Izaya 60
60
Bulemu bwa Jelusalemu kumazuba aaboola
1Nyamuka Jelusalemu,
komweka nkaambo bulemu bwa Mwami Leza bwakusikila.
2Bona, mudima uvumbide nyika musinze uvumbilide bantu,
pele Mwami Leza wasika kulinduwe,
bulemu bwakwe bwaboneka alinduwe.
3Misyobo iyooboola kuli mumuni wako,
bamami bayooboola kubbalabala lyamumuni wako.
4Sompa ulange-lange.
Boonse babungana kulibambila kuboola kulinduwe,
bana bako balombe baboola kuzwa kulaale,
bana bako basimbi balinyamwidwe mumaanza.
5Eezi zintu uyoozibona kazicitika,
nkabela moyo wako uyooduntaana mukukondwa,
mbono zyabasambazi beendela mulwizi ziyooletwa kulinduwe,
mbono zyamasi ziyooletwa kulinduwe.
6Matanga aankamela ayoozula munyika yako,
tukamela tuzwa ku Midiyani aku Efa.
Boonse bazwa ku Syeba bayooboola kabajisi ngolida atununkilizyo,
kabazabuluula mukulumbaizya Mwami Leza.
7Butanga boonse bwaku Keda buyooyobololwa akuletwa kulinduwe.
Bagutu baku Nabayoti bayookugwasya,
buyootambulwa kuti bupaizigwe acipaililo cangu,
ŋanda yangu yabulemu njooibotya.
8Ino mbaani aabo beenda mbuli makumbi bafeema
mbuli nziba ziya kuziteente zyazyo?
9Kasimpe nsumbu zilangide kulindime,
ali kumbele mato aaku Taasyisyi,
aleta bantu bako kuzwa kumanyika aakulaale,
baliyumwide nsiliva angolida,
kuti bazoolemekezye Mwami Leza wako Uusalala wa Isilayeli,
nkaambo wakuletela bulemu.
10Bazwamasi bayooyakulula bwaanda bwamaanda aako,
bamami babo bayookumanina milimo.
Nikuba kuti ndakamuuma mubukali bwangu,
muluse lwangu njoomubeda aankumbu.
11Milyango yanu lyoonse inoojalwidwe,
tiikoonoojalwa sikati amasiku,
kutegwa bantu bakakweetele mbono zyamumasi,
bamami babi bayooenzegwa cakuzundwa.
12Nkaako cisi naa bulelo oobo butakakumanini milimo buyooloba,
buyooonyonyweedwa limwi.
13Bulemu bwaku Lebanoni buyooletwa kulinduwe,
kuyooletwa mipulanga,
misikili alimwi amilombe
kuti izoobelesegwe mukubotya busena busalala,
njoocita kuti busena bwangu bukabe bwabulemu.
14Bana babaabo bali kukudyaminina bazookukotamina,
boonse aabo bali kukusampula bazoofugama kumaulu aako.
Bayookwiita kuti munzi wa Mwami Leza,
ngu Ziyoni wa Uusalala wa Isilayeli.
15Nikuba kuti wakalisiidwe akusulaikwa,
cakuti taakwe muntu wacili kwiinda mulinduwe,
pele lino njookucita kuti ukabe munzi wabulemu,
munooli lutangalo mulinduwe kwamazyalani oonse.
16Uyoonywa mukupa wabamasi uyoolelelwa mumaanda aabwami.
Ndendilyo noyooziba kuti mebo nde Mwami Leza ndendime Mufutuli wako.
Munununi wako, sintanze wa Jakobo.
17Mucilawo cakuti nkakuletele mukuba, njookuletela ngolida,
mucilawo cakuti nkakuletele cibulo njookuletela nsiliva.
Muciindi cakuti nkakuletele masamu, njookuletela mukuba.
Mucilawo cakuti nkakuletele mabweluuma njookuletela lubulo.
18Taakwe nokuyoomvwigwa limbi zyalupyopyongano munyika yako,
taakwe kupwaya nokuba kunyonyoona muminyinza yako pe,
nkabela uyooita bwaanda bwako kuti ndufutuko,
milyango yako iyootegwa kutembaula.
19Zuba talikabi mumuni wako ciindi casikati,
nuuba mumuni wamwezi tuukakumunikili
nkaambo Mwami Leza nguuyooba mumuni wako uutakamani,
Leza wako nguuyookuletela bulemu.
20Zuba talikabbili limbi, mwezi tuukagwisigwi pe,
Mwami Leza nguuyooba mumuni wako uutamani,
mazuba aakupenga kwako ayoomana.
21Bantu bako boonse bayooba balulami,
eelyo bayootola nyika kwalyoonse alyoonse.
Nzisyuukila nzindakasyanga,
aabo mbindakabamba ndemwini,
nkaambo batondezya bulemu bwangu.
22Bantu bace akati kanu bayoovula akuba cuulu,
bace kapati bayooba musyobo wanguzu. Ndime Mwami Leza.
Muciindi ceelede ndiyoocicita eeci cakufwambaana.
Currently Selected:
Izaya 60: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
