Izaya 65

Leza mbwayoobasubula bazangi

1Ndakaliyubununa lwangu kuli baabo batakali kundibuzya. Ndakajanwa abaabo batakali kundiyandaula, kumusyobo ooyo watakali kundiita zina mukukomba ndakati, “Ndime aano.” 2Buzuba boonse ndakali kutambika maanza aangu kubantu basicinguni kuti mbatambule beende munzila zitali kabotu. Baccilila miyeeyo yabo beni. 3Bantu aaba balandikalazya lyoonse nkendilangilide, balapa zipaizyo mumyuunda. Batenta tununkilizyo azipaililo zyazitina, 4Balakkala akati kazyuumbwe akoona mumasena aasisikide, balalya nyama yangulube, bajisi zibiya zili aamusinza wanyama iisofweede. 5Balati, “Tantamuka yawe, utandivuli afwiifwi nkaambo mebo ndasalala!” Bantu bali boobo bandikatazya mbuli busi mumpemo, mbuli mulilo uunyemfuma buzuba boonse. 6“Amubone cisubulo cabo cililembedwe kale, nsikooumuna buyo pele ndababweedezezya bubi buzulide, ndababweedezezya bubi amibili yabo, 7njoobasubwida zinyonyoono zyabo azyabasikale babo,” Mbwaamba Mwami Leza. “Nkaambo bakali kupa zipaizyo muzilundu akundivoolozya mebo mutulundu, njoobacita bweelede. Njoobabweedezezya bubi bwamilimo yabo yakale-kale.” 8Mboobu mbwaamba Mwami Leza ulati, “Kuti musinza kuucilimo mucisankama cansaansa, bantu balati, ‘Utacinyonyooni, nkaambo mobucili bulilu mulincico, mbombuboobo mbwendizoocitila babelesi bangu, nsikoozoobanyonyoona pe.’ 9Njooleta balunyungu lwa Jakobo, aluzubo lwa Juda aabo batizookkale muzilundu zyangu, bantu bangu mbindakasala bazoozikona, babelesi bangu nkobayookkala mulinzizyo. 10Syaloni buyooba busena buyoolela butanga bwangu, kkuti lya Akoo buyooba busena buyoobutila matanga aaŋombe, buyooba busena bwabantu bangu aabo bandilangaula. 11Pele kulindinywe nywebo nomusiya ndime nde Mwami Leza akuluba zilundu zyangu zisalala, nywebo nomukomba Gadi a Meni baleza bacoolwe baleta malweza. 12Coolwe canu ndipanga, nyoonse muyookotama kuti mujaigwe, nkaambo ndakamwiita pele tiimwakavuwa, ndakakanana kulindinywe pele tiimwakaswiilila pe. Mwakacita zibi nkelibwenene, akusala nzetabotelelwi.” 13Nkaako mboobu mbwaamba Mwami Leza ulati, “Babelesi bangu bayoolya, pele nywebo muyoofwa nzala, babelesi bangu bayoonywa, pele nywebo muyoofwa nyota, babelesi bangu bayoosekelela, pele nywebo muyoousigwa nsoni. 14Babelesi bangu bayooimba amyoyo iitangede, pele nywebo muyoolila akaambo kakucisa kwamyoyo yanu muyoolyeema cakutyompwa. 15Muyoosiya mazina aanu kuli baabo mbendisalide kuti akabe cisinganyo. Mwami Leza uyoomujaya, pele babelesi bakwe uyoobapa zina limbi. 16Kufumbwa ooyo uulomba kulekelelwa munyika, uyoocita boobo kwiindila muli Leza wabwini, kufumbwa ooyo uukonkezya munyika, ulakonkezya muli Leza wabwini. Nkaambo mapenzi aakaindi ayoolubwa, akusiswa kuzwa kulindime.”

Ijilu pya anyika mpya

17“Amulange njoolenga julu pya anyika mpya. Zintu zyakaindi tazikayeeyegwi limbi, nikuba kwiibalukwa. 18Pele amukondwe musekelele kwalyoonse alyoonse azeezyo nzenjoolenga, nkaambo njoolenga Jelusalemu kuti bube busena bwalutangalo, bantu bawo bayoobotelwa. 19Ndiyoosekelela Jelusalemu akukondelelwa bantu bangu. Kweema akulila takukamvwigwi limbi mulinguwo pe. 20Taakwe bana bayoofwa kabali bavwanda, naba mucembele uuyoofwa kaitanazulila myaka yakwe. Ooyo uuyoofwa kajisi buyo myaka iili mwaanda, uyooyeeyegwa kuti wafwa kacili mukubusi. Ooyo uuyoofwa katanasisya myaka iili mwaanda uyooyeeyegwa kuti wakasinganyizigwa andime. 21Bayooyaka maanda aakukkala mulingawo, bayoosyanga myuunda yamisaansa akulya micelo yayo. 22Tabakayaki maanda kwamana kwakkala bambi, nikuba kusyanga kwamana kwalya bambi. Mazuba aabantu bangu ayoovula mbuli aasamu, basale bangu bayoolya micelo yamilimo yabo kwaciindi cilamfu. 23Tabakabeleki cabuyo nikuba kuzyala bana bayoonjila mumapenzi. Nkaambo bayooba bantu balelekedwe a Mwami Leza, balo abalunyungu lwabo. 24Kabatana ndiita njoovuwa, kabacikanana buyo njoomvwa. 25Umpe akabelele bayoocelela aantoomwe, syuumbwa uyoolya bwizu mbuli musune. Pele vu liyooba ncecilyo canzoka. Mucilundu cangu cisalala takukabi ciyoocisa nikuba kunyonyoona,” mbwaamba Mwami Leza.

Currently Selected:

Izaya 65: Tonga96

Highlight

Copy