Matalikilo 13

Abulamu a Loti mbubakaandaana

1Naakazwa mucisi ca Ijipiti, Abulamu wakatozya kubbazu lyakunyika, ngooyo waakucisikila kumusanza cisi ca Kenani. Wakatolelezya amukaintu wakwe, alubono lwakwe loonse ndwaakajisi, awalo Loti wakaya anguwe. 2Lino Abulamu wakali muvubi, wakajisi mali aansiliva angolida alimwi aŋombe, mbelele, ampongo zinji. 3Eelyo wakali kuya bweenda kuswena ku Beteli okuya nkwaakasimpide tente akati kaminzi ya Beteli a Ayi. 4Wakabweeda kubusena ooko nkwaakayakide cipaililo kusaanguna, ooko wakaakukomba Mwami Leza.

5Awalo Loti, ooyo wakali kweenda a Abulamu, wakalijisi mbelele, ampongo, alimwi aŋombe abazike mbaakali aabo. 6Kwakanyina macelelo mapati nkaambo boonse bobilo, Abulamu a Loti, bakalijisi zivubwa zinji. 7Nkaako beembezi ba Abulamu a Loti bakali kuzwangana. Ciindi eeco Bakenani a Bapelizi bakacilikukkala munyika eeyo njiyonya.

8Mpoonya Abulamu wakati kuli Loti, “Langa, swebo tuli bantu bomwe. Kutabi nzwanga akati kanduwe andime, nikuba akati kabantu bangu abako. 9Cilainda kubota kuti twaandaana. Ndikukumbila kuti yebo usale lubazu lumwi lwacisi lutikubotele, uunke nkuko. Kuti waya kulubazu oolo ndoti sale, mebo ndaya kulubazu lumwi.”

10Eelyo Loti wakalanga koonse-koonse, wakajana kuti nyika yakkuti lyamulonga wa Jolodani kuyoosika ku Zowaa yakalijisi maanzi manji. Yakali mbuli muunda wa Mwami Leza, naa mbuli nyika ya Ijipiti. Eeci ciindi Mwami Leza taakananyonyoona minzi ya Sodomu a Gomola. 11Nkabela Loti wakasala kutola kkuti lyoonse lyamulonga wa Jolodani, wakalongela kulubazu lwakujwe. Mbombuboobu mbubakaandaana aaba bantu bobilo. 12Abulamu wakakkala munyika ya Kenani, pele Loti wakaakuyaka zivuka zyakwe akati kaminzi yakali mukkuti, kufwiifwi amunzi wa Sodomu. 13Bantu bamu Sodomu bakali basizinyonyoono, bakali bantu babi kapati ku Mwami Leza.

Abulamu mbwaakalongela ku Hebuloni

14Lino Mwami Leza wakaambila Abulamu naakamana kwaandaana a Loti wakati, “Langa ubone koonse-koonse kuzwa mpobede, kunyika kumusanza, kujwe, akumbo, 15nkaambo nyika yoonse njoobona njookupa alunyungu lwako mane kukabe kutamani. 16Njoovuzya lunyungu lwako, lube mbuli lusuko lwaansi. Naa muntu ulakonzya kubala lusuko lwaansi, uyookonzya akubala lunyungu lwako. 17Aboobo koya bweendeenda mubulamfu boonse bwanyika amubwamba bwayo boonse, nkaambo njeyookupa.” 18Mpawo Abulamu wakalonzya tente lyakwe, wainka waakukkala kumibanga yaku Mamule iili ku Hebuloni. Ooko wakaakuyakila Mwami Leza cipaililo.

Currently Selected:

Matalikilo 13: Tonga96

Highlight

Copy