonga wa Jolodani. Wakakambauka kuti, “Amweempe kunzila zyanu zibi, mubbapatizigwe kuti Leza amulekelele zinyonyoono zyanu.” 4Mbubonya mbokulembedwe mubbuku lyamusinsimi Izaya kuti,

“Kuli waambilizya munkanda kuti,

‘Amubambe mugwagwa wa Mwami Leza! Amululamike nzila yakwe kabotu.

5Tunkolola toonse tuyoovwikilwa,

amalundu oonse azyuulu ziyoobambasigwa anzila zipilingene ziyoolulamikwa,

atwalo tuzila twamaguguunya tuyooelanyizigwa.

6Misyobo yoonse yabantu iyoobona lufutuko luzwa kuli Leza!’”

7Bantu banji bakasika kuli Joni kuti bazoobbapatizigwe anguwe. Pele walo wakabaambila kuti, “Nywebo nobacipile! Nguni wakamucenjezya kutija cisubulo ca Leza ciboola? 8Amucite eezyo zibonya kuti mweempa. Nkabela mutanoocaambi kuti, ‘Abulahamu ngu taata.’ Kayi Leza ulakonzya kusandula naaba mabwe aaya kuti abe bana ba Abulahamu. 9Lino-lino keembe kakugonsya sikaiminwa, kalibambilidwe kale, aboobo woonse uutabi aamicelo mibotu ulatemwa akuwaala mumulilo.”

10Lino bantu bakamubuzya kuti, “Ino kayi tweelede kucita buti?”

11Walo wakabaingula kuti, “Ooyo uujisi zisani zyobilo, cimwi aabile mweenzinyina uutajisi, awalo uujisi cakulya acite mbubonya oobo.”

12Abalo basimitelo bamwi bakaboola kulinguwe kuti azoobabbapatizye. Bakamubuzya kuti, “Omwiiyi, ino swebo tweelede kucita nzi?” 13Wakabaambila kuti, “Mutatelesyi bantu mali aainda aayo ngomuzumizigwa amulawo.”

14Abalo basilumamba bamwi bakamubuzya kuti, “Mbuti swebo? Ncinzi ncotweelede kucita?” Joni wakati kulimbabo, “Mutanyangi bantu lubono lwabo, nikuba kubatamikizya. Alimwi mali ngomuvola aabe ngangawo kwamana.”

15Lusyomo lwabantu lwakakomena, bakatalika kuyeeya kuti ambweni Joni wakali ngo Munanike wa Leza. 16Aboobo Joni wakati kulimbabo, “Mebo ndimubbapatizya buyo amaanzi, pele walo ooyo uuboola mupati kapati kwiinda ndime, walo uyoomubbapatizya a Muuya Uusalala alimwi amulilo. Alimwi walo ulilemenede kwiinda ndime cakuti mebo nseelede kwaangununa twaanzyo twandyasyo zyakwe. 17Cipupuluzyo ulicijisi mumaanza, eelyo uyoopupulula akulongela maila mubutala. Maila ulaayobola mubutala bwakwe, pele buungu uyoobutentela mumulilo uutazimi!”

18Joni wakali kubaiisya munzila zinji bantu naakali kukambauka Makani Mabotu. 19Wakabaambila kuti basiye nzila zyabo zibi amane wakakalalila Mwami Helodi nkaambo wakakwata Helodiyasi wakali muka Filipo mwanookwabo, alimwi akaambo kazibi zinji zimwi nzyaakali kucita. 20Alimwi Helodi wakaindizya kubisya naakatumina Joni kuntolongo.

Jesu mbwaakabbapatizigwa

(Mateyo 3.13-17; Maako 1.9-11)

21Lino nibakabbapatizigwa bantu boonse, awalo Jesu wakabbapatizigwa. Naakacili kukomba Jesu, julu lyakajaluka, 22Muuya wa Leza wakamuselukila muciimo cankwilimba, eelyo ijwi lyakamvwigwa kuzwa kujulu kaliti, “Nduwe Mwanaangu ngwenjandisya ndabotelelwa anduwe.”

Basikale ba Jesu

(Mateyo 1.1-17)

23Ciindi Jesu naakatalika mulimo wakwe, wakali aamyaka yakatisike makumi otatwe, bantu bakali kuyeeya kuti wakali mwanaa Josefa, Josefa wakali mwanaa Heli, 24Heli mwanaa Matati mwanaa Levi, Levi mwanaa Meleki, Meleki mwanaa Janayi, Janayi mwanaa Josefa, 25Josefa mwanaa Matatiyasi, Matatiyasi mwana wa Amosi, Amosi mwanaa Nahamu, Nahamu mwana wa Esili, Esili mwanaa Nagi, 26Nagi mwanaa Maati, Maati mwanaa Matatiyasi, Matatiyasi mwanaa Semeini, Semeini mwanaa Joseki, Joseki mwanaa Joda, 27Joda mwanaa Jowanani, Jowanani mwanaa Lesa, Lesa mwanaa Zelubabeli, Zelubabeli mwanaa Salitiyelu, Salitiyelu mwanaa Neli, 28Neli mwanaa Meleki, Meleki mwana wa Adi, Adi mwanaa Kosamu, Kosamu mwana wa Elimadamu, Elimadamu mwana wa Aa, 29Aa mwanaa Josyuwa, Josyuwa mwana wa Eliyezaa, Eliyezaa mwanaa Jolimu, Jolimu mwanaa Matati, Matati mwanaa Levi, 30Levi mwanaa Simiyoni, Simiyoni mwanaa Juda, Juda mwanaa Josefa, Josefa mwanaa Jonamu, Jonamu mwanaa Eliyakimu, 31Eliyakimu mwanaa Melea, Melea mwanaa Mena, Mena mwanaa Matata, Matata mwanaa Natani, Natani mwanaa Devedi, 32Devedi mwanaa Jese, Jese mwanaa Obedi, Obedi mwanaa Bowazi, Bowazi mwanaa Salimoni, Salimoni mwanaa Naasoni, 33Naasoni mwana wa Aminadabu, Aminadabu mwana wa Adimini, Adimini mwana wa Aani, Aani mwanaa Heziloni, Heziloni mwanaa Pelezi, Pelezi mwanaa Juda, 34Juda mwanaa Jakobo, Jakobo mwanaa Izaka, Izaka mwana wa Abulahamu, Abulahamu mwanaa Tela, Tela mwanaa Nahoo, 35Nahoo mwanaa Selugi, Selugi mwanaa Leu, Leu mwanaa Pelegi, Pelegi mwana wa Eba, Eba mwanaa Syela, 36Syela mwanaa Kainani, Kainani mwana wa Aafakisadi, Afakisadi mwanaa Syemu, Syemu mwanaa Nowa, Nowa mwanaa Lameki, 37Lameki mwanaa Metusela, Metusela mwana wa Enoki, Enoki mwanaa Jaledi, Jaledi mwanaa Mahalaleeli, Mahalaleeli mwanaa Kainani, 38Kainani mwana wa Enosi mwanaa Seti, Seti mwana wa Adamu, Adamu mwanaa Leza.

Currently Selected:

Luka 3: Tonga96

Highlight

Copy