Matalikilo 29

Jakobo mbwaakasika kuli Labani

1Lino Jakobo wakacili kuya bweenda mulweendo lwakwe lwakuya kubantu bakujwe. 2Mpoonya wakabona mukalo wamaanzi musokwe, amatanga aambelele otatwe alilede kumbali aanguwo. Aaya matanga aambelele akali kunywisigwa maanzi kuzwa mumukalo ooyo, walo wakajisi civunisyo cabbwe pati. 3Kwanoonga matanga oonse azulila beembezi mbabavununa bbwe lyamukalo akutalika kuteka maanzi. Bamana kuzinywisya, bakali kulibweedezya bbwe alinguwo.

4Lino Jakobo wakabuzya beembezi kuti, “Ani muzwa kuli basa?” Balo bakamwiingula kuti, “Tuzwa ku Halani.” 5Alimwi wakababuzya kuti, “Sena mulimuzi Labani muzyukulu wa Nahoo?” Bakaingula kuti, “Iiyi, tulimuzi.” 6Jakobo wakababuzya kuti, “Sena uli kabotu?” Balo bakati, “Iiyi, uli kabotu. Uulya uuza kokuya abutanga bwambelele mwanaakwe, Lacelo.” 7Jakobo alimwi wakaamba kuti, “Tee kayi izuba licili pati aciindi cakujalila mbelele tacinasika, ino nkaambo nzi ncomutazipi maanzi muzicezye?” 8Balo bakaingula kuti, “Tatukonzyi kuzipa maanzi pe kusikila matanga oonse abungane eelyo notutigwisye bbwe amukalo kuti tuzinywisye maanzi.”

9Lino Jakobo kacaambaula ambabo, awalo Lacelo wakasika abutanga nkaambo nguwakali kweembela mbelele zyawisi. 10Jakobo naakabona Lacelo abutanga bwa Labani simizyaakwe, wakagwisya bbwe kuzwa amukalo, amane wazinywisya. 11Mpoonya Jakobo wakamyonta Lacelo akutalika kulila. 12Wakamwaambila kuti, “Mebo ndili mwanaa Labeka mucizi wauso.” Mpawo Lacelo wakazuzaanina kumunzi akuyooambila wisi. 13Labani amvwe buyo makani aa Jakobo mujwaakwe, wakazuzaana akuyoomucinga, wakaakumukumbata akumumyonta, amane wamutola kumunzi akuyoomunjizya muŋanda yakwe. Eelyo Jakobo wakalungulwida Labani makani oonse aakacitika. 14Labani wakati, “Masimpe yebo uli mukowa wangu ncobeni.” Nkabela Jakobo wakakkala ooko mwezi omwe.

Jakobo mbwaakabelekela Lacelo a Leya kuli Labani

15Lino Labani wakaambila Jakobo kuti, “Tacili cibotu kuti kondibelekela buyo kotakwe ncojana yebo, nikuba kuti tuli bamwi. Ino uyanda kuti kovola mali nzi?” 16Labani wakajisi bana basimbi bobilo, mupati wakali Leya, musyoonto wakali Lacelo. 17Leya wakali aalupwe, pele Lacelo wakali mubotu kapati. 18Lino Jakobo wakayanda Lacelo, nkaako wakati kuli Labani, “Ino mbuti kuti ndakubelekela myaka iili ciloba kuti nkakwate Lacelo?” 19Labani wakaingula kuti, “Pe, cilainda kubota kuti mwanaangu ndamukwasya kulinduwe kwiinda kuti akwatwe kumuntu uumbi buyo, ani kkala andime.” 20Jakobo wakabeleka kwa Labani myaka iili ciloba kuti akwate Lacelo, nikuba boobo ciindi eeci kulinguwe cakabaanga mazuba mace buyo, nkaambo kakuti wakali kuyandisisya Lacelo.

21Amane Jakobo wakaambila Labani kuti, “Mazuba ngutwakazuminana azulila, mbuti kuti twakwatana lino?” 22Aboobo Labani wakabamba pobwe lyabwiinga akutamba bantu boonse bakali kukkala kubusena oobo kuti baboole. 23Pele mubuzuba oobo masiku, Labani wakatola Leya kuli Jakobo, akusiya Lacelo ngwaakeelede kutola. Aboobo Jakobo wakaswaangana awe. 24Alimwi Labani wakapa musimbi muzike, uutegwa Zilipa, kumwanaakwe Leya. 25Lino nibwakaca cifumo-fumo, Jakobo wakabona kuti ngu Leya! Eelyo wakati kuli Labani, “Ino nkaambo nzi ncoocita cili boobu? Mebo ndakabelekela Lacelo kuti ndikwate. Ino nkaambo nzi ncoondicenga?” 26Labani wakaingula kuti, “Bona, tacili ciyanza cesu kukwasya muniini mupati katanakwatwa. 27Lino ulindile kuti imane mvwiki eeyi yakusekelela bwiinga, eelyo ndiyookupa awalo Lacelo kufumbwa kuti uzumine kundibelekela aimbi myaka iili ciloba.” 28Jakobo wakazumina. Imane buyo mvwiki yakusekelela bwiinga, Labani wakapa mwanaakwe Lacelo awalo kuli Jakobo, kuba mukaintu wakwe. 29Labani wakapa musimbi muzike uutegwa Biliha kumwanaakwe Lacelo. 30Nkaako Jakobo wakaalika Lacelo, alimwi Lacelo ngwaakali kuyanda kwiinda Leya. Lino wakamubelekela Labani aimbi myaka iili ciloba.

Bana ba Jakobo

31Lino Mwami Leza naakabona kuti Leya tayandwi kuli Jakobo, wakapa kuti Leya azyale bana, pele Lacelo pe. 32Leya wakamita akuzyala mwana mulombe. Eelyo wakaamba kuti, “Mwami Leza wabona mapenzi aangu, Lino mulumaangu ulatalika kundiyanda.” Aboobo mwana wakamuulika kuti Lubeni. 33Wakamita alimwi akuzyala mwana mulombe. Wakaamba kuti, “Mwami Leza wandipa aumbi mulombe, nkaambo wakandimvwa kuti nsiyandwi pe. Aboobo wakamuulika kuti Simiyoni.” 34Leya wakamita alimwi akutumbuka mwana mulombe. Nkabela wakati, “Lino mulumaangu ulandikakatila kapati, nkaambo ndamuzyalila bana balombe botatwe.” Aboobo wakamuulika kuti Levi. 35Wakamita alimwi akutumbuka aumbi mwana mulombe. Nkabela Leya wakati, “Lino ciindi eeci ndiyoomutembaula Mwami Leza.” Mpawo wakamuulika kuti Juda. Nkabela wakaima kuzyala.

Currently Selected:

Matalikilo 29: Tonga96

Highlight

Copy