Joni 15

Makani aacisiko amitabi yaco

1“Ndime musaansa nkabela Taata ngomukamwini muunda. 2Lino kufumbwa mutabi uutazyali micelo uluukwezula, pele mutabi uuzyala micelo uluukokweda kutegwa usalale uzyalisye micelo kwiindilila. 3Nywebo mulisalazidwe kale amajwi ngindakamwaambila. 4Amukkalilile mulindime, ambebo mulindinywe. Mbubonya mbuunga mutabi tuukonzyi kuzyala micelo wanooli ulikke, kuutajisilizi kucinyina, anywebo mbubonya, tamukonzyi kuzyala micelo ccita kamukkalilide mulindime. 5Ndime musaansa, nywebo ndinywe mitabi. Ooyo uukkalilila mulindime ambebo mulinguwe, nguutikonzye kuzyala micelo minji-minji, nkaambo kuti kamwaandeene andime tamukwe ncimukonzya kucita pe. 6Kuti naa muntu katakkalilili mulindime ulasoogwa mbubonya mbuli mutabi wagonkwa, eelyo ulayuma. Mitabi iili boobo bantu baliibungika akwiitenta mumulilo. 7Aboobo kuti naa mwakkalilila mulindime, aalo majwi aangu akkalilila mulindinywe, mulakonzya kukumbila kufumbwa ncomuyanda, eelyo mulapegwa. 8Kuti kamuzyalisya micelo, eeco inga cacita kuti Taata alemezegwe, nkabela anywebo nomuyoolizibya ncobeni kuti muli basikwiiya bangu.

9“Mbuli mbwandiyandisya Taata, ambebo ndamuyandisya nywebo mbubonya buyo. Aboobo amuyandane mbuli mbwemuyanda. 10Kuti mwalondola milawo yangu, muyooyandana mbuli mbwemuyanda, mbubonya ambebo mbwebamba milawo ya Taata akuyanda mbuli mbwandiyanda. 11Ndamwaambila zintu eezi kuti mutangale mbubonya mbuli mbwetangede, akwalo kutangala kwanu kwiindilile. 12Mulawo wangu ngooyu, ngwakuti muyandane mbubonya mbuli mbwemuyanda mebo. 13Taakwe muntu uujisi luyando lupati lwiinda loolu lwakuti atuule buumi bwakwe akaambo kabeenzinyina. 14Kuti naa kamucita nzendamwaambila akumulailila mulibeenzuma. 15Nsicimwaambi limbi kuti muli batwanga pe, nkaambo mutwanga tazi zicita simalelo wakwe, pele ndimwiita kuti muli beenzuma nkaambo oonse makani ngindakamvwa kuli Taata ndakamuzibya. 16Tamuli ndinywe mwakandisala, ndime ndakamusala. Ndakamusalila kuti muzyale micelo, eyi kamwiizyala lyoonse, eelyo Taata uyoomupa kufumbwa ncomuyoomukumbila muzina lyangu. 17Nkaako ndamupa mulawo ooyu wakuti muyandane.

Bamunyika mbobayoosulaika Bakilisito

18“Kuti naa bamunyika bakamusulaike, mukazibe kuti bakasaanguna kusulaika ndime kabatana kucita oobo kuli ndinywe. 19Kuti nimwali mbuli bamunyika, nibali kumuyanda nkaambo nimwali bamwi babo. Lino akaambo kakuti tamuli banjiyo, nikuba kuti ndakamusala kuzwa kuli bamunyika, ncencico eeco ncobamusulaikila. 20Amuyeeye majwi ngindamwaambila aakuti ‘Mutwanga tali mupati kwiinda simalelo wakwe!’ Kuti naa bakandipenzya mebo, bayoomupenzya anywebo. Kuti naa bakaatambula majwi aangu bayooatambula aalo majwi aanu. 21Pele ono bayoomupenzya boobu akaambo kangu nkaambo tabamuzi ooyo wakandituma. 22Nindatakaboola akuzoobaiisya, nibatajisi mulandu wacinyonyoono, pele ono tabajisi cilitamizyo kuzinyonyoono zyabo pe. 23Ooyo uundisulaikide mebo ulimusulaikide a Taata. 24Nindatakacita milimo iitanacitidwe kale amuntu naba omwe, nibatajisi mulandu wacinyonyoono. Nikuba kuti bakaibona milimo yangu, pele bakandisulaika mebo a Taata. 25Eezi zyacitika mbubonya mbuli bulembedwe mu Milawo yabo kuti, ‘Bakandisulaika aatakwe kaambo!’ 26Pele Mugwasyi ooyo asika, walo ngwenjoomutumina kuzwa kuli Taata, ngonguwe Muuya wiisya zyabwini uuzwida kwa Taata. Nguuzoopa bumboni bundilungulula. 27Anywebo muli bakamboni bangu nkaambo mwakali aandime kuzwa kumatalikilo.

Currently Selected:

Joni 15: Tonga96

Highlight

Copy