Matalikilo 11

Ŋanda ndamfu ya Babeli

1Kumatalikilo bantu boonse bamunyika bakali kwaamba buyo mwaambo omwe, bakali kwaambaula majwi omwe buyo. 2Nibakalongela kujwe, bakaakusika kucibanda cimwi cakali munyika ya Syainaa, nkobakaakukkala. 3Mpoonya bakati, “Nobeenzuma, atuume zitina tuzitente kabotu mumulilo.” Aboobo mubusena bwamabwe bakaba aazitina nzibakayasya abunzuka bwa taala kuti zijatane. 4Mpoonya bakati, “Lino atuyake munzi mupati, tuyake aŋanda ndamfu iyoosika kujulu. Ndendilyo notutibe aampuwo, alimwi akuti tutamwaizyanyi mboilinyika.” 5Lino Mwami Leza wakaseluka kuzoobona munzi ooyo aŋanda njibakayaka bantu aabo. 6Wakaamba kuti, “Lino bantu aaba boonse mbamusyobo omwe buyo, alimwi baambaula mwaambo omwe. Aaya ngamatalikilo aazintu nzibanoocita. Lino-lino balatalika kucita kufumbwa ncobayanda. 7Atuselukile ansi tukapilinganye mwaambo wabo kuti kabatacimvwani pe.” 8Mbombuboobu Mwami Leza mbwaakabamwaila munyika yoonse, bakaleka kuyaka munzi ooyo. 9Nkaako munzi ooyo wakategwa Babeli, nkaambo ooko Mwami Leza wakaandaanya myaambo yabantu. Alimwi kuzwa ooko Mwami Leza wakabamwaila munyika yoonse.

Bantu balunyungu lwa syemu

(1 Makani 1.24-27)

10Aaba mbabalunyungu lwa Syemu. Nikwakainda myaka yobilo zambangulwe kalimanide, Syemu wakajisi myaka iili mwaanda naakazyala mwana mulombe uutegwa Alipakisedi. 11Musule akooku, Syemu wakapona aimbi myaka iili myaanda yosanwe, eelyo wakazyala abambi bana balombe abasimbi.

12Lino Alipakisedi naakaba aamyaka iili makumi otatwe aisanu, wakazyala mwana mulombe uutegwa Syela. 13Musule akooku wakapona aimbi myaka iili myaanda yone aitatu, wakazyala abambi bana balombe abasimbi. 14Lino Syela naakaba aamyaka iili makumi otatwe, wakazyala mwana mulombe uutegwa Eba. 15Musule aakooku wakapona aimbi myaka iili myaanda yone aitatu, wakazyala abambi bana balombe abasimbi. 16Lino Eba naakaba aamyaka iili makumi otatwe aine, wakazyala mwana mulombe uutegwa Pelegi. 17Musule akooku wakapona aimbi myaka iili myaanda yone amakumi otatwe, wakazyala abambi bana balombe abasimbi.

18Lino Pelegi naakaba aamyaka iili makumi otatwe, wakazyala mwana mulombe uutegwa Leyu. 19Musule akooku wakapona aimbi myaka iili myaanda yobilo afuka, wakazyala abambi bana balombe abasimbi.

20Lino Leyu naakaba aamyaka iili makumi otatwe aibili, wakazyala mwana mulombe uutegwa Selugi. 21Musule akooku wakapona aimbi myaka iili myaanda yobilo aciloba, wakazyala abambi bana balombe abasimbi.

22Lino Selugi naakaba aamyaka iili makumi otatwe, wakazyala mwana mulombe uutegwa Nahoo. 23Musule akooku wakapona aimbi myaka iili myaanda yobilo, wakazyala abambi bana balombe abasimbi.

24Lino Nahoo naakaba aamyaka iili makumi obilo afuka, wakazyala mwana mulombe uutegwa Tela. 25Musule akooku wakapona aimbi myaka iili mwaanda akkumi afuka, wakazyala abambi bana balombe abasimbi.

26Lino Tela naakaba aamyaka iili makumi aali ciloba, wakazyala ba Abulamu, Nahoo, a Halani.

Balunyungu lwa Tela

27Mbaaba balunyungu lwa Tela, Tela wakazyala Abulamu, Nahoo, a Halani. Lino Halani wakazyala Loti. 28Halani wakafwida mumunzi ookwabo, mumunzi wa Uli, mucisi ca Kalodiya, ciindi eeci wisi wakacili kupona. 29Abulamu wakakwata Salayi, walo Nahoo wakakwata Milika, mwanaa Halani. Milika wakamuzyalila mwana mulombe uutegwa Isika. 30Pele Salayi taakajisi bana nkaambo taakalikuzyala pe.

31Lino Tela wakatola Abulamu mwanaakwe alimwi a Loti muzyukulu wakwe wakali mwanaa Halani, alimwi a Salayi mukamwanaakwe a Abulamu. Eelyo wakaya ambabo lweendo lwa kunyika ya Kenani, wakasiya Uli munzi ookwabo, wamucisi ca Bakalodiya. Bakeenda akusika kucisi ca Halani nkobakaakukkala. 32Ooko nkonkuko Tela nkwaakaakufwida, kajisi myaka iili myaanda yobilo aisanu.

Currently Selected:

Matalikilo 11: Tonga96

Highlight

Copy